Разгляд кадравых пытанняў

Прэзідэнт Беларусі Аляксандр Лукашэнка 14 студзеня разгледзеў кадравыя пытанні.

Кіраўнік дзяржавы назначыў:

Карповіча Артура Барысавіча - Міністрам антыманапольнага рэгулявання і гандлю;

Кійко Дзмітрыя Мікалаевіча - Міністрам па падатках і зборах;

Багданава Аляксея Ігаравіча - Надзвычайным і Паўнамоцным Паслом Беларусі ў Казахстане;

Агароднікава Аляксандра Сяргеевіча - Надзвычайным і Паўнамоцным Паслом Беларусі ва Узбекістане;

Піневіча Дзмітрыя Леанідавіча - Надзвычайным і Паўнамоцным Паслом Беларусі ў Азербайджане;

Барчука Віталя Пятровіча - Надзвычайным і Паўнамоцным Паслом Беларусі ў Кубе і па сумяшчальніцтве ў Дамінікане і Нікарагуа;

Глаза Анатоля Анатольевіча - Надзвычайным і Паўнамоцным Паслом Беларусі ў Турцыі;

Ярашэвіча Юрыя Рыгоравіча - Надзвычайным і Паўнамоцным Паслом Беларусі ў Ізраілі;

Назарука Ігара Васільевіча - пастаянным паўнамоцным прадстаўніком Беларусі пры статутных і іншых органах СНД.

Прэзідэнт таксама даў згоду на назначэнне:

Уцюпіна Паўла Уладзіміравіча - намеснікам Міністра замежных спраў;

Бурака Аляксандра Андрэевіча - першым намеснікам Старшыні Дзяржаўнага камітэта па стандартызацыі;

Кісленкі Івана Андрэевіча - намеснікам Старшыні Дзяржаўнага камітэта па стандартызацыі;

Пятрушы Дзмітрыя Віктаравіча - намеснікам старшыні Віцебскага аблвыканкама (пытанні будаўніцтва, ЖКГ);

Скрундзеўскага Аляксандра Мікалаевіча - генеральным дырэктарам ААТ "Белрэсурсы - кіруючая кампанія холдынга "Белрэсурсы".

Назначаючы новых паслоў, Кіраўнік дзяржавы пацікавіўся ў Міністра замежных спраў Максіма Рыжанкова прычынамі выбару менавіта гэтых кандыдатур. Як растлумачыў кіраўнік знешнепалітычнага ведамства, было прынята рашэнне ўмацаваць важныя напрамкі для Беларусі найбольш падрыхтаванымі кадрамі.

"Для іх гэта назначэнне будзе сур'ёзным крокам наперад і магчымасцю праявіць сябе на самастойнай рабоце за мяжой, - адзначыў Міністр. - Сапраўды, мне і ў Турцыі, і ў Ізраілі, і ва ўсіх краінах СНД, і на Кубе патрэбны вельмі дасведчаныя, падрыхтаваныя спецыялісты".

Паводле слоў Максіма Рыжанкова, таксама падабраны кандыдатуры на вакантныя месцы, што ўтварыліся ў сістэме МЗС.

"Па Міністэрстве прамысловасці. У нас што, усё там добра, што мы перспектыўных адпраўляем?" - спытаў Аляксандр Лукашэнка ўжо ў Кіраўніка Адміністрацыі Прэзідэнта.

"На сённяшні дзень Мінпрамам усе заданні выконваюцца, інвестыцыйныя праекты рэалізуюцца. Было ваша даручэнне, што акрамя двух нашых кітоў у знешнім гандлі - гэта Расія і Кітай - мы павінны ўмацаваць адносіны з краінамі СНД. З іх вылучаецца вялікая тройка - Казахстан, Азербайджан і Узбекістан ", - сказаў Дзмітрый Крутой.

Кіраўнік дзяржавы таксама пацікавіўся ў новаспечаных дыпламатаў, як яны бачаць сваю работу ў якасці кіраўнікоў дыпмісій.

"Стаўлю перад сабой задачу перасягнуць экспарт беларускай прадукцыі ў памеры $1 млрд. Наш тавараабарот у 2021 годзе ў цэлым перасягнуў $1 млрд і сёння складае $1,1-1,2 млрд, але экспарт пакуль у нас завіс на лічбе $800-900 млн. Трэба дабавіць у гэтым ключы", - адказаў Аляксей Багданаў, які будзе кіраваць пасольствам Беларусі ў Казахстане.

"А за кошт чаго?" - удакладніў Аляксандр Лукашэнка.

Аляксей Багданаў адзначыў неабходнасць развіцця сумесных вытворчасцей трактароў і камбайнаў. Таксама, паводле яго слоў, больш актыўна павінны паводзіць сябе на казахстанскім рынку МАЗ, "Магілёўліфтмаш" і "Бабруйскаграмаш".

"Будзем гэтымі рэчамі займацца. Акрамя таго, нам неабходна павялічваць пастаўкі беларускіх прадуктаў харчавання. Будзем працаваць па павелічэнні паставак менавіта халяльнай прадукцыі, - заявіў дыпламат. - І, вядома, палітыка, культура, спорт - ніхто не адмяняў гэту работу. Неабходна будзе працаваць па усіх напрамках".

Кіраўнік Адміністрацыі Прэзідэнта дадаў, што яшчэ адзін рэзерв у адносінах з Казахстанам - гэта супрацоўніцтва на міжрэгіянальным узроўні.

"Казахстан усё купіць у нас, калі будзе праходзіць па цане і якасці. Асабліва якасці, - падкрэсліў Аляксандр Лукашэнка. - За гэты рынак змагаецца не толькі Расія ці Беларусь, але і Захад, Кітайская Народная Рэспубліка. Таму шлях наш толькі праз рэгіёны. Трэба устанаўліваць адносіны з канкрэтнымі людзьмі і кіраўнікамі на месцах".

Такую ж палітыку, звярнуў увагу Прэзідэнт, неабходна праводзіць і ва Узбекістане. "З Прэзідэнтам Мірзіёевым у нас больш чым добрыя адносіны. Але трэба з імі працаваць. Упэўнены, што там вялікае поле дзейнасці", - сказаў беларускі лідар.

Цесныя адносіны ў Беларусі таксама з Азербайджанам. Кіраўнік дзяржавы ўпэўнены, што новы пасол Беларусі ў Азербайджане Дзмітрый Піневіч зможа ўнесці свой уклад у развіццё эканамічнага супрацоўніцтва. "Што датычыцца Прэзідэнта, любая прапанова, якая зыходзіць ад цябе, будзе падтрымана. Гэта вялікі сябар нашай дзяржавы, у нас заўсёды з ім і з яго бацькам былі добрыя адносіны", - заявіў Аляксандр Лукашэнка.

"Тое ж датычыцца і іншых дзяржаў. Не ведаю, як Ярашэвічу будзе працавацца ў Ізраілі, там няпроста будзе. Але калі ён знойдзе правільную дарогу, то з Ізраілем у нас таксама будуць добрыя адносіны, - упэўнены Прэзідэнт. - Там большасць людзей, якія цэняць і паважаюць Беларусь. І нашых там дастаткова, якія ў свой час з'ехалі, іх дзеці".

Адносіны з Турцыяй, паводле слоў Кіраўніка дзяржавы, пакуль не адпавядаюць існуючаму патэнцыялу. "З Прэзідэнтам Турцыі ў нас быў прамы дыялог і дамоўленасць: мы робім гэта - ён робіць гэта, мы гэты крок - ён гэты крок. Пакуль мы гэтых крокаў не бачым. Яны не ідуць, таму што мы гэтым цесна не займаемся. Таму трэба будзе удзяліць гэтаму асаблівую ўвагу, - даручыў Аляксандр Лукашэнка. - І пры сустрэчы з Прэзідэнтам Эрдаганам у час кароткай цырымоніі ўручэння грамат (даверчых грамат. - Заўвага) трэба адкрыта сказаць, што мы вельмі цэнім адносіны з Турцыяй, для нас яны вельмі важныя, але мы чакаем ад іх крокаў, паколькі мы зрабілі ўсё, што абяцалі".

Гаворачы ў цэлым пра работу Міністэрства замежных спраў, Прэзідэнт звярнуў увагу, што ў гэтым годзе і ва ўсёй пяцігодцы галоўным патрабаваннем, як і для ўсіх дзяржаўных служачых, стане выканальніцкая дысцыпліна і адказнасць за прымаемыя рашэнні.

"Наводзьце парадак у МЗС. Жалезнае патрабаванне. Людзі дасведчаныя, разумныя, дыпламатаў неразумных няма. Павінны быць жорсткія патрабаванні там, дзе трэба, і выканальніцкая дысцыпліна з боку падначаленых. Гэта датычыцца ўсіх. Ніякай размазні быць не павінна ні ў Адміністрацыі, ні ва Урадзе, ні ў вас. Вытрымаем гэты трэнд, будзем працаваць у такім ключы - у нас усё атрымаецца, - падкрэсліў Аляксандр Лукашэнка. - Дысцыплінкі ў нас не хапае, асабліва выканальніцкай. Адпісацца, нейкую туфту прыслаць Прэзідэнту міма Крутога. Ён падмахне - давай, Прэзідэнт, там разбірайся".

У прыклад ён прывёў работу па распрацоўцы інвестыцыйнай праграмы. "Найважнейшы дакумент. Я яго не падпісаў, як звычайна вярнуў Ураду. Вы мне зноў выкідваеце, і тры ці чатыры чалавекі прыйдуць мне дакладваць. Тыя, хто рыхтаваў гэту праграму. А дзе альтэрнатыўны пункт гледжання? Ці ўсё мы там будзем будаваць, ці туды мы грошы накіруем? Вось гэтага бяздумнага быць не павінна, - запатрабаваў Кіраўнік дзяржавы. - Менш мерапрыемстваў, менш тузаць людзей. Трэба сканцэнтравацца на канкрэтных пытаннях".

Аляксандр Лукашэнка нагадаў, што галоўная задача знешнепалітычнага ведамства - развіццё гандлёва-эканамічных адносін: "Ёсць гандлёвы абарот - добра. Няма гандлю - не працуеце. Вось адзінае да вас патрабаванне".

Пры назначэнні Артура Карповіча Міністрам антыманапольнага рэгулявання і гандлю Прэзідэнт заявіў: "Міністэрства вельмі важнае, таму што ў нас ідзе выпрацоўка той формулы цэнаўтварэння, па якой мы будзем працаваць. Спадзяюся, вельмі доўга. Вопыту ў сусветнай практыцы такога няма. Але хачу яшчэ раз падкрэсліць, што гэта задача Урада. Ні ў якім разе не міністэрства. Таму, Дзмітрый Мікалаевіч (Кіраўнік Адміністрацыі Прэзідэнта Дзмітрый Крутой. - Заўвага), ні ў якім выпадку спіхваць, як у нас гэта звычайна бывае, на міністэрства гэтыя пытанні нельга, - сказаў Кіраўнік дзяржавы. - Гэта павінен выпрацаваць Урад. Трэба прыцягнуць з Адміністрацыі людзей - накіроўвайце. Трэба з Міністэрства гандлю, там добрыя спецыялісты, - бярыце. Працуйце і выпрацоўвайце. У бліжэйшы час - Снапкова (першы віцэ-прэм'ер Мікалай Снапкоў. - Заўвага) папярэджваў, ён адказвае за гэта ва Урадзе - павінны быць унесены канкрэтныя прапановы".

"Ваша задача - вывучыць вопыт савецкага гандлю і зрабіць усё, каб на прылаўках быў асартыментны пералік тавараў. Як спецыяліст вы разумееце, пра што я гавару. І цэны ні ў якім разе не скакалі, асабліва ўверх. Гэта вы павінны бачыць на аб'ектах гандлю - у магазінах. Няважна, якой уласнасці яны - дзяржаўныя або прыватныя", - падкрэсліў беларускі лідар, звяртаючыся да Артура Карповіча.

Аляксандр Лукашэнка заўважыў, што "нашы ўжо рыначнікі перашалелі" ў сувязі з заявамі аб тым, што дзяржава будзе кантраляваць прыватныя прадпрыемствы. "Мы будзем прыватныя прадпрыемствы (у гандлі. - Заўвага) кантраляваць і накіроўваць іх работу. Гэтак жа, як прамысловыя. Таму тут ніякіх ваганняў быць не можа. Яны ўсе дзяржаўныя прадпрыемствы, паколькі размешчаны на тэрыторыі нашай дзяржавы і абслугоўваюць наша насельніцтва", - падкрэсліў беларускі лідар.

Аляксандр Лукашэнка канстатаваў, што на гандаль заўсёды даволі шмат скаргаў, але павінен быць трэнд на зніжэнне іх колькасці, што апошнім часам і адбываецца. "Скаргаў як мага менш павінна быць, - арыентуе Кіраўнік дзяржавы. - У той жа час я добра разумею, што такое цэны ў магазінах. Гэта цэны на міжнародных рынках, гандлёвых пляцоўках. Гэта цэны ў Расіі, з якой мы гандлюем. Вы лепш за мяне ведаеце, што там адбываецца. Я гэта ўсё ўлічваю. Але мы павінны зрабіць максімум для таго, каб у нас усё ж такі формула справядлівасці ў цэнаўтварэнні прысутнічала".

"Не павінна быць так, што якія-небудзь заснавальнікі, дырэктары і начальнікі ходзяць з кішэнямі, грашыма набітымі, а кантралёр-касір або грузчык на складзе вядуць жабрацкае існаванне. Такога быць не павінна. Павінна быць справядліва. Таму дзейнічайце! Вы - чалавек вопытны, які нямала пабачыў у жыцці. Не чакайце нейкіх указанняў. Калі вам нехта перашкаджае працаваць - гаварыце", - звярнуўся Кіраўнік дзяржавы да новага Міністра.

"Што датычыцца падатковай сістэмы, па-мойму, у нас больш-менш стабільная падатковая сістэма. Тым не менш, свежым поглядам паглядзіце, што трэба зрабіць. Таксама вас арыентую на тое, каб вы не захапляліся залішнімі рыначнымі катэгорыямі. Нам патрэбна нармальнае жыццё і нармальная работа прадпрыемстваў. Ад падаткаабкладання шмат залежыць, калі не ўсё іншы раз. Таму паглядзіце свежым поглядам, прааналізуйце нашу падатковую сістэму. І адразу ўнясіце прапановы і свае заўвагі, калі нам трэба недзе нешта зрабіць. Важнейшы напрамак работы", - сказаў Кіраўнік дзяржавы.

Аляксандр Лукашэнка асабліва адзначыў, што падатковая сістэма павінна быць справядлівай. "Не скажу, што ў нас усё справядліва. Паглядзіце льготы, якімі мы абклалі (у двукоссі) многія прадпрыемствы, якія гэтыя льготы не павінны мець. Ды і на насельніцтва. Той, хто павінен мець падтрымку і льготы, той павінен мець. Хто не, значыць, не. Павінен працаваць, упірацца і падтрымліваць дзяржаву. Нам гэта ў гэты час вельмі патрэбна. Па ўсіх напрамках", - падкрэсліў беларускі лідар.