Віншаванне калектыву Дэпартамента па наглядзе за бяспечным вядзеннем работ у прамысловасці
Прэзідэнт Беларусі Аляксандр Лукашэнка павіншаваў калектыў і ветэранаў Дэпартамента па наглядзе за бяспечным вядзеннем работ у прамысловасці Міністэрства па надзвычайных сітуацыях з 70-годдзем з дня ўтварэння ведамства.
"Дзяржпрамнагляд з першых дзён сваёй дзейнасці выконвае найважнейшую місію кантролю за бяспечнай эксплуатацыяй тэхнічна складаных аб'ектаў усяго індустрыяльнага комплексу краіны", - гаворыцца ў віншаванні.
Кіраўнік дзяржавы адзначыў, што такая работа патрабуе ад кожнага з супрацоўнікаў ведамства глыбокіх спецыяльных ведаў, прынцыповасці і гатоўнасці прымаць адказныя рашэнні, ад якіх залежаць жыцці людзей, экалогія рэгіёнаў і ўстойлівая работа прадпрыемстваў.
"Поспехі краіны ў развіцці яе прамысловага патэнцыялу і наш прагрэс у навукова-тэхнічных сферах сведчаць аб тым, што вы на належным узроўні спраўляецеся з пастаўленымі перад вамі задачамі, у многім прадухіляючы магчымыя рызыкі і працуючы на апярэджанне. Перакананы, што так будзе і ў далейшым", - падкрэсліў Аляксандр Лукашэнка.
"Асаблівыя словы ўдзячнасці адрасую ветэранам службы, якія заклалі трывалыя традыцыі, у аснове якіх ляжаць прафесіяналізм, надзейнасць і бяспека", - дадаў ён.
Прэзідэнт пажадаў калектыву і ветэранам Дзяржпрамнагляду шчасця, міру, дабра і новых поспехаў на карысць роднай Беларусі.
