Прынцыпы развіцця прадпрымальніцкай ініцыятывы
Садзейнічанне раскрыццю патэнцыялу суб'ектаў малога і сярэдняга прадпрымальніцтва мае важнае значэнне для ўстойлівага росту эканомікі, дыверсіфікацыі яе галіновай структуры і пераходу да лічбавага развіцця.
Сістэмныя рашэнні, якія прымаюцца Кіраўніком дзяржавы (Дырэктыва № 4 ад 31 снежня 2010 года "Аб развіцці прадпрымальніцкай ініцыятывы і стымуляванні дзелавой актыўнасці ў Рэспубліцы Беларусь", Дэкрэт № 7 ад 23 лістапада 2017 года "Аб развіцці прадпрымальніцтва"), далі магчымасць удасканаліць правілы вядзення бізнесу і дасягнуць значнага прагрэсу.
З 1 студзеня 2023 года ўступіў у сілу Закон Рэспублікі Беларусь № 213-З "Аб ліцэнзаванні". Дакумент заклаў асновы пераходу да новай - лічбавай эры ліцэнзавання. Упершыню рэалізаваны бездакументарны спосаб пацвярджэння права суб'екта гаспадарання на ажыццяўленне ліцэнзуемага віду дзейнасці. Усё, што неабходна - зверыцца з данымі Адзінага рэестра ліцэнзій, які даступны ў сетцы Інтэрнэт.
22 красавіка 2024 года Аляксандр Лукашэнка падпісаў Закон 365-З "Аб змяненні законаў па пытаннях прадпрымальніцкай дзейнасці".
Дакумент замацаваў новую структуру прадпрымальніцкай дзейнасці, дадатковыя інструменты падтрымкі для малога і сярэдняга бізнесу і сістэму стымулаў для маштабавання сваёй справы.
Укараненне інстытута самастойнай прафесійнай дзейнасці адкрыла грамадзянам дадатковыя магчымасці для самарэалізацыі і раскрыцця прадпрымальніцкага патэнцыялу.
Законам таксама замацаваны ўнікальны для постсавецкай прасторы інструмент, які дазваляе індывідуальным прадпрымальнікам у рэжыме "дзень у дзень" трансфармавацца ў статус камерцыйнай арганізацыі, захаваўшы пры гэтым напрацаваны раней бізнес-партфель, уключаючы прадастаўленыя дзяржавай дазволы і ўсе контрагенцкія сувязі.
21 жніўня 2024 года Прэзідэнтам Рэспублікі Беларусь падпісаны Указ № 328 "Аб ажыццяўленні фізічнымі асобамі рамеснай дзейнасці", які ўвайшоў у пакет дакументаў, накіраваных на трансфармацыю прадпрымальніцкай дзейнасці грамадзян.
Дакумент вызначыў асаблівы статус рамеснай дзейнасці як інструмента, які не толькі дае магчымасць стварыць дадатковыя ўмовы для ўключэння творчых грамадзян у эканамічнае асяроддзе, але і фарміруе аснову для адраджэння і развіцця нацыянальных беларускіх традыцый, навыкаў і ўменняў, захавання багатай культурнай спадчыны і аўтэнтычнасці беларускага народа, самабытнасці асобных тэрыторый.
Па даручэнні Аляксандра Лукашэнкі з канца 2021 года ў краіне разгорнута маштабная работа па аптымізацыі адміністрацыйнай нагрузкі на суб'екты гаспадарання і лічбавізацыі адміністрацыйных працэдур.
У ходзе праведзенай інвентарызацыі выяўлены і кансалідаваны ў адзіным пераліку ўсе адміністрацыйныя працэдуры для бізнесу. Адносна большай паловы з іх прынята рашэнне аб аптымізацыі - скарочаны тэрміны, пакет дакументаў, кошт, павялічаны (аж да бестэрміновага) перыяд дзеяння адміністрацыйнага рашэння або зменены парадак ажыццяўлення працэдуры. На пачатак 2025 года больш за чвэрць усіх адміністрацыйных працэдур даступны для ажыццяўлення ў лічбавым фармаце.
Для зручнасці бізнесу інфармацыя аб адміністрацыйных працэдурах кансалідавана ў Рэестры адміністрацыйных працэдур. Рэестр змяшчае інфармацыю аб парадку ажыццяўлення, кошце адміністрацыйнай працэдуры, спосабе аплаты, пераліку неабходных дакументаў, рэжыме работы ўпаўнаважаных органаў і іншыя звесткі. Прадастаўленне звестак з рэестра забяспечана праз сетку Інтэрнэт у кругласутачным рэжыме на бязвыплатнай аснове.
Новае гучанне набыў дыялог улады і бізнесу. Указам № 163 ад 26 красавіка 2021 года актуалізаваны падыходы да арганізацыі работы Савета па развіцці прадпрымальніцтва.
Пастаянна дзеючыя дарадчыя структуры з удзелам прадстаўнікоў дзелавога асяроддзя створаны практычна пры ўсіх рэспубліканскіх органах дзяржаўнага кіравання (грамадска-кансультатыўныя (экспертныя) саветы па развіцці прадпрымальніцтва), мясцовых органах улады (рэгіянальныя саветы па развіцці прадпрымальніцтва).
З мэтай прадаўжэння мэтанакіраванай работы па стварэнні спрыяльных умоў для фарміравання сектара малога і сярэдняга прадпрымальніцтва, які дынамічна развіваецца, Урадам Рэспублікі Беларусь зацверджана стратэгія развіцця малога і сярэдняга прадпрымальніцтва "Беларусь - краіна паспяховага прадпрымальніцтва" на перыяд да 2030 года.
Прынятыя меры далі магчымасць сфарміраваць атмасферу новага бізнес-клімату на аснове дзелавых адносін і ўзаемнага даверу дзяржавы і бізнесу, спрасціць не толькі працэс адкрыцця новага бізнесу, але і ўмовы яго вядзення.