Заснаваны афіцыйныя геральдычныя сімвалы ўнутраных войскаў
У мэтах захавання і развіцця гістарычных традыцый заснаваны афіцыйныя геральдычныя сімвалы ўнутраных войскаў Міністэрства ўнутраных спраў. Адпаведны Указ № 196 падпісаў Прэзідэнт Беларусі Аляксандр Лукашэнка.
Дакументам, у прыватнасці, заснаваны эмблема, сцяг і нагрудны знак унутраных войскаў "За выдатную службу ва ўнутраных войсках МУС Рэспублікі Беларусь". Акрамя таго, удакладнена выява і апісанне існуючага нагруднага знака "За самаадданую службу". Указам таксама зацверджаны палажэнні аб гэтых геральдычных сімвалах.
Эмблема ўнутраных войскаў уводзіцца ў мэтах захавання гістарычных традыцый, а таксама для выкарыстання яе ў якасці адметнай адзнакі прафесійнай прыналежнасці.
Сцяг, які выкананы ў крапавым колеры і змяшчае надпіс "ДОЎГ! ГОНАР! АЙЧЫНА!", будзе размяшчацца ў пунктах пастаяннай дыслакацыі злучэнняў і воінскіх часцей, у навучальных установах, а таксама выкарыстоўвацца пры правядзенні ідэалагічных і спартыўных мерапрыемстваў.
Нагрудным знакам "За выдатную службу ва ўнутраных войсках МУС Рэспублікі Беларусь" будуць узнагароджвацца ваеннаслужачыя, якія маюць 15 і больш гадоў выслугі, за ўзорнае выкананне службовых абавязкаў і паспяховае выкананне задач.
У сваю чаргу нагрудны знак "За самаадданую службу" мае дзве ступені. Ім у тым ліку ўзнагароджваюць за смеласць і рашучасць, высокі прафесіяналізм і самаадданасць, праяўленыя пры выкананні задач.
