Рабочая паездка ў Шклоўскі раён Магілёўскай вобласці

Прэзідэнт Беларусі Аляксандр Лукашэнка 13 ліпеня ў час рабочай паездкі ў Шклоўскі раён наведаў рэканструюемы комплекс будынкаў рамонтных майстэрняў.

Кіраўнік дзяржавы на прыкладзе аграсэрвісу ў Шклове разгледзеў перспектывы развіцця такіх арганізацый у краіне. "Самае важнае, гэта датычыцца краіны ў цэлым, каб гэта былі апорныя пункты для нашых заводаў, - сказаў Прэзідэнт. - У нас будзе 115-120 такіх апорных цэнтраў, дзе будуць аказвацца паслугі і самімі заводамі".

Ён адзначыў, што ўсё павінна быць па аналогіі з тым, як абслугоўваюць айчынную тэхніку ў мультыбрэндавых цэнтрах за мяжой.

"Заводы павінны разумець, што гэта і іх справа. Прадалі сюды тэхніку - будзьце ласкавы абслугоўваць яе тут, - падкрэсліў беларускі лідар. - Трэба зрабіць так, каб яны (райаграсэрвісы. - Заўвага) не былі пасынкамі ў нашых заводаў - МТЗ, МАЗ і гэтак далей. Трэба, каб гэта былі іх родныя дзеці. Перш за ўсё ім запчасткі і іншае. Будзьце ласкавы абслугоўваць як след. Я ўжо не гавару пра гарантыю".

Кіраўніку дзяржавы далажылі, што па краіне ўжо ў 31 райаграсэрвісе працуюць па гэтай схеме. У іх ліку і прадпрыемства ў Шклове.

Аляксандр Лукашэнка адзначыў, што ў такіх райаграсэрвісах, як рэканструяваны ў Шклове, у роўнай ступені трэба абслугоўваць не толькі айчынную тэхніку. Адпаведна трэба мець запас неабходных запчастак, адпрацаваную схему выканання работ і, што немалаважна, прымальныя цэны.

"Цэны павінны быць пад кантролем старшыні аблвыканкама. Як мінімум старшыні райвыканкама. Цэны павінны быць не стратныя, павінен быць кантроль за затратамі, сабекоштам паслуг", - сказаў Аляксандр Лукашэнка.

Кіраўнік дзяржавы адзначыў вялікія змяненні, якія адбыліся на тэрыторыі аграсэрвісу за год з пачатку рэканструкцыі.

Аляксандр Лукашэнка яшчэ раз растлумачыў, чаму гэты і іншыя праекты рэалізуюцца менавіта ў Шклоўскім раёне: "Гэта не таму што я тут працаваў і гэта мая радзіма. Проста таму, што я тут усё ведаю да кожнага метра. Таму мы робім такі ўзорны раён тут у Шклове і часткова ў Оршы".

"Трэба, каб Шклоўскі раён быў такім узорам для пераймання. Каб мы не вучылі кожнага. Вось прывезлі - ідзі, паглядзі, як павінна быць, і рабі", - падкрэсліў беларускі лідар.

Што датычыцца райаграсэрвісу, Прэзідэнт звярнуў увагу, што раней ён быў сярэдні або нават крыху ніжэйшы ў параўнанні з іншымі такімі арганізацыямі.

"Нам неабходна тут зрабіць узорную тыповую сельгастэхніку - райаграсэрвіс у Шклове, каб паказаць усім, як павінна быць. Ужо ў краіне шмат з'явілася гэтых пунктаў. Нават лепш, - сказаў Кіраўнік дзяржавы. - Самае вялікае ўсё зроблена. Засталіся дробязі. Трэба прывесці гэта ўсё ў парадак. Парадак і дысцыпліна павінны быць ідэальныя. Гэта - узор".

Плануецца, што гэтай восенню на базе гэтага ўзорнага райаграсэрвісу ў Шклове правядуць семінар, на які запросяць старшынь райвыканкамаў.

Праектам займалася Кіраўніцтва справамі Прэзідэнта. "Малайчына! Зрабіў добра. Але "страшна" для тых, хто будзе паўтараць гэта ў раёнах. Таму што можна спалохацца - тут вельмі добра зроблена. Але няхай падцягваюцца і робяць", - адзначыў Аляксандр Лукашэнка, звяртаючыся да Кіраўніка спраў Прэзідэнта Юрыя Назарава.

Кіраўнік спраў растлумачыў, што пры праектаванні і будаўніцтве "адзелі" будынак на выбудаваную тэхналогію. Таму ўсё зроблена без вытанчанасці, але тэхналагічна.

Кіраўнік дзяржавы ацаніў праведзеную рэканструкцыю, наведаў рамонтную майстэрню. "Для нас гэта цуд у тым плане, калі мы зробім такія рамонтныя майстэрні (у іншых раёнах. - Заўвага)", - падкрэсліў беларускі лідар.

Цяпер, сказаў Прэзідэнт, гэты падарунак, зроблены для раёна ад імя дзяржавы, трэба растыражаваць у маштабах краіны.

Аляксандр Лукашэнка яшчэ раз удакладніў у Юрыя Назарава, ці не дарагі гэты праект, бо грошы трэба лічыць. "Паўмеры ніколі не дадуць эфект", - упэўнена адказаў Кіраўнік спраў.

Прэзідэнту далажылі, што па кошце райаграсэрвіс атрымаўся як адзін малочнатаварны комплекс.

Кіраўнік дзяржавы звярнуў увагу, што такія рамонтныя арганізацыі разам з будаўнічымі ПМК і іншымі ўстановамі з'яўляюцца базавымі для кіраўнікоў раёнаў, каб мець магчымасць эфектыўна выбудоўваць работу. "Тут у старшыні райвыканкама ў самым нізе гэтай вертыкалі ўлады павінны быць рычагі кіравання. Гэта адзін з рычагоў кіравання раёнам. Тут усё павінна быць пад кантролем, - сказаў Аляксандр Лукашэнка. - Рынак рынкам, але рэгуляваць і назіраць трэба".

У час наведвання рэканструяванага аграсэрвісу Кіраўнік дзяржавы заявіў, што ў Беларусі трэба настойліва пераходзіць на ацяпленне пелетамі, а газ і іншыя крыніцы паліва выкарыстоўваць толькі як рэзерв.

Прэзідэнту далажылі, што кацельня ў аграсэрвісе працуе на драўняных пелетах. "Правільна. Паступова, настойліва трэба пераходзіць на ацяпленне пелетамі, дровамі і іншым. Вунь у палякаў цяпер завоблачныя цэны на пелеты. Не бяруць (у Беларусі гэту прадукцыю. - Заўвага). Ну, як хочаце. Пелеты трэба тут. Трэба ацяпляць у Беларусі", - сказаў Кіраўнік дзяржавы.

Ён падкрэсліў, што ў Беларусі вялікая колькасць мясцовай драўнянай сыравіны, якую трэба эфектыўна перапрацаваць і выкарыстоўваць. "Мы гэта ўмеем рабіць. Заводаў у нас хапае. Таму пелеты і яшчэ раз пелеты. Прыродны газ або іншая там крыніца паліва - толькі як рэзерв", - адзначыў Аляксандр Лукашэнка.

У час рабочай паездкі Кіраўнік дзяржавы нагадаў аб задачах, якія стаяць перад пачаткам масавай уборкі збожжавых.

Кіраўнік дзяржавы пацікавіўся ў Міністра сельскай гаспадаркі і харчавання Юрыя Горлава, колькі ўбрана ячменю. Кіраўнік Мінсельгасхарча далажыў, што 40%, адзначыўшы, што больш актыўнай уборцы перашкаджалі нядаўнія дажджы. Цяпер надвор'е ўжо больш спрыяе правядзенню ўборачнай кампаніі.

Прэзідэнт нагадаў, што ў масавую ўборку важна ўвайсці, вырашыўшы дзве асноўныя задачы - гатоўнасць тэхнікі і наяўнасць умелых механізатараў для работы на ёй, а таксама спраўныя збожжатокі. "Збожжа хаця б раз прапусціць трэба праз сушылку, а тое і два. Таму сушыльная гаспадарка - гэта жорсткае патрабаванне, - падкрэсліў беларускі лідар. - Ну і камбайны. Я думаю, ужо на кожны камбайн па адным механізатары, а тое і па два".

"Па кожным камбайне прозвішча, імя, імя па бацьку механізатараў", - запэўніў Юрый Горлаў наконт забяспечанасці кадрамі.

"Тое ж самае і на кормаўборачны камбайн, на трактар. На энерганасычаную тэхніку павінны быць талковыя людзі. І на той тэхніцы (менш магутнай. - Заўвага), яна няпростая. Але гэта - галоўнае", - падкрэсліў беларускі лідар.

Юрый Горлаў адзначыў, што ў ходзе бягучага тыдня трэба яшчэ "вырваць" укос траў.

"Ну, вырывай, - сказаў на гэта Прэзідэнт. - Але і спяшацца не трэба. Бо вы парэжаце палі і паламаеце тэхніку. Падсохне - наперад. Вось такое надвор'е суткі - усё высахне".

Аляксандр Лукашэнка таксама паразмаўляў з журналістамі, растлумачыўшы падыходы ў пытанні прыцягнення ў Беларусь працоўных мігрантаў.

Кіраўнік дзяржавы нагадаў, што гэта тэма якраз абмяркоўвалася ў ходзе нядаўняга візіту ў Беларусь Прэзідэнта Узбекістана Шаўката Мірзіёева. У Беларусі гатовы прымаць на работу грамадзян гэтай краіны.

Аляксандр Лукашэнка падкрэсліў, што ў гэтым асабліва зацікаўлены ў шэрагу рэгіёнаў, каб закрыць свае кадравыя патрэбнасці. "Прынята рашэнне аб тым, каб выпрацаваць сістэму і запрашаць у краіну збоку людзей. Украінцы паехалі, расіяне многія едуць да нас працаваць. Цяпер мы вялі перагаворы з Шаўкатам Мірзіёевым. Ва Узбекістане праблема з працаўладкаваннем людзей. Я яму прапанаваў. У нас ёсць сістэма: пасольства вызначае ў першым прыбліжэнні, каго можна, каго нельга. І тут кіраўнік (таго ці іншага прадпрыемства. - Заўвага) павінен вызначыць, колькі яму трэба чалавек, па якіх спецыяльнасцях. І ён выбірае сабе", - сказаў Прэзідэнт.

Аляксандр Лукашэнка адзначыў, што людзі з Узбекістана з задавальненнем едуць у Беларусь. "У бліжэйшы час цэлая партыя, каля 200 чалавек, гатовы да нас прыехаць сюды. Пакуль для Віцебскай вобласці. Таму што там наогул людзей мала. Трэба паглядзець паўднёвы ўсход Магілёўскай вобласці: колькі трэба людзей, якія, - сказаў Прэзідэнт. - Не трэба збіраць у адным месцы. Яны павінны быць разгрупаваны. Нам усюды патрэбны людзі".

Пры гэтым беларускі бок у тым ліку гатовы разглядаць варыянты з дадатковай падрыхтоўкай і навучаннем такіх кадраў ужо ў Беларусі. Тым больш будуць рады гатовым спецыялістам. "Але пажадана сем'ямі. Калі сямейны чалавек прыязджае, нам гэта нядрэнна. Людзі патрэбны будуць. І нам яны вельмі патрэбны", - падкрэсліў беларускі лідар.

Аднак працэс прыцягнення працоўных мігрантаў праходзіць пад пільным кантролем, у тым ліку праз сістэму МУС. "Павінна быць сістэма. Яна ў нас ёсць. Яна мною вызначана. Толькі кіраўнік бярэ, і ён за іх нясе адказнасць, - сказаў Кіраўнік дзяржавы. - Парадак павінен быць. Не павінна быць агулам".

"Таму выбарачна, мэтанакіравана. Па адным, два, дзесяць, дваццаць чалавек. Колькі каму патрэбна. Персанальная адказнасць. Памочнікі гэта будуць трымаць на кантролі, - дадаў беларускі лідар. - Вядома, калі б усё рабілі нашы, беларусы, - добра. Але ў нас часам не хапае людзей, а часам не хочуць працаваць. Без найму збоку рабочай сілы мы не абыдземся".

Што датычыцца Узбекістана, Аляксандр Лукашэнка нагадаў, што размова ідзе не толькі аб прыцягненні працоўных мігрантаў у беларускую сферу АПК. Прапанова, агучаная на перагаворах, прадугледжвае шырокае супрацоўніцтва ў вытворчасці прадуктаў харчавання, уключаючы інвестыцыі, з далейшым экспартам ва Узбекістан. Напрыклад, на базе Віцебскай вобласці. "Прыязджайце, апрацоўвайце зямлю, плаціце падаткі (усё як мае быць), і мы вам прадаём гэту прадукцыю ва Узбекістан. Стабільны хуткарослы рынак - 40 млн чалавек. І мы гатовы адтуль узяць людзей, - расказаў Кіраўнік дзяржавы. - Гавару: калі ласка, укладвай у Віцебскую вобласць - мы шукаем інвестара".

Кіраўнік Адміністрацыі Прэзідэнта Дзмітрый Крутой у сувязі з гэтым адзначыў, што Прэзідэнт Узбекістана таксама будзе трымаць пытанне на кантролі: "Мірзіёеў даў каманду пасля сустрэчы з вамі, што ён кантралюе, хто паедзе. І будуць толькі спецыялісты".

Дзмітрый Крутой таксама агучыў даныя, што цяпер на ўліку ў Беларусі стаяць 7 тыс. грамадзян Узбекістана, частка з якіх працуе ўжо ў эканоміцы. Але вялікая колькасць таксама студэнтаў, якія вучацца ў розных ВНУ. Магчыма, што многія з іх у выніку застануцца працаваць у Беларусі.

Прэзідэнт падкрэсліў, што ў Беларусі ўжо ёсць пазітыўны вопыт прыцягнення працоўных мігрантаў, якія добрасумленна выконваюць сваю работу. Ён таксама нагадаў, што для такіх людзей трэба стварыць належныя ўмовы для жыцця - падабраць жыллё, прадаставіць роўныя правы з беларускімі грамадзянамі. "Толькі прыязджайце і працуйце", - адзначыў ён.

Рэзюмуючы, Аляксандр Лукашэнка па пытанні прыцягнення працоўных мігрантаў сказаў наступнае: "Гэтага баяцца не трэба, але гэта будуць пастаянна разаграваць (апаненты. - Заўвага)".