Удзел у семінары па сельгастэматыцы ў Смалявіцкім раёне

Прэзідэнт Беларусі Аляксандр Лукашэнка 21 лютага ў Смалявіцкім раёне Мінскай вобласці наведаў сельгаспрадпрыемства "Шыпяны-АСК".

Мерапрыемства было арганізавана ў фармаце выязнога семінара. Для ўдзелу ў ім былі запрошаны службовыя асобы, якія таксама з'яўляюцца ўпаўнаважанымі прадстаўнікамі Кіраўніка дзяржавы ў розных рэгіёнах, памочнікі Прэзідэнта ў абласцях, кіраўнікі навукова-практычных цэнтраў НАН па земляробстве і жывёлагадоўлі.

Кіраўнік дзяржавы адзначыў, што цяпер ідзе зімоўка жывёлы. "Мы ж "рыначнікі", глыбока прагрэсіўныя. Мы забылі аб тым, што мяса і малако, у тым ліку і зімой - адсюль. І ўпускаем часта праблемы і пытанні зімоўкі", - заўважыў Аляксандр Лукашэнка.

Ён канстатаваў, што настаў самы востры зімовы перыяд, калі параўноўваць са снежнем і студзенем. У той жа час, дадаў Кіраўнік дзяржавы, маразы надоўга не затрымаюцца і праз пару тыдняў прыйдзе ўжо вясна.

"Але пакуль зімоўка - як яна ідзе, як арганізаваць гэты самы востры перыяд зімы, калі і кармоў няшмат. Мы сёння правядзём не толькі арганізацыйна-кантрольнае мерапрыемства, але і паслухаем нашых вучоных. А ў іх самыя апошнія даныя, гэта людзі прагрэсіўныя. Яны ведаюць, як жывёла павінна зімаваць і як падысці да веснавых палявых работ. Яны раскажуць памочнікам і ўпаўнаважаным, а з заўтрашняга дня вы павінны на месцах - у абласцях, раёнах - паглядзець, як арганізавана ўсё гэта, наколькі там адпавядае таму, што тут (у сельгаспрадпрыемстве "Шыпяны-АСК", на тэрыторыі якога праводзіцца семінар. - Заўвага)", - сказаў беларускі лідар.

"Таму глядзіце, запамінайце. З сённяшняга-заўтрашняга дня ў сваіх абласцях, дзе вы ўпаўнаважаныя і памочнікі, гэтак жа правядзіце мерапрыемствы, але ўжо не з пункту гледжання вучобы, а з пункту гледжання кантролю і арганізацыі. І на месцах з губернатараў, мясцовых кіраўнікоў запатрабуеце. Абагульніце ва ўрадзе ўсё і даложыце мне, як прайшла зімоўка жывёлы. Каму - ордэны, медалі, а каму - процілеглае", - заявіў Кіраўнік дзяржавы.

Прэзідэнт адзначыў, што не кожны яго памочнік або ўпаўнаважаны Кіраўніка дзяржавы паглыблены ў пытанні сельскай гаспадаркі. "Асвяжым памяць і пачнём дзейнічаць. Гэты год асабліва, ды і пяцігодка, - гэта не проста якасць (гэта наш канчатковы вынік), гэта жалезная выканальніцкая дысцыпліна. Калі не будзе дысцыпліны, усё пустое", - падкрэсліў Аляксандр Лукашэнка.

Заснавальнікам сельгаспрадпрыемства "Шыпяны-АСК" у свой час стаў Навукова-практычны цэнтр Нацыянальнай акадэміі навук Беларусі па земляробстве. У ліку асноўных відаў дзейнасці прадпрыемства - вытворчасць малака, гадаванне і адкорм буйной рагатай жывёлы, вырошчванне збожжавых і зернебабовых культур, рапсу, іх насенняводства, стварэнне кармавой базы для ўтрымання буйной рагатай жывёлы. З 2011 года прадпрыемства з'яўляецца элітгасам па вытворчасці насення збожжавых, зернебабовых, крупяных і алейных культур.

Кіраўніку дзяржавы спачатку далажылі аб вытворчай дзейнасці прадпрыемства і перспектывах яго развіцця, а потым удзельнікі мерапрыемства заслухалі інфармацыю ад Навукова-практычнага цэнтра НАН па жывёлагадоўлі аб асаблівасцях кармлення і ўтрымання буйной рагатай жывёлы ў зімова-стойлавы перыяд.

Пры гэтым Прэзідэнт запатрабаваў не замоўчваць і не абыходзіць існуючыя праблемы, а дакладваць аб'ектыўна і па сутнасці. У прыватнасці, ён расказаў аб фактах, калі кіраўнікам сельгаспрадпрыемстваў дзеля захавання колькасці дойнага статка забараняюць прадаваць на мясакамбінат кароў, якія ўжо не даюць малака. Апраўданне гучыць такое - будуць дакараць за колькасць. Аляксандр Лукашэнка падкрэсліў, што такі падыход катэгарычна недапушчальны.

Кіраўнік дзяржавы звярнуў увагу на асаблівасці ўтрымання жывёлы ў плане забеспячэння максімальнай працягласці прадукцыйнага перыяду. Ён заўважыў, што карова не павінна даіцца паўтара-два гады. Напрыклад, на прэзідэнцкім падворку працягласць прадукцыйнага перыяду складае як мінімум 9-12 гадоў. Прычым каровы даюць да 47 літраў малака за суткі, у той час як у гаспадарках радуюцца і 15 літрам.

У сувязі з гэтым Аляксандр Лукашэнка таксама падкрэсліў неабходнасць няўхільнага выканання ветэрынарна-санітарных правіл утрымання і вырошчвання буйной рагатай жывёлы на жывёлагадоўчых комплексах.

На малочнатаварным комплексе "Алесіна", які агледзеў Кіраўнік дзяржавы разам з удзельнікамі семінара, частку статка складаюць каровы чырвонай дацкай пароды. Вучоныя пачалі выводзіць іх некалькі гадоў таму на прадпрыемстве "Вусце" Аршанскага раёна ў якасці эксперымента. Аднак вынікі гэтага эксперымента пакуль спрэчныя. Аляксандр Лукашэнка пацікавіўся, які эфект ужо дасягнуты і што яшчэ насцярожвае ў гэтай рабоце.

"Гэта пытанне вельмі важнае, таму што Акадэмія навук замахнулася стварыць нам тут "космас" у жывёлагадоўлі. Паглядзім, як ствараем. Мы адбіралі ў Даніі самых лепшых і плацілі грошы. Прывезлі сюды - бракуем. Тут самая мінімальная павінна быць адбракоўка", - падкрэсліў Прэзідэнт.

Комплекс "Алесіна" складаецца з двух кароўнікаў па 400 галоў, радзільнага аддзялення з цэхам запуску, даільна-малочнага блока, адміністрацыйна-бытавога комплексу. Таксама ёсць будынак гадоўлі цялят і маладняку, два будынкі гадоўлі маладняку ​​і цялушак, навес для домікаў цялят прафілакторнага перыяду.

У комплексе прыменены перспектыўныя для малочнай жывёлагадоўлі краіны сістэма ўтрымання жывёл, спецыяльныя планіроўкі памяшканняў і інтэнсіўныя рэсурсазберагальныя навукаёмістыя тэхналогіі, створаны магчымасці па вырашэнні праблем паскоранага ўдасканалення жывёлы малочнага напрамку прадукцыйнасці.

Паводле слоў Кіраўніка гаспадаркі, рэзультат чырвоныя каровы паказваюць дастойны, малако па паказчыках высокай якасці. Яно асабліва падыходзіць для вытворчасці сыроў. "Калі гэта для сыроў, мы павінны прадаваць, дзе сыры вырабляюць", - заўважыў Аляксандр Лукашэнка.

Падводзячы вынікі наведвання комплексу, Прэзідэнт паставіў удзельнікам семінара задачу пракантраляваць утрыманне жывёлы на месцах: "Гэта вельмі важна. Галоўнае - гэта дысцыпліна. Гэта павышае тэхналагічную дысцыпліну. Няма тэхналогіі - няма малака і загубім жывёлу. Належыць па рацыёне - аддай. Належыць, каб пад носам корм быў, значыць, так павінна быць".

У гэтым плане, падкрэсліў Кіраўнік дзяржавы, кантроль павінен быць па ўсёй вертыкалі ўлады, пачынаючы ад кіраўніка рэгіёна да кіраўнікоў гаспадарак і заатэхнікаў.

Адна з тэм семінара - падрыхтоўка тэхнікі да веснавых палявых работ. Удзельнікі мерапрыемства на чале з Аляксандрам Лукашэнкам наведалі машынна-трактарны парк сельгаспрадпрыемства "Шыпяны-АСК".

"На лінейцы гатоўнасці павінна быць тэхніка. Трэба паставіць жорстка пытанне, каб трактары, аўтамабілі былі ў парадку. Яны (сельгаспрадпрыемствы. Заўвага) павінны на лінейку гатоўнасці перш за ўсё паставіць глебаапрацоўчую тэхніку, якая будзе занята вясной", - сказаў Прэзідэнт.

Ён адзначыў, што, вядома, у поўным аб'ёме тэхніка будзе гатова непасрэдна да пасяўной, але ўжо цяпер трэба ацаніць, як ідуць падрыхтоўка і справы на гэты момант. "Вы павінны ўзяць з сабой добрага спецыяліста, які вам падкажа, як павінна быць. А вы ўжо сваёй уладай запатрабуйце. Гэта сур'ёзная рэч. Асабліва ў жывёлагадоўлі", - даў параду Аляксандр Лукашэнка.

"Наша задача - узварухнуць сёння краіну, каб, не дай бог, не было спячкі. Ваша задача, гавару па-ваеннаму, - узварухніце краіну праз вертыкаль улады. У гэтым выпадку - зімоўка (у жывёлагадоўлі. - Заўвага) і падрыхтоўка да веснавой сяўбы. Мы ганарымся тым, што мы больш як $8 млрд прадалі сельгаспрадукцыі. Гэта здорава, але мы можам гэта страціць. Як звычайна бывае: супакоіліся, усё добра - страцілі. Таму трэба, каб, узварухнуўшыся, мы мелі ў гэтым годзе мінімум $9 млрд, а тое і $10 млрд ад продажу прадуктаў харчавання. Прадукты харчавання будуць пастаянна даражэць", - сказаў Кіраўнік дзяржавы.

"Вы бачыце, як мяняецца абстаноўка палітычная, якая ўплывала на эканоміку ў сувязі з палітыкай ЗША і гэтак далей. Але цешыць сябе не трэба. Мы не ведаем, чаго хочуць ЗША. Гавару гэта таму, што я абсалютна паглыблены ў гэтыя пытанні. Мы не ведаем, чаго яны запатрабуюць ад расіян за спыненне вайны і гэтак далей. Мне здаецца, што яны паспрабуюць цяпер расіян сутыкнуць з кітайцамі. Вось гэтага расіянам дапусціць нельга", - заявіў Аляксандр Лукашэнка.

Прэзідэнт разам з тым канстатаваў, што сітуацыя мяняецца. "Дзесьці, напэўна, нам на карысць, дзесьці наўрад ці, калі туды (дамовяцца Пуцін і Трамп) вернуцца ўсе гэтыя замежныя кампаніі - спачатку амерыканскія, а потым іншыя - еўрапейскія. Будзе няпроста канкурыраваць на нашым рынку. Але прадукты харчавання будуць патрэбны ўсім. Таму краіну ўзварухніце як належыць", - сказаў Кіраўнік дзяржавы.

Аляксандр Лукашэнка адзначыў, што пакуль катэгарычна не задаволены работай упаўнаважаных прадстаўнікоў Кіраўніка дзяржавы ў рэгіёнах, а таксама памочнікаў. У гэтым плане ён запатрабаваў ад Адміністрацыі Прэзідэнта дакладнай арганізацыі работы гэтай сістэмы.

"Памочнік павінен быць замкнуты на цябе (звяртаючыся да Кіраўніка Адміністрацыі Прэзідэнта Дзмітрыя Крутога. - Заўвага), і ты мне дакладваеш аб гэтым. Я сёння думаю, можа, змяніць гэту сістэму. Але памочнікаў трэба актывізаваць. Упаўнаважаныя - ну ад выпадку да выпадку, паказухай займаецеся. Але я ведаю, што не дапрацоўваеце", - заявіў беларускі лідар.