Селектарная нарада па пытаннях уборачнай кампаніі 2026 года

Прэзідэнт Беларусі Аляксандр Лукашэнка 21 ліпеня правёў селектарную нараду па пытаннях уборачнай кампаніі 2026 года.

Кіраўнік дзяржавы адзначыў, што сустрэча ў фармаце шырокай селектарнай нарады мае традыцыйны характар, таму што ўборка ўраджаю - адна з самых важных тэм у краіне ў гэты час.

"Калі гаварыць пра менталітэт беларусаў, то ў нас трывала закладзена, што нават калі свет узрушваюць войны і канфлікты, а мяжа  паміж разважлівасцю і вар'яцтвам асобных у тым ліку палітыкаў адсутнічае, нам трэба араць, сеяць і ўбіраць хлеб. Таму што і ў войны, і ў мірны час людзям хочацца есці, - заявіў Аляксандр Лукашэнка. - Уборачная гарачая пара - гэта ж не толькі пэўны экзамен, не толькі вынік усяго гадавога цыкла працы сялян, але і цвёрдая гарантыя нашай харчовай бяспекі і адна з асноў экспартнай валютнай выручкі. Гэта клопат усёй дзяржавы, а не толькі сялян. Будзем з хлебам - будзем жыць".

"А каб краіна была з хлебам і мясам, каб прадпрыемствы не стаялі без сыравіны, фермы і комплексы - без кармоў, а дзяржзаказ быў выкананы, трэба кожнаму адпрацаваць на сваім месцы годна і без усялякіх збояў", - падкрэсліў Прэзідэнт. 

Ён адзначыў, што для гэтага было зроблена ўсё. Акрамя таго, разлікі на ўраджай прагназуюцца нядрэнныя. "Цяпер трэба ўзяць гэты ўраджай максімальна - без апраўданняў і спасылак на акалічнасці, у тым ліку на капрызы надвор'я. Такія сюрпрызы ў нашых шыротах - звычайная карціна, і вопыт папярэдніх кампаній у нас ёсць", - дадаў Кіраўнік дзяржавы. 

Цяпер на палях вядзецца работа па некалькіх напрамках. Ідзе ўборка збожжавых і азімага рапсу, другі ўкос траў, а хутка трэба будзе сеяць азімыя культуры. "Разумна ўсё спланаваць - задача ўсёй вертыкалі - ад агранома і дырэктара сельгасарганізацыі да губернатараў і Урада", - падкрэсліў Аляксандр Лукашэнка.

Пры гэтым, паводле інфармацыі Урада, прагназуемы валавы збор збожжа будзе больш за 11 млн т, што адпавядае ўзроўню мінулага года. "У гэтым годзе мы павінны абавязкова перасягнуць (гэты вынік. - Заўвага). Мы дамаўляліся з вамі, што мінулагодні ўзровень - гэта ўзровень, на які мы будзем заўсёды арыентавацца. Як мне дакладваюць, у большасці рэгіёнаў ураджай збожжавых у гэтым годзе будзе не горшы, чым у мінулым годзе. У параўнанні з 2025 годам, магчыма, на два тыдні затрымаецца развіццё кукурузы", - папярэдзіў Аляксандр Лукашэнка. 

Кіраўнік дзяржавы адзначыў, што правільна арганізаваны севазварот і структура пасяўных плошчаў далі магчымасць аграрыям расцягнуць уборачную кампанію прыкладна да трох - трох з паловай месяцаў. У сувязі з гэтым Прэзідэнт абазначыў галоўныя ўмовы для паспяховага правядзення сёлетняй уборачнай.

"Камбайны, трактары, а таксама зернесушыльныя комплексы павінны быць спраўныя, і за кожнай адзінкай тэхнікі замацаваны кваліфікаваныя людзі", - падкрэсліў Кіраўнік дзяржавы. 

Паводле ацэнак Урада, гатоўнасць тэхнікі вышэйшая, чым у мінулым годзе, і складае 99%. Прэзідэнт канстатаваў, што гэтага дастаткова для паўнацэннай уборкі. У сельгасарганізацыях краіны ёсць 6,8 тыс. збожжаўборачных камбайнаў. Акрамя таго, на ўборку выйдуць 400 новых камбайнаў. 

"Разам з тым не ўсё так радасна, як хацелася б. Камітэтам дзяржкантролю на 14 ліпеня ўстаноўлены факты нізкай гатоўнасці збожжаўборачных камбайнаў у 36 са 146 правераных сельскагаспадарчых арганізацый. У асобных гаспадарках Верхнядзвінскага, Шумілінскага, Калінкавіцкага, Смаргонскага, Ашмянскага, Быхаўскага, Крычаўскага раёнаў рамонт пачалі толькі напярэдадні ўборкі", - заўважыў беларускі лідар. 

Прэзідэнт у сувязі з гэтым даручыў забяспечыць тэхніку неабходнымі запчасткамі, своечасовым рамонтам і абслугоўваннем. 

Што датычыцца праблемы з механізатарскімі кадрамі, то яна, як дакладваюць Кіраўніку дзяржавы, у цэлым вырашана. "Дадаткова да ўборкі прыцягнулі 2331 чалавека. Разам з тым на 13 ліпеня не ўсе прыбылі ў гаспадаркі. Напрыклад, у Віцебскай вобласці - 485 механізатараў з неабходных 655", - адзначыў ён. 

Кіраўнік дзяржавы канстатаваў, што тэмпы ўборкі і мінімізацыя страт збожжа залежаць непасрэдна і ад забяспечанасці гаспадарак палівам: "Хацелася б пачуць, як ідуць справы на месцах з яго запасамі". 

"Ключавая ўмова паспяховай работы менавіта ў гэтым годзе - надзейнасць сушыльнай гаспадаркі. Збожжа ў вялікіх аб'ёмах давядзецца прапускаць праз сушылкі. Як мінімум адзін раз, каб пазбегнуць страт ураджаю. Таму ўсе збожжатокі і зернесушылкі павінны быць поўнасцю спраўныя", - даручыў Прэзідэнт. 

Аляксандр Лукашэнка адзначыў, што цяпер гатоўнасць зернесушыльных комплексаў складае 97%. Паводле інфармацыі Урада, існуючыя 1660 зернесушыльных комплексаў дадуць магчымасць поўнасцю апрацаваць сутачны аб'ём збожжа. "З кабінета Урада - так, а на самай справе не. Аблятаючы ўсход і цэнтр Беларусі, я бачыў на збожжатоках немалую колькасць збожжа, якое ляжыць у буртах", - заявіў беларускі лідар. 

"Спадзяюся, вы добра разумееце, што спыненне зернесушыльнага комплексу роўнае спыненню ўсяго цыкла ўборкі, масаваму псаванню ўраджаю, зніжэнню яго класа", - падкрэсліў Кіраўнік дзяржавы. 

Прэзідэнт канстатаваў, што факты негатоўнасці зернесушыльных комплексаў устаноўлены кантралёрамі ў кожнай пятай гаспадарцы. Літаральна на мінулым тыдні не працавалі 49 комплексаў, у тым ліку ў Віцебскай вобласці - 16, у Гомельскай - 13. 

"Прычым у шэрагу раёнаў гэта адзіная зернесушылка. Напрыклад, у Гомельскай вобласці не атрымалі дазволу на выкарыстанне прыроднага газу 15 з 88 зернеачышчальна-сушыльных комплексаў. Толькі пачалі ўборку - ужо маем звышнарматыўныя страты і безгаспадарчыя адносіны да захаванасці збожжа пры яго жніве, перавозцы і дапрацоўцы. Вось гэта недапушчальна. Такія факты ўстаноўлены ў гаспадарках Жабінкаўскага, Зэльвенскага, Лельчыцкага, Пухавіцкага, Чавускага раёнаў", - сказаў Аляксандр Лукашэнка. 

Кіраўнік дзяржавы звярнуў увагу, што асаблівасць сёлетняга жніва яшчэ і ў тым, што нельга зніжаць тэмпы нарыхтоўкі кармоў. "Выдатныя першы, другі ўкосы траў ужо далі магчымасць нам нарыхтаваць на 5% больш сенажу і на 55% больш сена на сённяшні дзень", - канстатаваў ён.

"Часу на разварушванне няма. Вы бачыце, Гасподзь нам не дазваляе разварушвацца. Масавая ўборка ідзе на пяць-сем дзён раней за звычайныя тэрміны, і з улікам моцных дажджоў і ўмеранага пацяплення гэта будзе няпроста, - канстатаваў ён. - Пра дысцыпліну я нават не хачу шырока размаўляць - гэта аснова. Яна павінна быць жалезнай і з пункту гледжання захавання тэхналогіі, і з пункту гледжання стаўлення да сваіх абавязкаў". 

Прэзідэнт таксама заклікаў дапамагчы тым, хто жыве на прыватных падворках: "У першую чаргу трэба дапамагчы пажылым і адзінокім, якім больш няма на каго спадзявацца, акрамя кіраўніка сельгаспрадпрыемства і дзяржавы".

Аляксандр Лукашэнка на селектарнай нарадзе ўказаў на выяўленыя ў час уборачнай злачынствы, у ліку якіх крадзеж гаруча-змазачных матэрыялаў, а таксама ўказаў на асобныя факты "крышавання" раскрадальнікаў паліва з боку праваахоўнікаў.

"Толькі пачалі ўборку, а МУС ужо выяўлена 46 злачынстваў. Асноўныя - крадзеж камплектуючых і запасных частак, хабарніцтва. На першым месцы - крадзеж гаруча-змазачных матэрыялаў", - заявіў Кіраўнік дзяржавы.

Аляксандр Лукашэнка канстатаваў, што гэта застарэлая праблема. "У мяне на стале вынікі свежага маніторынгу, які паказаў, што мясцовая ўлада да выкаранення крадзяжоў падыходзіць спусціўшы рукавы або наогул гэтым не займаецца. Таму нячыстыя на руку работнікі крадуць паліва і цалкам упэўнены ў сваёй беспакаранасці", - падкрэсліў ён.

"Асабліва абурае, што некаторыя супрацоўнікі (гэта не толькі міліцыі датычыцца) праваахоўных органаў замест таго, каб змагацца з гэтымі несунамі, уваходзяць з імі ў долю і верхаводзяць, як у ліхія 90-я. Мужыкі, вы ж разумееце, што 90-х нават у гэтай дробязнай праблеме мы не дапусцім", - заявіў Прэзідэнт.

"Мы дамаўляліся, што ў сельгасарганізацыях паліва будзе падфарбавана. Гэта значыць, што работнікі Дзяржаўнай аўтамабільнай інспекцыі перш за ўсё, кіраўнікі гаспадарак, іншыя адказныя асобы ў любы момант могуць праверыць гэта паліва, - сказаў Кіраўнік дзяржавы. - Калі ў прыватнай асобы або ў міліцыянера ў баку ў наяўнасці гэта падфарбаванае паліва - трэба адказваць. І адказваць па ўсёй строгасці закону. Асабліва службовым асобам, якія носяць пагоны і вялікія партфелі".

У сувязі з гэтым Аляксандр Лукашэнка адзначыў, што Дзяржаўнаму сакратару Савета Бяспекі было даручана арганізаваць праверку па такіх фактах. "На меркаванне Дзяржсакратара - дзе вырашылі праверыць, там і правяраюць. Спадзяюся, арганізавана (праходзіць праверка. - Заўвага)", - дадаў ён.

Кіраўнік дзяржавы, звяртаючыся да Міністра ўнутраных спраў, папярэдзіў, што даравання пры выяўленні такіх фактаў не будзе. "Я гэта разглядаю як сабатаж з боку міліцыі даручэнняў Прэзідэнта. А Вы да гэтага, Аляксандр Рыгоравіч (Дзяржсакратар Савета Бяспекі Аляксандр Вальфовіч. - Заўвага), павінны ставіцца самым жорсткім чынам. У вас для гэтага правоў хапае. Я разлічваў на міліцыю, што яны будуць спыняць любыя спробы крадзяжу, але яны самі маюць гэты недахоп. Няхай гэта не масава, але мы не можам дапусціць (такіх фактаў. - Заўвага), - сказаў ён. - Думаю, такая размова (на гэту тэму. - Заўвага) у нас апошняя", - сказаў ён.

У сельскагаспадарчых арганізацыях таксама выяўлена 150 нецвярозых работнікаў. Выяўлены прыпіскі ў аператыўнай справаздачнасці аб гатоўнасці тэхнікі і зернесушыльных комплексаў. Па краіне пракуратура ўстанавіла 41 выпадак, калі тэхніка была гатова да работы толькі на паперы. "Такія факты выяўлены ў 25 раёнах Брэсцкай, Мінскай і Магілёўскай абласцей, - падкрэсліў Аляксандр Лукашэнка. - На мой погляд, адна з прычын гэтага ў тым, што асобныя кіраўнікі да канца так і не засвоілі простую ісціну - кіраваць уборачнай трэба ў полі, а не з акна кабінета".

На нарадзе з дакладам выступіў Старшыня Камітэта дзяржкантролю Васіль Герасімаў. Ён гаварыў аб фактах негатоўнасці тэхнікі і прыпісках у гэтым пытанні, недастатковай наяўнасці ў шэрагу выпадкаў запчастак, прастоях, недаглядах у забеспячэнні кадрамі механізатараў. Не ўсюды рэалізаваны задачы па падрыхтоўцы да ўборачнай зернесушыльных комплексаў і складскіх памяшканняў. Выяўляюцца факты няякаснай уборкі і звышнарматыўных страт, парушэнні пры перавозцы збожжа. 

Кантралёры таксама выяўляюць недахопы ў нарыхтоўцы кармоў. У колькасным аб'ёме спрацавалі значна лепш, чым у мінулым годзе, але нярэдкія выпадкі парушэння тэхрэгламентаў пры закладцы кармоў на захоўванне.

Прэзідэнт, рэагуючы на даклад Старшыні КДК, адзначыў: "Прэм'ер-міністру і Вам на працягу бягучага і наступнага тыдня неабходна прыняць самыя жорсткія меры па ўсіх недахопах. І не трэба думаць, што мы застанёмся без кадраў".

Аляксандр Лукашэнка падкрэсліў, што беспарадак, п'янства і крадзеж ніхто цярпець не будзе. "Гэтага быць не павінна. Таму ў вас гэты тыдзень і наступны. Прыняць жорсткія меры і далажыць, - сказаў ён. - Не мне вам тлумачыць, чаго нам каштуе паліва, запчасткі, тэхніка. І спакой забяспечыць, і бяспеку". 

Кіраўнік дзяржавы звярнуў увагу на работу і адказнасць за сітуацыю ўпаўнаважаных Прэзідэнта па рэгіёнах. Напрыклад, старшыня Камітэта дзяржкантролю таксама з'яўляецца ўпаўнаважаным прадстаўніком Прэзідэнта ў Гродзенскай вобласці. Васіль Герасімаў расказаў, што апошні раз работа па ўборачнай у рэгіёне абмяркоўвалася раніцай 20 ліпеня, а да гэтага праводзілася спецыяльная нарада. 

"Вялікі паэт пра нас гаварыў, што мы "празасядаліся". Замест таго, каб на месцах прымаць меры, мы засядаем", - заўважыў беларускі лідар. 

"Адказныя, майце на ўвазе. Дзмітрый Мікалаевіч (Кіраўнік Адміністрацыі Прэзідэнта Дзмітрый Крутой. - Заўвага), трэба перагледзець спіс гэтых адказных. Пасля ўборкі дадзім усім ацэнку і перагледзім", - папярэдзіў Прэзідэнт.

Аляксандр Лукашэнка нагадаў аб патрабаванні па забяспечанасці кадрамі, каб для работы з тэхнікай, асабліва энерганасычанай, хапала механізатараў. "Мы дамаўляліся - ніякіх паставак энерганасычанай тэхнікі, калі няма механізатараў. Гэта датычыцца і тых камбайнаў, якія ёсць", - падкрэсліў Прэзідэнт. 

"Хачу папярэдзіць перш за ўсё адказных упаўнаважаных і памочнікаў Прэзідэнта, трэці - губернатар. Галавой адкажаце за парадак ва ўборачнай кампаніі", - сказаў беларускі лідар. 

Ён падкрэсліў, што да кантролю за ходам уборачнай нельга ставіцца з халадком: "Усе павінны быць мабілізаваны. Вы бачыце, што робіцца з харчаваннем у свеце. Сёння можна зарабіць добрую капейку". 

Аляксандр Лукашэнка выразна расставіў акцэнты ў пытанні, хто і за што адказвае ва ўборачнай кампаніі. Арганізацыя ўборкі ўраджаю - справа старшынь аблвыканкамаў, райвыканкамаў і, зразумела, кіраўнікоў гаспадарак. Міністр сельскай гаспадаркі і харчавання павінен сачыць за захаваннем тэхналогіі. А галоўная задача віцэ-прэм'ера, які адказвае за сферу АПК, - рэалізацыя прадукцыі. 

У пытанні забеспячэння кадрамі Прэзідэнт падкрэсліў, што гэта справа кіраўніцтва на месцах, як і каго прыцягваць, але пастаўленыя задачы павінны быць выкананы ў поўным аб'ёме. Кіраўнік дзяржавы нагадаў, што на час масавай уборкі ў дапамогу гаспадаркам у мінулыя гады задзейнічалі і чыноўнікаў з выканкамаў, і моладзь, уключаючы старшакласнікаў. 

"Усіх трэба задзейнічаць. Усе хочуць есці, і есці добра. Лепш працаваць у полі, чым ваяваць. Гэта - наша мірная "вайна". Таму дзейнічайце. Няхай людзі папрацуюць. І не шкадуйце (сродкаў, каб. - Заўвага) падтрымаць іх матэрыяльна, - сказаў Аляксандр Лукашэнка. - Я ў вашы справы не ўмешваюся і не прымушаю ганяць камбайны і трактары ў полі. Гэта справа кожнага кіраўніка, прынамсі, старшыні райвыканкама. Але калі ў вас справы будуць ісці дрэнна, а ў гэты час камбайны або іншая тэхніка не будзе задзейнічана, гэта ўжо прычына з вас запатрабаваць. Задачы трэба вырашыць у тэрмін".

Міністр сельскай гаспадаркі і харчавання Юрый Горлаў на селектарнай нарадзе далажыў аб планах на ўборачную кампанію гэтага года. Збожжавых і зернебабовых культур разам з рапсам і кукурузай на зерне трэба будзе ўбраць на 2,4 млн га. Паводле ацэнак спецыялістаў, ураджай на палях не ніжэйшы за ўзровень мінулага года. Збожжавых каласавых плануецца сабраць каля 8 млн т, кукурузы на зерне - 2,4 млн т (плюс 500 тыс. т да ўзроўню мінулага года) і 1,2 млн т рапсу (плюс 200 тыс. т). Стаіць задача да 1 жніўня завяршыць церабленне лёну. 

Кіраўнік Мінсельгасхарча таксама далажыў аб гатоўнасці тэхнікі да масавай уборкі і пастаўках новай, замацаванні за імі механізатараў. Вядзецца работа па забеспячэнні запаснымі часткамі, створаны мабільныя рамонтныя брыгады. Разам з тым Юрый Горлаў прызнаў і наяўнасць праблемных фактаў, аб якіх дакладваў Старшыня КДК. 

Аляксандр Лукашэнка падкрэсліў, што кожны райаграсэрвіс павінен стаць своеасаблівым дылерскім цэнтрам для рамонту ўсіх відаў тэхнікі. "Гэта - закон", - сказаў ён. 

Абмяркоўвалася таксама сітуацыя з забеспячэннем сельгасарганізацый палівам. Юрый Горлаў далажыў аб аб'ёмах, якія неабходны для ўборачнай кампаніі і іншых палявых работ у ліпені-верасні. "Крыніцы ўсе адпрацаваны, пастаўка паліва забяспечана", - сказаў ён.

Тым не менш адзначана, што пакуль яшчэ аграсектар не ў поўнай меры разлічыўся за паліва, якое было ўзята з матэрыяльнага рэзерву ў мінулым годзе. Тэрмін вяртання быў вызначаны да 1 жніўня бягучага года. 

Аляксандр Лукашэнка ў сувязі з гэтым абазначыў сваю жорсткую пазіцыю: "Я вас у мінулым годзе папярэджваў: што вінен, аддаць павінен. Узялі - вярніце. І размоў іншых быць не павінна". 

"Паліва ў краіне дастаткова. Усе пытанні па паліве (усякае бывае ў жыцці: трэба бензавоз, два-тры куды-небудзь перакінуць…) - да Прэм'ер-міністра. Ён будзе вырашаць пытанні па паліве. У тым ліку калі трэба будзе задзейнічаць нешта з рэзерваў. У тым рэчышчы, як мы дамовіліся", - сказаў Аляксандр Лукашэнка. 

Ён адзначыў, што ў гэтым пытанні алгарытм выпрацаваны. "Але трэба наводзіць тут парадак. Павінна быць дысцыпліна. Узяў - вярні. Потым яшчэ папросіш", - абазначыў Кіраўнік дзяржавы.

Прэзідэнт даручыў нарошчваць тэмпы ўборачнай кампаніі, каб з наступнага тыдня штодзённа ўбіраць не менш як 6% пасеваў збожжавых.

"Менш як 6% у дзень з наступнага тыдня ўбіраць нельга. Гэта самы мінімум. Але лепш - 7-8%. Чаго б нам ні каштавала, трэба ўбіраць. І без страт", - сказаў Кіраўнік дзяржавы.

Асаблівая ўвага - выкананню тэхналагічнай дысцыпліны. "Дысцыпліна ў аснове ўсяго. Аб гэтым гавораць усе. Няма дысцыпліны - няма толку. Перш за ўсё - тэхналагічная дысцыпліна. Калі людзі не разумеюць, што трэба выконваць тэхналогію, тады ўключаецца іншая дысцыпліна", - адзначыў Прэзідэнт.

Кіраўнік дзяржавы даручыў праваахоўнікам таксама трымаць на кантролі пытанні па дысцыпліне і дапамагаць у гэтым плане кіраўніцтву райвыканкамаў, кіраўнікам гаспадарак. "Прыйшоў на работу - адпрацуй як належыць і выдай рэзультат", - падкрэсліў ён.

Аляксандр Лукашэнка распарадзіўся адпраўляць у армію тых, хто дрэнна працуе, не выконвае працоўную дысцыпліну ў сельскай гаспадарцы, асабліва ў перыяд уборачнай кампаніі.

"Ну чаго мы будзем пры дэфіцыце кадраў наручнікі надзяваць? Папрасіце Хрэніна (Міністр абароны Віктар Хрэнін. - Заўвага), даручэнне яму маё перадайце: усіх, хто не ўмее працаваць, - у армію і на паўднёвую граніцу. У лес. Там нашы хлопцы, сілы спецыяльных аперацый, па маім загадзе разгрупаваны па ўкраінскай граніцы, - сказаў Прэзідэнт. - Гэта не значыць, што мы на кагосьці нападаць (збіраемся. - Заўвага). Мы ні на кога не нападаем, мы забяспечваем сваю бяспеку. Нялёгка - камарыкі, мухі, мошкі і іншае. Вось туды іх, у армію. Звычайнымі салдатамі. Тыдзень падрыхтоўкі (гранатамёт, кулямёт), і туды - у распараджэнне сіл спецыяльных аперацый".

"Усіх туды, хто не выканае даручэнні. Гэта мой загад. Любы чыноўнік (ва ўрадзе, аблвыканкаме, райвыканкаме) - у гаспадарку на трактар, камбайн. Не ўмееш гайкі круціць? Будзеш памочнікам, будзеш падносіць "снарады". Любое невыкананне - у армію. Няхай там служыць. У лесе будзе сядзець. Там таксама патрэбны кадры. Няхай у перыяд уборкі там паслужыць. І чыноўнік, і той, хто не хоча працаваць", - дадаў Аляксандр Лукашэнка.

Старшыні аблвыканкамаў на селектарнай нарадзе далажылі аб ходзе ўборачнай кампаніі ў разрэзе абласцей, вырашэнні абазначаных праблемных аспектаў. Аляксандр Лукашэнка расставіў акцэнты ў шэрагу важных пытанняў і заявіў, што мае намер у хуткім часе прадоўжыць работу ў рэгіёнах, каб азнаёміцца з сітуацыяй на месцах.

На селектарнай нарадзе Аляксандр Лукашэнка яшчэ раз выказаўся на тэму прыцягнення ў краіну работнікаў з Узбекістана.

Беларускі лідар падкрэсліў, што Прэзідэнт Узбекістана папрасіў яго не толькі аб працаўладкаванні людзей, але ў першую чаргу аб пастаўках мяса і малака. "У іх не хапае зямлі, у іх няма вады (недастаткова водных рэсурсаў. - Заўвага). У нас дастаткова і зямель, і вады. Мы можам вырабіць мяса і малако", - сказаў Кіраўнік дзяржавы.

Паводле слоў Аляксандра Лукашэнкі, бакі дамовіліся аб прыездзе ў Беларусь работнікаў з Узбекістана, каб хутчэй і эфектыўней вырашыць пытанне з пастаўкамі неабходнай сельгаспрадукцыі. І гэта датычыцца не толькі Віцебскай вобласці, якая цяпер найбольш актыўна задзейнічана ў рэалізацыі адпаведных планаў.

Для нарошчвання сельгасвытворчасці пад павелічэнне паставак у тым ліку неабходны дадатковы аб'ём рабочай сілы. Але ў Беларусі ў гэтых адносінах ёсць кадравы дэфіцыт. Таму выпрацаваны парадак і сістэма прыцягнення замежных работнікаў.

"Калі вашы людзі (з Узбекістана. - Заўвага) пройдуць па гэтай нашай сістэме, гэта ўсё пад кантролем, мы іх возьмем на работу ў Беларусь як сваіх людзей. Не толькі каб зарабіць грошы і зарплату атрымаць добрую, а вырабіць мяса, малако, - падзяліўся Прэзідэнт дэталямі дамоўленасцей. - Вырабілі мяса, малако - мы ім прададзім на іх рынкі. Вось адсюль і заработная плата".

Аляксандр Лукашэнка звярнуў увагу, што калі нехта мае намер ехаць у Беларусь, каб атрымліваць "вялізныя грошы" ў эквіваленце некалькіх тысяч долараў, то лепш разгледзець, напрыклад, варыянт працаўладкавання ў Расіі: "Яны там могуць уладкавацца на нафтапромыслы, яшчэ на нейкія напрамкі, працаваць і атрымліваць вялізную зарплату".

"Да нас яны прыедуць для таго, каб, яшчэ раз паўтараю, вырабіць мяса, малако, іншую сельгаспрадукцыю і паставіць на радзіму. Чым вышэйшая прадукцыйнасць, чым больш тавараў вырабяць, тым большая зарплата. І яны могуць распараджацца так, як яны хочуць", - сказаў Прэзідэнт.

У сваю чаргу Беларусь прадаставіць такім работнікам увесь пералік сацыяльных паслуг і гарантый. "Што датычыцца аховы здароўя, адукацыі, яны будуць мець такія ж правы, як беларусы. А гэта таксама затраты і немалыя грошы", - заўважыў беларускі лідар.

Звяртаючыся да кіраўнікоў рэгіёнаў, Прэзідэнт сказаў, што на месцах павінны самастойна вырашаць, ці трэба недзе прыцягваць замежных работнікаў. Галоўнае - у поўнай меры рэалізаваць пастаўленыя задачы. "Калі вам людзі збоку не трэба - не бярыце. Я вас не прымушаю іх браць", - адзначыў Аляксандр Лукашэнка.

Падводзячы вынікі нарады, Прэзідэнт сказаў: "Каб своечасова, добра ўбраць, забяспечыць Беларусь і на экспарт паставіць прадукцыю сельскай гаспадаркі, у нас ёсць усё. Ад тэхнікі да перапрацоўкі. Трэба ўсім варушыцца, працаваць. Як рабіць - мы з вамі вызначыліся". 

Асабліва Кіраўнік дзяржавы падкрэсліў ролю сілавых структур, якія не толькі сочаць за парадкам і выяўляюць парушэнні, але і ў прамым сэнсе слова падстаўляюць плячо аграрыям у перыяд уборачнай кампаніі: "Я папрашу быць адказнымі і прыкладам для вертыкалі ўлады. Каб пра вас як пра сілавікоў сёння гаварылі толькі станоўчае: "МНС, МУС, пракуроры дапамагаюць, дзякуй Мінабароны". Вось так павінны пра нас гаварыць людзі з месцаў. Таму, калі ласка, падключайцеся". 

Аляксандр Лукашэнка адзначыў, што ў цэлым галоўнае - правільная арганізацыя працэсаў і дысцыпліна. Сваю ролю павінны адыграць і ўпаўнаважаныя Прэзідэнта па рэгіёнах. "Пакуль не перагледжаны гэты склад, выехаць (трэба. - Заўвага) у вобласці і там дапамагаць працаваць. Не трэба хадзіць за губернатарамі, не трэба нікога палохаць, бразгаць наручнікамі і іншае. Трэба дапамагчы. Усе павінны быць мабілізаваны, - сказаў Кіраўнік дзяржавы. - Але гэта не значыць, што мы заўтра кінемся на вёску і будзем там ад мэра Мінска да міністра прамысловасці сядзець у калгасах і саўгасах. Не, у нас шмат іншых праблем. І дай бог, каб у нас у прамысловасці або ў будаўніцтве справы ішлі так, як у сельскай гаспадарцы".

"Сельская гаспадарка ў нас дыхае нармальна. Але вы бачыце, што мы вельмі сур'ёзна залежым ад надвор'я. І Гасподзь Бог нас не балуе. Недзе дапаможа, дзе трэба. Але дзе мы недапрацоўваем, ён нам дапамагаць не будзе", - падкрэсліў беларускі лідар.