Першы намеснік Кіраўніка Адміністрацыі Прэзідэнта Уладзімір Пярцоў прадставіў калектыву БЕЛТА новага гендырэктара Андрэя Мохара

Першы намеснік Кіраўніка Адміністрацыі Прэзідэнта Уладзімір Пярцоў прадставіў калектыву рэспубліканскага ўнітарнага прадпрыемства "Беларускае тэлеграфнае агенцтва" новага генеральнага дырэктара Андрэя Мохара.

"Учора Прэзідэнтам нашай краіны было прынята кадравае рашэнне назначыць на пасаду генеральнага дырэктара БЕЛТА Андрэя Канстанцінавіча Мохара. У сувязі з гэтым я сёння маю гонар прадставіць вам вашага непасрэднага начальніка, - адзначыў Уладзімір Пярцоў. - Ён скончыў журфак БДУ, прайшоў перападрыхтоўку ў Акадэміі кіравання пры Прэзідэнце па спецыяльнасці "дзяржаўнае кіраванне і ідэалогія". За яго плячыма вялікая школа ў нашым журналісцкім цэху: працаваў у сістэме беларускага радыё, у ЗАТ "Другі нацыянальны тэлеканал" кіраваў інфармацыйнай дырэкцыяй. Андрэй Канстанцінавіч як ніхто разумее, што такое навіны, загалоўкі, планы, кадры, а таксама, што такое аператыўнасць і праўдзівасць той інфармацыі, якая павінна выходзіць на стужцы інфармацыйнага агенцтва БЕЛТА. Таму што вы галоўны летапіс нашай краіны - вы першыя, вы аўтарытэтныя. Менавіта з вашай стужкі ўвесь свет, не толькі наша краіна, атрымлівае інфармацыю пра тыя падзеі, факты - пра ўсё тое, што адбываецца ў Беларусі".

Уладзімір Пярцоў выказаў упэўненасць, што новы гендырэктар інфармагенцтва ў поўнай меры прыменіць свае навыкі, падыходы, падзеліцца імі з калектывам БЕЛТА, каб вывесці работу на новы, больш якасны ўзровень ва ўмовах інфармацыйнай вайны. "Той, аб якой учора гаварыў Прэзідэнт і якая ўдарыла па вам з усёй моцай, што адбілася на выдаленні вашага канала з платформы YouTube, - дадаў ён. - Жадаю пад кіраўніцтвам чалавека з нашай сферы зрабіць усё магчымае для таго, каб БЕЛТА выйшла на новую ступень, на новыя вышыні і захавала той высокі статус галоўнага інфармацыйнага агенцтва, летапісца нашай краіны".

Андрэй Мохар адзначыў, што быў актыўным чытачом БЕЛТА. "У штодзённым прамым рэжыме сачыў, глядзеў, чэрпаў інфармацыю, выкарыстоўваў у сваёй рабоце. Бачу, якая гіганцкая праца стаіць за гэтай, здавалася б, простай стужкай. Ведаю, што часам лягчэй стварыць каманду з нуля, але складаней прыходзіць у калектыў, які працуе, у якім усё на сваіх месцах. Упэўнены, што будзе над чым папрацаваць. І я не сумняваюся, што мы зможам зрабіць нейкі якасны крок наперад для таго, каб пацвердзіць званне старэйшага, самага аўтарытэтнага інфармацыйнага агенцтва краіны. Вельмі прыемна з вамі будзе працаваць", - сказаў ён.