Рабочая паездка ў Мазырскі раён Гомельскай вобласці

Пачалася вялікая камандзіроўка Прэзідэнта Беларусі Аляксандра Лукашэнка ў Гомельскую вобласць. Галоўная тэма паездкі Кіраўніка дзяржавы на поўдзень краіны - рэгіянальнае развіццё.

Першай кропкай стаў Мазырскі раён. Адразу пасля прыбыцця ў Мазырскі раён Прэзідэнт звярнуў увагу на сітуацыю ў лясной і сельскай гаспадарцы.

"Я зараз глядзеў на лес, які вы планава спілавалі. Барозны нарэзаны… Значыць, лес аднаўляецца, так я разумею?" - удакладніў беларускі лідар і атрымаў сцвярджальны адказ.

Гаворачы пра сітуацыю на палях, Аляксандр Лукашэнка адзначыў, што ў Гомельскай вобласці ў гэтым плане няма праблем. "На палях, вядома, тут парадак. Добра", - дадаў ён.

Што датычыцца жывёлагадоўлі, то тут справы ідуць значна горш, на што і ўказаў Кіраўнік дзяржавы старшыні Гомельскага аблвыканкама Івану Крупко на прыкладзе матэрыялаў праверак.

"Гэта называецца жах. Я разумею, што ў асобных месцах, разумею, што яны канцэнтруюць негатыў (матэрыялы праверкі. - Заўвага). Але гэта больш, чым крымінальная справа", - выказаўся Прэзідэнт пра найбольш абуральныя факты.

"Павінна быць жалезная дысцыпліна, калі мы хочам выжыць. Каму-каму, а гамяльчанам гэта не трэба тлумачыць: паглядзіце на поўдзень - зразумееце (размова пра ўзброены канфлікт ва Украіне. - Заўвага)", - заявіў Аляксандр Лукашэнка.

У ходзе рабочай паездкі Прэзідэнт указаў на неабходнасць разумнага і адказнага стаўлення да меліяраваных зямель.

Кіраўнік дзяржавы адзначыў, што працэсам меліярацыі павінны кіраваць губернатары. Пры гэтым важны не толькі сам працэс, але і адпаведнае стаўленне да ўжо меліяраваных зямель. Іх перадача гаспадаркам павінна быць замацавана ў адпаведных дакументах.

"Дзесьці мы правялі меліярацыю, але два-тры гады - зноў зараслі каналы, - сказаў Аляксандр Лукашэнка. - Вы зарылі там вялікія грошы. Вось цяпер прыедзе пракурор і спытае: а акт перадачы падпісалі?"

"Усё павінна быць перададзена па акце ад меліяратараў гаспадарцы. Узяў ты гэта меліяраванае поле - туды ўкладзены мільёны рублёў. Перадалі па акце - адказвай (за стан меліяраванага поля. - Заўвага)", - падкрэсліў Прэзідэнт.

Беларускі лідар назваў захаванне ўрадлівасці глебы дзяржаўнай задачай, нараўне, напрыклад, з будаўніцтвам дарог. Акрамя таго, адзначыў ён, асаблівае значэнне меліярацыя набывае на поўдні Беларусі. "На Палессі гэта найважнейшае пытанне", - дадаў ён.

Аляксандр Лукашэнка таксама выказаўся аб значэнні малочнатаварных комплексаў для сельскай гаспадаркі.

"Што такое малочнатаварны комплекс? Калі мы гэтыя закінутыя землі ператвараем у комплексы, вакол адразу (нават на Палессі, дзе ў вас балоты, лясы, пяскі) мяняецца край. Трэба ў гэтым напрамку рухацца", - заявіў беларускі лідар.

Кіраўнік дзяржавы звярнуў увагу, што такі комплекс патрабуе стварэння трывалай кармавой базы - рацыянальнага выкарыстання ўрадлівых зямель для вырошчвання збожжа і кармавых культур.

"Патрэбны кармы, каб комплекс утрымліваць. Зразумела, што адразу гэта не рване. Трэба час, але неабходна ў гэтым напрамку рухацца", - упэўнены Прэзідэнт.

У ходзе рабочай паездкі Кіраўнік дзяржавы азнаёміўся з работай ААТ "Мазыртэхсэрвіс", дзе аднаўляюць і вырабляюць сельгастэхніку.

Наведваючы гэта прадпрыемства, беларускі лідар указаў на неабходнасць аднаўлення сельгастэхнік. Размова ідзе пра спецыялізаваныя арганізацыі, якія займаюцца тэхнічным абслугоўваннем, рамонтам, мантажом абсталявання, а таксама забеспячэннем сельскагаспадарчых прадпрыемстваў тэхнікай і запаснымі часткамі.

"Нам трэба кроў з носа аднавіць сельгастэхнікі. Працаваць, працаваць і аднавіць у кожным раёне", - падкрэсліў Аляксандр Лукашэнка.

Кіраўнік дзяржавы звярнуў увагу, што значнай частцы сельскагаспадарчых прадпрыемстваў патрэбна дапамога па рамонце тэхнікі. Гэта звязана не толькі з ускладненнем тэхнікі, але і з кадравым пытаннем. "Ужо няма тых сівавалосых старых людзей. Яны, можа, недзе і ёсць. Іх трэба прасіць, каб яны прыйшлі, дапамаглі, параілі, падтрымалі слесараў-рамонтнікаў, - канстатаваў ён. - Важна цяпер гэта падхапіць, каб старыя людзі навучылі моладзь, каб гэта перадаць".

Разам з тым, падкрэсліў Прэзідэнт, гэтыя арганізацыі па рамонце тэхнікі не абавязкова павінны быць такімі ж маштабнымі, як "Мазыртэхсэрвіс", які Кіраўнік дзяржавы параўнаў з паўнацэнным заводам.

"Як мяне інфармуюць, Мазыр (гаворка пра прадпрыемства "Мазыртэхсэрвіс". - Заўвага) працуе як завод па пэўных напрамках на многія раёны. Але ў Івана Іванавіча (старшыні Гомельскага аблвыканкама Івана Крупко. - Заўвага) шмат праблем у іншых раёнах, таму нам трэба аднаўляць гэтыя сэрвісы", - сказаў Аляксандр Лукашэнка.

Кіраўнік дзяржавы заўважыў, што такія арганізацыі (раней - сельгастэхнікі, а цяпер райаграсэрвісы) могуць аказваць дапамогу ў рамонце не толькі сельгасарганізацыям, але і людзям.

Пасля азнаямлення з работай "Мазыртэхсэрвісу" Кіраўнік дзяржавы сабраў семінар-нараду па тэме работы аграсэрвісаў і падрыхтоўкі тэхнікі да палявых работ.

Прэзідэнт нагадаў, што ў савецкія часы так і было - сельгастэхнікі былі ў кожным раёне, яны канцэнтравалі ў сябе работы па рамонце, аднаўленні тэхнікі, абсталявання для сельскай гаспадаркі, аказвалі паслугі, напрыклад, па бурэнні свідравін. І, акрамя таго, там быў сфарміраваны неабходны рэзерв запчастак і паліва.

"Потым настаў перыяд, калі мы ўсе сталі рыначнікамі. У выніку гэтага палавіна сельгастэхнік былі знішчаны. Такі ў нас рынак быў. Праз некаторы час разумеем памылкі і пачынаем усведамляць, што такія цэнтры павінны быць. Я настойваю, каб яны былі ў кожным раёне", - сказаў Прэзідэнт.

У сучаснай Беларусі на базе ранейшых сельгастэхнік развіваецца сетка раённых, абласных аграсэрвісаў, якія аб'яднаны ў "Белаграсэрвіс".

"Вельмі марудна разгортваемся па іх аднаўленні, дааснашчэнні, перааснашчэнні там, дзе гэта трэба. Вельмі марудна. Таму нам трэба паскарацца", - арыентаваў Аляксандр Лукашэнка.

"Тэхніка ўскладняецца, кадры трэба вучыць. На базе сельгастэхнік і школа была, і не толькі інжынераў мы там удасканальвалі і вучылі. Гэта значыць патрэбная справа. Рашэнне прынята (было раней аб іх аднаўленні. - Заўвага). Больш як палову мы аднавілі", - падвёў прамежкавыя вынікі Кіраўнік дзяржавы.

Ён звярнуў увагу, што ў некаторых рэгіёнах на месцах ужо вырашылі прыпыніць працэс і не спяшацца са стварэннем аграсэрвісаў у невялікіх раёнах, спасылаючыся на тое, што яны могуць звярнуцца па дапамогу ў суседнія. Адзін з прыкладаў - Нароўля, размешчаная недалёка ад Мазыра з яго выдатна аснашчаным "Мазыртэхсэрвісам". З такім падыходам Аляксандр Лукашэнка не згодны. "Нешта павінна быць і ў Нароўлі, - канстатаваў ён. - На скорую руку трэба і там нешта мець".

"Напэўна, не гарыць сёння ў Нароўлі. З часам убачым: трэба - не трэба. Але ёсць раёны, дзе вельмі трэба: Жыткавіцкі, Шклоўскі і іншыя. Гэта буйныя раёны, якія могуць абслугоўваць (і суседнія раёны. - Заўвага). Трэба вось гэтыя базавыя аднавіць - будзем іх называць міжраённыя", - абазначыў першачарговыя задачы Прэзідэнт. Але пасля гэтага трэба ўсё роўна вяртацца да пытання стварэння няхай і невялікіх, але ў кожным раёне аграсэрвісаў.

Напрыклад, "Мазыртэхсэрвіс", на базе якога быў арганізаваны семінар-нарада, Кіраўнік дзяржавы лічыць арганізацыяй даволі высокага ўзроўню. "Гэта не толькі рамонт, абслугоўванне. Гэта вытворчасць адпаведных машын. Гэта вельмі багата. Але такія вузлавыя павінны быць", - сказаў ён. Як далажылі Прэзідэнту, тут, як у міжраённым цэнтры, абслугоўваюць не толькі Мазырскі, але і шэраг іншых раёнаў Гомельскай вобласці. Як падкрэсліў Аляксандр Лукашэнка, у такім выпадку трэба падумаць над стварэннем майстэрняў у тых раёнах, дзе няма свайго аграсэрвісу.

У якасці наступнага кроку ў перспектыўным развіцці аграсэрвісаў Кіраўніку дзяржавы прапанавалі перааснасціць практычна да заводскага ўзроўню тыя з іх, якія маюць высокакваліфікаваныя кадры і вытворчую базу. Гэта дасць магчымасць рамантаваць не толькі механічную частку, але і больш складаныя камплектуючыя - электронныя блокі кіравання, гідраўлічную сістэму і іншае. Акрамя таго, такі крок па сутнасці зробіць аграсэрвісы праваднікамі ідэй заводаў-вытворцаў. Было таксама адзначана, што такое рашэнне надае эканамічную ўстойлівасць аграсэрвісам. Акрамя таго, павелічэнне вытворчых магутнасцей стварае новыя рабочыя месцы. А цесная сувязь з каледжамі і аграрнымі ВНУ дае магчымасць прыцягваць моладзь на прадпрыемствы.

"Нам трэба план гэты выбудаваць, каб мы разумелі, дзе трэба будаваць або аднаўляць", - даручыў беларускі лідар. Пры гэтым, дадаў ён, у такіх арганізацыях абавязкова павінны быць створаны камфортныя ўмовы для сельскагаспадарчых прадпрыемстваў: "Трэба разумна падумаць і выбудоўваць схему такім чынам, каб было прывабна для калгасаў і саўгасаў, каб яны паехалі ў гэту сельгастэхніку".

Аляксандр Лукашэнка, рэзюмуючы ўсё сказанае, падкрэсліў, што сетку раённых, міжраённых, абласных агратэхнік трэба абавязкова выбудоўваць: "Тэхніка становіцца ўсё больш складанай, яе трэба абслугоўваць. Усё на завод не адвязеш. Завод адзін, а ў нас сотні калгасаў і саўгасаў. Таму трэба мець гэта".

Прэзідэнт лічыць, што ў Беларусі трэба вызначыцца па гарантыйным рамонце тэхнікі і тэрміну, на працягу якога вытворца нясе адказнасць па гарантыі.

Кіраўнік дзяржавы падкрэсліў, што пытанне з гарантыйным рамонтам, абслугоўваннем сельгастэхнікі трэба вырашаць жалезабетонна. "Няякасную вырабіў прадукцыю - забірай і аднаўляй за свой кошт. Гарантыйнае абслугоўванне павінна быць. Мы павінны да гэтага пытання яшчэ раз вярнуцца ва ўрадзе і вызначыцца", - сказаў Прэзідэнт.

Паводле яго слоў, гэта пытанне набывае асаблівую актуальнасць у сувязі са з'яўленнем вельмі складаных машын, накшталт збожжаўборачнай, кормаўборачнай тэхнікі "Гомсельмаш", трактароў МТЗ, аўтамабіляў і г.д. Цяпер, як заўважыў Аляксандр Лукашэнка, нярэдкія выпадкі, калі такія машыны спісваюць пасля даволі кароткага тэрміну эксплуатацыі і ставяць пад плот. Хаця іх можна было б вярнуць у эксплуатацыю, і такія станоўчыя прыклады ёсць. "Добра, гамяльчане нас навучылі, як гэтыя трактары аднаўляць - з двух адзін або з трох два, па-рознаму атрымліваецца. Добрая тэхніка і таннейшая, чым новая", - адзначыў Кіраўнік дзяржавы.

Ён падкрэсліў, што трэба ўстанавіць канкрэтныя правілы па амартызацыі тэхнікі і тэрміны: "Мы павінны дакладна даць сігнал на месцы, у бухгалтэрыі той ці іншай гаспадаркі. І хоць памры, ты яе не спішаш. Ты яе павінен захоўваць, берагчы, аднаўляць. Гэта ўжо справа кіраўніка".

Тое ж самае датычыцца гарантыйнага рамонту, абслугоўвання. "Мы павінны вызначыцца па гарантыйным рамонце тэхнікі - колькі гадоў завод будзе несці па гарантыі адказнасць. Не трэба ўсё гэта - няякасную тэхніку - перакладаць на сялян. Трэба прымушаць прамыслоўцаў працаваць якасна", - падкрэсліў беларускі лідар.

Аляксандр Лукашэнка таксама звярнуў увагу на забеспячэнне захаванасці мінеральных угнаенняў.

"Яшчэ раз хачу губернатараў папярэдзіць (аб захаванасці мінеральных угнаенняў. - Заўвага), каб у нас не было непрыемных з вамі потым размоў", - сказаў Кіраўнік дзяржавы.

Прэзідэнт звярнуў увагу на тое, што Камітэт дзяржкантролю дакладвае яму аб наяўнасці праблем, і немалых, звязаных з забеспячэннем захаванасці ўгнаенняў. "Хлопцы, вы проста адной нагой у турме. Я вам гэта абгрунтоўваў эканамічна. У нас сёння цэны на міжнародных рынках велізарныя, асабліва на азотныя ўгнаенні. А вы іх губіце. Не можаце захаваць - не бярыце. (Або дзейнічайце па наступным прынцыпе. - Заўвага) раніцай завезлі - да вечара ўсё ўнеслі. Чаго я вас буду ўгаворваць, дарослыя людзі. Сказана - зроблена. Мабілізацыя павінна быць, павінна быць дысцыпліна", - падкрэсліў Аляксандр Лукашэнка.

У час семінара-нарады Прэзідэнт прапанаваў перагледзець падыходы да напаўнення і рэалізацыі праграмы "Адзін раён - адзін праект".

"Мы на нарадзе ў бліжэйшы час абмяркуем гэта пытанне, - сказаў беларускі лідар. - Нам трэба сур'ёзна прааналізаваць як меліярацыю, так і гэтыя пытанні, - праз некаторы час прааналізаваць, як будзем рухацца далей". Прэзідэнт адзначыў, што пры выбары праектаў для рэалізацыі многія разлічвалі на вялікія аб'ёмы фінансавання. А арыентавацца трэба было перш за ўсё на мэтазгоднасць, эканамічную эфектыўнасць. І ў гэтым сэнсе аднаўленне па ўсёй краіне сеткі арганізацый аграсэрвісаў для рамонту і вытворчасці сельгастэхнікі можа быць якраз тымі самымі праектамі для раёнаў, якія неабходны.

"Усе думалі, будуць шалёныя грошы, 154 праекты па праграме "Адзін раён - адзін праект", замахнуліся, не ўсё зрабілі. Але сельгастэхнікі і райаграсэрвісы, аблсэрвісы - яны якраз і з'яўляюцца такім праектам. А дзе-нідзе і важней, чым ствараць пяць рабочых месцаў і штампаваць пластык, мяшкі нейкія рабіць і гэтак далей. Напэўна, і гэта патрэбна. Але гэта (стварэнне райаграсэрвісаў. - Заўвага) - добрыя праекты, якія трэба рэалізоўваць. І калі нехта ўкладваў грошы, якія прызначаны для праграмы "Адзін раён - адзін праект", у такія напрамкі, праекты, думаю, гэта нядрэнна", - сказаў Аляксандр Лукашэнка.

"Гэта якраз нядрэннае ўкладанне", - дадаў ён.

Аналагічна, паводле слоў Прэзідэнта, трэба падыходзіць і ў іншых напрамках - будаўнічым, дарожным і г.д. "Там таксама трэба нам разабрацца і падумаць, як мы далей будзем рухацца па гэтых праектах - "Адзін раён - адзін праект", - сказаў Кіраўнік дзяржавы.

Прэзідэнт заўважыў, што, магчыма, не ўсюды ёсць вострая надзённая неабходнасць укладвацца ў рэалізацыю новага праекта на мясцовым узроўні, не ўсюды ёсць для гэтага свабодныя працоўныя рэсурсы, а стварэнне адпаведнай інфраструктуры для іх прыцягнення запатрабуе яшчэ дадатковых укладанняў. "Разумна трэба падысці. Можа, у нейкім раёне не трэба нам гэты праект. А перанесці гэтыя сродкі на нейкі іншы праект. Калі, напрыклад, у Полацку вырашылі пабудаваць новы завод па перапрацоўцы малака, дык, можа, грошы сканцэнтраваць трэба будзе і пабудаваць гэта прадпрыемства", - прывёў адзін з магчымых прыкладаў ён. 

Яшчэ адзін прыклад - праекты сучасных рыбгасаў па развядзенні каштоўных парод рыбы. Адзін з іх - на паўднёвым усходзе Магілёўскай вобласці - нядаўна наведваў Прэзідэнт. "Рынак у нас - нямераны, адкрыты. Робяць выдатную прадукцыю, дай бог свой рынак насыціць як належыць. Ведаем ужо, як рабіць. Малайцы. Раней малька куплялі, дарошчвалі (як цяля на адкорме), цяпер ікру атрымалі і малька з ікры вывелі - замкнёны цыкл. Знешні рынак вялікі, расіяне гатовы купляць. Чаму не ўкласці грошы - і хутка, каб атрымаць добрую аддачу?" - задаў рытарычнае пытанне Аляксандр Лукашэнка. На яго думку, каля дзесяці такіх рыбных гаспадарак можна проста разгарнуць па краіне, стварыць рабочыя месцы і нядрэнна зарабіць. 

"І такіх праектаў шмат. Яны перш за ўсё звязаны з зямлёй, будаўніцтвам, рамонтам, аднаўленнем (тэхнікі. - Заўвага) - усё тое, што мы ўмеем рабіць. І нічога не трэба выдумліваць", - падкрэсліў беларускі лідар.

Аляксандр Лукашэнка на семінары-нарадзе заявіў, што цяперашняе пакаленне дарослых людзей, якія валодаюць значным вопытам, павінна стварыць краіну, якую можна будзе без апасенняў перадаць наступным пакаленням.

"Мы з вамі дарослыя людзі. А ёсць такія, як Дзмітрый Мікалаевіч Крутой і яшчэ маладзейшы, якія ў тыя часы не жылі. А калі хто і жыў, яны гэтым не цікавіліся. У іх няма вопыту, - звярнуў увагу Кіраўнік дзяржавы. - А вопыт - ён жа гадамі, дзесяцігоддзямі складваецца. Таму вось Дзмітрый Мікалаевіч і зусім маладое пакаленне - яны павінны ад нас цяпер навучыцца."

"Таму, мужыкі, трэба хутка зрабіць тое, што мы ўмеем рабіць. Нашы дзеці гэтага не зробяць. Яны добрыя, з інтэрнэтам разбіраюцца і іншае. Яны разумныя і разумнейшыя за нас па асобных напрамках. Але без ежы і адзення нічога не будзе ні ў іх, ні ў каго. Мы - вопытныя людзі, і нам трэба вось за гэты перыяд, які нам тут адпушчаны, стварыць краіну, якую мы ім перададзім", - падкрэсліў Аляксандр Лукашэнка.

"І мы павінны па ўсіх напрамках нешта зрабіць. Бо (інакш. - Заўвага) усё гэта прападзе", - папярэдзіў Кіраўнік дзяржавы.

У якасці прыкладу ён прывёў праграму развіцця Прыпяцкага Палесся і, у прыватнасці, захавання зямель, правядзення меліярацыі, стварэння вытворчасцей. Аляксандр Лукашэнка ўспомніў, як у першыя гады свайго прэзідэнцтва прыязджаў у гэты рэгіён і людзі прасілі забяспечыць іх самым простым - хлебам. З тых часоў, вядома, праведзена велізарная работа, і ёсць добрыя вынікі. Але гэта не значыць, што можна спыніцца на дасягнутым. "Я не хачу, каб гэта было потым (каб паўтарылася сітуацыя пачатку 90-х гадоў. - Заўвага). А гэта будзе вельмі хутка на Палессі. На Палессі гэта імгненна. Упусціў два-тры гады - усё зарасце", - растлумачыў сваю матывацыю Прэзідэнт.

Кіраўнік дзяржавы паставіў задачу павышаць культуру земляробства, заўважыўшы, што ў Гомельскай вобласці ў гэтым напрамку ўжо ёсць пазітыўныя зрухі. Ва ўсякім разе на тых землях, якія кіраўнік дзяржавы агледзеў з борта верталёта, накіроўваючыся ў гэту рабочую паездку. "Культурна, акуратна, палі апрацаваныя. Відаць, што людзі папрацавалі. Так павінна быць усюды", - сказаў ён. Ёсць станоўчыя прыклады і ў іншых рэгіёнах, але разам з тым ёсць і месцы, дзе застаюцца вымачкі, і з гэтым трэба змагацца.

Арыентаваў Аляксандр Лукашэнка і на прадаўжэнне работы па развіцці аграпрамысловага комплексу краіны, правядзенне меліярацыйных работ. "Меліярацыю трэба праводзіць. Нельга страціць гэтыя землі. Тут, на Палессі, людзі ўмеюць працаваць і хочуць. Таму і прыватныя, і калгасы-саўгасы - трэба развіваць гэта (сельскую гаспадарку. - Заўвага)", - звярнуў увагу беларускі лідар.

Прэзідэнт таксама падкрэсліў важнасць аказання шэфскай дапамогі сельгасарганізацыям з боку прамысловых прадпрыемстваў, буйных гарадскіх структур. У першую чаргу гэта датычыцца прыцягнення спецыялістаў на час актыўных палявых работ. У сувязі з гэтым закраналася і пытанне замацавання кадраў у вёсцы, у тым ліку будаўніцтва арэнднага жылля. Асаблівую ўвагу кіраўнік дзяржавы звярнуў і на своечасовую выплату зарплат работнікам АПК.

"Трэба падрыхтаваць краіну. І ўжо моладзь потым ад гэтага не адмовіцца. Яна ўжо будзе ведаць, як (трэба дзейнічаць. - Заўвага). Вось у чым сэнс, вялікі сэнс, - прадоўжыў Аляксандр Лукашэнка. - У гэтым уся філасофія, у гэтым сутнасць уся. Мы павінны з вамі справу зрабіць. І на гэта ў нас застаецца ўсё менш і менш часу".

"Вось, здавалася б, краіна ёсць, усе задаволены. Не, хлопцы, па ўсіх напрамках яшчэ трэба многае мадэрнізаваць", - падкрэсліў Аляксандр Лукашэнка.

Прэзідэнт у час мерапрыемства пашырыў заяўлены парадак дня семінара-нарады і спытаў адказных службовых асоб аб праграме развіцця Прыпяцкага Палесся і выкананні работ па меліярацыі.

"Наперадзе павінна ісці вытворчасць, потым дзіцячыя сады, адукацыя, ахова здароўя", - сказаў Аляксандр Лукашэнка, абмяркоўваючы рэалізацыю праграмы развіцця Прыпяцкага Палесся. 

Ён прывёў у прыклад рыбную галіну, якая вельмі нядрэнна развіта на Палессі: "Гэта не складаныя вытворчасці, але мы ўмеем іх ствараць. Трэба шукаць такія праекты". 

Кіраўнік дзяржавы падкрэсліў, што не менш важная задача - захаванне ўрадлівых зямель. У сувязі з гэтым ён зноў звярнуў увагу на актуальнасць такога напрамку, як меліярацыя. Пры гэтым важна захаваць ужо меліяраваныя землі, не дапускаючы іх зарастання і выхаду з сельгасабароту. 

"Прасачы, Міхаіл Іванавіч, разам з Леанідам Канстанцінавічам (старшыні камісій Савета Рэспублікі Міхаіл Русы і Леанід Заяц. - Заўвага), каб мы выратавалі землі. Ты ведаеш, як яны зарастаюць, калі не апрацоўваюцца як трэба, калі культуры няма, - падкрэсліў Аляксандр Лукашэнка. - Палешукі да таго, што маюць вытворчасці, жыць будуць тут, так склалася, ад азёр, балот, рэк і зямельных угоддзяў, якія б гэтыя землі ні былі. Можа, нешта прыдумаем па павышэнні ўрадлівасці".

Як далажылі Прэзідэнту, тэма сельскай гаспадаркі ў праграме развіцця Прыпяцкага Палесся - адзін з прыярытэтных напрамкаў. Плануецца, што да 2030 года ў дзевяці раёнах Гомельскай і Брэсцкай абласцей, уключаных у праграму, удасца дасягнуць паказчыкаў у 1 млн т малака, 1 млн т збожжа з кукурузай, 100 тыс. т мяса ялавічыны. У цэлым мерапрыемствы праграмы рэалізуюцца своечасова і ў поўным аб'ёме.