Сустрэча з расійскім бізнесменам Уладзімірам Патаніным

Кіраўнік беларускай дзяржавы Аляксандр Лукашэнка 8 верасня на сустрэчы ў Мінску прапанаваў расійскаму бізнесмену Уладзіміру Патаніну, кіраўніку кампаній "Інтэррос" і "Нарнікель", больш цеснае супрацоўніцтва з Беларуссю.

"Улічваючы, што "Інтэррос" - гэта не толькі "Нарыльскі нікель", гэта шматгаліновая структура, у нас ёсць аб чым весці размову. Думаю, што ёсць судакрананне многіх інтарэсаў. І я прасіў нашага Прэм'ер-міністра, каб ён дэталёва Вам давёў асноўныя напрамкі развіцця Беларусі і тыя кропкі, дзе мы можам супрацоўнічаць, - сказаў Прэзідэнт. - Мы адкрыты для супрацоўніцтва. І хацелі б, каб Ваша кампанія (паспяховая кампанія, нават у гэты складаны час) супрацоўнічала з Беларуссю".

Аляксандр Лукашэнка адзначыў, што Уладзімір Патанін - чалавек, дасведчаны ў многіх пытаннях, і ў тым ліку сам цудоўна ведае напрамкі, па якіх можна развіваць супрацоўніцтва: "Кар'ерныя самазвалы. Дзіўна для мяне, аказалася, і шыны цікавяць - нашай "Белшыны" вытворчасць. І агульныя праекты па абслугоўванні і стварэнні новай тэхнікі ў Краснаярскім краі - гэта таксама цікавы для нас, перспектыўны праект. Вы шматгаліновік у сваёй структуры - там ёсць і гуманітарны напрамак, і IT-сфера. Нешта мы ўмеем рабіць у Беларусі. Вы таксама выдатна ведаеце, што мы можам рабіць".

Кіраўнік дзяржавы таксама звярнуў увагу, што Уладзімір Патанін мае і беларускія карані: "Мы ж землякі па сваіх каранях. Дзядуля ў Вас з Магілёўшчыны".

"Я на чвэрць беларус. Так, ён сапраўдны селянін быў. Карані ёсць", - пацвердзіў Уладзімір Патанін.

"Усё да таго, каб Вы звярнулі ўвагу на Беларусь і мы больш цесна з Вамі ў гэтым плане супрацоўнічалі", - сказаў Аляксандр Лукашэнка.

Уладзімір Патанін адзначыў, што доўга абдумваў перад прыездам у Беларусь, якія сферы ўяўляюць узаемны інтарэс для супрацоўніцтва. "Паверце, мы сур'ёзна разглядалі ўсе магчымасці. І я вельмі рады, што ў ходзе паездкі ўдаецца агульныя планы ператварыць ужо ў канкрэтныя праекты", - сказаў ён.

Кіраўнік кампаній згадаў аб падпісаным напярэдадні пагадненні аб супрацоўніцтве паміж "Нарнікелем" і БЕЛАЗам з мэтай аб'яднаць намаганні па развіцці навуковага і тэхналагічнага патэнцыялу для стварэння горнай тэхнікі новага пакалення, укаранення беспілотных тэхналогій для горнай здабычы і іншых інавацый. Прадугледжваецца стварэнне сумеснага прадпрыемства для рэалізацыі гэтых планаў, а таксама прадпрыемства з паўнапрофільнай рамонтнай базай з мэтай развіцця вытворчасці, рамонту і абслугоўвання падземнай горнай тэхнікі.

"Гэта нам дае магчымасць не толькі вырашыць пытанне насычэння горнай тэхнікай нашага прадпрыемства. Сумеснае супрацоўніцтва дасць магчымасць стварыць новую лінейку тэхнікі, якая, па нашых разліках, нашых надзеях, будзе паспяхова канкурыраваць з лепшымі ўзорамі. Таму што мы дабаўляем туды элементы работы, звязаныя з беспілотнымі праектамі, з новымі тыпамі рухавікоў - больш эканамічнымі, бяспечнымі. І наогул паспрабавалі злучыць наша супрацоўніцтва ў галіне традыцыйнай горнай тэхнікі і іншых галінах з распрацоўкамі ў галіне штучнага інтэлекту, работы з вялікімі данымі", - падкрэсліў Уладзімір Патанін.