Наведванне ТАА "АМКАДОР-ЛЕСМАШ"

Прэзідэнт Беларусі Аляксандр Лукашэнка 25 верасня зрабіў рабочую паездку ў Лагойскі раён Мінскай вобласці, дзе наведаў ТАА "АМКАДОР-ЛЕСМАШ".

Кіраўнік дзяржавы пачаў рабочую паездку з размовы аб сельскай гаспадарцы. Прэзідэнт пацікавіўся, як ідзе сяўба азімых у Мінскай вобласці. Даложана, што пасеяна ўжо 70% ад запланаваных плошчаў. Завяршыць сяўбу плануюць да 5 кастрычніка.

"Перш чым пра лес будзем гаварыць, трэба разумець, што сеяць цяпер трэба імгненна. Не аператыўна, не хутка - проста імгненна", - падкрэсліў беларускі лідар.

Аляксандр Лукашэнка звярнуў увагу, што ў аграрыяў з улікам надвор'я ёсць усяго каля тыдня ў запасе, каб правесці сяўбу ў агратэхнічныя тэрміны і каб пасевы паспелі потым даць добрыя ўсходы.

На прадпрыемстве Кіраўніку дзяржавы далажылі аб вытворчасці лесанарыхтоўчай тэхнікі пад поўную патрэбнасць краіны і развіцці холдынга "АМКАДОР", лесанарыхтоўках.

Прэзідэнт падкрэсліў важнасць для краіны вытворчасці сучаснай айчыннай лесанарыхтоўчай тэхнікі. Аляксандр Лукашэнка адзначыў, што без адпаведнай тэхнікі ў лесе працаваць у сучасных умовах немагчыма. "Ужо сякерай або пілой "Дружба-2" ніхто не працуе. І не трэба. Таму без вашых харвестараў, форвардараў нічога мы там зрабіць не зможам", - сказаў ён.

Прэзідэнт падкрэсліў, што важна і далей працаваць над павышэннем якасці прадукцыі як лінейкі лесанарыхтоўчай тэхнікі, так і прадукцыі холдынга "АМКАДОР" у цэлым. "Я вельмі разлічваю, што ты падштурхнеш "АМКАДОР" не ўніз, а ўверх, і будзе вынік", - сказаў Аляксандр Лукашэнка, звяртаючыся да генеральнага дырэктара ААТ "АМКАДОР" - кіруючая кампанія холдынга" Аляксандра Яфімава.

Што датычыцца лясной тэхнікі, кіраўнік прадпрыемства запэўніў, што "АМКАДОР" гатовы закрываць патрэбнасць айчыннай лесанарыхтоўкі ў спецыялізаваных машынах. У тым ліку з перспектывай нарошчвання аб'ёмаў, каб своечасова ўбіраць спелы лес, на чым робіць акцэнт Кіраўнік дзяржавы.

Аляксандр Лукашэнка таксама звярнуў увагу, што трэба не толькі забяспечваць патрэбнасці ўнутранага рынку, але і пастаўляць гэту прадукцыю на экспарт. Напрыклад, у Расійскую Федэрацыю. "Трэба працаваць на экспарт. І нам ёсць куды рухацца. Трэба дапамагаць расіянам у лесе", - сказаў ён. Кіраўнік холдынга запэўніў кіраўніка дзяржавы, што ў гэтым напрамку ўжо вядзецца работа. Цікавасць да лясной тэхнікі "Амкадор" ёсць у шэрага рэгіёнаў Расіі - у прыватнасці, у Архангельскай вобласці.

"Трэба спяшацца, трэба рабіць хутчэй. Такога перыяду (складанага, цяжкага, але ў той жа час выгаднага для нас) больш у гісторыі Беларусі ў агляднай будучыні не будзе. Ні ў якім разе не расслабляцца. Таму што вы хутчэй зоймеце рынкі, якія вызваляюцца. А ў Беларусі трэба адназначна ўзмацняць нарыхтоўку лесу, - падкрэсліў беларускі лідар. - Трэба рабіць хутка і працаваць столькі, колькі патрэбна".

Гаворачы пра запатрабаванасць прадукцыі лясной галіны, ён прывёў у прыклад у тым ліку супрацоўніцтва з Аманам. У прыватнасці, раней Мінск і Маскат дасягнулі дамоўленасцей аб будаўніцтве ў Беларусі цэлюлозна-кардоннага камбіната. "Мае перагаворы з азіяцкімі краінамі, Аманам... Адразу ставяць пытанне: мэбля, лес, папера. Нам трэба хутчэй ісці", - упэўнены Прэзідэнт.

Старшыня Камітэта дзяржаўнага кантролю Васіль Герасімаў адзначыў, што магчымасці нарасціць перапрацоўку сапраўды ёсць. Гэта неабходна з улікам таго, што назбіраліся вялікія аб'ёмы тэхнічнай драўніны. Аляксандр Лукашэнка падкрэсліў, што гэта неабходна рабіць, але пераважна не за кошт нарошчвання магутнасцей, а максімальнага задзейнічання ўжо існуючых. Інакш у будучым, калі гэтыя магутнасці не будуць загружаны ў поўнай меры, можа скласціся сітуацыя, як цяпер у нямецкім аўтапраме.

"Вы мне не расказвайце пра нарошчванне магутнасцей, аб'ёмы перапрацоўкі. Гэта будзе як цяпер "Мерседэс" у Германіі. Трэба папрацаваць на пяць гадзін у тыдзень больш, - сказаў Прэзідэнт. - Тым больш у нас жа людзі хочуць працаваць. У нас людзі - рабацягі, яны заўсёды адрэагуюць. Трэба толькі з імі размаўляць, тлумачыць і, зразумела, плаціць".

Кіраўнік дзяржавы ў сувязі з гэтым звярнуў увагу на дастойную заработную плату работнікаў "АМКАДОР-ЛЕСМАШ": "Для раённага цэнтра гэта ўвогуле заваблочна. Мы некалі пра 500 долараў марылі, а яны ўжо тут больш за тысячу атрымліваюць. Цудоўная заработная плата".

Як далажылі Аляксандру Лукашэнку, 52% агульнага парку лесанарыхтоўчай тэхнікі займаюць машыны вытворчасці "АМКАДОР". На гэты час прадпрыемства ў Лагойску выйшла на праектную магутнасць 120 адзінак тэхнікі ў год. Пры гэтым сярэдняе спажыванне лясных машын да 2030 года прагназуецца на ўзроўні 100 адзінак штогод. Такім чынам, магутнасці "АМКАДОР-ЛЕСМАШ" даюць магчымасць у перспектыве не толькі закрыць патрэбнасці лесагаспадарчага комплексу Беларусі, але і пастаўляць машыны на экспарт.

Прэзідэнт у сувязі з гэтым пацікавіўся, ці працуе прадпрыемства максімальна. Аляксандр Яфімаў адзначыў, што ў дзеючых карпусах нарасціць вытворчасць тэхнікі немагчыма, аднак у прадпрыемства ёсць рэзерв для развіцця за кошт магчымага пашырэння плошчаў. У далейшых планах развіццё ўласных кампетэнцый, пашырэнне наменклатуры выпускаемай прадукцыі і завяршэнне ўводу ўсіх вытворчых магутнасцей з давядзеннем гадавога аб'ёму выпуску да 250 машын.

Беларускі лідар пацікавіўся якасцю айчыннай тэхнікі ў Міністра лясной гаспадаркі Сяргея Ульдзіновіча - чалавека, які мае самае непасрэднае дачыненне да лясной галіны і можа назіраць машыны "АМКАДОР" непасрэдна ў час работы. "Што цябе не задавальняе тут, што дрэнна? - удакладніў Кіраўнік дзяржавы. Паводле слоў Міністра, у лесагаспадарчай тэхнікі "АМКАДОР" меліся пэўныя праблемы, аднак большасць з іх вырашана. Акрамя таго, прадпрыемства працуе ў цесным супрацоўніцтве з арганізацыямі Міністэрства лясной гаспадаркі для развіцця сэрвіснага абслугоўвання лесаперапрацоўчай тэхнікі. "Калі цябе задавальняе, табе і адказваць за ўсе "касякі" ў лесе, якія я бачу", - папярэдзіў Аляксандр Лукашэнка Сяргея Ульдзіновіча.

Кіраўнік дзяржавы нагадаў, што раней быў прыняты шэраг рашэнняў па "АМКАДОР", у тым ліку ў фінансавых адносінах. У сувязі з гэтым ён спытаў: "Вынік ёсць ад гэтага? Ці зноў гэта глыток паветра, а далей будзе яма?"

Прэзідэнту далажылі, што "АМКАДОР-ЛЕСМАШ" і іншыя прадпрыемствы холдынга дэманструюць тэмпы росту выручкі, ёсць дадатная дынаміка і па экспарце. Вядзецца работа над павышэннем лакалізацыі тэхнікі і загрузкі магутнасцей прадпрыемстваў. Вырашаюцца пытанні па далейшым павышэнні якасці прадукцыі. Гэта дае падставы меркаваць, што ўжо ў будучым годзе прадукцыя на экспарт будзе ісці ў большым аб'ёме.

Прэзідэнт на прадпрыемстве падрабязна азнаёміўся з вытворчасцю і ўзорамі выпускаемай прадукцыі. Кіраўніку дзяржавы таксама на практыцы прадэманстравалі работу комплексу машын - айчынных харвестара і форвардара.

Як яму далажылі, на прадпрыемстве правялі ўжо вялікую работу па імпартазамяшчэнні, вырабляючы айчынныя камплектуючыя, якія не ўступаюць лепшым замежным узорам. Гэта ў тым ліку харвестарныя галоўкі - самы дарагі і навукаёмісты вузел. Гэты напрамак работы стаў тым больш актуальным пасля ўвядзення шэрагам краін санкцый у адносінах да Беларусі і яе прадпрыемстваў.

Аляксандр Лукашэнка ў сувязі з гэтым нагадаў аб сваім першапачатковым патрабаванні да чыноўнікаў і кіраўніцтва прадпрыемстваў. "Пра санкцыі забараняецца гаварыць. Ніякіх размоў! Гэта час магчымасцей. Калі б нас не прыціснулі, мы гэта не мелі б. А калі мелі б, то не пры нашым жыцці. Калі ласка - рэзультат. Не хочаце - не трэба, мы зрабілі самі. І калі мы разумная машынабудаўнічая краіна, мы павінны гэта рабіць, чаго б ні каштавала", - падкрэсліў ён на прыкладзе асваення вытворчасці ў Беларусі ўсёй неабходнай тэхнікі для лесанарыхтоўкі.

Прэзідэнт адзначыў, што пад такія праекты ў дзяржаве заўсёды знойдуцца сродкі. Галоўнае - не ўпусціць момант, каб вырабіць запатрабаваную прадукцыю і заняць сваю нішу на рынку. І гэта датычыцца не толькі лесанарыхтоўчай тэхнікі. "Лішніх грошай ніколі не было і не будзе. Але, тым не менш, я напружваю і Нацыянальны банк, і ўрад, каб мы знаходзілі гэтыя грошы. Як? Гэта наша пытанне. Але цяпер трэба аператыўней і хутчэй, - упэўнены Кіраўнік дзяржавы. - Рух ёсць. Для мяне важна дынаміка. Той выйграе, хто сёння будзе бегчы. Хутка трэба рабіць і па продажах, і іншае".

Аляксандр Лукашэнка ў час наведвання прадпрыемства нагадаў аб задачах, якія стаяць перад холдынгам, а таксама па іншых напрамках у прамысловасці.

Што датычыцца і канкрэтна прадпрыемства ў Лагойскім раёне, і холдынга "АМКАДОР" у цэлым, Кіраўніка дзяржавы запэўнілі, што пазітыўная дынаміка ёсць.

"Значыць, вынік будзе. Ну дай бог. Я вельмі ўважліва сачу за "АМКАДОРам". Гэта для нас вельмі важна. Не хачу нават гаварыць, якое значэнне мае. Сам ведаеш, лепш за мяне", - звярнуўся Прэзідэнт да генеральнага дырэктара ААТ "АМКАДОР" - кіруючая кампанія холдынга" Аляксандра Яфімава.

Цяперашні кіраўнік холдынга - у нядаўнім мінулым Міністр прамысловасці. Ён узначаліў кампанію летам 2025 года, але і да міністэрскай работы працоўны шлях Аляксандра Яфімава быў цесна звязаны з "АМКАДОРам". "Гэта пачатак працоўнай дзейнасці. Таму гэта ўсё ў душы", - адзначыў ён.

Пры накіраванні на "АМКАДОР" новага кіраўніка Аляксандр Лукашэнка ставіў задачы па вывядзенні прадпрыемства з існуючага цяжкага становішча, развіцці вытворчасці і больш актыўнай рабоце на знешніх рынках. За год у гэтым напрамку нямала зроблена, але і наперадзе яшчэ шмат работы.

Гаворачы аб цяперашніх задачах Аляксандра Яфімава, Прэзідэнт сказаў: "Ты павінен ажыццявіць прарыў на гэтым фронце, а далей мы будзем глядзець, што з табой рабіць (у плане кар'ерных перспектыў. - Заўвага)".

Потым Аляксандр Лукашэнка звярнуўся да віцэ-прэм'ера Віктара Каранкевіча, спытаўшы, як ідуць справы з распрацоўкай і вытворчасцю некаторых тэхнічных навінак для айчыннай прамысловасці.

"Даільны апарат гатовы?" - пацікавіўся Кіраўнік дзяржавы.

"Да снежня будзе гатовы. І мы яго будзем дэманстраваць", - далажыў віцэ-прэм'ер.

Гэту рабатызаваную даільную ўстаноўку папярэдне ўжо дэманстравалі Кіраўніку дзяржавы ў канцы 2025 года. Айчынны праграмны комплекс для яе распрацоўвалі ў "H-холдынгу". А сам апарат прызначаны закрыць важнейшую патрэбнасць для сегмента аўтаматызацыі жывёлагадоўлі.

"У эксперыменце пакуль атрымліваецца. Я наведваў, бачыў гэта ўсё", - далажыў намеснік Старшыні Усебеларускага народнага сходу, упаўнаважаны прадстаўнік Кіраўніка дзяржавы ў Мінскай вобласці Аляксандр Косінец.

Яшчэ адзін напрамак, за які асабіста адказвае Віктар Каранкевіч, - канчатковая адпрацоўка тэхналогіі і запуск у серыю першага айчыннага камбінаванага рулоннага прэс-падборшчыка. Доследны ўзор Прэзідэнту прадэманстравалі летам бягучага года ў час рабочай паездкі ў Бярозаўскі раён.

"Па 4 тыс. кожны прэс ужо зрабіў рулонаў. Далей прадаўжаем выпрабаванні", - далажыў віцэ-прэм'ер.

Аляксандр Лукашэнка спытаў, як гэты агрэгат сябе паказвае ў параўнанні з замежнымі аналагамі.

"Мы гаворым, што ён не горшы за імпартны. Па асобных пазіцыях нават і лепшы", - запэўніў Віктар Каранкевіч.

"Ну глядзі. Гэта таксама твой твар. Як у яго (Аляксандра Яфімава. - Заўвага) "АМКАДОР", так у цябе канкрэтныя гэтыя дзве рэчы", - заўважыў Кіраўнік дзяржавы.

Следам справаздачу трымаў Міністр прамысловасці Андрэй Кузняцоў. Яму Прэзідэнт даручаў асвоіць у Беларусі вытворчасць якаснай гідраўлікі, якая запатрабавана на многіх прамысловых прадпрыемствах краіны.

"Мы пасля вашага даручэння правялі нараду на нашай асноўнай кампаніі "САЛЕА" ў Дзяржынску. Прыцягнулі не толькі нашы падведамасныя прадпрыемствы, але і прыватніка", - сказаў Міністр.

Аляксандр Лукашэнка ў адказ даручыў прыцягваць усіх, каго неабходна, ажно да замежных экспертаў. "Калі трэба з-за мяжы - купім, заплацім, калі будзе магчымасць некага прыцягнуць", - сказаў ён.

Андрэй Кузняцоў далажыў, што ў плане вытворчасці ўласнай гідраўлікі ў краіне ўжо ёсць вынікі. Напрыклад, айчыннай гідраўлікай камплектуецца 80% тэхнікі, што вырабляецца на МТЗ, а таксама "Гомсельмашы". Паралельна дадаткова вядуцца работы над павышэннем якасці. Міністр упэўнены, што на працягу наступнага года пры рэалізацыі даручэння кіраўніка дзяржавы будзе паказаны дастойны вынік.

"Гэта таксама твой твар, - сказаў Аляксандр Лукашэнка. - Трэба з гідраўлікай вырашыць пытанне".

Кіраўнік дзяржавы падкрэсліў, што зямельныя і лясныя рэсурсы вельмі важны для Беларусі: "Зямлі і лес - гэта наша ўсё. Трэба займацца культуртэхнікай. Але толькі тады, калі ёсць аддача ад таго, што ў цябе акультурана. Я гляджу, нам на многіх палях трэба нешта высякаць, выдзіраць гэтыя пні і апрацоўваць глебу. Трэба больш і больш займацца меліярацыяй, культуртэхнікай, каб вяртаць землі да жыцця".

Ён звярнуў увагу, што цэны на прадукты харчавання ў свеце сур'ёзна растуць, і для Беларусі, якая іх вырабляе з лішкам і экспартуе, гэта добра. "Для таго, каб прадукты харчавання мець, патрэбны землі і тэхналогіі", - падкрэсліў Аляксандр Лукашэнка.

Прэзідэнт яшчэ раз нагадаў аб задачы па ўдасканаленні тэхналагічнай і арганізацыйнай кіруемасці ў буйных аб'яднаных сельгасарганізацыях.

Даручэнні па гэтай тэме былі дадзены Кіраўніку Адміністрацыі Прэзідэнта Дзмітрыю Крутому і памочніку Прэзідэнта - інспектару па Магілёўскай вобласці Надзеі Каткавец пасля рабочай паездкі Аляксандра Лукашэнкі ў Шклоўскі раён. За тыдзень да гэтага Кіраўнік дзяржавы наведаў там сельгаспрадпрыемства "Гавяды-агра", якое некаторы час таму было ўзбуйнена - да яго дабавілі чатыры суседнія сельскагаспадарчыя арганізацыі.

"Пяць гаспадарак (увогуле. - Заўвага). Раней там быў старшыня, намеснік, спецыялісты ўсе і 20 чалавек у канторы. Сёння ў аб'яднанай гаспадарцы нават начальніка ўчастка няма. Ну а як можна працаваць? Я гавару: "Як ты кіруеш гаспадаркай?". А ў нас, кажа (кіраўнік "Гавяды-агра". - Заўвага), ёсць заатэхнік, аграном, ветурач і іншыя", - нагадаў Кіраўнік дзяржавы аб сваёй нядаўняй размове ў Шклоўскім раёне.

Прэзідэнт упэўнены, што такім чынам немагчыма эфектыўна выбудоўваць кіраўніцкія працэсы. Хаця б таму, што тэрыторыі гаспадаркі знаходзяцца адна ад адной на адлегласці да 40-50 км. Спецыялістам, каб нешта пракантраляваць, трэба рэгулярна праязджаць гэтыя адлегласці ў абодва бакі. Гэта і доўга, і затратна, і не заўсёды магчыма.

"І вось я пасля гэтага дадому прыехаў - ноччу спаць не магу, думаю, як ён кіруе гэтай махінай. Пяць гаспадарак - начальнікаў участкаў няма", - падзяліўся Аляксандр Лукашэнка.

Ён растлумачыў, што пры наяўнасці такіх начальнікаў участкаў на тэрыторыі былых асобных гаспадарак цяперашні кіраўнік мог бы на планёрцы паставіць неабходныя задачы з улікам рэкамендацый агранома і іншых спецыялістаў, а ў далейшым ужо ход работ кантраляваўся б на месцах. "Начальнік участка ўзяў трактарыста, трактар, сеялку. І ён засявае гэта поле. Ён кантралюе", - прывёў прыклад Кіраўнік дзяржавы.

"Вось так пааб'ядноўвалі гаспадаркі, а не падумалі, як кіраваць. Тэхналагічна як будзе кіравацца (добра, там спецыялісты), а галоўнае - арганізацыйна? - падкрэсліў Прэзідэнт. - Вось я ім з Каткавец паставіў задачу".

Аляксандр Лукашэнка растлумачыў, што наводзіць парадак у гэтым і іншых пытаннях на прыкладзе Шклоўскага раёна, каб паказаць усім астатнім, як трэба рабіць. "Таму што я ведаю там кожную дарогу, кожную сцежку", - адзначыў Прэзідэнт.

Аналагічна з сельскай гаспадаркай Прэзідэнт звярнуў увагу на пытанні кіруемасці на буйных прамысловых аб'яднаннях і холдынгах. "Мы холдынгі стварылі. Нібыта і правільна. Але ў прамысловасці - ні ў якім разе кіраванне не страціць, - паставіў задачу Кіраўнік дзяржавы. - Гэта значыць, нам трэба яшчэ вось гэты элемент адпрацаваць, асабліва ў сельскай гаспадарцы".

У дачыненні да сельскай гаспадаркі Аляксандр Лукашэнка нагадаў пра яшчэ адну задачу, аб чым таксама ішла размова ў час нядаўняй рабочай паездкі ў Шклоўскі раён. Гэта павелічэнне аб'ёмаў вытворчасці бульбы ў краіне, але абавязкова пад пошук і пашырэнне рынкаў збыту.

"Таму ў Дзмітрыя Мікалаевіча (Кіраўніка Адміністрацыі Прэзідэнта Дзмітрыя Крутога. - Заўвага) вялікія задачы і па харчаванні (пашырэнні рынку), і па прамысловасці. З расіянамі ў яго добрыя адносіны, а для бізнесу гэта немалаважна", - рэзюмаваў Кіраўнік дзяржавы.