Першы намеснік Кіраўніка Адміністрацыі Прэзідэнта Уладзімір Пярцоў прыняў удзел у цырымоніі ўскладання кветак у мемарыяльным комплексе "Хатынь"

Першы намеснік Кіраўніка Адміністрацыі Прэзідэнта Уладзімір Пярцоў 22 сакавіка прыняў удзел у цырымоніі ўскладання кветак у мемарыяльным комплексе "Хатынь".

"Як толькі мы пачынаем забываць, сціраць з памяці гэтыя факты або спрабуем перавярнуць старонку, не звяртаць увагу на трагедыі, якія адбыліся на нашай зямлі ў гады Вялікай Айчыннай вайны, асабліва з мірным насельніцтвам, ні ў чым не вінаватымі жыхарамі такіх вёсак, як Хатынь, адразу пачынае фарміравацца і распаўсюджвацца альтэрнатыўная лжывая гісторыя, у першую чаргу накіраваная на маладое пакаленне", - сказаў Уладзімір Пярцоў у час цырымоніі.

Маніпуляцыі гістарычнымі фактамі, паводле яго слоў, накіраваны на стварэнне сярод маладых людзей прыхільнікаў тэорый, якія ў гэты дзень нават агучваць кашчунства, - аб "цывілізаваных" планах, якія нібы былі ў фашыстаў у дачыненні да Беларусі і іншых рэспублік тагачаснага Савецкага Саюза. Аднак у плане "Ост" дакладна былі прапісаны роля і месца гэтых народаў.

"Вакуум заўсёды запаўняецца нейкай інфармацыяй. У гэтым выпадку ёсць тыя, хто хацеў бы вакуум запоўніць сваёй інфармацыяй, каб падрыхтаваць пакаленне караваеносцаў і калабарантаў, якія сустракаюць акупантаў з чарговага рэйха, фактычна тых жа краін, што і ў гады Вялікай Айчыннай вайны, каб тут быць панамі, знішчаць непатрэбных "недалюдзей", пакідаючы астатніх у рабстве", - сказаў Першы намеснік Кіраўніка Адміністрацыі Прэзідэнта.

Уладзімір Пярцоў, вяртаючыся да падзей свайго дзяцінства, адзначыў, што іх школьнікамі прывозілі ў "Хатынь". Па дарозе туды ў экскурсійным аўтобусе, як і ўсе дзеці, яны жартавалі, а дарога назад праходзіла ў цішыні. Дзяцей уражвала пачутае тут.

"Пачуўшы ўсе гэтыя дэталі, разумееш: людзей збіралі, спальвалі, расстрэльвалі проста таму, што для тых, хто прыйшоў на нашу зямлю і памагатых-паліцаяў, яны былі недалюдзьмі, неданасельніцтвам", - адзначыў Першы намеснік Кіраўніка Адміністрацыі Прэзідэнта.

Прадаўжаючы дзяліцца асабістым, Уладзімір Пярцоў расказаў: ад кожнага візіту ў мемарыяльны комплекс "Хатынь" у яго адны і тыя ж уражанні. З глыбокай памяці ўзнімаюцца першыя дзіцячыя адчуванні, навеяныя болем і смуткам.

"Многае добраўпарадкавана, прыведзена ў парадак, музей з'явіўся - гэта вялікая справа для сучаснай моладзі - пры дапамозе інтэрактыву паказваць, расказваць. Але ўражанні, адчуванні, слёзы нават у дарослых людзей сапраўды такія ж, як былі ў часы дзяцінства. У гэтым, напэўна, заключаецца гістарычная памяць - на фактах, на падзеях, на гістарычных дакументах, у такіх мемарыяльных комплексах паказваць і расказваць, захоўваць нашу гісторыю, каб ніколі не паўтарылася трагедыя", - сказаў Уладзімір Пярцоў.

У Дзень памяці ахвяр Хатынскай трагедыі беларусы і госці краіны далучыліся да акцыі "Прыйдзі і пакланіся", прысвечанай 83-й гадавіне страшнай трагедыі спаленай фашыстамі разам са 149 жыхарамі вёскі, якая стала сімвалам смутку і няскоранасці народа.

Першым да Вечнага агню ўсклалі вянок ад Прэзідэнта Беларусі Аляксандра Лукашэнкі.

Кветкі і кветкавыя кампазіцыі як сімвал глыбокай павагі загінулым хатынцам і ўсім ахвярам вайны да фігуры Няскоранага чалавека, брацкай магілы, у якой пахаваны астанкі спаленых жыхароў вёскі, і да Вечнага агню ўсклалі вышэйшыя службовыя асобы, кіраўнікі міністэрстваў і ведамстваў, якія ўзначалілі свае дэлегацыі, прадстаўнікі грамадскіх аб'яднанняў і арганізацый, моладзь, школьнікі, сілавікі, да якіх далучыліся выхаванцы ваенна-патрыятычных клубаў.