Удзел ва ўрачыстым сходзе працоўнага калектыву Беларускага нацыянальнага тэхнічнага ўніверсітэта

Прэзідэнт Беларусі Аляксандр Лукашэнка прыняў 10 снежня ўдзел ва ўрачыстым сходзе працоўнага калектыву Беларускага нацыянальнага тэхнічнага ўніверсітэта.

Мерапрыемства не было запланавана ў графіку Кіраўніка дзяржавы. Аднак, як падкрэсліў Прэзідэнт, кожнаму хацелася б "дакрануцца да сівізны вядучай тэхнічнай ВНУ".

Ён адзначыў, што БНТУ стаў роданачальнікам інжынернай думкі і інжынернай творчасці ў краіне. "Цяперашняе мерапрыемства - гэта даніна павагі тым, хто не толькі ствараў гэты ўніверсітэт (можа, і не столькі), але і хто праславіў сваімі справамі гэту ВНУ", - заявіў Аляксандр Лукашэнка.

У дворыку галоўнага корпуса ўніверсітэта да 100-годдзя ВНУ выставілі ўзоры беларускай аўтамабільнай тэхнікі, створаныя выпускнікамі БНТУ. Паводле слоў Прэзідэнта, беларускія інжынеры ўмеюць рабіць сапраўдныя цуды, але, з іншага боку, знаходзяцца ў жорсткай сусветнай канкурэнцыі. "Усё, што мы бачылі тут, у свеце вырабляецца ў вялікай колькасці. І тое, што вы выстаялі ў гэтай канкурэнцыі, вырабляеце патрэбную на сусветным рынку прадукцыю, дарагога варта", - падкрэсліў Кіраўнік дзяржавы.

Ён дадаў, што заўсёды з вялікай павагай ставіўся да выпускнікоў БНТУ. "Я заўсёды параўноўваў паводзіны тых ці іншых студэнтаў, выпускнікоў і гэтак далей: вы заўсёды былі асновай і фундаментам нашай дзяржаўнасці", - сказаў беларускі лідар.

"Мы перажываем вельмі цяжкі і складаны перыяд станаўлення беларускай дзяржаўнасці, незалежнасці і суверэнітэту. І гэта звязана перш за ўсё са зменай пакаленняў", - сказаў Аляксандр Лукашэнка.

Прэзідэнт са шкадаваннем канстатаваў, што пакаленне беларусаў, якое заваявала свабоду для краіны і яе народа, ужо адыходзіць. "Гэта светлыя, святыя людзі, перад якімі мы заўсёды схіляемся", - заявіў Кіраўнік дзяржавы. На яго думку, менавіта ў гады Вялікай Айчыннай вайны кавалася аснова цяперашняй беларускай незалежнасці.

"Цяпер вельмі цяжкі перыяд змены пакаленняў. Ён заўсёды праходзіць складана і ў навуцы, і ў спорце, - адзначыў Аляксандр Лукашэнка. - Я хачу пажадаць, каб цяперашняе пакаленне выхавала сапраўдных маладых людзей, выхавала пакаленне патрыётаў. Каб, адыходзячы ад актыўнай дзейнасці, мы былі цвёрда ўпэўнены, што суверэнітэт і незалежнасць нашай дзяржавы непахісныя, што тая незалежнасць, якая вы ведаеце, як дасталася нам, будзе захавана. Каб мы больш ніколі не жылі на чужой зямлі, каб нашы дзеці і дзеці яшчэ не народжаных маладых людзей адчувалі сябе гаспадарамі на гэтай зямлі. Гэта цяжкі ўрок, цяжкая будучыня, якая пачалася ўжо".

Прэзідэнт заклікаў старэйшае пакаленне зрабіць усё, каб маладыя інжынеры заўсёды заставаліся патрыётамі, бераглі суверэнітэт і незалежнасць Беларусі і пры ўсіх акалічнасцях змаглі захаваць беларускую дзяржаву.

Кіраўнік дзяржавы ўручыў Беларускаму нацыянальнаму тэхнічнаму ўніверсітэту ордэн Працоўнай Славы і дзяржаўныя ўзнагароды супрацоўнікам ВНУ.

"Я хачу сёння тут уручыць дзяржаўныя ўзнагароды тым, хто зрабіў (вобразна кажучы) гэты ўніверсітэт, хто падтрымлівае яго імідж на найвышэйшым узроўні. Тым, хто прывёў наш універсітэт у эліту сусветных універсітэтаў. Дазвольце мне сёння таксама ўручыць першы ў гісторыі незалежнай Беларусі ордэн (Працоўнай Славы. - Заўвага). Ён будзе першы, спадзяюся не апошні, і ўніверсітэт будзе заўсёды ганарыцца гэтай узнагародай", - сказаў Аляксандр Лукашэнка.

Ордэнам Айчыны III ступені на цырымоніі былі ўзнагароджаны загадчык кафедры цеплавых электрычных станцый Мікалай Карніцкі і загадчык кафедры лазернай тэхнікі і тэхналогіі Мікалай Куляшоў. Заслугі члена Беларускага саюза архітэктараў Вальмена Аладава адзначаны ордэнам Францыска Скарыны.

У ліку ўзнагароджаных таксама загадчык кафедры трактароў Уладзімір Байкоў, прафесар кафедры канструявання і вытворчасці прыбораў Уладзімір Мінчэня і дэкан архітэктурнага факультэта Армен Сардараў. Яны атрымалі ад кіраўніка дзяржавы ордэн Пашаны. Шэраг супрацоўнікаў ВНУ былі таксама ўдастоены медаля "За працоўныя заслугі" і Падзякі Прэзідэнта.

Загадчыку кафедры машыназнаўства і дэталей машын Анатолю Скайбеду Прэзідэнт уручыў дыплом аб прысваенні ганаровага звання "Заслужаны вынаходнік Рэспублікі Беларусь".

"Калі я ўручаў гэтыя ўзнагароды, мяне не пакідала думка, што я практычна з усімі не проста сутыкаўся, а знаёмы. Некаторыя мне нагадвалі, што мы зрабілі. Запомніўся наш архітэктар, кажа: "А вы помніце, як мы Нулявы кіламетр Беларусі ўстанаўлівалі?" Вядома, помню. Мы дамовіліся, што гэта не апошняя наша работа. Мы яшчэ нешта добрае павінны зрабіць для нашай краіны", - падкрэсліў Аляксандр Лукашэнка ў канцы цырымоніі.