Даклад аб рабоце банкаўскай сістэмы

Прэзідэнт Беларусі Аляксандр Лукашэнка 12 жніўня заслухаў даклад аб рабоце банкаўскай сістэмы.

Кіраўнік дзяржавы, звяртаючыся да Старшыні Праўлення Нацыянальнага банка Рамана Галоўчанкі, не так даўно назначанага на гэту пасаду з пасады Прэм'ер-міністра краіны, звярнуў увагу, што чакае ад яго ўзважанага, аб'ектыўнага погляду на стан спраў у эканоміцы ў цэлым. "Не сказаць, што ты цяпер убаку, але ўсё ж такі ў нейкай ступені збоку. І вельмі важна, як вопытнага чалавека, тваё меркаванне па стане эканомікі Беларусі на сённяшні дзень. На што трэба звярнуць увагу перш за ўсё - гэта галоўнае, што ты мне павінен расказаць", - заўважыў Прэзідэнт. 

"І другое. Як я папярэджваў ужо Кіраўніка Адміністрацыі (Адміністрацыі Прэзідэнта. - Заўвага), што наша сённяшняя сустрэча і ваш даклад па сітуацыі ў краіне, у галіне банкаў, фінансаў, не значыць, што мы не сустрэнемся на ўзроўні Прэзідэнта са спецыялістамі і кіраўнікамі нашых банкаў і Нацыянальнага банка перш за ўсё для таго, каб раз і назаўсёды канчаткова заявіць, якую палітыку мы будзем праводзіць у бліжэйшы час і якая мая пазіцыя ў адносінах да Нацыянальнага банка", - дадаў Кіраўнік дзяржавы. 

Паводле яго слоў, адзін з аспектаў, які неабходна дадаткова праясніць, - гэта назначэнне менавіта  Рамана Галоўчанкі на пасаду кіраўніка Нацбанка. "Тут многія выюць, і асабліва збеглыя, "вось, не спецыяліст, ён яго на банк назначыў" і гэтак далей. На ўсе пытанні мы павінны адказаць", - сказаў Прэзідэнт. Наконт работы самога Рамана Галоўчанкі на пасадзе Старшыні Праўлення Нацбанка Кіраўнік дзяржавы звярнуў увагу, што яго дзеянням, рашэнням і стану спраў у банкаўскай сферы рэгулярна даецца экспертная ацэнка. "Тут спецыялісты наглядаюць і за табой таксама", - заўважыў Аляксандр Лукашэнка.

У сувязі з гэтым Прэзідэнт закрануў тэму павелічэння сукупнага прыбытку банкаў у краіне, што можа разглядацца, з аднаго боку, як пазітыўны паказчык, але з другога - ёсць апаска, каб не ўзнікла дысбалансу і банкі не адцягвалі грошы з эканомікі. "Я, праўда, не вельмі разумею, гэта добра ці дрэнна (рост сукупнага прыбытку банкаў. - Заўвага). Калі ты быў Прэм'ер-міністрам, ты гаварыў, што гэта дрэнна - што грошы банкі адцягваюць".

"Вядома, добра, - запэўніў Раман Галоўчанка. - Мы пачалі прыбытак банкаў Урадам браць і накіроўваць іх на фінансаванне эканомікі". 

"Гэта вельмі важна, - падкрэсліў Аляксандр Лукашэнка. - У банках "лішніх" грошай быць не павінна. І прыбытак - усё роўна гэта ад тых, хто гэтыя грошы там захоўвае. У асноўным гэта так. Таму я ў гэтым плане вельмі спадзяюся, што так і будзе. Эканоміка павінна развівацца, і трэба, каб банкаўская сістэма садзейнічала росту эканомікі". 

Прэзідэнт паставіў пытанне аб далейшых дзеяннях адносна крыптавалюты і крыптарынку.

"Крыптарынак, крыптавалюта. Што гэта такое, з чым мы з табой будзем есці гэту праблему? - вобразна выказаўся Кіраўнік дзяржавы, звяртаючыся да Рамана Галоўчанкі. - Як мы ёю скарыстаемся, асабліва цяпер, для таго каб забяспечыць плацяжы? Шмат пра гэта гаворыцца, і ўсё ж не такі развіты ў нас гэты рынак у Беларусі па крыптавалюце. Як мы будзем у далейшым дзейнічаць?"

Аляксандр Лукашэнка адзначыў, што гэта тэматыка абмяркоўвалася яшчэ ў той час, калі Нацбанкам кіраваў Павел Калаур. "Мы ўзнімалі гэта пытанне, да нас айцішнікі звярталіся, што трэба ў гэтым напрамку дзейнічаць. Як мы будзем (у выніку дзейнічаць. - Заўвага)? Гэта для мяне важна і для краіны ў цэлым", - сказаў Прэзідэнт. 

Кіраўнік дзяржавы таксама пацікавіўся, як праходзяць трансгранічныя плацяжы ва ўмовах санкцый (ёсць звесткі, што іх аб'ём нібыта зніжаецца). Размова ішла і пра інфляцыю, якая крыху паскорылася, але працэс застаецца рэгулюемым. Прэзідэнт спытаў, якія дзеянні па далейшым рэгуляванні неабходны, на думку Нацбанка, каб пазбегнуць трапляння ў сітуацыю, з якой будзе складана выйсці. Адной з тэм даклада стаў стан і структура золатавалютных рэзерваў, узровень якіх, як вядома, вырас за апошні час. "Але трэба разумець, што і золата падаражэла", - абазначыў Прэзідэнт адну з прычын росту ЗВР. "Але не толькі за кошт золата, Аляксандр Рыгоравіч", - растлумачыў Раман Галоўчанка. 

Ён далажыў аб тым, як выконваюцца задачы, сфармуляваныя і пастаўленыя Кіраўніком дзяржавы пры кадравых назначэннях. Старшыня Праўлення Нацбанка таксама далажыў аб сітуацыі ў банкаўскай сістэме і на фінансавым рынку ў цэлым. "Вядома, пасля назначэння давялося пачаць з пытанняў дысцыпліны, стараннасці і выбудоўвання новых правіл работы з банкаўскай сістэмай. Да банкаў даведзены прынцып, што няма дрэнных, добрых. Няма такога суб'ектывізму - ёсць тыя, хто выконвае задачы, і тыя, хто гэтыя задачы не выконвае. Прынцып ацэнкі адзін - гэта вынік", - падкрэсліў ён.

"Хацеў бы пачаць, можа, з такога невялікага сімвалічнага моманту..." - пачаў даклад Раман Галоўчанка. 

"Грошы прынёс?" - жартам заўважыў Аляксандр Лукашэнка.

"Я ва Урадзе актыўна займаўся імпартазамяшчэннем і тут вырашыў прадоўжыць гэту тэматыку. Усім вядома, што Нацыянальны банк актыўна выпускае ў абарачэнне памятныя і інвестыцыйныя манеты, у тым ліку з каштоўных металаў. Для мяне было сюрпрызам даведацца, што ўсе яны выпускаліся за мяжой. Па заказе Нацыянальнага банка, але за мяжой. Спачатку ў Еўрасаюзе, потым у дружалюбных краінах: Кітай, Расія, Казахстан", - сказаў Раман Галоўчанка.

Паводле слоў Старшыні Праўлення Нацбанка, пры выпуску ў іншых краінах манет з серабра або золата там жа даводзіцца купляць і метал: "Пры гэтым наша сыравіна - лом каштоўных металаў - застаецца незапатрабаванай. Таму мы з Міністрам фінансаў падумалі: чаму самі не можам зрабіць?"

Раман Галоўчанка звярнуў увагу, што гомельскае прадпрыемства "Крышталь", што працуе з каштоўнымі металамі, крыху дааснасцілі і адчаканілі першую залатую манету, якая называецца "Славянка". Старшыня Праўлення Нацбанка перадаў яе Прэзідэнту Беларусі. "Поўнасцю зроблена ў Беларусі з беларускай сыравіны, калі можна так сказаць", - дадаў ён.

Аляксандр Лукашэнка даручыў перадаць першую манету з беларускай сыравіны ў музей Палаца Незалежнасці. "Першая манета ўсё ж такі - гэта вельмі важна і прынцыпова. І ў новы музей (размова пра ўзводзімы Нацыянальны гістарычны музей. - Заўвага) потым перададзім", - запэўніў беларускі лідар.