Даклад аб сітуацыі на спажывецкім рынку Беларусі

Прэзідэнт Беларусі Аляксандр Лукашэнка даручыў звярнуць асаблівую ўвагу на тавары першай неабходнасці і сацыяльна значныя тавары. Аб гэтым ён заявіў 26 мая, заслухоўваючы даклад аб сітуацыі на спажывецкім рынку краіны.

"Нягледзячы на тое, што ў нас у прынцыпе з гандлем у магазінах і гэтак далей, здаецца, усё цярпіма, тым не менш, хацелася б ад вас пачуць ацэнку сітуацыі, якая складваецца на спажывецкім рынку. І пачуць прагноз развіцця спажывецкага рынку і напрамку гэтага развіцця, асабліва ў плане цэнаўтварэння. Асаблівую ўвагу прашу звярнуць на тавары першай неабходнасці, сацыяльна значныя тавары, без якіх людзі абысціся не могуць, асабліва ва ўмовах эпідэміі", - заявіў Кіраўнік дзяржавы.

Аляксандр Лукашэнка адзначыў, што не раз звяртаў увагу, і асабліва Міністэрства антыманапольнага рэгулявання і гандлю, на тое, што нельга проста спакойна назіраць за тым, як недзе неабгрунтавана растуць цэны. "Мы не павінны за гэтым працэсам спакойна назіраць. Мы павінны вывучаць сітуацыю, умешвацца, аналізаваць і, калі патрэбна, умешваючыся, выпраўляць яе", - заявіў ён.

"Не трэба тут разважанняў наконт таго, што рынак усё адрэгулюе. Мы ўжо з вамі на рынку нямала прапрацавалі і разумеем, што рынак далёка не ўсё і не заўсёды рэгулюе. Але цяпер выпадак асаблівы. І паглядзіце: вельмі развітыя ў рыначных адносінах краіны хуценька і граніцы закрылі, Расія нават паліва ўжо забараніла ўвозіць на ўнутраны рынак. Вось вам і ўвесь рынак", - канстатаваў беларускі лідар.

"Рэгулююць цэны, забаранялі вываз у той жа Расіі сродкаў аховы ўрачоў - масак, рэспіратараў, дэзынфіцыруючых сродкаў і гэтак далей. І я ў гэтым плане іх не асуджаю. Яны дакладна разумеюць інтарэсы свайго народа", - дадаў Прэзідэнт.

Кіраўнік дзяржавы яшчэ раз акцэнтаваў увагу на тым, што неабходна сачыць за развіццём сітуацыі на спажывецкім рынку і ў залежнасці ад гэтага прымаць рашэнне, ёсць неабходнасць умешвацца ў тыя ці іншыя працэсы ці няма. "Думаю, сёння сітуацыя такая, што мы не проста павінны назіраць, але і, пры неабходнасці, умешвацца ў тыя працэсы, якія адбываюцца на ўнутраным спажывецкім рынку", - лічыць Аляксандр Лукашэнка.

Міністр антыманапольнага рэгулявання і гандлю Уладзімір Калтовіч далажыў аб рабоце па забеспячэнні спажывецкага рынку і кантролю над цэнамі. "Самае галоўнае, што сёння, нягледзячы ні на што (перш за ўсё, нягледзячы на знешнія выклікі), сітуацыя па таварным забеспячэнні і цэнах на ўнутраным спажывецкім рынку кіруемая, прагназуемая і стабільная", - сказаў ён.

"Гэта значыць, дэфіцыту ў нас няма ніякага, ні па адной групе тавараў?" - пацікавіўся Аляксандр Лукашэнка.

"У нас няма дэфіцыту і няма ажыятажу", - запэўніў Уладзімір Калтовіч.

На мерапрыемства таксама былі запрошаны Старшыня Камітэта дзяржкантролю Леанід Анфімаў, Першы намеснік Прэм'ер-міністра Дзмітрый Крутой, кіраўнік Мінсельгасхарча Іван Крупко і Намеснік Кіраўніка Адміністрацыі Прэзідэнта Валерый Бельскі.