Даклад Міністра адукацыі Андрэя Іванца

Прэзідэнт Беларусі Аляксандр Лукашэнка 3 верасня прыняў з дакладам Міністра адукацыі Андрэя Іванца.

Кіраўнік дзяржавы ва ўступным слове абазначыў некалькі асноўных тэм, па якіх папрасіў Міністра далажыць: вынікі ўступнай кампаніі, забеспячэнне якаснага харчавання ў школах, фізічная падрыхтоўка навучэнцаў і студэнтаў. Прэзідэнта таксама цікавіў працэс стварэння Акадэміі інтэлектуальных тэхналогій, пытанні функцыянавання магістратуры. Яшчэ адна тэма - работа маладых спецыялістаў на месцах, як арганізаваны гэты працэс, чаго, магчыма, не хапае.

Аляксандр Лукашэнка адзначыў, што апошнім часам амаль тыдзень знаходзіўся ў замежных камандзіроўках, а да гэтага ў цэнтры яго ўвагі быў ход уборачнай кампаніі ў вёсцы. "Ад гэтага ніяк нельга было адысці. Таму нібыта пытанні школы і ВНУ адышлі на другі план. Але гэта не значыць, што я не ў курсе, як у нас складваліся справы з пачаткам новага навучальнага года, - сказаў Прэзідэнт. - Зразумела, пытанне ўступнай кампаніі. Як яна прайшла, якія ёсць праблемы майго ўзроўню?"

Кіраўнік дзяржавы таксама прапанаваў пры неабходнасці абмеркаваць тыя ці іншыя арганізацыйныя і кадравыя пытанні.

Пра харчаванне і фізпадрыхтоўку ў школах

Аляксандр Лукашэнка нагадаў пра задачу арганізаваць якаснае харчаванне дзяцей у школах. "Мы дамаўляліся, што трэба зрабіць так, каб мы больш не перажывалі за харчаванне, не абмяркоўвалі на ўзроўні Прэзідэнта. Такая задача перад Урадам, вамі была пастаўлена, - сказаў Кіраўнік дзяржавы. - Я гляджу, мы ўвесь час развіваемся ў тым напрамку, што як бы тут дзецям прапанаваць амаль рэстараннае або яшчэ нейкае меню. Дзяцей трэба проста ў абед нармальна накарміць. Бульбы ў нас хапае, мяса, малака ў нас хапае. Таму сасіскі, каўбасы і гэтак далей. Нешта такое, каб дзеці маглі нармальна паесці".

"Будзем шчырымі, у нас некаторыя сем'і асабліва за харчаваннем дзяцей не сочаць. Таму тое, што яны атрымаюць у школе, - нармальны абед - гэта для дзяцей будзе прымальна і садзейнічаць іх нармальнаму здароўю і развіццю", - адзначыў Прэзідэнт.

Кіраўнік дзяржавы таксама даручыў узмацніць фізпадрыхтоўку: "Школа пакуль у фізічных адносінах недапрацоўвае. Гэта мне і ваенныя кажуць, што кантынгент (тыя, хто прыходзіць у армію) хоць палепшыўся, але ненамнога. Трэба нам неяк нашу моладзь, асабліва дзяцей школьнага ўзросту, узварухнуць добра і ў фізічных адносінах".

"Таму харчаванне, фізічная падрыхтоўка ў школе (у ліку важных пытанняў. - Заўвага). Тое ж самае і ў ВНУ", - дадаў беларускі лідар.

Пра капрамонты школ

Прэзідэнту было даложана аб гатоўнасці ўстаноў адукацыі да пачатку новага навучальнага года. Так, з 1 верасня ў Беларусі функцыянуюць 3,5 тыс. устаноў дашкольнай адукацыі (дзіцячыя сады, яслі), куды прыйшлі 300 тыс. выхаванцаў. Працуюць 2,6 тыс. школ, дзе навучаюцца 1025 тыс. школьнікаў, у тым ліку 87,5 тыс. першакласнікаў. Паводле слоў Міністра, да 1 верасня пашпарты гатоўнасці да пачатку навучальнага года былі падпісаны ва ўсіх школах.

Аляксандр Лукашэнка ставіць задачу завяршыць рэалізацыю плана па капітальным рамонце школ у гэтым годзе: "Чаго б ні каштавала, трэба поўнасцю школы ўзварухнуць і прывесці іх да таго выгляду, у якім мы хацелі б іх бачыць. Калі хтосьці нечага не разумее, своечасова дакладвай. У 2027 год не цягні гэтыя праблемы, іх трэба вырашыць цяпер".

Андрэй Іванец наконт гэтага адзначыў: "Усе губернатары разумеюць гэту задачу, вельмі адказна ставяцца". Ён растлумачыў, што ў бягучым годзе заканчваецца рэалізацыя трохгадовага плана па мадэрнізацыі школ. За гэты час капітальна адрамантавалі больш як 300 школ.

Пра Акадэмію інтэлектуальных тэхналогій

Працэс стварэння Акадэміі інтэлектуальных тэхналогій стаў адной з тэм у час даклада. "Мы павінны зрабіць салідны цэнтр, дзе будуць вучыцца самыя таленавітыя і здольныя людзі. Падкрэсліваю: людзі. Таму гэта не значыць, што мы са школы туды возьмем пасля 11-га класа, нават няхай гэта будуць таленавітыя дзеці, і больш нікога. Гэтага трэба пазбегнуць. Любы (ва ўзросце, не ва ўзросце, маладым, пажылым), калі ён таленавіты і нешта можа зрабіць. Ён павінен прыйсці туды з канкрэтнай прапановай. І пасля таго, як мы ім прадаставім там магчымасці ўдасканальвацца, навучацца і ў лабараторыях нешта ствараць, каб у выніку яны выдалі нам рэальны прадукт, які будзе патрэбны грамадству, нашай эканоміцы, нашай дзяржаве", - сказаў Кіраўнік дзяржавы.

Аляксандр Лукашэнка пацікавіўся, як ідуць справы ў пытанні стварэння гэтай акадэміі, у якой Міністр адукацыі будзе ўзначальваць наглядальны савет і ў практычнай плоскасці вызначаць палітыку.

"Вы - чалавек вучоны. Не проста ў жыцці вам гэта ўсё давалася. Адукаваны, разумны і перспектыўны. І ў навуковых адносінах вы паспрабавалі ўсё гэта. Тое, што трэба ў акадэміі. Вам давядзецца займацца гэтай акадэміяй, кадрамі і гэтак далей", - заўважыў беларускі лідар.

Прэзідэнт адзначыў, што якраз перад гэтай сустрэчай яму паклалі на стол прапановы ў выглядзе праектаў указаў, якія датычацца стварэння акадэміі. Ён заявіў, што ў гэтым пытанні не трэба Урад дадаткова нагружаць, каб ён вызначаў нейкую сістэму, напрамкі або кадры.

"У нас універсітэты працуюць, сістэма зразумелая - пад Міністэрствам адукацыі. Дакладна гэтак жа павінна працаваць акадэмія. Прытым персанальнае далучэнне там Міністра як старшыні наглядальнага савета. Навошта яшчэ кудысьці вышэй узнімаць пытанні гэтай акадэміі? Тым больш што гэта будзе фармалізм адзін, - сказаў Аляксандр Лукашэнка. - Усё роўна вам давядзецца выпрацоўваць гэтыя падыходы і ўносіць ва Урад, калі, як вы мне там прапісваеце, Урад будзе вызначаць нейкія пытанні і напрамкі. Гэта прэзідэнцкая ініцыятыва, прэзідэнцкая фактычна структура. Ясна, што пад гэта і так будуць завязаны і Урад, і Адміністрацыя Прэзідэнта".

Пра дапамогу маладым спецыялістам

Маладых спецыялістаў у Беларусі не трэба, вобразна кажучы, насіць на руках, але ім трэба дапамагаць, дзе гэта неабходна. Такую задачу ставіць Прэзідэнт.

"Я папрасіў, каб мне прадаставілі даныя. Як у іх (маладых спецыялістаў. - Заўвага) справы, што там у нас не хапае? Гэта не значыць, што мы іх на руках павінны насіць. Мяне ніхто не насіў і нават вас ніхто не насіў. Карабкаліся мы па гэтым жыцці самі. Але недзе дапамагчы трэба", - сказаў Кіраўнік дзяржавы.

Пра магістратуру і заходнія стандарты

Асобную ўвагу Аляксандр Лукашэнка ўдзяліў тэме магістратуры. Гэта пытанне Кіраўнік дзяржавы трымае на асабістым кантролі.

"Як мы там сёння працуем? Мы з вамі вызначаліся, што не будзем бегчы за гэтымі заходнімі стандартамі. Але там, дзе ёсць нешта разумнае, мы гэта возьмем. Калі магістратура патрэбна будзе для адукацыі, далейшай вучобы, навуковай дзейнасці, педагагічнай практыкі і іншаземцаў, калі ласка, мы можам прадаставіць такую магчымасць. Але без усялякіх там забяганняў наперад і таго, каб пераймаць вопыт нейкіх заходніх адукацыйных цэнтраў або дзяржаў", - сказаў Прэзідэнт.

"Мы рыхтуем для сябе людзей. Скончыўшы ВНУ, яны павінны атрымаць дыплом аб вышэйшай адукацыі. А потым ужо, у залежнасці ад таго, наколькі гэта нашай дзяржаве патрэбна, мы будзем думаць аб магістратуры. Прыкладна так мы абмяркоўвалі гэту канцэпцыю. Хацелася б даведацца, як практычна гэта рэалізуецца", - абазначыў адно з пытанняў Аляксандр Лукашэнка.