Сустрэча з губернатарам Валагодскай вобласці Расіі Георгіем Філімонавым

Прэзідэнт Беларусі Аляксандр Лукашэнка 25 жніўня сустрэўся з губернатарам Валагодскай вобласці Расіі Георгіем Філімонавым.

Сваю сустрэчу з кіраўніком расійскага рэгіёна Кіраўнік дзяржавы пачаў са згадвання вядомай песні "Песняроў" - беларуска-расійскага калектыву, як сказаў аб ім Прэзідэнт. Дзякуючы іх кампазіцыі "Волагда" многія ў Беларусі і не толькі асацыіруюць гэты расійскі горад, рэгіён і яго жыхароў менавіта з гэтай песняй. "У тым ліку і дзякуючы расійска-беларускаму, можна сказаць, калектыву "Песняры" вы сталі самымі вядомымі і блізкімі для Беларусі людзьмі. Мы гэтаму рады", - сказаў Аляксандр Лукашэнка.

Ён растлумачыў, чаму менавіта так назваў гэты калектыў і якую ролю тут адыгрывае гісторыя яго развіцця ў перыяд пасля распаду Савецкага Саюза. "Давялося адраджаць гэты калектыў. Пра гэта мала хто цяпер гаворыць. Але ў часы буйнога нацыяналізму ў Беларусі (а ўсё ж такі ён у нас працвітаў некалькі гадоў, пару гадоў да выбрання Прэзідэнта) ад усяго рускага, расійскага спрабавалі тут адмовіцца некаторыя. Адмовіліся і (спрабавалі. - Заўвага) грамадства прымусіць. Але, як бачыце, грамадства не ўспрыняло гэты пасыл".

Аляксандр Лукашэнка расказаў, што ў пачатку свайго прэзідэнцтва сустракаўся з удзельнікамі калектыву, быў добра знаёмы з Уладзімірам Мулявіным, які ў той няпросты творчы перыяд вельмі прасіў дапамагчы зноў вярнуцца на сцэну. "Вядома, мы зрабілі ўсё для таго, каб "Песняры" вярнуліся", - сказаў Кіраўнік дзяржавы. Ён адзначыў, што песню "Волагда" ў выкананні гэтага калектыву ведаюць і вельмі цэняць, любяць як у самім горадзе, у вобласці, так і ў Беларусі. "Уся Расія і Беларусь ведаюць і любяць творчасць "Песняроў", у тым ліку і гэту, здавалася б, простую песню, але якая стала вялікай. Сапраўды, усё вялікае ў простым", - сказаў беларускі лідар.

Звяртаючыся да Георгія Філімонава, Прэзідэнт заўважыў, што гэта першы яго візіт у Беларусь. "Непарадак. Ну як? Побач, родныя людзі - і першы раз у нас. Але я думаю, гэта толькі пачатак, і вы, бываючы ў Маскве або дзе-небудзь бліжэй да нас, заўсёды знойдзеце час для таго, каб наведаць Беларусь, - дадаў ён. - І лішні раз не толькі нагадаць пра вялікую Валагодчыну і пра сябе (гэта таксама важна), але і прарэвізаваць, як усё ж такі выконваюцца тыя дамоўленасці, якіх мы з вамі дасягнём".

Кіраўнік дзяржавы запэўніў, што з беларускага боку ў гэтым плане ніякіх праблем быць не павінна, і звярнуў увагу на ключавыя фактары, дзякуючы якім гэта ўзаемадзеянне будуецца на трывалай аснове, з'яўляецца надзейным і доўгатэрміновым. "Па-першае, гэта ўдзячнасць губернатарам за тое супрацоўніцтва, якое мы сёння маем. Не было б вас, не было б і гэтага супрацоўніцтва, асабліва ў былыя часы. Яны былі не такія простыя і светлыя ў нашых адносінах, як цяпер. Сапраўды, праблемныя часы аб'ядноўваюць людзей. Напэўна, беларусаў з расіянамі ў тым ліку, і кіраўнікоў нашых дзяржаў", - сказаў Аляксандр Лукашэнка.

Беларускі лідар асабліва адзначыў важнасць супрацоўніцтва з расійскімі рэгіёнамі, у тым ліку з цэнтральнай яе часткі. "Па-другое, для нас вельмі важна супрацоўніцтва з вамі, - падкрэсліў ён. - Вялікая павага нашага народа да рускага народа. Мне нават як чалавеку савецкаму цяжка вымаўляць гэта - што там рускія, беларусы... Мы адзін народ фактычна. Ад аднаго кораня ўзялі пачатак, нарадзіліся, мы падобныя абсалютна адзін да аднаго, у нас прынцыпы адны і тыя ж, мы развіваемся так, як павінны развівацца славянскія народы. Мы хацелі б, каб у нас былі самыя добрыя і цёплыя адносіны".

Кіраўнік дзяржавы звярнуў увагу, што за апошнія пяць гадоў тавараабарот паміж Беларуссю і Валагодскай вобласцю значна вырас. "Аб'ёмы тавараабароту добрыя. Але ўсё ж такі я папрасіў маіх памочнікаў, каб яны прааналізавалі сітуацыю. Каб я мог вызначыць некаторыя напрамкі супрацоўніцтва з вамі", - звярнуўся Прэзідэнт да губернатара Валагодскай вобласці.

Аляксандр Лукашэнка канстатаваў, што Беларусь - машынабудаўнічая краіна, таму пастаўляе шмат тэхнікі на экспарт. "Валагодчына набывае розныя віды нашай тэхнікі, знаёма з імі. Вядома, у любой тэхнікі ёсць пэўныя недахопы. Але мы вам удзячныя за тое, што вы ацанілі нашу тэхніку і лічыце яе адной з прымальных па цане і якасці для вашай вобласці", - дадаў беларускі лідар.

У сувязі з гэтым ён закрануў тэму трактарабудавання: "Трактар вельмі любім у вашай вобласці і Расіі ў цэлым. Выпускаюцца каля, як мяне інфармуюць, дзесяці мадыфікацый і прыкладна столькі ж спецмашын на базе нашых трактароў. Мы гатовы да пашырэння гэтай лінейкі і зацікаўлены ў развіцці сумесных вытворчасцей".

Паводле слоў Прэзідэнта, беларускі бок таксама гатовы прапанаваць індывідуальныя фінансавыя праграмы для Валагодскай вобласці і прадугледзець сэрвіснае абслугоўванне ўсёй той тэхнікі, якая будзе працаваць у рэгіёне.

"Гэта нават абмяркоўвацца не павінна, і я нават пра гэта гаварыць не павінен. Мы вызначыліся: калі мы тэхніку некуды прадаём... Слухайце, без сэрвісу хто яе купляць будзе? - задаў заканамернае пытанне кіраўнік дзяржавы. - Таму хаця б асноўнае сэрвіснае абслугоўванне трэба імгненна рабіць, каб людзі разумелі, куды звярнуцца для таго, каб замяніць якую-небудзь шасцярэньку, якая выйшла са строю, або рухавік".

"Валагодчына, як і ўся Расія, постсавецкая прастора, Беларусь, зацікаўлена ў пастаўцы ліфтаў. Таму што ідзе масавая проста замена ліфтаў. Мы гатовы з вамі працаваць", - абазначыў яшчэ адзін напрамак Аляксандр Лукашэнка.

Кіраўнік дзяржавы запэўніў губернатара, што Беларусь таксама гатова супрацоўнічаць з Валагодскай вобласцю ў сферы харчавання. "Я ведаю, што вы і так паспяховыя ў гэтых адносінах, але ўсё ж такі вобласць паўночная (адносна паўночная). Магчыма, якія-небудзь прадукты харчавання вам патрэбны. Вы скажыце - мы гатовы з вамі супрацоўнічаць", - сказаў Аляксандр Лукашэнка.

Сярод напрамкаў супрацоўніцтва Прэзідэнт назваў будаўніцтва. "Нашы магчымасці вы ведаеце, мы гатовы працаваць з вамі не толькі ў галіне будаўніцтва, але і аддзелачных работ, і перш за ўсё аказваць праектныя паслугі. У нас вельмі магутны сектар, які займаецца праектаваннем і прамысловых прадпрыемстваў, і грамадскіх будынкаў, і жылля. Калі будзе ў вас неабходнасць, мы гатовы з вамі ў гэтым напрамку працаваць", - адзначыў ён.

Беларускі лідар згадаў і гуманітарнае супрацоўніцтва, звярнуўшы ўвагу на тое, што Валагодская вобласць нямала робіць для абароны гістарычнай памяці. "Вы ведаеце нашу палітыку ў Беларусі. Мы не зносім помнікі - мы іх будуем, - падкрэсліў Аляксандр Лукашэнка. - І такія манументы гіганцкія, як "Брэсцкая крэпасць", "Хатынь", "Ала" і многія-многія мемарыялы, вы заўсёды можаце прыехаць наведаць. І не толькі гэтыя. Азнаёміцца вашы людзі могуць і з гісторыяй Беларусі. Мы гатовы вас заўсёды прыняць".

Аляксандр Лукашэнка нагадаў, што ў Чарапаўцы быў адкрыты помнік выпускнікам Лепельскага і Чарапавецкага ваенных вучылішчаў, сярод якіх ёсць Героі Савецкага Саюза. Георгій Філімонаў падтрымаў гэту ініцыятыву і прыняў удзел у яго адкрыцці. "Помнік, які вы адкрылі, мы вельмі цэнім. І нашы людзі, бываючы там, і турысты прыходзяць да гэтага помніка. Нам трэба яшчэ раз звярнуць на гэта ўвагу беларусаў", - канстатаваў Прэзідэнт.

У сваю чаргу Георгій Філімонаў падзякаваў Кіраўніку беларускай дзяржавы за такія "важныя, цёплыя, правільныя, праграмныя" словы, сказаныя ў пачатку сустрэчы. Ён пацвердзіў, што сапраўды ўпершыню ў Мінску і, знаходзячыся тут, адчувае сябе нібыта дома. "Так, мы прадстаўнікі адзінага дрэва, адзінага славянскага суперэтнасу, носьбіты аднаго гістарычнага, культурнага кода, у нас агульная спадчына, агульная Перамога (мы сустракаемся ў 80-годдзе Вялікай Перамогі), і мы вельмі цэнім подзвіг нашых продкаў, якія стварылі саму магчымасць нам жыць, нараджаць дзяцей, развівацца і перадаваць гэту спадчыну з пакалення ў пакаленне", - падкрэсліў Георгій Філімонаў.

Гэту агульнасць, паводле яго слоў, можна ахарактарызаваць савецкай спадчынай, як гэта зрабіў Прэзідэнт Беларусі, і з ім салідарны Георгій Філімонаў. "Я таксама часта спатыкаюся, калі раптам нехта мне намякае або я вымушаны вымаўляць дзяжурныя, дыпламатычныя фразы, рабіць рэверансы і называць беларусаў іншаземцамі. Не магу нават унутрана сабе гэта дазволіць", - сказаў кіраўнік Валагодскай вобласці.

"Мы з вамі, з нашымі беларускімі калегамі, братамі, паплечнікамі, адстойваем гістарычную памяць, змагаемся за праўду, за гістарычную справядлівасць. І мы перамагаем. Упэўнены, што ва ўсіх сэнсах перамога будзе за намі", - заявіў Георгій Філімонаў.