Даклад Старшыні Федэрацыі прафсаюзаў Беларусі Юрыя Сянько

Кіраўнік дзяржавы Аляксандр Лукашэнка 17 ліпеня прыняў з дакладам Старшыню Федэрацыі прафсаюзаў Беларусі Юрыя Сянько.

Аляксандр Лукашэнка перш за ўсё пацікавіўся сітуацыяй у прафсаюзах, поглядам на гэтыя працэсы Юрыя Сянько, у якога ўжо было дастаткова часу, каб з моманту свайго выбрання паглыбіцца ў адпаведныя пытанні і ацаніць іх свежым поглядам.

"Я вельмі разлічваю, што прафсаюзы ў нас будуць арганізаванай, магутнай такой базай для таго, каб падтрымліваць стабільнасць у нашым грамадстве, - сказаў Кіраўнік дзяржавы. - Яны і цяпер з'яўляюцца, напэўна, самай магутнай "партыйнай" арганізацыяй. І каціруюцца ў сваім арганізацыйным плане вышэй за любую партыю, якая ў нас існуе".

Аляксандр Лукашэнка падкрэсліў, што ніколі не абыходзіць увагай прафсаюзы, у тым ліку калі размова ідзе пра грамадска-палітычную сітуацыю ў краіне. "Таму што вы заземлены павінны быць, так яно і ёсць у асноўным (месцамі не вельмі), на працоўныя калектывы, на людзей. Таму я заўсёды падтрымліваю прафсаюзы і дзякуй Вам і нашым прафсаюзам за тое, што яны актыўна ўдзельнічалі ў перадвыбарнай кампаніі і аказалі ў гэтым плане вялікую дапамогу ўсім тым, хто займаўся выбарамі, у тым ліку і мне", - заявіў Прэзідэнт.

Што датычыцца магчымых недахопаў, Кіраўнік дзяржавы папрасіў далажыць аб гэтым "без прыкрас", тым больш, што Юрый Сянько для прафсаюзнай сферы ў пэўнай ступені - чалавек, які прыйшоў збоку.

"Ёсць шэраг пытанняў. Я іх напярэдадні, як звычайна, атрымаў, якія Вы хацелі б абмеркаваць: звышурочная работа, уборачная кампанія (мы заўтра таксама пагаворым на гэту тэму), міжнародная дзейнасць. І пра зямельныя ўчасткі - у нас тэма па краіне ў цэлым існавала і існуе - для таго, каб устанавіць за тымі ці іншымі арганізацыямі зямельныя ўчасткі, якімі яны карыстаюцца спрадвеку, як у народзе кажуць. Трэба ўстанавіць праваўстаноўчыя дакументы", - пералічыў кола тэм Кіраўнік дзяржавы.

Ён таксама папрасіў Юрыя Сянько выказаць сваю ацэнку цяперашняй работы мытнай службы ў Беларусі, улічваючы, што раней ён шмат гадоў працаваў у гэтай сферы, узначальваючы, у тым ліку, Дзяржаўны мытны камітэт. "Усё ж генералаў былых не бывае. Вы адным вокам паглядайце на тое, як працуе ведамства, у якім Вы выраслі", - сказаў Прэзідэнт.

Юрый Сянько ў час даклада нагадаў, што 30 гадоў таму быў падпісаны Указ "Аб развіцці сацыяльнага партнёрства ў Рэспубліцы Беларусь". Паводле слоў кіраўніка ФПБ, Указ даў вельмі добры імпульс да таго, каб Урад, прафсаюзы і наймальнікі селі за стол перагавораў для вырашэння ўсіх пытанняў, якія датычацца чалавека працы. Аляксандр Лукашэнка пацікавіўся, ці дзейнічае гэта схема да гэтага часу.

"Абсалютна добра дзейнічае. Гэта вылілася ў выдатныя статыстычныя даныя змяненняў у нарматыўна-прававых актах. Дапусцім, у Працоўным кодэксе сёння дзейнічаюць 105 норм, якія так ці інакш адсылаюць да калектыўных дагавораў, што падпісваюць прафсаюзы разам з наймальнікамі, - адказаў Юрый Сянько. - Гэта значыць, заканадаўства наша прасякнута нормамі, якія так ці інакш ідуць у развіццё сацыяльнага партнёрства і ў развіццё Указа".

Кіраўнік ФПБ перакананы, што прафсаюзы, Урад і наймальнікі ўдзячныя за тое, што ўсе пытанні вырашаюцца за сталом перагавораў. "Яны вырашаюцца канструктыўна, з улікам усіх нюансаў, якія павінны вырашацца прадпрыемствамі. Гэта нармальная работа прадпрыемстваў - безупынная, бясстратная. Так і для работніка - якая стымулюе ўсе нюансы, звязаныя з жаданнем працаваць, захоўваць сябе для гэтага працоўнага месца", - дадаў ён.