Аб прысуджэнні спецыяльнай прэміі Прэзідэнта Рэспублікі Беларусь

Кіраўнік дзяржавы Аляксандр Лукашэнка 30 снежня падпісаў Указ № 454 аб прысуджэнні спецыяльнай прэміі Прэзідэнта Рэспублікі Беларусь "Беларускі спартыўны Алімп" 2022 года.

За актыўную дзейнасць па папулярызацыі фізічнай культуры і спорту, развіцці фізкультурна-спартыўных традыцый, якія садзейнічаюць фарміраванню гарманічнай асобы, спецыяльная прэмія прысуджана Антону Смольскаму, Анастасіі Пракапенка і Віктару Байкову.

Капітан нацыянальнай каманды па біятлоне, майстар спорту міжнароднага класа Антон Смольскі - сярэбраны прызёр зімовых Алімпійскіх гульняў 2022 года, прызёр этапаў Кубка свету, пераможца і прызёр этапаў Кубка Садружнасці сезона 2021/2022, чэмпіён Еўропы па летнім біятлоне.

Заслужаны майстар спорту Рэспублікі Беларусь Анастасія Пракапенка - шматразовая чэмпіёнка свету і Еўропы па сучасным пяцібор'і. Яна прымала ўдзел у чатырох Алімпіядах, з'яўляецца бронзавым прызёрам Алімпійскіх гульняў 2008 года.

Заслужаны трэнер Рэспублікі Беларусь Віктар Байкоў з 1982 года працуе ў Гомельскім дзяржаўным вучылішчы алімпійскага рэзерву. Ён падрыхтаваў Заслужанага майстра спорту Рэспублікі Беларусь Марыну Літвінчук - трохразовага прызёра Алімпійскіх гульняў (2012, 2016 і 2021 гады). Выхаваў цэлую плеяду спартсменаў высокага класа - пераможцаў і прызёраў чэмпіянатаў свету і Еўропы, сярод якіх 11 майстроў спорту Рэспублікі Беларусь міжнароднага класа, 52 майстры спорту Рэспублікі Беларусь.