Намеснік Кіраўніка Адміністрацыі Прэзідэнта Дзмітрый Матусевіч прыняў удзел у пленарным пасяджэнні Форуму жанчын-прадпрымальніц Саюзнай дзяржавы

У Беларусі развіццю жаночага прадпрымальніцтва ўдзяляецца сур'ёзная ўвага. Аб гэтым заявіў у Мінску на пленарным пасяджэнні Форуму жанчын-прадпрымальніц Саюзнай дзяржавы Намеснік Кіраўніка Адміністрацыі Прэзідэнта Дзмітрый Матусевіч.

"З пункту гледжання прадпрымальніцтва жанчына бачыць свет па-іншаму. Адпаведна, і поспех часам бывае нечаканым", - адзначыў Дзмітрый Матусевіч.

Гаворачы пра жанчын-прадпрымальніц, жанчын-кіраўніц, ён вылучыў такія іх якасці, як абавязковасць, спраўнасць, арганізатарскія здольнасці, сур'ёзны падыход да справы. Ініцыятывы прадстаўніц прыгожага полу заўсёды знаходзяць падтрымку, дзяржава зацікаўлена ў развіцці жаночага бізнесу. Жанчыны паспяхова займаюць свабодныя нішы, а месцамі іх бізнес мае мужчынскі характар.

"Будзем на заканадаўчым і іншым узроўні рабіць усё, каб у вас атрымлівалася весці сваю справу. Не толькі таму, што важны эканамічны рост, але і таму, што за вамі стаяць вашы сем'і", - падкрэсліў, звяртаючыся да ўдзельніц, Дзмітрый Матусевіч.

Форум накіраваны на ўмацаванне супрацоўніцтва паміж дзвюма краінамі. Прадстаўлены і беларускія, і расійскія паспяховыя праекты. У абедзвюх краінах развіццю прадпрымальніцтва ўдзяляецца вялікая ўвага.