Наведванне пляцоўкі комплекснай рэканструкцыі забудовы ТАА "Мінскі гарадскі тэхнапарк"

Прэзідэнт Беларусі Аляксандр Лукашэнка 15 жніўня наведаў пляцоўку комплекснай рэканструкцыі забудовы ТАА "Мінскі гарадскі тэхнапарк".

Прэзідэнту далажылі аб ходзе рэканструкцыі пляцоўкі. Кіраўнік дзяржавы выказаў шэраг нараканняў наконт аператыўнасці работ і запатрабаваў дзейнічаць больш актыўна. "Чаго вы цягнеце да гэтага часу?" - сказаў ён.

Старшыня Мінгарвыканкама Уладзімір Кухараў далажыў аб работах па зносе шэрага непрыдатных будынкаў і збудаванняў, узвядзенні новых карпусоў і прадастаўленні іх у арэнду для шэрага вытворцаў, як дзяржаўных, так і прыватных. Прэзідэнт на аўтобусе зрабіў аглядную паездку па тэрыторыі пляцоўкі, дэталёва пацікавіўся станам спраў, ходам работ і даў шэраг даручэнняў.

Аляксандр Лукашэнка запатрабаваў, каб да новага года работы па новых памяшканнях вяліся ўжо на фундаментах. "Мы павінны будаваць па-сучаснаму. Не цагляны мур у паўметра, а самыя сучасныя сценавыя панэлі", - даручыў ён.

Кіраўнік дзяржавы папярэдзіў і наконт недапушчальнасці крадзяжоў. "Не дай бог, тут будзе ўкрадзены хоць адзін рубель", - сказаў Аляксандр Лукашэнка.

Ён даручыў, каб і на іншых цяпер невыкарыстоўваемых пляцоўках у Мінску работы вяліся з улікам тых жа падыходаў.

"Трэба хутка гэта ўсё зрабіць", - запатрабаваў Кіраўнік дзяржавы.

Асобную ўвагу ён звярнуў і на захаванне гістарычнага аблічча будынка на Партызанскім праспекце, які фарміруе ансамбль гэтага праспекта.

Аляксандр Лукашэнка запатрабаваў большай лакалізацыі на айчынных вытворчасцях, і ў прыватнасці на мотавелазаводзе. Ён звярнуў увагу, што многія камплектуючыя цяпер закупляюцца за мяжой, і падкрэсліў, што трэба імкнуцца да таго, каб рабіць сваё. Напрыклад, па асобных вырабах лакалізацыя толькі каля 20%, а ва ўмовах цяперашняй абстаноўкі ў свеце, санкцыйнага націску такі падыход нясе ў сабе пэўныя рызыкі.

"Мы павінны рабіць сваё! - падкрэсліў Кіраўнік дзяржавы. - Тое, што завёз запчасткі, сабраў тут... Гэта добра з кітайцамі (камплектуючыя мотавелазавод закупляе ў Кітаі. - Заўвага) у нас добрыя адносіны. Гэта павінна быць сваё, наколькі магчыма. І так па ўсіх матацыклах і веласіпедах".

Аляксандр Лукашэнка ў цэлым застаўся незадаволены ўбачаным, адзначыўшы марудную рэалізацыю раней намечаных планаў. У сувязі з гэтым Кіраўнік дзяржавы выказаў жорсткую крытыку ў адрас адказных асоб. "Няма чаго глядзець. Гэта не работа! Такая работа нікому не патрэбна", - сказаў Прэзідэнт.

У час знаходжання на пляцоўцы комплекснай рэканструкцыі забудовы ТАА "Мінскі гарадскі тэхнапарк" Аляксандр Лукашэнка сабраў нараду аб завяршэнні будаўніцтва праблемных аб'ектаў у Мінску.

Кіраўнік дзяржавы адразу абазначыў галоўнае пытанне - развіццё гарадской інфраструктуры ў сталіцы і будаўніцтва новых аб'ектаў, прычым з захаваннем усіх стандартаў і абавязацельстваў. "Не трэба вам нагадваць, што Мінск з'яўляецца візітнай карткай, для гэтага шмат робіцца, і добраўпарадкаванне, і для камфорту людзей. Гэта бачаць і госці сталіцы, і беларусы. Але як у такую канцэпцыю прыгожага і ўтульнага горада могуць упісвацца даўгабуды? Вось асноўнае пытанне, якое мы павінны сёння разгледзець", - падкрэсліў Аляксандр Лукашэнка.

Паводле яго слоў, будаўнічыя праекты часам не рэалізуюцца гадамі. У якасці аднаго з прыкладаў Кіраўнік дзяржавы прывёў былыя аб'екты Мінскага вытворчага аб'яднання вылічальнай тэхнікі (МВАВТ). "Толькі пасля ўмяшання Прэзідэнта давялі да ладу аб'ект на выездзе з горада па праспекце Пераможцаў, - сказаў беларускі лідар. - І такі ён не адзін. Вазьміце газпрамаўскі даўгабуд. Доўгі час не могуць увесці ў эксплуатацыю гасцініцу насупраць "Мінск-Арэны". Не завершана будаўніцтва паркінга і ўбудаваных памяшканняў у жылым доме на Нёманскай, 80. Гандлёвы цэнтр "Гулівер" - нямы дакор нашай безгаспадарчасці. Аналагічная сітуацыя, паводле слоў Прэзідэнта, з пабудовай каля цырка ў самым знакавым месцы Мінска.

"Аб чым сведчаць гэтыя прыклады? Аб тым, што ў сталіцы бардака больш, чым дзе-небудзь, Наталля Іванаўна (Качанава. - Заўвага), - лічыць Кіраўнік дзяржавы. - Жулікаў тут хапае, але і непаваротлівасць гарадскіх чыноўнікаў таксама мае месца. І вы як ніхто павінны разумець, што гэта не толькі помнікі безгаспадарчасці. Перш за ўсё гэта няствораныя рабочыя месцы, недаатрыманыя падаткі ў бюджэт, замарожаная эканамічная актыўнасць. Такі стан спраў нікуды не варты".

"Ёсць старшыня гарвыканкама, упаўнаважаныя па горадзе і аж цэлы памочнік, - сказаў беларускі лідар. - Пара прымаць кардынальныя меры, пачынаючы з газпрамаўскіх праектаў і заканчваючы будаўніцтвам жылля".

Аляксандр Лукашэнка запатрабаваў далажыць аб сітуацыі з завяршэннем будаўніцтва аб'ектаў на месцы былога завода МВАВТ, перспектывах развіцця тэрыторый мотавелазавода, шляхах вырашэння праблемы іншых даўгабудаў сталіцы.