Сустрэча з Прэм'ерам Дзяржсавета КНР Лі Кэцянам

Прэзідэнт Беларусі Аляксандр Лукашэнка 1 сакавіка ў Пекіне сустрэўся з Прэм'ерам Дзяржсавета КНР Лі Кэцянам. Месцам сустрэчы стаў будынак Дома народных сходаў. Гэта будынак Парламента КНР, размешчаны ў заходняй частцы плошчы Цяньаньмэнь. Тут традыцыйна праводзяцца афіцыйныя сустрэчы і прыёмы, пасяджэнні і з'езды.

Кіраўнік дзяржавы падзякаваў кітайскаму боку за каласальную дапамогу і падтрымку беларускаму народу і краіне. Ён адзначыў, што на пасадзе Прэзідэнта гэта яго 13-ты візіт у Кітай. У свой час менавіта ў Кітаі пераймалі вопыт па шэрагу напрамкаў, у першую чаргу ў пытанні стварэння свабодных эканамічных зон. "Мы ўсё лепшае (30 гадоў таму пачалі гэты працэс) пераймалі ў вас. Мы шмат зрабілі з таго часу. І жамчужынай, вянцом нашых адносін стаў (індустрыяльны парк. - Заўвага) "Вялікі камень" - буйны міжнародны праект, які мы са Старшынёй КНР Сі Цзіньпінам адкрылі пад Мінскам. І ён назваў гэты праект жамчужынай Шаўковага шляху, - адзначыў Кіраўнік дзяржавы. - Тады я сказаў, што мы ніколі не застанёмся ў даўгу перад вялікім кітайскім народам. Так было заўсёды ў гісторыі нашага народа. Я працаваў з трыма старшынямі КНР: Цзян Цзэмінем, Ху Цзіньтаа і цяперашнім - Сі Цзіньпінам".

Аляксандр Лукашэнка падкрэсліў, што пры непасрэдным удзеле Лі Кэцяна бакі дасягнулі практычна немагчымага. Раней бакі марылі аб $5 млрд тавараабароту. Сёння ж гэты паказчык практычна ўжо дасягнуў $6 млрд і працягвае расці.

"У нас няма закрытых тэм для супрацоўніцтва. Мы супрацоўнічаем па ўсіх напрамках. І, самае галоўнае, мы ніколі не ставілі перад сабой задачу, каб дружыць і працаваць супраць трэціх краін, каго б там ні было. Мы робім усё ў інтарэсах сваіх народаў - беларускага і кітайскага. Так будзе і ў далейшым", - запэўніў беларускі лідар.

Ён адзначыў, што аб цяперашніх перагаворах з кіраўніцтвам Кітая кіраўнікі дзяржаў дамовіліся на сустрэчы ў Самаркандзе восенню мінулага года. "Мы паспрабуем акрэсліць новыя гарызонты нашага супрацоўніцтва", - заявіў Прэзідэнт Беларусі.

Аляксандр Лукашэнка таксама павіншаваў кітайскі бок з паспяховым правядзеннем чарговага з'езда Кампартыі Кітая: "Мы ўсе вельмі ўважліва назіралі за развіццём сітуацыі, за гэтым з'ездам. Мы бачым сітуацыю, якая складваецца на міжнароднай арэне. І мы віншуем вас са спакойным, удумлівым рухам наперад. Вы ідзяце сваім шляхам, вы нікому не перашкаджаеце і не рэагуеце на дробныя ўкусы, якія то злева, то справа накіраваны супраць КНР. Гэта цалкам адпавядае духу і характару кітайскага народа". 

"Мы вам жадаем поспехаў. У гэтым наш прагматызм. Таму што будзе моцным Кітай - будзе моцнай і будзе развівацца і наша Беларусь, - падкрэсліў беларускі лідар. - У нас прапаноў шмат, планаў вельмі шмат, якія будуць выгадныя і Беларусі, і Кітаю". Але галоўнае ў тым (я яшчэ Цзян Цзэміню гаварыў пра гэта, потым Ху Цзіньтаа): у вас ёсць у цэнтры Еўропы мірная, спакойная Беларусь. Давайце разам будзем інтэнсіфікаваць нашы адносіны на карысць нашых народаў. Там няма закрытых тэм для вас, няма закрытых рэгіёнаў. Прыязджайце, будзем супрацоўнічаць. Наша дружба стала ўсепагоднай, усёабдымнай. І ў гэтым ключы мы гатовы дзейнічаць і ісці насустрач кітайскаму народу".

Лі Кэцян у сваю чаргу адзначыў: "Нашы адносіны выбудаваны на аснове ўзаемнай павагі, даверу, а таксама супрацоўніцтва і ўзаемнага выйгрышу. Практычнае супрацоўніцтва паступова расце. Нашы адносіны маюць вельмі шырокія перспектывы развіцця, - сказаў ён. - Упэўнены, што кітайска-беларускія адносіны развіваюцца на аснове шматгадовай дружбы".

Пасля сустрэчы з Прэм'ерам Дзяржсавета КНР Прэзідэнт Беларусі на плошчы Цяньаньмэнь усклаў вянок да Помніка народным героям. 

Прагучалі дзяржаўныя гімны Беларусі і КНР, пасля чаго пад урачыстую мелодыю "Кветкі для герояў" да падножжа помніка быў ускладзены вянок у колерах Дзяржаўнага сцяга Рэспублікі Беларусь. Завяршэнне цырымоніі сімвалізавала ўрачыстая мелодыя "У гонар герояў".

Помнік на плошчы Цяньаньмэнь пабудаваны ў сярэдзіне XX стагоддзя ў памяць аб героях, якія аддалі жыццё ў рэвалюцыйнай барацьбе кітайскага народа ў XIX-XX стагоддзях. Вышыня абеліска складае 37,9 метра, што параўнальна з дзесяціпавярховым домам. На п'едэстале знаходзяцца восем барэльефаў з белага мармуру з выявамі рэвалюцыйнай барацьбы кітайцаў у перыяд з 1840 года да заснавання КНР у 1949 годзе. На мануменце высечана рукапісная цытата Маа Цзэдуна: "Вечная слава народным героям!"