Рабочая паездка ў Віцебскую вобласць

Прэзідэнт Беларусі Аляксандр Лукашэнка 21 красавіка зрабіў рабочую паездку ў Віцебскую вобласць. Ён працаваў на малой радзіме - у гарадскім пасёлку Копысь, прататыпе "вёскі будучыні" з аднайменнай праграмы. Тут знаходзіцца дрэваапрацоўчы ўчастак № 2 Аршанскага лясгаса.

Адразу пасля прыбыцця Кіраўнік дзяржавы спытаў адказных службовых асоб пра стан спраў у рэгіёне: "Як уражанні? Што дрэнна?"

Асаблівы акцэнт Прэзідэнт зрабіў на перспектывах развіцця пасёлкаў гарадскога тыпу. Аляксандр Лукашэнка нагадаў, што ў свой час было прынята рашэнне аб пераўтварэннях у Копысі, каб на яго прыкладзе паказаць астатнім, як павінна быць. Зразумела, для развіцця прынцыпова важна наяўнасць працоўных месцаў. Таму тут было пабудавана дрэваапрацоўчае прадпрыемства Аршанскага лясгаса, на якім цяпер працуюць 50 чалавек. Многія прыязджаюць з іншых населеных пунктаў, у тым ліку з Оршы. Таму, як адзначыў Прэзідэнт, паўстае пытанне забеспячэння жыллём. "Людзі пераедуць, будуць жыць і працаваць, - сказаў Кіраўнік дзяржавы. - Для людзей трэба стварыць умовы".

Гаворачы аб пераўтварэннях у Копысі, Прэзідэнт звярнуў увагу, што ў свой час даручыў пабудаваць тут маленькую пякарню, што цяпер працуе і вырабляе хлеб, які карыстаецца попытам не толькі ў жыхароў аграгарадка. "Таксама намёк нам. Напэўна, трэба развіваць гэтыя маленькія пякарні. Толькі трэба падумаць аб інвестарах", - падкрэсліў Аляксандр Лукашэнка. Прэзідэнт дадаў, што шмат гадоў таму ў Копысі ўдалося зрабіць нейкі ўзор для іншых аграгарадкоў.

Аляксандр Лукашэнка даручыў правесці рэвізію стану спраў у пасёлках гарадскога тыпу, вызначыць перспектывы развіцця і што яшчэ трэба зрабіць.

"Паглядзім, як пасёлкі гарадскога тыпу прыводзяць у парадак. Чаго не хапае - абмяркуем, прымем меры. Але не жартуйце з агнём, шмат гаворым, але не ўсё робім", - падкрэсліў Прэзідэнт.

Гаворачы пра будаўніцтва жылля, Кіраўнік дзяржавы адзначыў, што на домакамплекты Мінлясгаса ёсць вялікі попыт, які трэба задавальняць. "Трэба больш, попыт ёсць", - сказаў Прэзідэнт. У той жа час ён папярэдзіў наконт разумнай цэнавай палітыкі, каб людзі не адмовіліся ад гэтай прадукцыі.

Што датычыцца жыллёвай палітыкі ў цэлым, Аляксандр Лукашэнка звярнуў увагу, што будаваць трэба перш за ўсё там, дзе на гэта ёсць запыт ад прадпрыемстваў, работадаўцаў, іншымі словамі - пад заказ.

"Наогул нам трэба сур'ёзна перабудавацца - і ў вобласці, ва ўсіх абласцях, і ў краіне і будаваць толькі ў адпаведнасці з заказам жыллё. А людзі што хочуць, тое будуюць - за свой кошт. Мы перашкаджаць ім не павінны, тым больш у такіх пасёлках (як Копысь. - Заўвага)", - сказаў Прэзідэнт. У якасці прыкладу Кіраўнік дзяржавы прывёў дрэваапрацоўчы ўчастак Аршанскага лясгаса, размешчаны ў Копысі. Тут працуюць каля 50 чалавек, і некаторыя прыязджаюць нават з Оршы. Калі для іх пабудаваць жыллё ў Копысі, людзі пераедуць, будуць тут жа жыць і працаваць, упэўнены Аляксандр Лукашэнка. "Для людзей трэба стварыць умовы. Для працы ўмовы нармальныя. Не хапае толькі адзінага - дом, патрэбны дом. Участачкі ў нас ёсць. Як толькі мы абмяжуем будаўніцтва жылля ў Мінску і абласных цэнтрах, людзі сюды прыедуць жыць. А чаго тут не жыць?" - адзначыў Прэзідэнт.

"Трэба ўзяць і спыніць гэту бяздумную будоўлю і сцягваць людзей у буйныя гарады", - падкрэсліў Кіраўнік дзяржавы.

У сваю чаргу Міністр лясной гаспадаркі Аляксандр Кулік звярнуўся з просьбай дазволіць у сістэме лясгаса прадаваць сваім работнікам арэнднае жыллё ва ўласнасць пасля заканчэння 10 гадоў арэнды і пры ўмове добрасумленнай працы на прадпрыемстве. "Калі б дазволілі іх гадоў праз 10 прыватызаваць людзям, якія добрасумленна..." - сказаў ён.

Прэзідэнт, не чакаючы падрабязнасцей, адразу адказаў згодай, але пры адной умове: "Добра, толькі за тыя грошы, за якія пабудавалі".

"Кіраўнік запрашае і кажа: вось цана. Але яму ж трэба, каб людзі працавалі тут. "Працаваць тут думаеш?" - "Думаю". Гэта галоўнае - працаваць далей тут, і цана. Плаціш грошы, працуеш, падпісваеш дагавор, не - да пабачэння. Што тут дрэннага? Няхай купляе чалавек дом (выкупляе арэнднае жыллё. - Заўвага), а мы за гэтыя грошы яшчэ адзін пабудуем", - дадаў Аляксандр Лукашэнка.

Міністр лясной гаспадаркі Аляксандр Кулік далажыў Прэзідэнту аб забеспячэнні лясгасаў сучаснай лесанарыхтоўчай тэхнікай, а дрэваапрацоўчай галіны - драўнянай сыравінай. Гаворачы пра экспарт, Аляксандр Кулік адзначыў, што прадукцыя пастаўляецца на рынкі 16 краін. Было адзначана, што фінансавыя вынікі ў дрэваапрацоўчай галіне палепшыліся.

"Вось гэта сведчыць аб тым, дзе нашы грошы і наша перспектыва. Нават не ў нафтаперапрацоўцы. У нас свая сыравіна, гэта трэба развіваць. І ўсё, што адпавядае гэтай сыравіне", - падкрэсліў Аляксандр Лукашэнка.

Размова зайшла аб тым, што арганізацыі Мінлясгаса ў мінулым годзе паставілі дзяржаўным і прыватным дрэваапрацоўчым прадпрыемствам нашай краіны 10 млн куб.м драўніны. Кіраўнік спраў Прэзідэнта Юрый Назараў звярнуў увагу, што прадпрыемствам, якія перапрацоўваюць драўніну ў вялікіх аб'ёмах, неабходна разумець перспектыву.

"Тут трэба або з канцэрнам вырашыць пытанні кожнага, або гадавыя таргі на біржы праводзіць, як раней, - адзначыў кіраўнік спраў Прэзідэнта. - Ім трэба разумець дыяметры, гадавы аб'ём кругляка, які ім прапануюць".

"Дык а ў чым справа? Калі мы недаперапрацавалі сыравіну, а нехта мае ў ёй патрэбу і хоча бачыць перспектыву, у чым тады праблема? - сказаў Аляксандр Лукашэнка. - Пытанне ж заўсёды ў нас было ў цэнах: біржа, не біржа і гэтак далей. Цяпер мы можам, зыходзячы з сітуацыі, якая склалася, вызначыцца па цэнаўтварэнні. І аддаць ім па гэтай цане прадукт". Кіраўнік дзяржавы даручыў вырашыць праблему ў гэтым годзе, каб да 1 студзеня такія перапрацоўшчыкі маглі бачыць перспектыву.

Адным з пытанняў стала забеспячэнне машынна-трактарнага парку дрэваапрацоўчай галіны. "У нас сёння форвардары, харвестары, асноўныя машыны і механізмы", - падкрэсліў Аляксандр Кулік.

Міністр праінфармаваў, што тэхніка нарыхтавала амаль 65% ад агульнага аб'ёму драўніны. Кіраўнік Мінлясгаса дадаў, што разлічвае на тое, што ручная нарыхтоўка будзе падтрымлівацца на ўзроўні каля 30%. У сувязі з гэтым Прэзідэнт звярнуў увагу, што з машынай сапраўды атрымліваецца падабрацца не да ўсіх участкаў, таму людзі патрэбны.

Пасля даклада Прэзідэнт азнаёміўся з выстаўкай айчыннай лесанарыхтоўчай тэхнікі такіх прадпрыемстваў, як МТЗ, "Гомсельмаш", АМКАДОР, МАЗ і іншых. Былі на выстаўцы і лесанарыхтоўчыя інструменты, у тым ліку сякеры вытворчасці МТЗ. "Гэта сякера добрая, ёмістая", - ацаніў інструмент Кіраўнік дзяржавы.

МТЗ таксама прадставіў узор гусенічнай тэхнікі - трактар з карчавальнікам. Аляксандр Лукашэнка ўдакладніў, ці выпускае Мінскі трактарны завод гусенічную тэхніку для сельскай гаспадаркі і ці карыстаецца яна попытам у сялян. Прэзідэнт упэўнены, што ў кожнай гаспадарцы патрэбны хаця б адзін такі трактар.

Калі размова зайшла пра тэхніку МАЗ, Кіраўнік дзяржавы пацікавіўся, як ідуць справы на заводзе, і звярнуў увагу, што трэба паглыбляцца ў лакалізацыю. Спытаў Аляксандр Лукашэнка і пра вынікі "МАЗ-СПОРТаўта".

Прэзідэнт выказаўся таксама аб сітуацыі на "АМКАДОРы". "Нам трэба вырашаць пытанне не толькі ўласнасці на "Амкадоры", але і даўгоў", - сказаў Аляксандр Лукашэнка і звярнуў увагу на тое, што прадпрыемства знаходзіцца ў складаным становішчы з-за дзеянняў уласніка.

Кіраўнік дзяржавы пацікавіўся ў Міністра лясной гаспадаркі Аляксандра Куліка, ці мае гэта прадпрыемства вялікае значэнне для сістэмы лясной гаспадаркі, на што атрымаў сцвярджальны адказ.

Міністр лясной гаспадаркі пагадзіўся, што развіццё нашай лесанарыхтоўчай і дрэваапрацоўчай прамысловасці немагчыма без шматаперацыйнай тэхнікі айчыннай вытворчасці, якую выпускаюць у тым ліку на "АМКАДОРы".

Прэзідэнт пацікавіўся ўзроўнем лакалізацыі на тэхніцы вытворчасці "АМКАДОР" і ўдакладніў, за кошт чаго ён можа быць павышаны. Было адзначана, што форвардары, выпушчаныя на "Амкадоры", - гэта даволі надзейныя машыны, здольныя служыць восем гадоў.

"Але май на ўвазе, што праз восем гадоў ты не спішаш - аднаўляць трэба", - падкрэсліў Аляксандр Лукашэнка.

Азнаёміўшыся з узорамі тэхнікі, Прэзідэнт прайшоў у цэхі дрэваапрацоўчага ўчастка. Кіраўнік дзяржавы азнаёміўся з работай кацельні сушыльнага комплексу, лесапільнага цэха, цэха паганажу і цэха вытворчасці паддонаў.

На вытворчасці Аляксандр Лукашэнка паразмаўляў з рабочым, які аказаўся жыхаром Оршы. "А чаго ты не хочаш у Копысі жыць? - задаў пытанне Прэзідэнт. Малады чалавек сказаў, што ў Оршы ў яго сям'я, але прызнаўся, што ахвотна пераехаў бы ў Копысь, калі б тут у яго быў дом з участкам. Кіраўнік дзяржавы заўважыў, што рабочым можна было б выдзеліць жыллё, каб пасля, напрыклад, дзесяці гадоў работы на прадпрыемстве яны маглі выкупіць яго па астаткавым кошце.

Адсюль узнікла пытанне замацавання маладых кадраў на першым працоўным месцы, у тым ліку ў аграгарадках і гарадскіх пасёлках. Адным са шляхоў замацавання моладзі магло б стаць настаўніцтва, лічыць Аляксандр Лукашэнка. Дарэчы, развіццё пасёлкаў гарадскога тыпу было адной з важных тэм паездкі Прэзідэнта ў Віцебскую вобласць.

"Трэба працаваць над замацаваннем. Вядома, з Оршы - тут недалёка - падвозяць людзей. Але пажадана, каб людзі жылі тут", - лічыць Кіраўнік дзяржавы.

Пасля наведвання дрэваапрацоўчага прадпрыемства Прэзідэнту па традыцыі ўручылі падарунак - ікону Аляксандра Неўскага, вырабленую з дубу. Абраз быў зроблены рукамі лесаводаў галіны і асвячоны ў храме Аляксандра Неўскага.

Аляксандр Лукашэнка, знаходзячыся з рабочай паездкай у Аршанскім раёне і наведваючы Копысь, нечакана дапоўніў свой маршрут новымі аб'ектамі. Кіраўнік дзяржавы вырашыў заехаць у ТАА "МІЛККАП СТАРТ", дзе вырабляюць сыры, а таксама ў мясцовую хлебапякарню.

Прэзідэнт адразу пасля прыбыцця на першы аб'ект - дрэваапрацоўчы цэх Аршанскага лясгаса - нагадаў адказным службовым асобам, што раней патрабаваў ад іх трымаць на кантролі сітуацыю на прыватным прадпрыемстве па вытворчасці сыроў, якое размешчана літаральна праз дарогу, і ў пякарні, створанай па даручэнні кіраўніка дзяржавы. "Цяпер зойдзем, паглядзім", - паабяцаў Аляксандр Лукашэнка і абяцанне сваё стрымаў.

Пасля агляду цэха па дрэваапрацоўцы Прэзідэнт наведаў цэх па вытворчасці сыроў ТАА "МІЛККАП СТАРТ" у Копысі. Раней тут па даручэнні Прэзідэнта адрадзілі вытворчасць сыроў, якая некалі існавала. Аляксандр Лукашэнка прайшоў па цэхах і распытаў работнікаў аб працэсе вырабу прадукцыі. У прыватнасці, Кіраўнік дзяржавы ўдакладніў, якія аб'ёмы малака перапрацоўваюцца цяпер і які ў цэлым патэнцыял. Спецыялісты растлумачылі, што цяпер перапрацоўваюць амаль 60 тон малака за змену, але, працуючы на поўную магутнасць на існуючым абсталяванні, маглі б перапрацоўваць 100 тон.

"Гэта значыць, што вы загружаны напалову?" - спытаў Аляксандр Лукашэнка. Паводле слоў старшыні Віцебскага аблвыканкама Аляксандра Субоціна, на прадпрыемстве ёсць праблема з ачышчальнымі збудаваннямі, і на іх будаўніцтва, у адпаведнасці з праектам, патрабуецца значны час. Прэзідэнт на гэта запатрабаваў, каб праз год праблема была вырашана і ўсё зроблена па тэхналогіі. Камітэту дзяржкантролю кіраўнік дзяржавы даручыў разабрацца, якія сродкі былі ўкладзены ў гэта прадпрыемства інвестарам.

"Трэба разабрацца. Калі ён (інвестар. - Заўвага) добра працуе і гатовы тут развіваць - калі ласка, няхай будуе ачышчальныя і наперад. Калі не, значыць, іншы чалавек, іншы інвестар павінен рабіць гэта. Па-гаспадарску разбярыцеся", - паставіў задачу Кіраўнік дзяржавы.

Праходзячы па розных цэхах і памяшканнях прадпрыемства, Прэзідэнт удакладняў іх прызначэнне, паколькі некаторыя яшчэ знаходзяцца ў працэсе добраўпарадкавання, а некаторыя выкарыстоўваюцца не па прызначэнні, частка абсталявання застаецца незадзейнічанай. Аляксандр Лукашэнка крытычна адазваўся аб убачаным, заўважыўшы, што кіраўнікі мясцовай вертыкалі недастаткова паглыблены ў сітуацыю на гэтым аб'екце.

У выніку Кіраўнік дзяржавы даручыў, каб дэталёвую праверку прадпрыемства па вытворчасці сыроў правялі спецыялісты, у тым ліку санэпідэмслужбы. "Тут павінна быць санстанцыя і іншыя спецыялісты, якія паглядзяць тэхналогію, што тут правільна, няправільна, захоўванне. Спецыялісты павінны разабрацца", - сказаў Аляксандр Лукашэнка.

Кіраўнік дзяржавы таксама заехаў у мясцовую пякарню, дзе займаюцца вытворчасцю хлеба.

Аляксандр Лукашэнка даручыў у бліжэйшы час пашырыць вытворчасць, паколькі попыт на прадукцыю пякарні з Копысі вялікі. Трэба таксама распаўсюдзіць такі вопыт па краіне, невялікіх гарадках, каб там былі свае хлебапякарні.

Кіраўнік дзяржавы даручыў адказным службовым асобам узяць на кантроль пытанне развіцця пякарні ў Копысі, будаўніцтва дадатковых плошчаў і пашырэння яе магутнасцей: "Каб праз год тут выпякалася столькі хлеба, колькі патрэбна. Чаму? Таму што я хачу паглядзець, калі ўсё будзе нармальна (а яно будзе), трэба, каб у нас у раёнах, малых гарадах і іншых, хлеб быў тут (па месцы, а не прывазны. - Заўвага)".

"І адразу ў Оршы трэба думаць. Трэба, каб такія маленькія пякарні былі забяспечаны. Важна тое, што мы павінны па ўсёй краіне ў невялікіх населеных пунктах распаўсюдзіць гэта ўсё, у аграгарадках павінна быць", - падкрэсліў Аляксандр Лукашэнка.