Наведванне ІІІ Чэмпіянату па колцы дроў сярод СМІ

Прэзідэнт Беларусі Аляксандр Лукашэнка 7 лістапада наведаў ІІІ Чэмпіянат па колцы дроў сярод СМІ, які адбыўся на маляўнічым беразе вадасховішча Вяча ў Мінскім раёне.

Адразу пасля прыбыцця на спаборніцтвы Кіраўнік дзяржавы правёў майстар-клас па колцы дроў.

"Каб сячы дровы, трэба выбраць адпаведную сякеру, - расказаў аб сваім падыходзе Аляксандр Лукашэнка. - Выбралі сякеру, глядзім на калодку - вось адна трэшчына, па гэтай трэшчыне трэба сячы. Прырода выбрала, дзе слабей валокны трымаюць, рассячы будзе лягчэй тут. Трэба сячы не спяшаючыся. Вельмі важна глядзець у тую кропку, куды ты хочаш ударыць сякерай". У выніку вялізныя цяжкія калоды літаральна ад некалькіх удараў распадаліся на часткі, здавалася б, без бачных намаганняў. Хоць для гэтага, вядома, патрэбны не толькі гады вопыту, але і немалая фізічная сіла.

Прэзідэнт у час майстар-класа прадэманстраваў некалькі сякер, якія выкарыстоўвае для колкі дроў, а таксама прэзентаваў сякеру беларускай вытворчасці. Паводле яго слоў, яна атрымалася нядрэннай, крыху цяжэйшай за імпартныя аналагі. У шэрагу выпадкаў, калі трэба справіцца з важкай калодай, гэта хутчэй добрая якасць, а не недахоп. Таму многія ўдзельнікі майстар-класа, якім Прэзідэнт прапаноўваў прадэманстраваць свае ўменні, звярталіся менавіта да айчыннай прылады працы. А прысутным адказным чыноўнікам Кіраўнік дзяржавы нагадаў аб сваім даручэнні, дадзеным у маі гэтага года ў час рабочай паездкі ў Оршу.

Тады Прэзідэнту былі прадэманстраваны першыя ўзоры сучасных айчынных сякер, вырабленых па яго даручэнні. Аднак, паводле ацэнкі Прэзідэнта, выраб атрымаўся не вельмі ўдачным. І Аляксандр Лукашэнка паставіў жорсткую задачу - дапрацаваць і ўжо на працягу гэтага года асвоіць вытворчасць такіх тавараў, неабходных для работы з драўнінай. Кіраўнік дзяржавы тады заўважыў, што для Беларусі, чыя тэрыторыя амаль напалавіну пакрыта лесам, гэта ганьба - не мець добрай па якасці лінейкі тэхнікі і тавараў для работы з драўнінай і, як вынік, траціць значныя фінансавыя сродкі на закупку ўсяго неабходнага за мяжой. Прэзідэнт падкрэсліў, што ўсё для лесу павінна вырабляцца ў нашай краіне.

Цяпер Прэзідэнт нагадаў аб гэтым адказным асобам: "Я ў Оршы даручаў зрабіць для лесу ўсё. Значыць, збярыце, хто там быў, і запатрабуйце, пачынаючы ад сякеры і заканчваючы бензапілой".

Разам з Аляксандрам Лукашэнкам у колцы дроў прынялі ўдзел і асобы, якія яго суправаджалі, у тым ліку прэс-сакратар Прэзідэнта Наталля Эйсмант, сенатар Дзмітрый Баскаў і іншыя. "Каб людзі разумелі, што каля мяне няма гультаёў", - пракаменціраваў гэта Кіраўнік дзяржавы. Ён уважліва назіраў за працэсам, дапамагаючы ўдзельнікам майстар-класа не толькі дабіцца выніку - рассячы калоду, але і зрабіць гэта максімальна хутка, якасна, з улікам нюансаў, якія зусім не відаць на першы погляд. Напрыклад, не ўсе ведаюць, што калоць пажадана не на дробныя часткі, а на большыя, каб дровы потым даўжэй гарэлі.

Аляксандр Лукашэнка падкрэсліў, што навучыцца калоць дровы можа кожны, і гэта, паводле яго слоў, добрая зарадка. Таму, калі Кіраўнік дзяржавы звярнуўся да гледачоў, якія назіралі за працэсам, з прапановай паспрабаваць свае сілы, жадаючых было шмат, асабліва сярод жанчын. Тых, каму пашанцавала паўдзельнічаць у майстар-класе колкі дроў па-прэзідэнцку, Аляксандр Лукашэнка пахваліў: "Малайцы, толк будзе".

Кіраўнік дзяржавы таксама наведаў пляцоўкі, дзе праходзілі спаборніцтвы, паразмаўляў з некаторымі прадстаўнікамі журналісцкіх каманд, у тым ліку з замежных СМІ. Напрыклад, у цэнтры ўсеагульнай увагі аказалася пляцоўка, дзе ўзмоцнена працавалі сякерамі ўдзельнікі каманды кітайскага інфармацыйнага агенцтва Сіньхуа. Яны ўжо другі год удзельнічаюць у чэмпіянаце і вельмі спадзяюцца, што на гэты раз іх выступленне будзе больш паспяховым (у мінулым годзе ў агульным камандным заліку яны размясціліся ніжэй за 30-ю пазіцыю). На гэта ёсць некалькі прычын. Па-першае, якраз у гэты дзень агенцтва адзначае чарговую гадавіну свайго заснавання. А па-другое, на адным з этапаў камандзе дапамагаў малодшы сын кіраўніка дзяржавы Мікалай Лукашэнка, які, як вядома, атрымлівае вышэйшую адукацыю ў кітайскай ВНУ.

Не абышлося, вядома, і без традыцыйных на такіх масавых мерапрыемствах просьбаў зрабіць фота з Прэзідэнтам.

У размове з прадстаўнікамі СМІ Аляксандр Лукашэнка пракаменціраваў вынікі прэзідэнцкіх выбараў у ЗША.

"Трамп, вядома, гэта моц. Як бы я да яго не ставіўся, ён малайчына. Цяжка было паверыць, што ён зможа выйграць. Стралялі, душылі, пасадзіць хацелі і іншае, але ён як бульдозер прайшоўся. І прайшоўся пасля таго, як ён папрацаваў ужо нібыта няўдала. Нібыта (!) няўдала. Таму гэта яго асабісты подзвіг у імя амерыканскага народа, ён малайчына з гэтага пункту гледжання. Камала... гераічная жанчына, і ёй не трэба плакаць. Я сёння паглядзеў, перажывае: прайграла. Амерыка гатова выбраць чарнаскурага Прэзідэнта, але Амерыка не гатова яшчэ выбраць жанчыну. Амерыка да гэтага не гатова. І яна нос у нос ішла з гэтым "бульдозерам". Яна зрабіла ўсё магчымае і немагчымае. Яна малайчына, таму плакаць ёй ні ў якім разе нельга", - падкрэсліў Аляксандр Лукашэнка.

Ён таксама звярнуў увагу, што дэмакраты пасля паражэння не заклікалі сваіх прыхільнікаў выходзіць на пратэсты або з кайлом і сякерай ісці на органы ўлады. І гэта, паводле слоў Прэзідэнта, навука для збеглай апазіцыі. "Прайгралі - будзем працаваць далей. Гэта з боку Дэмакратычнай партыі добры прыклад для ўсяго свету", - сказаў Прэзідэнт.

Пры гэтым Кіраўнік дзяржавы заявіў, што яму ўсё роўна, хто выйграў выбары ў ЗША. "Я ведаю, што ў мяне ёсць кавалак зямлі, які я павінен забяспечыць і абараніць, мае людзі. Я проста выказваю сваё меркаванне. Мне ўсё роўна, хто там перамог, але не ўсё роўна, якую палітыку Амерыка будзе праводзіць, таму што гэта трэць сусветнай эканомікі, а эканоміка - галоўнае", - звярнуў увагу Аляксандр Лукашэнка.

Ён таксама заўважыў, што на выбарах у Беларусі і Дональд Трамп, і Камала Карыс пры такой ачумелай палітыцы, як яны праводзяць у ЗША, наогул не набралі б галасоў.

"Гэта выключна амерыканскі варыянт, ён адбыўся. Гэта іх справа", - дадаў Прэзідэнт.

Кіраўнік дзяржавы заявіў, што калі нававыбранаму Прэзідэнту ЗША Дональду Трампу ўдасца спыніць войны, яму трэба будзе прысвоіць Нобелеўскую прэмію міру.

"Яму трэба пакласці ўсё для таго, каб не толькі зрабіць Амерыку вялікай - няхай робяць яе вялікай, але ў інтарэсах усяго свету, калі вы прэтэндуеце на лідарства", - падкрэсліў Аляксандр Лукашэнка.

Кіраўнік дзяржавы нагадаў, што Дональд Трамп у час выбарчай кампаніі абяцаў зрабіць усё, каб спыніць войны (а ў свеце больш за паўсотню канфліктаў), у тым ліку ва Украіне.

"Калі ён гэта зробіць, то мы накіруем петыцыю на Нобелеўскую прэмію, яму прысвояць за тое, што ён зрабіў добрую справу. Надзея ёсць, што ён будзе выконваць свае абяцанні. Але Амерыка не Беларусь: там могуць забыць, яшчэ нешта. Але мы спадзяёмся, што ён сваё абяцанне будзе выконваць", - заявіў беларускі лідар.

У той жа час Прэзідэнт заўважыў, што не ўсё будзе залежаць ад Дональда Трампа. Што датычыцца канфлікту ва Украіне, то тут як мінімум неабходны ўдзел двух бакоў канфлікту. "Ён будзе старацца спыніць вайну ва Украіне, але гэта не аднабаковы працэс. Гэта трэба дамаўляцца і, можа, не толькі з Расіяй. Гэта датычыцца вельмі многіх краін", - звярнуў увагу Кіраўнік дзяржавы.

Дональд Трамп таксама заяўляў, што гатовы паставіць Кітай на месца. Аднак Аляксандр Лукашэнка падкрэсліў, што такі чалавек, які можа "Кітай на месца паставіць", яшчэ не нарадзіўся.

"Таму трэба ўсё дзяліць на два, на тры. Тое, што ты гаворыш сёння ў перадвыбарную кампанію, не факт, што заўтра складуцца так абставіны, - дадаў Прэзідэнт. - Захочуць яны, каб тут быў мір і спакой, у Еўропе, мы будзем гэтаму садзейнічаць".

Аднак Аляксандр Лукашэнка ўпэўнены, што ЗША пакуль прадоўжаць аказваць націск на Еўропу, паколькі ім не патрэбны канкурэнты. "Яны за кошт гэтага жывуць. Калі Еўропа і еўра падымуцца, долару не будзе чаго рабіць. У Еўрасаюзе пачалі ўжо гэта разумець", - сказаў Прэзідэнт.

Кіраўнік дзяржавы не стаў выключаць, што ў будучым ЕС аб'яднаецца ў добрым сэнсе гэтага слова і пачне працаваць з Беларуссю і Расіяй. Свае самыя высокія тэхналогіі лідары ЕС маглі б аб'яднаць з рэсурсамі, якія ёсць у Расійскай Федэрацыі.

"Гэта калісьці адбудзецца, убачыце, - перакананы Аляксандр Лукашэнка. - Вось сёння Германія пачала хістацца. Выкінуць гэтага Шольца з пасады - і Германія абразуміцца. Танны газ, танныя энергарэсурсы, вядучая эканоміка свету, цуд сусветны - сёння дзе яны? Апусціліся ніжэй кален. Немцы не дурні, яны прымусяць Урад працаваць так, як трэба".

"Свет страшэнна мяняецца. Так мы, зыходзячы з сённяшняй сітуацыі ў свеце, разважаем - заўтра будзе зусім іншая сітуацыя. Яны (кіраўнікі дзяржаў - членаў ЕС. - Заўвага), вядома, будуць балець за свае краіны, за Еўропу. І вось тут не Кітай можа стаць галоўным сапернікам для Амерыкі, а еўрапейцы", - лічыць Кіраўнік дзяржавы.

Ён таксама заўважыў, што падымаецца Глабальны Поўдзень, вельмі хуткімі тэмпамі расце эканоміка Індыі.

"Можа, літаральна праз некаторы час узнікнуць новыя абставіны. Ім (ЗША. - Заўвага) давядзецца на гэта рэагаваць. Таму мы з вамі разважаем з пункту гледжання сённяшняга дня. Заўтра мы будзем разважаць, зыходзячы з сітуацыі, якая змянілася. Яна мяняецца на вачах", - канстатаваў Прэзідэнт.

Аляксандр Лукашэнка разлічвае, што Дональд Трамп зоймецца пытаннямі сусветнага парадку дня і паспрабуе ўнесці ўклад у вырашэнне існуючых праблем. 

"Усё ж такі надзея нейкая ёсць, што нешта памяняецца. І яшчэ адзін нюанс, чалавечы: калі на чале ўлады людзі без вопыту - гэта адно, калі людзі не маюць дзяцей - гэта катастрофа. Ім абыякава, што адбываецца ў свеце. У Трампа вялікая сям'я, дзеці. І ў Трампа наша Меланія (Меланія Трамп - ураджэнка Югаславіі. - Заўвага), якая жорстка яго ў руках трымае. Таму тое, што ў яго ёсць сям'я і дзеці, - вялікая справа. Ён задумваецца не толькі пра сваю будучыню, але і пра будучыню дзяцей", - рэзюмаваў Кіраўнік дзяржавы.