Перагаворы з Прэзідэнтам Зімбабвэ Эмерсанам Мнангагвам

Прэзідэнт Беларусі Аляксандр Лукашэнка 14 мая правёў перагаворы з Прэзідэнтам Зімбабвэ Эмерсанам Мнангагвам у Палацы Незалежнасці.

Кіраўнікі дзяржаў абмеркавалі стан двухбаковага супрацоўніцтва, ход рэалізацыі існуючых і перспектывы новых праектаў, у тым ліку ў гандлёва-эканамічнай і інвестыцыйнай сферах.

"Мы вельмі высока цэнім дружбу з вашай краінай, вашым народам. Нас аб'ядноўвае агульнасць падыходаў да фарміравання справядлівага светапарадку, заснаванага на суверэннай роўнасці ўсіх дзяржаў, шматбаковасці, павазе Статуту ААН і міжнароднага права", - сказаў Аляксандр Лукашэнка ў час перагавораў.

"Яшчэ раз хачу падкрэсліць, што вы для нас у Беларусі заўсёды жаданы госць, а Белавежская пушча для вас ужо стала родным домам. Прыязджайце ў любы дзень, у любы час са сваёй жонкай, з сям'ёй. Правядзіце тут час у гэтым клімаце камфортным, не такім, можа, гарачым, як у вас летам бывае", - запрасіў Прэзідэнт Беларусі.

Што датычыцца двухбаковага супрацоўніцтва, ён падкрэсліў, што зімбабвійскі бок няма неабходнасці пераконваць у адказнасці беларускіх партнёраў, гатоўнасці дакладна і ў тэрмін выконваць заключаныя дамоўленасці. "Мы заўсёды будзем верныя гэтаму прынцыпу. У гэтым можаце не сумнявацца", - запэўніў Аляксандр Лукашэнка.

"Наша двухбаковае супрацоўніцтва - гэта новы стандарт у рабоце з краінамі Афрыкі. Улічваючы гэту высокую планку, мы пастараліся забяспечыць вам і вашай дэлегацыі насычаную праграму. Я абсалютна ўпэўнены, што вынікі візіту нададуць магутны імпульс адносінам братэрства і партнёрства паміж народамі Беларусі і Зімбабвэ, - сказаў Кіраўнік беларускай дзяржавы. - За апошнія гады нашы краіны вывелі на новы ўзровень палітычныя адносіны, значна пашырылі гандлёва-эканамічнае ўзаемадзеянне, сфарміравалі трывалую дагаворна-прававую базу супрацоўніцтва".

Аляксандр Лукашэнка адзначыў, што з моманту гістарычных перагавораў на вышэйшым узроўні ў Харарэ ў 2023 годзе зроблена нямала. Створана сумесная камісія, наладжаны прамы дыялог паміж профільнымі міністэрствамі і кампаніямі, пашыраюцца гуманітарныя і культурныя кантакты паміж Беларуссю і Зімбабвэ.

"Разам нашы краіны дасягаюць значных практычных вынікаў", - падкрэсліў беларускі лідар.

Адзін з прыкладаў - сумесная праграма механізацыі сельскай гаспадаркі Зімбабвэ, якую Аляксандр Лукашэнка назваў сапраўдным узорам сумленнага, адкрытага і плённага ўзаемадзеяння. Дзякуючы гэтай праграме збор пшаніцы ў Зімбабвэ ўжо вырас больш як у тры разы. З 2022 года Зімбабвэ поўнасцю забяспечвае ўнутраныя патрэбнасці ў пшаніцы, пачаты экспарт лішкаў у суседнія краіны (Мазамбік, Батсвана).

"Мы прадаўжаем работу з фокусам на тое, каб захаваць такія ўраджаі і дадаткова ўмацаваць харчовую бяспеку Зімбабвэ і поўдня Афрыкі ў цэлым. Гэта вельмі важны напрамак - работа з тэрыторыі Зімбабвэ на іншыя краіны. І на гэтым прыкладзе нашай сумеснай работы іншыя краіны Афрыканскага кантынента бачаць, што эксплуатацыі і дыктату Захаду і транснацыянальных карпарацый ёсць рэальная альтэрнатыва", - сказаў Кіраўнік беларускай дзяржавы.

Беларусь гатова прыняць на навучанне больш студэнтаў з Зімбабвэ. "Больш за 60 студэнтаў з вашай краіны ўжо вучацца ў беларускіх ВНУ па розных спецыяльнасцях аграрнага, медыцынскага, тэхнічнага профіляў. Гатовы павялічваць іх колькасць пры неабходнасці", - заявіў беларускі лідар.

Аляксандр Лукашэнка таксама адзначыў, што краіны актывізавалі прамысловую кааперацыю: "Упэўнены, падпісаныя ў красавіку бягучага года пагадненні аб стварэнні ў Зімбабвэ сумеснай вытворчасці аўтобусаў будуць увасоблены ў жыццё".

Прадаўжаецца рэалізацыя дамоўленасцей аб узаемных пастаўках прадуктаў харчавання (сухое малако, сокі, фрукты і інш.), супрацоўніцтве ў галіне аховы здароўя і паставак лекавых сродкаў, навукі і тэхналогій.

"Мы гатовы маштабаваць назапашаны вопыт. Беларусь можа стаць надзейным партнёрам Зімбабвэ ва ўкараненні сучасных тэхналогій перапрацоўкі адходаў, лічбавізацыі, мірным выкарыстанні атамнай энергіі, узаемадзеянні ў асваенні космасу", - прапанаваў Аляксандр Лукашэнка.

"У нас, вядома ж, ёсць і пытанні, якія перашкаджаюць нам рухацца тымі тэмпамі, якімі мы хацелі б, наперад і выйсці да 2030 года на ўстойлівы ўзаемны тавараабарот, які набліжаецца да $100 млн. Трэба знайсці развязкі па гэтых пытаннях. Яны ёсць. Таму мы з вамі і вядзём гэтыя перагаворы", - падкрэсліў Кіраўнік беларускай дзяржавы.

Эмерсан Мнангагва ў час перагавораў заявіў, што Беларусь для зімбабвійскай дэлегацыі стала "домам далёка ад дому".

"Гасціннасць, якая была аказана мне, пераўзыходзіць усе чаканні. І мая дэлегацыя ўдзячна за такую гасціннасць і такі прыём. Гэта сапраўды дом далёка ад дому, - падкрэсліў Эмерсан Мнангагва, звяртаючыся да Аляксандра Лукашэнкі. - Вы з'яўляецеся прыкладам лідарства. Дзякую вам за тую ролю, якую вы адыгрываеце ў плённых дыскусіях і супрацоўніцтве, якія прыводзяць да ўмацавання нашых адносін і існуючай дружбы паміж Зімбабвэ і Беларуссю. Вялікі дзякуй, дарагі брат!"

Прэзідэнт Зімбабвэ таксама павіншаваў Аляксандра Лукашэнку і беларускі народ з 80-годдзем Перамогі савецкага народа ў Вялікай Айчыннай вайне. У час візіту ў Беларусь Эмерсан Мнангагва наведаў Брэсцкую крэпасць-герой. Паводле яго слоў, гэты мемарыяльны комплекс нагадвае аб вялікім подзвігу і ахвярах, якія прынёс беларускі народ дзеля міру ва ўсім свеце. "Мы аддаём даніну павагі воінам Беларусі, якія пакінулі свой след у гісторыі і ўнеслі вялікі ўклад у мірнае існаванне", - адзначыў Эмерсан Мнангагва.

Гаворачы пра супрацоўніцтва з Беларуссю, Прэзідэнт Зімбабвэ заявіў: "Прагрэс і рост, які мы назіраем у двухбаковых адносінах, прыносіць нам задавальненне. Мы сапраўды дасягнулі поспехаў. Тым не менш ёсць неабходнасць выкарыстоўваць гэтыя поспехі для таго, каб рухацца далей.

Эмерсан Мнангагва адзначыў вялікі ўклад Беларусі ў праграму па механізацыі сельскай гаспадаркі Зімбабвэ і забеспячэнне харчовай бяспекі краіны. "Гэта значны крок наперад для нас, і мы ўдзячны вам за гэта, - заявіў ён. - Мы гатовы і ў далейшым разглядаць механізацыю і мадэрнізацыю нашай малочнай прамысловасці з падтрымкай беларускіх партнёраў".

"Зімбабвэ імкнецца дасягнуць прагрэсу ў супрацоўніцтве па вытворчасці тэхнікі, паколькі мы атрымаем ад гэтага вялікую карысць. У той жа час, я лічу, беларуская эканоміка таксама можа выйграць ад таго, таму што яна будзе прысутнічаць у нашым рэгіёне - Афрыцы", - дадаў Прэзідэнт.

На яго думку, бакам таксама трэба развіваць узаемадзеянне ў сферах адукацыі, тэхналогій і многіх іншых галінах.

Пасля перагавораў на вышэйшым узроўні адбылася цырымонія абмену тэкстамі міжнародных дакументаў. Бакі падпісалі дарожную карту стратэгічнага супрацоўніцтва і партнёрства на 2026-2030 гады.

"Падпісаны пакет двухбаковых дакументаў. У яго аснове - дарожная карта на 2026-2030 гады, у якой улічаны ўсе ключавыя сумесныя праекты ў розных сферах", - заявіў па выніках перагавораў Аляксандр Лукашэнка.

Кіраўнік дзяржавы адзначыў, што бакі правялі вельмі насычаныя і рэзультатыўныя перагаворы. "Абмеркавалі шырокае кола пытанняў, разгледзелі, як выконваюцца ўжо дасягнутыя дамоўленасці (у тым ліку ў ходзе візіту ў Зімбабвэ два гады таму). Вызначылі новыя сумесныя праекты. Пры гэтым асаблівую ўвагу ўдзялілі развіццю перспектыўных напрамкаў, уключаючы міжрэгіянальнае ўзаемадзеянне і прамысловую кааперацыю", - сказаў Прэзідэнт.

"Да нас вельмі эфектыўна папрацавалі нашы спецыялісты і міністры. Абмеркавалі шырокае кола пытанняў, разгледзелі, як выконваюцца ўжо дасягнутыя дамоўленасці (у тым ліку ў ходзе візіту ў Зімбабвэ два гады таму). Вызначылі новыя сумесныя праекты. Пры гэтым асаблівую ўвагу ўдзялілі развіццю перспектыўных напрамкаў, уключаючы міжрэгіянальнае ўзаемадзеянне і прамысловую кааперацыю", - сказаў Аляксандр Лукашэнка.

Прэзідэнт адзначыў, што ў ходзе візіту Эмерсана Мнангагвы ў Беларусь дасягнуты значныя вынікі. Гэтаму папярэднічала вялікая работа ўрадаў, профільных міністэрстваў, рэгіянальных улад і кампаній.

"Але я хачу выказаць шчырую ўдзячнасць менавіта вам за вялікі асабісты ўклад у развіццё стратэгічных адносін дружбы і братэрства паміж народамі Беларусі і Зімбабвэ. Перакананы, з такой падтрымкай мы яшчэ актыўней будзем нарошчваць тавараабарот, ствараць сумесныя перспектыўныя вытворчасці, адкрываць новыя рынкі як у Афрыцы, так і ў Еўразіі", - падкрэсліў беларускі лідар.

Аляксандр Лукашэнка запрасіў Прэзідэнта Зімбабвэ і яго жонку Аксілію Мнангагву яшчэ не раз наведаць Беларусь. Ён запэўніў, што зімбабвійскі лідар будзе адчуваць сябе нават не як дома, а сапраўды будзе дома - на беларускай зямлі. "Я вельмі ўдзячны вам за ўсё, што вы зрабілі. Аддаю належнае таму, што не было б такога ўзроўню разумення і адносін паміж Зімбабвэ і Беларуссю, калі б не вы. Гэта вы прыехалі некалі, з'яўляючыся віцэ-прэзідэнтам, у нашу краіну і прапанавалі выбудоўваць нашы адносіны. З гэтага ўсё і пачалося", - дадаў Прэзідэнт Беларусі.

"Мы гатовы аказаць садзейнічанне Зімбабвэ ў стварэнні комплекснай сістэмы аховы здароўя, пастаўляць з Беларусі медыцынскія прэпараты і спецыяльнае абсталяванне, каб вырашыць праблему аказання медыцынскай дапамогі дзеткам, жанчынам і ўсяму насельніцтву Зімбабвэ", - сказаў Кіраўнік беларускай дзяржавы.

"Вы вывучылі нашу сістэму аховы здароўя. Яна вам спадабалася, паводле маіх даных. І вы гатовы яе выбудаваць у Зімбабвэ з нашай дапамогай. Мы гатовы вам у гэтым садзейнічаць", - запэўніў Аляксандр Лукашэнка.

"У бягучым годзе Беларусь старшынствуе ў Еўразійскім эканамічным саюзе, Зімбабвэ - у Супольніцтве развіцця Поўдня Афрыкі (гандлёва-эканамічны саюз краін поўдня Афрыкі. - Заўвага). Мы гатовы выкарыстоўваць сваё асаблівае становішча для актывізацыі супрацоўніцтва паміж гэтымі інтэграцыйнымі блокамі і спрашчэння ўмоў узаемнага гандлю. Вядома, у адпаведнасці з дзеючымі прававымі працэдурамі", - сказаў Кіраўнік дзяржавы.

"Мы дамовіліся стварыць камісію на ўзроўні кіраўнікоў дзяржаў. Яна стане стратэгічным механізмам высокага ўзроўню, што дасць магчымасць каардынаваць работу ўжо дзеючых сумесных камісій і камітэтаў", - сказаў беларускі лідар.

Паводле яго слоў, адпаведны праект пагаднення будзе падрыхтаваны да яго візіту ў адказ у Зімбабвэ.

Эмерсан Мнангагва ў сваю чаргу сказаў: "Мы з нецярпеннем чакаем прадаўжэння нашага двухбаковага супрацоўніцтва. І чакаем нашых партнёраў у Афрыцы. У Зімбабвэ ўнікальная пазіцыя, якая дае магчымасць краіне стаць своеасаблівым хабам, з дапамогай якога беларускія прадукты могуць быць рэалізаваны ў больш шырокім рэгіёне. Гэта пасадзейнічае пашырэнню эканамічнага супрацоўніцтва з многімі краінамі Афрыкі".

Паводле яго слоў, супрацоўніцтва з Беларуссю ўнясе значны ўклад у развіццё прамысловасці і эканомікі Зімбабвэ ў цэлым. Пры гэтым, паводле слоў Прэзідэнта, зімбабвійскі бок гатовы разглядаць і новыя магчымасці для пашырэння супрацоўніцтва, у прыватнасці, у галіне перапрацоўкі і абыходжання з адходамі, ачысткі вады.

"Мы прызнаём важнасць партнёрства, якое склалася паміж краінамі ў гэтай складанай міжнароднай сітуацыі. Мы рашуча настроены нарошчваць нашы адносіны, у тым ліку і на базе розных міжнародных пляцовак", - заявіў зімбабвійскі лідар.

"Мы бачым вялікую карысць у тым ліку ў сферы здабычы мінеральных рэсурсаў. Разам мы можам распрацаваць сур'ёзную аснову для інвестыцый, якая забяспечыць рост прадукцыйнасці ў гэтым сектары і дасць магчымасць нашым эканомікам працвітаць", - сказаў Эмерсан Мнангагва.