Нарада з кіраўніцтвам Савета Міністраў

Прэзідэнт Беларусі Аляксандр Лукашэнка 19 жніўня правёў нараду з кіраўніцтвам Савета Міністраў.

"Традыцыйная нарада з удзелам зацікаўленых, членаў Урада і губернатараў", - адзначыў Аляксандр Лукашэнка ў пачатку сустрэчы.

На разгляд Кіраўніка дзяржавы вынесена некалькі важных пытанняў у сферах эканомікі і сацыяльнай палітыкі, і першае з іх - спрашчэнне працэдур будаўніцтва і крэдытавання жылля.

"Як мы заўсёды гаворым, Беларусь - дзяржава для народа. Таму ўсе рашэнні павінны прымацца ў інтарэсах людзей. І адной з нашых прыярытэтных задач было і застаецца забеспячэнне грамадзян жыллём. Уласны дах над галавой важны для любога чалавека. Асабліва для маладой сям'і. Гэта яе ўпэўненасць у заўтрашнім дні", - сказаў Аляксандр Лукашэнка.

Прэзідэнт звярнуў увагу, што ў краіне пастаянна ўдасканальваюцца падыходы да прадастаўлення дзяржаўнай падтрымкі пры паляпшэнні жыллёвых умоў, у першую чаргу ў сельскай мясцовасці.

"Мы вельмі шмат гаварылі апошнім часам аб карэкціроўцы нашай жыллёвай палітыкі. Мы гаварылі аб тым, што прыярытэтам у нас было і застаецца забеспячэнне жыллём шматдзетных сем'яў, ваеннаслужачых і гэтак далей. Таму на нашай сустрэчы пытанне нумар адзін - спрашчэнне працэдур будаўніцтва і крэдытавання жылля", - падкрэсліў Кіраўнік дзяржавы.

Аляксандр Лукашэнка раней даручаў Ураду комплексна падысці да паляпшэння заканадаўства ў гэтай галіне. Ён канстатаваў, што статыстыка па ўводзе жылля другі год запар адмоўная. "У чым пытанне?" - спытаў Прэзідэнт. 

Паводле яго слоў, у справаздачах аналітыкаў адна з першых прычын адтоку кадраў з невялікіх населеных пунктаў - адсутнасць магчымасці набыць уласнае жыллё або хаця б засяліцца ў арганізаванае камфортнае і добраўпарадкаванае арэнднае жыллё. 

"Сёння трэба надаць новы імпульс жыллёваму будаўніцтву ў вёсцы, у тым ліку індывідуальных дамоў, будаўніцтву прадпрыемствамі арэнднага жылля для сваіх работнікаў. Урадам прапанаваны комплекс навацый: ад спрашчэння падключэння да інжынернай інфраструктуры індывідуальных дамоў да пашырэння фінансавай падтрымкі маладым сем'ям (да 31 года). Усе навацыі разгледжаны экспертным саветам, у тым ліку Савета Рэспублікі, у Камітэце дзяржкантролю, Адміністрацыі Прэзідэнта. Аднак, як мне вядома, агульнай згоды па дакументах не дасягнута", - заўважыў Кіраўнік дзяржавы. 

Напрыклад, растлумачыў Аляксандр Лукашэнка, не зразумела, для чаго абавязваць забудоўшчыка прымяняць праектную дакументацыю пры ўзвядзенні індывідуальных дамоў у вёсцы, калі ад гэтага адмовіліся яшчэ год таму. 

"Таму мы сёння абмяркуем рацыянальнасць кожнага змянення, каб людзям, якіх гэтыя новаўвядзенні датычацца непасрэдна, было максімальна зразумела, як будзе вырашацца іх жыллёвае пытанне", - падкрэсліў Прэзідэнт. 

Кіраўнік дзяржавы спытаў у профільнага міністра, ці сапраўды ўсе меры, якія прапануюцца, спрашчаюць працэдуры будаўніцтва (каб не атрымалася бачнасць замест вырашэння пытання), ці дазволіць абноўленае заканадаўства разгарнуць жыллёвае будаўніцтва і як у гэтых працэдурах задзейнічаны банкаўскі сектар, ці будзе ў запланаванай падтрымкі дастатковае фінансаванне. 

"І, як вы памятаеце, усе нормы павінны быць выкладзены простай, чалавечай мовай, без бюракратычнага нагрувашчвання і змяненняў у дзясятцы ўказаў, - запатрабаваў Аляксандр Лукашэнка. - Жыллёвая палітыка, дэбюракратызацыя ў жыллёвых працэсах - гэта пытанне першае".

Другой тэмай нарады стала ўдасканаленне транспартнай інфраструктуры. Прэзідэнт расказаў, што больш як год таму да яго звярнуўся інвестар з прапановай аб стварэнні адзінага нацыянальнага аператара. Планавалася аб'яднаць пад яго крылом усе існуючыя ў краіне інтэлектуальныя транспартныя сістэмы (платныя дарогі, парковачную сістэму, вагагабарытны кантроль, сістэму фотафіксацыі парушэнняў).

"Было даручана вельмі падрабязна прапрацаваць гэту тэму ва Урадзе. Зразумела, выключна ў дзяржаўных інтарэсах. Прынамсі, каб было лепш, чым цяпер, і гэта выяўлялася ў фінансах. Паколькі, калі праводзіць ужо лічбавую трансфармацыю транспартнай інфраструктуры, то самым перадавым і зручным для людзей спосабам", - падкрэсліў Аляксандр Лукашэнка.

У прыклад ён прывёў сітуацыю з паркоўкамі: "Напрыклад, усім вядома, што ў плане парковак у нас поўны хаос, асабліва ў сталіцы. У самым населеным нашым горадзе - Мінску - нямала аматараў запхнуць сваю машыну куды хочаце. Нават пры наяўнасці платных зон, размешчаных па ўсім цэнтры, ёсць такія грамадзяне, якія аўтамабіль там паставяць, але не заплацяць, гэта значыць плацежнай дысцыпліны няма. І прапаноў па яе ўстанаўленні таксама няма".

"Таму галоўнае пытанне такое: ці сапраўды адзіны нацыянальны аператар умацуе дарожную і грамадскую бяспеку, а таксама зможа павысіць фінансавую і тэхналагічную дысцыпліну? Калі так, то які аб'ём інвестыцый спатрэбіцца для рэалізацыі праекта? Якія тэрміны акупнасці? Ці падлічаны будучыя паступленні ў бюджэт? - абазначыў шэраг пытанняў Аляксандр Лукашэнка. 

Паводле яго слоў, пакуль выразнага і зразумелага адказу на іх няма. У сувязі з гэтым Прэзідэнт даручыў далажыць, якія выгады нясе краіне прапанаваная кансалідацыя сістэм, наколькі дакладныя прагназуемыя інвестарам эканамічныя эфекты або ў яго "бізнес-плане" галоўны фактар росту - гэта павышэнне тарыфаў.

"Чакаю тлумачэнняў, за кошт чаго можна дасягнуць эканоміі бюджэтных сродкаў, аб якой заяўляе інвестар", - дадаў Аляксандр Лукашэнка.

Адной з тэм мерапрыемства ў Кіраўніка дзяржавы стала ажыццяўленне рамеснай дзейнасці. Прэзідэнт нагадаў, што ў гэтым годзе прыняты абноўлены Закон па пытаннях прадпрымальніцкай дзейнасці, з якога вынікае, што рамеснікі становяцца часткай прадпрымальніцкай супольнасці.

"Па прапанове Урада з 1 кастрычніка гэтага года можна стаць рамеснікам выключна па ўстаноўленым пераліку відаў дзейнасці. Гэты пералік павінен быць у бліжэйшы час вызначаны Урадам", - сказаў Аляксандр Лукашэнка.

Таксама плануецца падпісанне адпаведнага Указа Кіраўніка дзяржавы. У сувязі з гэтым Прэзідэнт пацікавіўся, якія менавіта змяненні прапануюцца і чым абумоўлены гэты выбар, ці абмяркоўваліся гэтыя змяненні з насельніцтвам.

"Не толькі я, але і ўсё насельніцтва павінна выразна разумець, якія віды дзейнасці з 1 студзеня будучага года будуць законныя, - зрабіў акцэнт Аляксандр Лукашэнка. - У нас ёсць дзяржаўныя прадпрыемствы, прыватныя прадпрыемствы, якія займаюцца пэўнай дзейнасцю, плацяць падаткі. Але трэба дакладна вызначыць, якія ў нас будуць іпэшнікі, рамеснікі, хто яны такія, якія падаткі будуць плаціць, у якіх сферах будуць ажыццяўляць сваю дзейнасць. Усё павінна быць дакладна, празрыста, без усялякай кашы і цяганіны".

"Трэба звярнуць увагу, ці не створыць прапанаванае рэфармаванне перадумовы для пераходу часткі рамеснікаў, напрамкі дзейнасці якіх выпадуць з пераліку, у ценявы сектар", - удакладніў Аляксандр Лукашэнка. У ліку пытанняў, якія абазначыў Прэзідэнт, - захаванне культурнай спадчыны Беларусі і патрабаванне ў ходзе пераўтварэнняў не страціць якое-небудзь рэдкае рамяство.

Сярод пытанняў, вынесеных на абмеркаванне на ўзроўні Кіраўніка дзяржавы, было пытанне са сферы сельскай гаспадаркі, якое выклікае занепакоенасць, - выбракоўка буйной рагатай жывёлы.

Аляксандр Лукашэнка падкрэсліў, што ў аграпрамысловы сектар Беларусі пастаянна ўкладваюцца каласальныя сілы і сродкі. Нядаўна запушчаны чарговы віток мадэрнізацыі.

Прыкладаемыя намаганні даюць пэўны эфект. Ёсць дадатная дынаміка ў жывёлагадоўлі: у бягучым годзе вытворчасць малака павялічылі на 6,5%, жывёлы і птушкі - амаль на 4,5%.

"Аднак за гэтымі лічбамі стаіць страшная колькасць загінулага пагалоўя", - звярнуў увагу Кіраўнік дзяржавы. Паводле даных Камітэта дзяржкантролю, амаль паўсюдна асноўнае выбыццё - з-за хвароб. Толькі за паўгода загінула 70 тыс. галоў. Сярод іх цялят ад нараджэння да паўгода - больш за палову, амаль 40 тыс.

"Гэта абуральная безгаспадарчасць. Калі некалі ў мужыка ў вёсцы карова гінула, гэта было трагедыяй сусветнага маштабу. Цяпер чамусьці прывыклі хавацца за нарматывамі і стандартамі. Жудасць! Якія яшчэ нарматывы (асабліва ў Магілёўскай вобласці) па падзяжы жывёлы", - крытычна заўважыў Кіраўнік дзяржавы.

Прэзідэнт запатрабаваў, каб быў толькі адзін зразумелы стандарт - здаровая жывёла, якая ўтрымліваецца ў добрых умовах. І тады не будзе выбыцця - ні нарматыўнага, ні звышнарматыўнага.

Асаблівую ўвагу Кіраўнік дзяржавы звярнуў на пытанне камплектавання малочнатаварных комплексаў, якіх па краіне пабудавана нямала. "Каго мы там доім? Калі карову, то чаму з казіным удоем?" - спытаў Аляксандр Лукашэнка.

У ходзе нарады Міністр сельскай гаспадаркі прадметна далажыў аб стане спраў па выбракоўцы буйной рагатай жывёлы і аб тым, якія меры прымаюцца для камплектавання малочнатаварных комплексаў высокапрадукцыйным пагалоўем.