Нарада па падрыхтоўцы пасяджэння Вышэйшага Еўразійскага эканамічнага савета і Еўразійскага эканамічнага форуму

Прэзідэнт Беларусі Аляксандр Лукашэнка 19 чэрвеня сабраў нараду па падрыхтоўцы пасяджэння Вышэйшага Еўразійскага эканамічнага савета і Еўразійскага эканамічнага форуму.

Аляксандр Лукашэнка нагадаў, што літаральна праз тыдзень у Мінску пройдуць буйнейшыя для краіны міжнародныя мерапрыемствы гэтага года. Чакаецца ўдзел у іх прадстаўнікоў больш як двух дзясяткаў краін.

"Нагрузка на нас вялікая. Мы павінны абмеркаваць гатоўнасць да гэтага мерапрыемства. Як прымаць гасцей у такім маштабе, колькасці, мы ведаем. Усё павінна быць падрыхтавана са знакам якасці і ў арганізацыйным, і перш за ўсё ў змястоўным плане, - падкрэсліў Прэзідэнт. - Неабходна забяспечыць максімальны ўзровень беларускай гасціннасці (гэта таксама мы ўмеем рабіць), стварыць камфортныя ўмовы для работы і пражывання нашых гасцей. Асаблівая ўвага змястоўнаму напаўненню ўсіх мерапрыемстваў - ад форуму да работы Вышэйшага савета".

Кіраўнік дзяржавы адзначыў, што ў ЕАЭС ёсць што абмяркоўваць, але пасяджэнні дзеля пасяджэнняў нікому не патрэбны. "Парадак дня Вышэйшага савета павінен быць насычаным, прадметным і адпавядаць нашым нацыянальным інтарэсам. Еўразійская эканамічная камісія ўнесла аж 700 лістоў - 4 кілаграмы матэрыялаў. Пры гэтым ледзь ці не ўсе яны прапануюць прыняць без абмеркавання. Калі яны гатовы і ўзгоднены, адпавядаюць нашым інтарэсам, як і іншых дзяржаў, калі ласка. Калі там усё гэтак добра. Калі гэта пустая парода без грама дабаўленай вартасці для саюза, такія пытанні не павінны быць унесены ў парадак дня, - заявіў беларускі лідар. - Я аб гэтым гавару, таму што я як Старшыня буду прапаноўваць гэты парадак дня".

Прыярытэты старшынства Беларусі ў органах Еўразійскага эканамічнага саюза ў 2025 годзе былі выкладзены ў звароце Аляксандра Лукашэнкі да кіраўнікоў дзяржаў - членаў ЕАЭС.

"Яны павінны быць рэалізаваны. Прамысловая кааперацыя, транспартная палітыка, фінансавы рынак, міжнароднае пазіцыянаванне і гандлёвая экспансія на знешнія рынкі, фарміраванне сацыяльнага складніка інтэграцыі - па кожным напрамку патрэбна практычная аддача ад прымаемых рашэнняў і тых дакументаў, якія мы ў выніку падпішам", - падкрэсліў Прэзідэнт.

"Яшчэ раз адзначу: Беларусь была і застаецца перакананым прыхільнікам паглыблення еўразійскай інтэграцыі і пабудовы эфектыўна працуючай агульнай эканамічнай прасторы на аснове даверу і ўзаемаразумення", - заявіў кіраўнік дзяржавы.

На парадку дня нарады - арганізацыйныя пытанні правядзення Еўразійскага эканамічнага форуму і пасяджэння Вышэйшага савета, а таксама абмеркаванне парадку дня саміту і найбольш важных яго пунктаў.

Кіраўнік знешнепалітычнага ведамства Максім Рыжанкоў у час нарады праінфармаваў, што Еўразійскі эканамічны форум пройдзе 26 чэрвеня на базе Мінскага міжнароднага выставачнага цэнтра "Белэкспа". Прадугледжана правядзенне шасці буйных тэматычных блокаў, якія ўключаюць 35 мерапрыемстваў: пленарныя сесіі, круглыя сталы, бізнес-дыялогі і да таго падобнае.

"Па стане на бягучую дату ўжо зарэгістравана каля 2050 удзельнікаў з 29 краін, што сведчыць аб высокай цікавасці да мерапрыемства. У большай ступені прадстаўлены краіны - члены ЕАЭС і краіны (з ліку. - Заўвага) найбольш значных нашых партнёраў у Азіі і Афрыцы", - сказаў Максім Рыжанкоў.