Уручэнне даверчых грамат

Прэзідэнт Беларусі Аляксандр Лукашэнка 3 лютага прыняў даверчыя граматы паслоў 8 дзяржаў, уключаючы Расійскую Федэрацыю.

Даверчыя граматы Прэзідэнту ўручылі дыпламаты В'етнама, Дамініканскай Рэспублікі, Лаоса, Марока, Нігерыі, Расіі, Рэспублікі Чад і Шры-Ланкі. 

Кіраўнік дзяржавы, вітаючы замежных дыпламатаў, адзначыў, што яны прыбылі ў Беларусь у асаблівы і нават эпахальны час, паколькі 27 лютага ў краіне пройдзе рэспубліканскі рэферэндум па ўнясенні змяненняў у Канстытуцыю.

"Прынцыпова важна, што наш народ сам вызначае далейшае развіццё дзяржавы. Асабліва падкрэслю: без усялякага націску звонку. Менавіта таму мы лічым гэту палітычную кампанію поўнасцю адпаведнай усім дэмакратычным нормам", - адзначыў беларускі лідар.

Аляксандр Лукашэнка запрасіў замежных паслоў да адкрытай размовы не толькі з прадстаўнікамі дзяржаўных органаў, але і з беларускімі экспертамі, журналістамі, актывістамі грамадскіх арганізацый. "Для вас адкрыты ўсе дзверы ў Беларусі", - заявіў Прэзідэнт.

Разам з тым ён заўважыў: каб лепш разумець, чым жыве сёння Беларусь, трэба яшчэ і ведаць, як беларускі народ заваяваў сваю свабоду і права на жыццё ва ўласнай дзяржаве.

"Самая трагічная старонка ў нашай гісторыі - Другая сусветная вайна, якая забрала жыцці як мінімум кожнага трэцяга беларуса. Асабліва падкрэслю, што бязлітасна знішчалі наш народ не нейкія дзікія орды варвараў, а прадстаўнікі самых прагрэсіўных нацый Еўропы, якія праз дзясяткі гадоў пачынаюць нас вучыць, як нам жыць", - сказаў Кіраўнік дзяржавы.

Прэзідэнт адзначыў, што невыпадкова 2022-і аб'яўлены ў краіне Годам гістарычнай памяці. "Мы хочам, каб усе ведалі, якую цану беларусы заплацілі за мір і свабоду", - падкрэсліў Аляксандр Лукашэнка.

"Мы добра памятаем жахі той вайны (Другой сусветнай. - Заўвага) і сёння з трывогай назіраем за эскалацыяй напружанасці ў свеце. І асаблівасць у тым, што тыя, хто эскаліруе гэту абстаноўку, тыя, хто прыўносіць новыя фактары эскалацыі, спрабуюць на іншых зваліць віну. Сітуацыя сёння вельмі нагадвае канец 30-х - пачатак 40-х гадоў мінулага стагоддзя. Яна небяспечная сваёй непрадказальнасцю і можа ў любы момант перайсці ў гарачую фазу", - лічыць Аляксандр Лукашэнка.

Паводле яго слоў, бягучы стан спраў справакавалі сістэмнае разбурэнне архітэктуры міжнароднай бяспекі і нарастаючая мілітарызацыя Еўрапейскага рэгіёна. "Прычым для нас відавочна, хто з'яўляецца ініцыятарам гэтага працэсу", - адзначыў Прэзідэнт.

"Дэстабілізацыі сітуацыі ў свеце садзейнічае ўсё больш маштабнае прымяненне некаторымі дзяржавамі нелегітымных санкцый як адной з праяў неакаланіялізму супраць непажаданых ім краін, што непазбежна вядзе да санкцыйных войнаў", - сказаў Аляксандр Лукашэнка.

Прэзідэнт адзначыў, што сёння Беларусь актыўна працуе на традыцыйных рынках, асвойвае новыя і запрашае да ўзаемавыгаднага супрацоўніцтва ўсе дзяржавы. "Нам ёсць што прапанаваць у прамысловай сферы, сельскай гаспадарцы, будаўніцтве, фармацэўтыцы і многіх іншых галінах. Гатовы таксама развіваць даверныя адносіны ў культурнай, адукацыйнай, навуковай, спартыўнай і іншых гуманітарных сферах", - падкрэсліў беларускі лідар.

Традыцыйна Аляксандр Лукашэнка выказаўся аб супрацоўніцтве Беларусі з кожнай з гэтых дзяржаў.

Аб Расіі

Прывітаўшы пасла Расіі Барыса Грызлова, Прэзідэнт сказаў: "Усе вас добра ведаюць у Беларусі як даўняга сябра і цэняць ваш вялікі ўклад ва ўмацаванне і развіццё ўзаемадзеяння паміж нашымі краінамі".

Паводле слоў Кіраўніка дзяржавы, перад Мінскам і Масквой стаяць вялікія, амбіцыйныя задачы. "2021-ы ўвайшоў у гісторыю нашых дзяржаў як год прыняцця лёсавызначальных рашэнняў аб паглыбленні эканамічнай інтэграцыі, якія дадуць магчымасць вывесці стратэгічнае партнёрства на якасна новы ўзровень. Я вельмі разлічваю, што ў сваёй прафесійнай дзейнасці Вы як вельмі вопытны кіраўнік у расійскай дзяржаве, ды і сусветнага маштабу, будзеце садзейнічаць умацаванню шматпланавых беларуска-расійскіх сувязей і развіццю інтэграцыйнага ўзаемадзеяння", - падкрэсліў Аляксандр Лукашэнка.

Аб В'етнаме

Беларусь мае намер актывізаваць супрацоўніцтва з дзяржавамі Азіі, Афрыкі і Лацінскай Амерыкі, падкрэсліў Кіраўнік дзяржавы. "Мы называем гэтыя рэгіёны "далёкай дугой" зыходзячы з іх геаграфічнай аддаленасці. Аднак у палітычным і эканамічным планах многія з гэтых краін з'яўляюцца нашымі блізкімі саюзнікамі і партнёрамі", - адзначыў ён.

Звяртаючыся да прадстаўнікоў азіяцкіх дзяржаў, Прэзідэнт падкрэсліў: "Наша паспяховае супрацоўніцтва ў палітычнай сферы стала фундаментам эканамічнага ўзаемадзеяння. Разлічваем на далейшае развіццё і ўмацаванне адносін".

Аляксандр Лукашэнка нагадаў, што ў 2022 годзе адзначаецца 30-годдзе ўстанаўлення дыпламатычных адносін Беларусі і В'етнама. "У нашых народаў шмат агульнага: мы разам змагаліся са знешнімі агрэсарамі і заваявалі сваё права на пабудову суверэнных і незалежных дзяржаў", - адзначыў беларускі лідар.

Аб Лаосе

Аляксандр Лукашэнка адзначыў зацікаўленасць краіны ў наданні новай якасці традыцыйна дружалюбным адносінам з Лаосам. На яго думку, магчымасці Беларусі могуць у значнай ступені забяспечыць патрэбнасці лаоскай эканомікі. "Як вядома, сёння Лаос імкнецца развіваць прамысловасць, сельскую гаспадарку, навукова-тэхналагічную базу. Наша дзяржава гатова прапанаваць вам свае веды і вопыт", - сказаў Прэзідэнт.

Аб Шры-Ланцы

Гаворачы аб супрацоўніцтве са Шры-Ланкой, кіраўнік дзяржавы адзначыў, што два гады таму споўнілася 20 гадоў з моманту ўстанаўлення дыпламатычных адносін і за гэты працяглы перыяд дасягнуты прыкметны прагрэс у развіцці палітычных кантактаў, гандлю, супрацоўніцтва ў сферы адукацыі. "Беларусі ёсць што прапанаваць Шры-Ланцы для павышэння эфектыўнасці яе аграсектара: ад спецыяльнай тэхнікі да гатовых тэхналагічных праектаў збору і захоўвання ўраджаю. Адносіны ў нас развіваюцца дынамічна. Мы гатовы са свайго боку надаць гэтай дынаміцы яшчэ большы размах", - запэўніў Аляксандр Лукашэнка.

Аб Марока

Беларускі лідар звярнуў увагу на патэнцыял у развіцці эканамічнага ўзаемадзеяння з краінамі Афрыкі. "Важны гандлёвы партнёр Беларусі на поўначы гэтага кантынента - Каралеўства Марока - адзначыў ён. - У нас значны нерэалізаваны патэнцыял для развіцця гандлю. Вялікія перспектывы адкрываюцца ў сельскай гаспадарцы, прамысловасці, а таксама ў гуманітарных галінах".

Аб Нігерыі

"Беларусь разглядае Федэратыўную Рэспубліку Нігерыя ў якасці важнага і перспектыўнага знешнеэканамічнага партнёра. На наш погляд, мы здольны істотна прыбавіць ва ўзаемным гандлі", - упэўнены Прэзідэнт.

Паводле яго слоў, удзел Беларусі ў механізацыі сельскай гаспадаркі Нігерыі, развіцці інфраструктуры і рэалізацыі сумесных праектаў па здабычы карысных выкапняў дасць магчымасць вывесці супрацоўніцтва на больш высокі ўзровень.

Аб Рэспубліцы Чад

Кіраўнік дзяржавы адзначыў зацікаўленасць Беларусі ў актывізацыі кантактаў з Рэспублікай Чад па ўсіх напрамках двухбаковага ўзаемадзеяння. "У вашай краіне разведаны вялікія запасы карысных выкапняў, а Беларусь мае неабходную горназдабыўную тэхніку і абсталяванне, - звярнуў увагу Прэзідэнт. - Мы таксама гатовы наладзіць эфектыўнае партнёрства з мясцовымі кампаніямі ў сельскай гаспадарцы. Можам прапанаваць аўтамабільную і дарожна-будаўнічую тэхніку, лекавыя прэпараты і прадукты харчавання".

Аб Дамінікане

Звяртаючыся да пасла Дамініканскай Рэспублікі, Аляксандр Лукашэнка падкрэсліў, што Беларусь высока цэніць канструктыўныя і ўзаемапаважлівыя адносіны з краінамі Лацінскай Амерыкі і Карыбскага басейна.

"Мы бачым добрыя перспектывы для актывізацыі міждзяржаўных сувязей з Дамініканскай Рэспублікай. Нягледзячы на геаграфічную аддаленасць, у нас ёсць нямала агульных інтарэсаў. Эканомікі Беларусі і Дамініканы шмат у чым узаемадапаўняльныя", - сказаў Кіраўнік дзяржавы.

"Думаю, многія з вас ужо добра вывучылі структуру беларускай эканомікі і, магчыма, намецілі для сябе найбольш перспектыўныя сферы для ўзаемадзеяння і супрацоўніцтва", - адзначыў Аляксандр Лукашэнка.

Прэзідэнт дадаў, што для беларускага боку таксама важна, каб замежныя дыпламаты знайшлі час і бліжэй пазнаёміліся з багатай гісторыяй і самабытнай культурай краіны, традыцыямі і гасціннасцю народа. "Не сумняваюся, што тут вы знойдзеце новых добрых сяброў, - сказаў Кіраўнік дзяржавы. - Вельмі хачу, каб гэты перыяд у вашым жыцці застаўся памятным і вельмі рэзультатыўным".