Сустрэча з віцэ-прэзідэнтам Венесуэлы па пытаннях планавання, Міністрам планавання Рыкарда Менендэсам
- 9
- 4:04
Прэзідэнт Беларусі Аляксандр Лукашэнка 28 лістапада правёў сустрэчу з віцэ-прэзідэнтам Венесуэлы па пытаннях планавання, Міністрам планавання Рыкарда Менендэсам.
"Мне прыемна з Вамі сустракацца. Мы даўно ведаем адзін аднаго, Вы добра ведаеце Беларусь, - сказаў у пачатку сустрэчы беларускі лідар. - Мы пачыналі з нуля ў часы жыцця нашага агульнага сябра Уга Чавеса. Нямала зрабілі, але не па нашай віне - Беларусі і Венесуэлы - адбылася пэўная паўза ў нашых адносінах. Яны былі, гэтыя адносіны, але не такія інтэнсіўныя".
Кіраўнік дзяржавы адзначыў, што, на шчасце, тыя напрамкі, якія былі вызначаны раней, удалося не страціць і цяпер ім неабходна надаць новы імпульс.
Прэзідэнт прапанаваў правесці рэвізію ўсіх сумесных праектаў, выключыўшы ўсё неактуальнае і дабавіўшы пры неабходнасці новыя напрамкі і сферы супрацоўніцтва, і тым самым абнавіць тую дарожную карту, якая была вызначана раней.
"За мінулыя гады ў свеце адбыліся значныя змяненні. Адна з асноўных і вельмі яркіх падзей - гэта вашы суверэнітэт і незалежнасць. Вы малайцы, вы адстаялі краіну. Цяперашняе пакаленне венесуэльцаў будзе дзякаваць заўсёды - вы абаранілі краіну, - сказаў Кіраўнік дзяржавы. - Вы процістаялі ўсім і выстаялі". Аляксандр Лукашэнка падкрэсліў, што Венесуэла і цяперашняе пакаленне палітыкаў краіны сёння маюць найвялікшую павагу ва ўсім свеце, у тым ліку і ў Беларусі, за мужнасць і стойкасць у адстойванні суверэнітэту і незалежнасці.
У сваю чаргу Рыкарда Менендэс падзякаваў за магчымасць сустрэчы і перадаў Аляксандру Лукашэнку ад Прэзідэнта Венесуэлы Нікаласа Мадуры цёплыя прывітанні і словы захаплення беларускім народам. "Мы вельмі любім і захапляемся Беларуссю. У свой час Уга Чавес навучыў нас любіць і захапляцца Беларуссю і яе народам. І размова ідзе не толькі аб гістарычным гераічным мінулым вашай краіны, але і аб вашым бачанні будучыні, - сказаў віцэ-прэзідэнт. - Як адзначыў Прэзідэнт Мадура, і Беларусь, і Венесуэла з'яўляюцца архітэктарамі новага свету, развіваюць палітыку міру, дзе няма месца ні санкцыям, ні агрэсіі".
Рыкарда Менендэс таксама перадаў прапанову Нікаласа Мадуры аб арганізацыі сустрэчы з Кіраўніком беларускай дзяржавы для абмеркавання актуальнага парадку дня і перспектыў далейшага ўзаемадзеяння.
