Даклад Старшыні Савета Рэспублікі Нацыянальнага сходу Беларусі Наталлі Качанавай

Прэзідэнт Беларусі Аляксандр Лукашэнка 25 лютага прыняў з дакладам Старшыню Савета Рэспублікі Нацыянальнага сходу Беларусі Наталлю Качанаву.

У час сустрэчы Кіраўнік дзяржавы пракаменціраваў працэс падбору кадраў у новы склад Урада і не толькі.

"Бачу ўжо ў сродках масавай інфармацыі пачынаюць мусоліць: "Ах, Урад! Хто будзе - не будзе..." Яны проста забылі, журналісты, блогеры і іншыя, асабліва не нашы, што Урад фарміруецца не пасля выбараў. Мы паступова фарміравалі Урад да выбараў некалькі месяцаў, паўгода, а недзе год, назначаючы міністраў і гэтак далей. У нас амаль палова ўжо міністраў, членаў Урада працуюць менш, чым год. Інакш кажучы, гэта нованазначаныя людзі, - сказаў Кіраўнік дзяржавы. - Але кіраўніцтва і вышэйшыя службовыя асобы, і іншыя - усё, што ўваходзіць у кампетэнцыю Прэзідэнта, - гэтыя людзі падлягаюць разгляду".

Аляксандр Лукашэнка нагадаў, што даручаў гэтыя пытанні разгледзець і ўнесці прапановы па кандыдатурах спецыяльнай камісіі, у склад якой уваходзіць і Наталля Качанава. "Каб меркаванняў было больш. Я ведаю, вы абмяркоўвалі не адзін раз персаналіі кандыдатур. Да чаго прыйшлі?" - пацікавіўся Прэзідэнт.

Ён растлумачыў, што работа камісіі - гэта не толькі прапанаванне кандыдатур у склад Урада, але і ў цэлым. Але, вядома, размова ў першую чаргу пра кіраўніцтва Урада, шэраг міністраў, вышэйшых службовых асоб. Прэзідэнт таксама папрасіў Наталлю Качанаву расказаць аб выніках яе нядаўняга візіту ў Азербайджан.

У якасці асобнага пытання Кіраўнік дзяржавы прапанаваў абмеркаваць работу экспертнага савета пры Савеце Рэспублікі. Ён створаны па даручэнні Прэзідэнта ў чэрвені 2021 года. Яго патэнцыял максімальна задзейнічаны ў працэсе заканатворчасці. Гэта своеасаблівы фільтр важнейшых для краіны заканадаўчых рашэнняў. Аляксандр Лукашэнка падкрэсліў значную ролю гэтай структуры.

"Каб мы, так сказаць, раздаючы паўнамоцтвы і перадаючы ад Прэзідэнта ўніз, не ўчынілі чахарду ў органах улады і кіравання. А чахарда можа быць, гэта самае небяспечнае, з боку законаў, якія мы прымаем. Таму вельмі важна, каб гэту сістэму не парушылі. І гэтаму павінен  служыць перш за ўсё экспертны савет. Таму я хачу ведаць, як арганізавана гэта работа", - сказаў Кіраўнік дзяржавы.

Аляксандр Лукашэнка папрасіў Наталлю Качанаву не адыходзіць ад гэтых пытанняў, асабліва ўлічваючы яе вопыт работы і на пасадзе Кіраўніка Адміністрацыі Прэзідэнта. "Трэба, каб улада была ўладай. Таму што патрабаваць не будзе з каго. Як мы будзем выканальніцкую дысцыпліну наладжваць у краіне, калі ў нас не будзе нармальна функцыянаваць вертыкаль улады, якую мы можам самі разбурыць законамі. Таму гэта вельмі важнае пытанне", - падкрэсліў беларускі лідар.

У сваю чаргу Наталля Качанава адзначыла, што ўжо роўна год, як у краіне ў ходзе адзінага дня галасавання былі выбраны дэпутаты ўсіх узроўняў. У новым складзе працуе і Савет Рэспублікі, кіруючыся дзеючым заканадаўствам і зацверджаным рэгламентам.

Што датычыцца работы экспертнага савета, то з 2021 года праведзена больш за 140 пасяджэнняў. "Мы разглядаем усе законапраекты і ўказы, якія кладуць на стол нам, а далей ідуць на подпіс вам", - адзначыла Наталля Качанава.

Паводле яе слоў, толькі крыху больш за чвэрць разглядаемых дакументаў застаюцца без заўваг і прапаноў з боку экспертнага савета. Усе яны перадаюцца таму органу, які ўносіць на разгляд нарматыўны прававы акт. Напрыклад, ва Урад. "Мы не прымушаем нікога дапрацоўваць. Мы выказваем меркаванні экспертаў. А далей яны ўжо маюць права рабіць, як яны робяць", - расказала Старшыня Савета Рэспублікі.

Аляксандр Лукашэнка даручыў прадоўжыць гэту работу і актывізаваць яе.