Удзел у цырымоніі ўрачыстага адкрыцця міжнародага фестывалю этнакультурных традыцый "Кліч Палесся"

Міжнародны фестываль этнакультурных традыцый "Кліч Палесся" дае нагоду ўсім славянам сабрацца на агульнай гістарычнай радзіме. Аб гэтым Прэзідэнт Беларусі Аляксандр Лукашэнка заявіў 15 жніўня на цырымоніі ўрачыстага адкрыцця форуму.

Вітаючы ўдзельнікаў мерапрыемства, Кіраўнік дзяржавы назваў фестываль яркай і ўнікальнай падзеяй.

Па сцвярджэнні гісторыкаў, Палессе - прарадзіма славян. Адсюль нашы вытокі. Тут, на гэтых крутых берагах паўнаводнай Прыпяці, сярод бязмежных дуброў і воднай прыроднай прыгажосці, нашы карані - прыгожага і дастойнага народа, адзначыў Аляксандр Лукашэнка. "Таму, прымаючы рашэнне аб правядзенні фестывалю ў 2010 годзе, мы меркавалі, што ён стане яшчэ адной нагодай сабрацца разам тром братэрскім народам - ​​беларусам, рускім і ўкраінцам, - сказаў Прэзідэнт. - І вядома, мы рады бачыць тут, на агульнай гістарычнай радзіме, усіх славян. Усіх без выключэння".

Кіраўнік дзяржавы адзначыў, што на Палессі ён рабіў свае першыя крокі на пасадзе Прэзідэнта, і таму гэта месца для яго асаблівае. Аляксандр Лукашэнка раней не раз расказваў, як у адну з першых паездак у рэгіён у якасці Прэзідэнта краіны пачаў уручную касіць пойму Прыпяці з палешукамі, пасля чаго мясцовыя сказалі аб ім: "Гэта наш", - і ўсялякія размовы аб нейкай незалежнай палескай рэспубліцы, якія хадзілі ў той час, спыніліся.

"І тая касьба (з палешукамі. - Заўвага) у 90-я гады з сапраўднай мужчынскай размовай, шчырай і сумленнай, шмат у чым прадвызначыла маё прэзідэнцкае крэда - адкрыта, прама, вока на вока гаварыць з народам і рабіць усё на яго карысць", - падкрэсліў Аляксандр Лукашэнка.

Памятаю, летам па калена ў пыле сустракаўся з людзьмі з Ляскавіч, навакольных вёсак. Адна бабулька падышла і ад імя ўсіх кажа: "Дзетачка, дапамажыце з хлебам". Хлеба не было. Тады я запатрабаваў ад ваенных перакінуць сюды ваенныя пякарні, і гэта была першая пякарня, якая зрабіла гарачы хлеб для  палешукоў. Сёння, праз гады, цяжка ў гэта паверыць. Але з гэтага ўсё пачыналася", - расказаў Кіраўнік дзяржавы.

У той час палескі край меў патрэбу ў падтрымцы. Таму была прынята і рэалізавана праграма адраджэння Палесся. Ставіліся простыя і зразумелыя задачы - стварыць новыя працоўныя месцы, мадэрнізаваць вытворчасць. А самае галоўнае - павысіць якасць жыцця палешукоў, зрабіць так, каб вобраз гэтых "людзей на балоце", бедных і ў лапцях, застаўся толькі ў кіно, але не ў рэальным жыцці.

"Многае зрабілі. Тое, што некалі я вам абяцаў, мы зрабілі. Сёння мы рэалізуем разам з вамі ўжо другую праграму адраджэння Палесся. Яна будзе нацэлена на тое, каб людзі маглі мець дастойныя ўмовы жыцця, дастойную работу, нармальную заработную плату. Ад вас толькі адно трэба - дысцыпліна, парадак і праца", - звярнуў увагу Прэзідэнт. Паводле яго слоў, новая праграма "створыць самыя ўнікальныя ўмовы там, дзе гэта трэба, для працы і жыцця палешукоў".

Беларускі лідар нагадаў, што па яго даручэнні чарговую праграму курыруе выхадзец з Палесся Міхаіл Русы. "Ён душой і сэрцам разумее, што трэба для Палесся", - адзначыў Прэзідэнт.

Аляксандр Лукашэнка падкрэсліў, што за апошні час палескі рэгіён абнавіўся - стаў цэнтрам развітой прамысловасці, агародніцтва, культурным цэнтрам з невычэрпным турыстычным патэнцыялам, куды прыязджае мноства турыстаў. "Вы бачыце, як змяніліся разам з Ляскавічамі і Туравам дзясяткі іншых населеных пунктаў Брэстчыны і Гомельшчыны, - сказаў ён. - Але галоўнае - мы будуем наш палескі рэгіён з розумам, не парушаючы прыроднай гармоніі, захоўваючы сакральнае, першапачатковае хараство гэтых мясцін".