Нарада па стане спраў у банкаўскай сферы
- 7
- 1:42
Прэзідэнт Беларусі Аляксандр Лукашэнка 26 красавіка абмеркаваў з Першым намеснікам Прэм'ер-міністра Мікалаем Снапковым, Старшынёй КДК Васілём Герасімавым і экс-кіраўніком банка БелВЭБ Васілём Мацюшэўскім стан спраў у банкаўскай сферы.
"Тэма нашай кароткай размовы - банкаўская сістэма", - адзначыў Аляксандр Лукашэнка.
Прэзідэнт расказаў, што зусім нядаўна Камітэту дзяржаўнага кантролю было даручана праверыць стан спраў у банках - як у прыватных, так і дзяржаўных - і выявіць негатыўныя тэндэнцыі. "Аказалася, што недахопы ўласцівы ўсім нашым банкам. І мы робім адназначную выснову, што дрэнна працуем з банкаўскай сістэмай, - заявіў Кіраўнік дзяржавы. - Мы не стварылі для іх нейкую прававую каляіну, у якой яны павінны дакладна развівацца, прытрымлівацца пэўных норм, правіл і законаў, не выходзячы за гэту каляіну. Тады ў нас і атрымліваецца: то Мацюшэўскі (экс-кіраўнік банка БелВЭБ. - Заўвага) няправільна зрабіў, то Калаур (кіраўнік Нацыянальнага банка. - Заўвага) не туды залез і гэтак далей".
Кіраўнік дзяржавы даручыў да чэрвеня ўнесці прапановы па прававых пытаннях работы банкаў. "Я сёння прыняў гэта рашэнне, і Камітэт дзяржкантролю ў бліжэйшы час прааналізуе абстаноўку ў банках і адназначна прапіша, што можна, а што нельга. І банкаўская супольнасць, спецыялісты, якіх вы падключыце да выпрацоўкі гэтых рашэнняў, каб былі ўнесены канкрэтныя прапановы для прыняцця рашэнняў. Да чэрвеня на стале ў мяне павінны быць гэтыя прапановы. Гэта трэба ўсё рабіць", - падкрэсліў Аляксандр Лукашэнка.
