Уручэнне дзяржаўных узнагарод

Цырымонія ўручэння дзяржаўных узнагарод адбылася 24 жніўня ў Палацы Незалежнасці.

За ўзорнае выкананне службовых абавязкаў, значныя заслугі ў воінскай службе і высокі прафесіяналізм кіраўніком дзяржавы ўзнагароджаны тры дзясяткі ваеннаслужачых і прадстаўнікоў сілавых структур: Міністэрства абароны, МУС, Дзяржпагранкамітэта, Камітэта дзяржбяспекі, Службы бяспекі Прэзідэнта. Высокія ўзнагароды атрымалі і шэраг цывільных асоб, якія праявілі рашучасць і мужнасць у складаных умовах пры забеспячэнні бяспекі і навядзенні парадку ў краіне ў жніўні і восенню 2020 года. Аднак спіс узнагароджаных значна шырэйшы. Ва Указе, падпісаным Прэзідэнтам, амаль сотня чалавек. Усім ім высокія заслужаныя ўзнагароды ў самы бліжэйшы час па даручэнні Прэзідэнта ўручаць Прэм'ер-міністр, Дзяржсакратар Савета бяспекі і Кіраўнік Адміністрацыі Прэзідэнта.

Як адзначыў Кіраўнік дзяржавы, гэтыя людзі былі на вастрыі ў вельмі няпросты для краіны час. Высокія ўзнагароды сёння ж атрымалі і шэраг цывільных асоб, якія праявілі рашучасць і мужнасць у складаных умовах пры забеспячэнні бяспекі і навядзенні парадку ў краіне ў жніўні і восенню 2020 года.

"Усё далей углыб гісторыі адыходзяць падзеі тых незабыўных для нас з вамі, памятных, можна сказаць, дзён 2020 года. Мы ўсё больш і больш задаёмся пытаннем: дык што гэта было на самай справе? Ацэнка тым падзеям дадзена. І не мэта мая сёння паўтарацца. "Скажу толькі адно. Як і чалавек ад нараджэння, так і любы народ піша сваю гісторыю. І праз некаторы час, азіраючыся назад, з жалем або гонарам канстатуем факты свайго жыцця, - адзначыў Аляксандр Лукашэнка. - У кагосьці былі старонкі не вельмі. Нехта ганарыцца пражытымі гадамі. Гэтак жа і наш беларускі народ, увогуле народы ў гісторыі даюць ацэнкі пражытаму".

Прэзідэнт канстатаваў, што з гэтага пункту гледжання нічога добрага 2020 год у сувязі з гэтымі падзеямі не прыбавіў. "Але беларускі народ справіўся. Мы з вамі справіліся і выстаялі. Гэта вартае таго. І калі ацаніць, што гэта былі цяжкія дні, цяжкія жнівень і верасень, але мы выстаялі, гэтай старонкай з гэтага пункту гледжання мы можам ганарыцца", - падкрэсліў беларускі лідар.

Кіраўнік дзяржавы звярнуўся да ўдзельнікаў цырымоніі: "Перш за ўсё хачу падзякаваць нашым людзям. І перш за ўсё вам. Усе практычна вы тут людзі ваенныя. Мы выстаялі перш за ўсё дзякуючы мужнасці, стойкасці - вашым гэтым добрым якасцям. Мы тады не думалі ні пра подзвігі, ні пра ўчынкі. Мы проста разумелі, што павінны зрабіць сваю работу. Абараніць сваю краіну, абараніць мір і спакой нашых грамадзян, для чаго мы - органы ўлады, ваенныя і людзі, якія побач з намі стаяць, - прызначаны".

Аляксандр Лукашэнка падкрэсліў, што вельмі ўдзячны гэтым людзям. Ён расказаў, што пасля тых падзей даручыў адзначыць заслугі ўсіх хлопцаў, якія насмерць стаялі на вуліцы, былі траўміраваны, у тым ліку вельмі сур'ёзна, але не адступілі. "Усіх знайсці, няхай гэта будуць тысячы-тысячы людзей, і ўзнагародзіць. Але, можа, мы некага прапусцілі, не заўважылі. Усякае бывае, жыццё цяпер складанае. Іх трэба знайсці - усіх тых, хто быў з намі на барыкадах, хто стаяў у тыя жнівеньскія, вераснёўскія дні, абараняючы наша мірнае жыццё. Нават калі яны сёння ўбіраюць збожжа на камбайнах, звольніўшыся з радоў Узброеных Сіл. Мы гэта зробім", - сказаў Прэзідэнт.

Ён адзначыў, што, як заўсёды бывае, тых, хто побач, часам не заўважаеш, здаецца, што так і павінна быць. "Так і павінна быць. Тыя, хто побач, тыя ідуць, не азіраючыся, выконваючы загад. Думаю, настаў час вярнуць даўгі", - дадаў Кіраўнік дзяржавы.

"Цяпер мы ўжо ўсвядомілі, што было б з намі. Мы тады зрабілі практычна немагчымае. На нас трэніраваліся. Але гэта была трэніроўка, гэта была прэлюдыя да тых падзей, якія адбываюцца цяпер у свеце і ў прыватнасці ва Украіне. Мы выстаялі, таму сёння жывём у мірнай краіне", - падкрэсліў беларускі лідар.

Пры гэтым Прэзідэнт звярнуў увагу: расслабляцца яшчэ вельмі рана, усё толькі пачынаецца: "Там была рэпетыцыя, трэніроўка, як я сказаў, прэлюдыя да асноўных падзей. Усё толькі пачынаецца. Нам не да расслаблення".

Аляксандр Лукашэнка звярнуў увагу на складаную абстаноўку ў рэгіёне і свеце, у тым ліку вакол Беларусі. "Польшча і краіны Прыбалтыкі ператварыліся, як бачыце, у палігоны для рэгулярных вучэнняў натаўскіх войскаў. Раней нейтральныя Швецыя і Фінляндыя (ім жа нечага карціць, сядзелі б ціхенька і маўчалі) імкнуцца ў тэрміновым парадку ўступіць у Паўночнаатлантычны альянс, лічыце - уступілі фактычна", - сказаў ён.

Пры гэтым, адзначыў Прэзідэнт, не спыняецца масіраваная гібрыдная агрэсія супраць беларускай дзяржавы. "З боку так званай збеглай нават не апазіцыі, а тых мяцежнікаў, якія хутка збеглі за межы нашай краіны. Па сваёй сутнасці гэтыя людзі з'яўляюцца адным з краевугольных камянёў палітыкі Вашынгтона і Бруселя на нашым напрамку і не толькі. І наш абавязак перад цяперашнім і будучымі пакаленнямі - зрабіць з гэтага высновы і ўсімі магчымымі сродкамі захаваць краіну, - заявіў беларускі лідар. - І мы яе захаваем, чаго б нам гэта ні каштавала. У гэтым не толькі мая, але і ваша задача. Людзі вельмі вераць у нас і ведаюць, што мы заўсёды прыйдзем дапамагчы. Забяспечым спакойнае і мірнае жыццё нашых людзей, абаронім краіну ад знешніх і ўнутраных пагроз".

Звяртаючыся да ўдзельнікаў цырымоніі, Прэзідэнт падзякаваў ім за бездакорную службу і надзейнасць, пажадаў новых дасягненняў у службе і на рабоце, моцнага здароўя ім, а таксама іх родным, блізкім.