Рабочая паездка ў Брэсцкую вобласць

Гаспадаркі павінны перш за ўсё вырошчваць прадукцыю, якая дае максімальную эканамічную аддачу, а не слепа прытрымлівацца дырэктыўных установак па арганізацыі севазвароту. На гэтым акцэнтаваў асаблівую ўвагу Прэзідэнт Беларусі Аляксандр Лукашэнка 25 красавіка, знаходзячыся з рабочай паездкай у Брэсцкай вобласці.

Кіраўнік дзяржавы па традыцыі напярэдадні чарговай гадавіны аварыі на Чарнобыльскай АЭС робіць рабочую паездку па рэгіёнах, якія пацярпелі ад гэтай катастрофы. Аляксандр Лукашэнка 25 красавіка наведаў Лунінецкі раён Брэсцкай вобласці.

У цэнтры ўвагі Кіраўніка дзяржавы знаходзіліся пытанні сацыяльна-эканамічнага развіцця і добраўпарадкавання населеных пунктаў Лунінецкага раёна, а таксама сельскагаспадарчай тэматыкі.

Першым пунктам праграмы Прэзідэнта стала наведванне СВК "Гарадоцкі", дзе Аляксандр Лукашэнка азнаёміўся з тым, як вядуцца веснавыя палявыя работы ў гэтай гаспадарцы і ў цэлым па краіне.

Як было даложана Прэзідэнту, па стане на раніцу 25 красавіка сяўба ранніх яравых збожжавых і зернебабовых культур завершана ў 89 раёнах Беларусі. У асноўным гэта поўдзень і цэнтральная частка рэспублікі. Поўнасцю завяршыць пасяўную кампанію плануецца да 10 мая.

Кіраўнік дзяржавы асабліва падкрэсліў, што пасля завяршэння пасяўной намаганні неабходна сканцэнтраваць на прывядзенні ў парадак палёў. "Па контуры палі павінны быць узараны, прыведзены ў нармальны стан", - сказаў Прэзідэнт.

Аднак асноўную ўвагу Кіраўнік дзяржавы засяродзіў на тэхналогіях сяўбы кукурузы на зерне. У гэтым годзе пасевы кукурузы плануецца павялічыць на 2,5 тыс. га. Як расказаў Міністр сельскай гаспадаркі і харчавання Міхаіл Русы, у 2012 годзе праблема забеспячэння гаспадарак уласным насеннем будзе вырашана. Аляксандр Лукашэнка пацікавіўся ў старшыні Лунінецкага райвыканкама Васіля Агіевіча, ці добра на землях раёна вырошчваецца гэта культура. Атрымаўшы сцвярджальны адказ, Прэзідэнт канстатаваў: "Значыць, кукуруза для Палесся - гэта тое, што трэба".

"Трэба дакладна вызначыць культуры, якія мы можам вырошчваць тут, на Палессі. Калі, напрыклад, тут акрамя клубніц нічога не расце, значыць, трэба аддаць прыярытэт клубніцам і вырошчваць іх. Але нельга сеяць тое, што не дае добрага выніку", - сказаў Кіраўнік дзяржавы. Аляксандр Лукашэнка падкрэсліў, што гэта датычыца не толькі Прыпяцкага рэгіёну, а ўсёй краіны.

У сувязі з гэтым Аляксандр Лукашэнка адзначыў, што кожны рэгіён павінен вызначыць аптымальныя сельгаскультуры для вырошчвання, сканцэнтраваўшыся на іх.

"Нельга прадаўжаць жыць дзедаўскімі метадамі. Трэба спецыялізавацца і вырошчваць тыя культуры, якія найлепш прыжывуцца", - сказаў Кіраўнік дзяржавы. Пры гэтым ён адзначыў, што гаспадаркі павінны самі пастаянна эксперыментаваць у вырошчванні новых культур і вызначаць найбольш аптымальныя для тых зямель варыянты.

Аляксандр Лукашэнка пацікавіўся станам спраў у горшых гаспадарках раёна, існуючымі праблемамі. Як адзначыў старшыня Лунінецкага райвыканкама, асноўнай праблемай для раёна з'яўляецца абнаўленне матэрыяльна-тэхнічнай базы.

Кіраўнік дзяржавы зноў закрануў пытанне дысцыпліны, разумнага і адказнага падыходу да работы. "Пакуль ёсць пытанні да кіраўнікоў і старшынь райвыканкамаў. Менш - да губернатараў, але і да іх ёсць пытанні за неразварушлівасць. Я папярэджваў ужо раней, у гэтым годзе патрабаванне будзе вельмі строгае з нашых кіраўнікоў", - падкрэсліў Прэзідэнт.

Аляксандр Лукашэнка закрануў таксама пытанне стану зямель у рэгіёнах, якія пацярпелі ад аварыі на Чарнобыльскай АЭС. У Беларусі звыш чвэрці тэрыторыі забруджана радыенуклідамі. Каля 460 населеных пунктаў фактычна зніклі з карты краіны. Дзяржава ўкладае каласальныя сродкі ў мінімізацыю наступстваў аварыі на ЧАЭС. За перыяд незалежнасці Беларусь у ліквідацыю наступстваў аварыі і аднаўленне забруджаных зямель уклала звыш $19 млрд., пры гэтым агульны ўрон, нанесены краіне ў выніку чарнобыльскай аварыі, ацэньваецца ў $235 млрд. Праграмай на наступную пяцігодку прадугледжваецца ўкладанне $2,2 млрд. у пераадоленне наступстваў чарнобыльскай катастрофы.

У Лунінецкім раёне да зон радыеактыўнага забруджвання адносяцца 50 населеных пунктаў. Кожны з іх падлягае перыядычнаму кантролю, колькасць насельніцтва там складае крыху больш за 60 тыс. чалавек. Як было даложана Кіраўніку дзяржавы, уся прадукцыя, што атрымліваецца ў гаспадарках, размешчаных на такіх землях, з'яўляецца чыстай, радыенукліды яшчэ ёсць толькі ў грыбах і ягадах. "Значыць, мы ў свой час выратавалі землі", - канстатаваў Прэзідэнт.

Потым Аляксандр Лукашэнка накіраваўся ў Лунінец і наведаў універсам "Заходні". Перад уваходам ва ўніверсам прадпрыемствы Лунінецкага райпо разгарнулі выстаўку прадукцыі двух мясцовых хлебазаводаў, на якой быў прадстаўлены шырокі асартымент булачных вырабаў.

Універсам "Заходні" - гэта новая гандлёвая кропка, здадзеная ў эксплуатацыю ў 2010 годзе. Сярэднямесячны рознічны тавараабарот у мінулым годзе склаў тут больш як Br593 млн.

Кіраўнік дзяржавы цікавіўся асартыментам прадукцыі, ростам цэн на харчовыя тавары, суадносінамі айчынных і імпартных тавараў у магазіне і ў цэлым работай магазінаў спажыўкааперацыі, а таксама гандлёвым забеспячэннем жыхароў новых мікрараёнаў і сельскага насельніцтва, якое пражывае на тэрыторыі, што пацярпела ў выніку аварыі на Чарнобыльскай АЭС.

Як расказалі Прэзідэнту, павышэнне цэн у асноўным паўплывала на імпартныя тавары, менш - на айчынныя. Дарэчы, асноўная частка тавараў у магазіне (89%) айчыннай вытворчасці. У магазіне прадстаўлена больш як 15 тыс. назваў прадукцыі.

Лунінецкае райпо ў сістэме спажыўкааперацыі вобласці займае першае месца. Чысты прыбытак за мінулы год па гандлёвай галіне райпо склаў Br2,8 млрд.

Аляксандр Лукашэнка ў цэлым застаўся задаволены тым, як наладжаны гандаль у Лунінцы, і работай гэтай гандлёвай кропкі ў прыватнасці. Пры гэтым ён сказаў, што мясцовая ўлада павінна трымаць на кантролі сітуацыю з цэнамі і не дапускаць іх неабгрунтаванага павышэння.

У пераломны момант недапушчальна нажывацца за кошт людзей, неабгрунтавана павышаць цэны, заявіў Прэзідэнт Беларусі.

Кіраўнік дзяржавы таксама паразмаўляў з мясцовымі жыхарамі, якія сабраліся з нагоды яго прыезду ў Лунінец. Аляксандр Лукашэнка пахваліў жыхароў раёна за работу, заўважыўшы, што яны добра працуюць. Ён таксама прапанаваў крыху пазней наведаць некалькі прыватных падворкаў. Аляксандра Лукашэнку зацікавіў вопыт палешукоў па вырошчванню клубніц. Жыхары Лунінца адзначылі, што з радасцю прымуць яго ў сябе ў любы час.

Не засталася без увагі Прэзідэнта і арганізацыя медыцынскага абслугоўвання насельніцтва ў забруджаных рэгіёнах. Аляксандр Лукашэнка наведаў Лунінецкую цэнтральную раённую бальніцу, дзе азнаёміўся з тым, як вядзецца аказанне спецыялізаванай медыцынскай дапамогі насельніцтву, пацярпеламу ад чарнобыльскай катастрофы, а таксама кадравым забеспячэннем медустаноў раёна і сістэмай сацыяльнай падтрымкі медыцынскіх работнікаў.

Новы будынак Лунінецкай цэнтральнай раённай бальніцы быў уведзены ў эксплуатацыю ў мінулым годзе. Адначасова стацыянарнае лячэнне ў бальніцы могуць прайсці 246 чалавек. Будаўніцтва бальніцы каштавала каля Br60 млрд., у тым ліку на закупку абсталявання было накіравана амаль Br12 млрд. Па даручэнні Кіраўніка дзяржавы тут адкрыта аддзяленне гемадыялізу, дзе арганізавана работа ў дзве змены і аказваецца дапамога хворым з цяжкай паталогіяй нырак з Лунінецкага, Ганцавіцкага раёнаў, а ў перспектыве - і часткі Пінскага.

Аляксандр Лукашэнка пабываў у аддзяленні гемадыялізу, рэанімацыі, аперацыйным блоку, радзільным аддзяленні. Ад імя Кіраўніка дзяржавы маладым маці і нованароджаным былі перададзены падарункі.