Сустрэча з губернатарам Самарскай вобласці Расіі Вячаславам Федарышчавым

Прэзідэнт Беларусі Аляксандр Лукашэнка 21 ліпеня сустрэўся з губернатарам Самарскай вобласці Расійскай Федэрацыі Вячаславам Федарышчавым.

Кіраўнік дзяржавы расказаў, што Беларусь пераарыентуе сваю дыпламатычную прысутнасць з заходніх краін на тыя дзяржавы, якія хочуць развіваць супрацоўніцтва, і гэта перш за ўсё Расійская Федэрацыя - павышаецца ўзровень дыпламатычных прадстаўніцтваў, адкрываюцца новыя. "Мы паставілі перад сабой задачу. З Захаду мы практычна забралі свае дыпламатычныя прадстаўніцтвы. Калі яны не хочуць з намі супрацоўнічаць, чаго нам ламацца ў зачыненыя дзверы. Мы пашыраем сваю прысутнасць там, дзе нас хочуць бачыць. І перш за ўсё ў нашай Расійскай Федэрацыі", - заявіў Прэзідэнт.

"Той рэзерв дыпламатаў, які ў нас сёння створаны, мы гатовы перанакіраваць з Захаду на Усход. Не хочуць працаваць з Беларуссю - сёння ў свеце дастаткова дзяржаў, якія з задавальненнем з намі супрацоўнічаюць", - падкрэсліў беларускі лідар.

Аляксандр Лукашэнка прапанаваў Самарскай вобласці ствараць сумесныя прадпрыемствы, прычым як з улікам ужо існуючых кампетэнцый, так і па новых напрамках.

"Будзем гатовы заўсёды садзейнічаць рэалізацыі нашых дамоўленасцей. Калі мы аб нечым дамовімся, мы абавязкова дамоўленасці выканаем", - запэўніў беларускі лідар. Аляксандр Лукашэнка падкрэсліў, што цэнтральная задача заключаецца ў павелічэнні несыравіннага экспарту, нарошчванні прамкааперацыі і выпуску саюзнага прадукту.

"Мы гатовы разам ствараць сумесныя прадпрыемствы, і перш за ўсё ў Самарскай вобласці, таму што вельмі магутная ў прамысловых адносінах, перспектыўныя прадпрыемствы (у гэтым расійскім рэгіёне. - Заўвага). Мы хацелі б з імі супрацоўнічаць. Вядома, у выніку гэтага супрацоўніцтва мы атрымалі б новыя кампетэнцыі, а вы атрымалі б добрых, мазгавітых людзей у Беларусі, якія маглі б супрацоўнічаць і ствараць сумесны прадукт, - заявіў Прэзідэнт. - Думаю, нам на гэта трэба сёння перш за ўсё звяртаць увагу, не забываючы, вядома ж, аб традыцыйных напрамках супрацоўніцтва, такіх як пастаўка нашай тэхнікі ў Самарскую вобласць - тая, якая вам патрэбна - пасажырская, грузавая, камунальная, дарожна-будаўнічая, кар'ерная, сельскагаспадарчая, пажарная і іншыя віды".

Кіраўнік дзяржавы адзначыў, што ў Беларусі і ў прамысловасці, і ў сельскай гаспадарцы вырабляюць усе тавары, якія патрэбны для жыцця. "Думаю, у Самарскай вобласці гэта заўсёды будзе запатрабавана, хоць яна і сама ўсё гэта ўмее рабіць", - сказаў Прэзідэнт.

Асаблівую ўвагу ён звярнуў на сферу станкабудавання, якая ў тым ліку запатрабавана ў авіябудаванні, і гэты напрамак развіты ў Самарскай вобласці. У Беларусі ў сваю чаргу з савецкіх часоў развіваюць станкабудаванне, і гэта быў беларускі брэнд нараўне з шэрагам іншых галін. "Станкабудаванне - гэта вельмі магутны напрамак развіцця нашай прамысловасці. Мы захавалі ўсе кампетэнцыі, прадпрыемствы. Вы можаце падключыцца да гэтага. Мы атрымаем добры эфект. Таму мы гатовы працаваць па станкабудаванні", - прапанаваў Кіраўнік дзяржавы.

Яшчэ адна прапанова, якую агучыў Аляксандр Лукашэнка, - вытворчасць камплектуючых для легкавых аўтамабіляў: "У вас там цэлы кластар. У нас ёсць прадпрыемствы, якія вырабляюць камплектуючыя. Можам разам супрацоўнічаць. У рэшце рэшт, падзяліць гэты рынак велізарны беларуска-расійскі, ды і за мяжу разам пастаўляць. Не трэба нам канкурыраваць там, дзе не трэба канкурыраваць".

Прэзідэнт таксама прапанаваў пастаўляць у гэты расійскі рэгіён беларускае ліфтавае абсталяванне, якое запатрабавана ў многіх краінах свету, і асабліва на постсавецкай прасторы.

"Я сказаў аб стварэнні сумесных прадпрыемстваў. Самарская вобласць для нас вельмі падыходзіць. Таму што найвышэйшае развіццё. Мы таксама імкнёмся атрымліваць больш інавацыйнага прадукту. У гэтым плане ёсць, над чым падумаць", - сказаў Аляксандр Лукашэнка.

Ён таксама запэўніў, што Беларусь гатова пастаўляць у Самарскую вобласць не толькі прамысловыя тавары, але і сельскагаспадарчую прадукцыю, у цэлым развіваць супрацоўніцтва ў АПК: "У Расіі прадукты харчавання патрэбны будуць заўсёды, яны патрэбны і сёння. Таму разам давайце будзем працаваць, вырабляць патрэбныя прадукты і прадаваць на нашых сумесных ранках".

"Калі нешта ўбачыце цікавае ў Беларусі, мы да вашых паслуг. Гатовы заўсёды з вамі працаваць і супрацоўнічаць. Гатовы зрабіць для вас усё, што мы можам і нават не можам, але зможам у перспектыве рабіць", - падкрэсліў беларускі лідар.

"Космас, ракетабудаванне, авіябудаванне - вось тое, што нас вельмі цікавіць у Самары. Ракетабудаванне ў вас на вышэйшым узроўні", - сказаў Кіраўнік дзяржавы.

Ён адзначыў, што ў частцы распрацовак для космасу Беларусь супрацоўнічае з Расіяй. Размова ў тым ліку аб стварэнні штучных спадарожнікаў Зямлі, розных чыпаў і іншага: "Тое, што мы перажывалі, што застанёмся без іх (ва ўмовах санкцый і адыходу ад супрацоўніцтва заходніх партнёраў. - Заўвага). У нас прадпрыемствы гэтыя захаваны - "Інтэграл", БелОМА і іншыя, якія робяць і абсталяванне для вытворчасці гэтых чыпаў. Сёння абыходзімся. Усё лятае".

"Да вашых паслуг тут усё, што вас зацікавіць, што вы папросіце. Для вас мы ўсё зробім. Для нас цікавы ваш вопыт па ракетабудаванні і самалётабудаванні", - падкрэсліў беларускі лідар.

Аляксандр Лукашэнка адзначыў, што дзякуючы дамоўленасцям з Прэзідэнтам Расіі ў Беларусі сур'ёзна рушылі наперад у сферы авіябудавання. Гэта ў тым ліку сумесны праект па стварэнні 19-мясцовага мнагамэтавага самалёта "Асвей", вытворчасць камплектуючых.

"Самалёт "Асвей" мы створым абавязкова. Мы выканаем свае абавязацельствы, - сказаў Прэзідэнт. - Мы гатовы тут працаваць. Вы ведаеце, што ў нас магутная рамонтная база па самалётабудаванні, верталётабудаванні, па бранятэхніцы. Мы яе развіваем да ўзроўню вытворчасці, каб мы маглі не толькі рамантаваць, але і вырабляць. Пачыналі з нейкіх вузлоў, асабліва ў самалётабудаванні, цяпер выйшлі на больш высокі ўзровень. У гэтым плане ў нас вельмі вялікая цікавасць да вашых прадпрыемстваў. Думаю, што тут таксама мы знойдзем нашы агульныя інтарэсы".

Вячаслаў Федарышчаў у час сустрэчы перадаў Прэзідэнту цёплыя словы ад жыхароў рэгіёна: "Па-першае, дазвольце мне выканаць пачэсную місію: вельмі шмат самарцаў перадавалі Вам вялікае прывітанне. Вас у Самары любяць, ведаюць і заўсёды запрашаюць у госці. Правёўшы велізарную колькасць сустрэч з сельгасвытворцамі, прамысловасцю, заўсёды чуў адно: калі ў Беларусь прыедзеце, запрасіце, калі ласка, Аляксандра Рыгоравіча ў Самару".

Аляксандр Лукашэнка запэўніў кіраўніка рэгіёна, што з глыбокай павагай ставіцца да Самарскай вобласці і яе жыхароў: "Гэта мае людзі, гэта таксама нашы людзі. Таму ім сорамна за мяне не будзе тут".

Самарская вобласць - не першы суб'ект Расіі, у якім працуе Вячаслаў Федарышчаў. Да гэтага ён працаваў у Тульскай вобласці. Паводле слоў кіраўніка рэгіёна, пытанні эканамічнага супрацоўніцтва з Беларуссю заўсёды былі на першым месцы.

"Гэта той стратэгічны вектар, які вызначае наш Прэзідэнт Уладзімір Уладзіміравіч Пуцін разам з Вамі. І мы вельмі ўважліва сочым за парадкам дня Саюзнай дзяржавы. Для нас вельмі важна, каб Самара, якая з'яўляецца адным з самых індустрыяльных рэгіёнаў Расійскай Федэрацыі, была ў гэтым парадку дня, бачыла сябе там і адпавядала яму. Тыя прапановы, з якімі мы сёння прыехалі, зыходзяць з парадку дня Саюзнай дзяржавы", - падкрэсліў ён.

Губернатар Самарскай вобласці адзначыў, што беларуская тэхніка добра зарэкамендавала сябе ў рэгіёне. Размова ідзе як пра тэхніку, якая працуе ў палях, так і пра тую, што абслугоўвае камунальную гаспадарку.

"У мяне вельмі вялікая задача - абнаўленне і мадэрнізацыя ў Самарскай вобласці. Яна капітальная: толькі ліфтаў трэба замяніць 6 тыс. Каля 4 млрд рублёў мы прадугледзелі на камунальную тэхніку на бліжэйшыя некалькі гадоў, - прывёў прыклады Вячаслаў Федарышчаў. - Вядома, наведваючы заводы, у першую чаргу будзем уважліва ставіцца да магчымасці прамога супрацоўніцтва. Рэкламаваць маім калегам нічога не трэба: усе ведаюць і бачаць гэты вопыт. І мы яму давяраем. Таму сёння будзем шукаць магчымасці для заключэння папярэдніх дамоўленасцей".