Сустрэча са Старшынёй Дзяржаўнай Думы Расіі Вячаславам Валодзіным

Адносіны Беларусі і Расіі нарэшце развіваюцца адкрыта, прынцыпова і сумленна. Аб гэтым Прэзідэнт Беларусі Аляксандр Лукашэнка заявіў 2 снежня на сустрэчы са Старшынёй Дзяржаўнай Думы Расіі Вячаславам Валодзіным.

"Мы з Вамі вельмі даўно знаёмы. Увогуле, аднадумцы, але сустракаемся афіцыйна першы раз. У гэтым нейкая дзіўнасць. Але я думаю, што мы навярстаем, калі ёсць нешта ўпушчанае. Хоць, як мы сёння бачым, наўрад ці мы можам сябе ў нечым папракнуць. Нашы адносіны - Беларусі і Расіі - нарэшце развіваюцца адкрыта, прынцыпова, сумленна", - заявіў Кіраўнік дзяржавы.

Прэзідэнт таксама адзначыў, што ў адносінах дзвюх краін цяпер "не адчуваецца нейкіх патаемных плыней". "Мы вельмі рады гэтаму. Кажуць, што нешта звонку на нас паўплывала. Але на нас звонку заўсёды нешта ўплывае, на некага мы ўплываем. Справа не ў гэтым. Сутнасць у тым, што мы разумеем, што ў гэтым свеце трэба захаваць тую цывілізацыю, якая існавала спрадвеку і існуе сёння на нашай агульнай Айчыне. Калі мы гэтага не зробім, мы гэту цывілізацыю загубім. Няхай сёння выюць, крычаць на Захадзе, што мы ставім перад сабой такія мэты, але гэта так", - падкрэсліў Кіраўнік дзяржавы.

Аляксандр Лукашэнка растлумачыў, што пад агульнай цывілізацыйнай прасторай разумеецца тэрыторыя Беларусі і Расіі, дзе мірна жывуць прадстаўнікі вялікай колькасці розных нацыянальнасцей. "І ў гэтым сутнасць нашай цывілізацыі - што мы нікога не прыгняталі, не прыгнятаем і не збіраемся прыгнятаць, у адрозненне ад іх", - звярнуў увагу Прэзідэнт. На яго думку, у гэтай жа прасторы павінна знаходзіцца і Украіна. Беларускі лідар выказаў упэўненасць, што ўкраінскі народ "адстроіць абстаноўку і выраўнуе сітуацыю", каб гэта стала менавіта так.

Аляксандр Лукашэнка адзначыў, што знешнія дэструктыўныя сілы паводзяць сябе агідна і брыдка. "Мы гэта бачым. І па Беларусі не атрымалася імгненна задушыць у мінулым годзе. Пачалося павольнае ўдушэнне. Зразумела, што яно ў агульным кантэксце барацьбы супраць Расійскай Федэрацыі, супраць тых сяброў, якія сёння вакол Расіі і Беларусі", - сказаў Кіраўнік дзяржавы.

"У нас рашучая пазіцыя ў гэтым плане. Мы павінны не проста выстаяць. Мы павінны развівацца як мае быць, рухацца наперад, паказваючы ім, што мы і без іх абыдземся. Для гэтага ў нас ёсць усё. Я ўпэўнены, што гэта - агульная пазіцыя Дзяржаўнай Думы і Вас як кіраўніка", - заявіў Прэзідэнт.

"Таму вы не перажывайце за Беларусь. Мы пакуль тут трымаемся", - прадоўжыў беларускі лідар. Ён адзначыў, што ў Расіі цяпер гавораць, што беларусы ў гэтым глабальным процістаянні трымаюцца, як у свой час трымалася Брэсцкая крэпасць. "Добры прыклад. Мы ўжо не будзем Брэсцкай крэпасцю, асаджваць нас ніхто не будзе. Але калі людзі не разумеюць нас, мы паспрабуем ім растлумачыць, што мы і робім разам з расіянамі", - сказаў Аляксандр Лукашэнка.

На сустрэчы з Вячаславам Валодзіным Прэзідэнт Беларусі расказаў, што пастаянна знаходзіцца ў кантакце са сваім расійскім калегам Уладзімірам Пуціным.

"Мы пастаянна ў кантакце, інфармуем адзін аднаго аб сітуацыі, плануем нашы дзеянні на перспектыву. Думаю, што ў канцы месяца мы яшчэ раз зверым карты - тое, што адбываецца цяпер, і вызначым нашу будучыню на наступны год", - сказаў беларускі лідар.

Аляксандр Лукашэнка таксама расказаў, што ў хуткім часе плануецца правядзенне перагавораў на ўзроўні кіраўнікоў дзяржаў постсавецкай прасторы. Тым больш што ў гэтым годзе адзначаецца 30-годдзе ўтварэння СНД, а першая ў гісторыі гэтага аб'яднання сустрэча кіраўнікоў краін СНД адбылася 30 снежня 1991 года ў Мінску.