Сустрэча з Прэзідэнтам Расіі Уладзімірам Пуціным

Прэзідэнты Беларусі і Расіі Аляксандр Лукашэнка і Уладзімір Пуцін 2 верасня правялі сустрэчу ў Пекіне.

"Я рады з вамі сустрэцца. Абмеркаваць некаторыя пытанні і ў рамках Шанхайскай арганізацыі (у кітайскім Цяньцзіні 31 жніўня - 1 верасня адбыўся саміт ШАС. - Заўвага). Я заўсёды гэта прызнаю і падкрэсліваю, што дзякуючы вам і Кітайскай Народнай Рэспубліцы мы - адзіная еўрапейская краіна - знаходзімся ў гэтай сям'і. Гэта для нас вельмі важна, - сказаў Прэзідэнт Беларусі. - Мы мелі магчымасць з усімі прэзідэнтамі перагаварыць. Нават з Прэм'ер-міністрам Індыі Нарэндрам Модзі. Даўно мы з ім не сустракаліся. Абмяняліся некаторыі рэчамі, пагаварылі. Гэта таксама вельмі важна".

Аляксандр Лукашэнка таксама падкрэсліў асаблівую важнасць для Беларусі адносін з Расіяй: "Вы ж разумееце, што Расію нам ніхто не заменіць. Таму вельмі важна, што мы сёння сустракаемся".

"Я ведаю, што вы падтрымалі ініцыятыву Кітая па глабальным кіраванні", - сказаў Кіраўнік беларускай дзяржавы, звяртаючыся да Пуціна.

Расійскі лідар у адказ пацвердзіў, што гэта сапраўды так.

"Добрая. Галоўнае - роўнасць. Як заўсёды, справядлівасць", - падкрэсліў Аляксандр Лукашэнка.

Прэзідэнт Беларусі расказаў, што аб ініцыятыве размова ішла і на яго сустрэчы ў Пекіне з членам Пастаяннага камітэта Палітбюро ЦК Кампартыі Кітая Цай Цы: "Я, адзінае, у канцы заўважыў: галоўнае, каб Кітай не саскочыў з гэтай ініцыятывы, каб яно так і было. А то, ведаеце, вырастуць, вялікімі стануць, потым на глабалізм пакутуюць".

Аляксандр Лукашэнка падзяліўся, што ў адказ Цай Цы заявіў: "Не, гэта чацвёртая наша ініцыятыва, мы свята будзем яе выконваць".

Кіраўнік дзяржавы згадаў і аб парадзе ў Пекіне 3 верасня ў гонар 80-годдзя Перамогі над японскім мілітарызмам і заканчэння Другой сусветнай вайны: "Што датычыцца парада, яны былі ў нас у Маскве. Святкавалі з намі нашу Перамогу (размова аб прысутнасці Старшыні КНР Сі Цзіньпіна на парадзе 9 мая бягучага года ў Маскве. - Заўвага). Вядома, мы, як бы ні было складана, павінны былі тут пабываць. І дзякуй, што запрасілі на гэты парад. Усё ж такі больш за тры дзясяткі толькі кіраўнікоў дзяржаў будзе на парадзе", - сказаў Аляксандр Лукашэнка.

"Праўда, будзе горача, Уладзімір Уладзіміравіч. Пад 40, 35 (градусаў. - Заўвага). Нават вам будзе горача. Я ўжо думаю, як там нам на сонцы на гэтым пастаяць. Але, кажуць, яны там забяспечаць (умовы на трыбуне, каб было больш камфортна. - Заўвага)", - звярнуў увагу беларускі лідар.

Вяртаючыся да тэмы двухбаковых адносін, Аляксандр Лукашэнка канстатаваў, што ў гэтым плане зусім няшмат праблемных пытанняў. "Дзіўна. Я так рэвізаваў напярэдадні. У нас менш пытанняў (амаль няма), чым з Кітаем. Хаця і ў Кітая... Вось сёння мы тры праблемы выявілі. Я вам раскажу потым. Гатовы ў гэтым напрамку развівацца".

Кіраўнік беларускай дзяржавы даў станоўчую ацэнку сустрэчы лідараў Расіі і ЗША, якая адбылася раней на Алясцы. "Я вас віншую. Разам з Дональдам Трампам вы правялі добрую сустрэчу на Алясцы. Мы вам апладзіравалі вельмі. З двух бакоў (не трэба гаварыць "нехта выйграў, прайграў") удвух вельмі здорава спрацавалі. Я глядзеў па Украіне - крыць няма чым. Толькі крычаць там на захад ад нас: "Дрэнна, дрэнна!" Ну, ім увесь час дрэнна. Я думаю, і яны паразумнеюць і далучацца да ініцыятыў, якія вы абазначылі з Прэзідэнтам ЗША", - сказаў ён.

Аляксандр Лукашэнка запэўніў свайго калегу Уладзіміра Пуціна ў падтрымцы Расіі: "Працуем разам на ўсіх франтах. Вы ведаеце. І будзем працаваць. Мы, калі Прэзідэнт ЗША патэлефанаваў (маецца на ўвазе праведзеная раней тэлефонная размова Аляксандра Лукашэнкі і Дональда Трампа. - Заўвага), абмяркоўвалі гэту праблему. Я яму сказаў: "Мы - адна краіна. У прынцыпе, Расія ў адзіночку ваюе. Мы як можам падтрымліваем і будзем падтрымліваць". Публічна аб гэтым гавару".

"Гэта бяда (маецца на ўвазе канфлікт ва Украіне. - Заўвага). А хто мае рацыю, хто вінаваты - час пакажа. Яшчэ дзякуй скажуць многія-многія, асабліва ў Еўропе, што зноў у гэты складаны час нам даводзіцца спыняць нацызм, які мог перарасці ў фашызм. Таму, Уладзімір Уладзіміравіч, будзем разам да канца сваю ролю і функцыю выконваць", - дадаў Прэзідэнт Беларусі.

Рэагуючы на словы Аляксандра Лукашэнкі, што Расію для Беларусі ніхто не заменіць, Уладзімір Пуцін заявіў: "І Беларусь ніхто не зможа замяніць для Расіі. У нас вельмі блізкія адносіны".

Ён таксама адзначыў, што і ў асабістым плане адносіны паміж лідарамі краін добрыя, але важна тое, што вынік сумеснай работы ў наяўнасці з пункту гледжання эканамічнага росту і развіцця супрацоўніцтва. Ёсць шмат напрамкаў у сферы кааперацыі, перш за ўсё ў прамысловасці.

"Дзе б мы ні сустракаліся, заўсёды знойдзем, аб чым пагаварыць", - сказаў расійскі лідар.

Прэзідэнт Расіі адзначыў, што аб'ём тавараабароту паміж краінамі ўжо складае звыш $50 млрд і супастаўныя маштабы супрацоўніцтва ў Расіі - усяго з некалькімі краінамі. І аб гэтым факце ён нават сказаў на сустрэчы ў Кітаі з адным з замежных калег.

"Што гэтым хачу сказаць? Што ўсё ж такі нашы сустрэчы дарма не праходзяць", - падкрэсліў Уладзімір Пуцін.

"Вельмі рады вас бачыць. Мы толькі што папрацавалі ў рамках ШАС. Заўтра прымем удзел у парадзе Перамогі, якая азнаменавала заканчэнне Другой сусветнай вайны. Гэта ўсё таксама наша з вамі агульная справа, у дадзеным выпадку разам з кітайскімі нашымі сябрамі. І ёсць магчымасць перагаварыць па нашых двухбаковых адносінах", - дадаў Прэзідэнт Расіі.