Сустрэча з прадстаўнікамі замежных і беларускіх СМІ

Прэзідэнт Беларусі Аляксандр Лукашэнка 6 ліпеня правёў сустрэчу з прадстаўнікамі замежных і беларускіх сродкаў масавай інфармацыі.

На сустрэчу з Кіраўніком беларускай дзяржавы былі запрошаны журналісты, якія прадстаўляюць СМІ з розных краін і рэгіёнаў свету. Гэта ў першую чаргу тыя медыя, якія апошнім часам найбольш актыўна накіроўвалі заяўкі на інтэрв'ю з Прэзідэнтам Беларусі.

Аляксандр Лукашэнка адразу прапанаваў не праводзіць размову ў форме прэс-канферэнцыі: "Давайце ў свабодным ключы правядзём гутарку (не прэс-канферэнцыю) і пагаворым аб пытаннях, якія хвалююць вас і, думаю, усіх вашых гледачоў і народы нашых краін, у тым ліку і беларускі народ".

Кіраўнік дзяржавы адказаў на першае пытанне: што чакае свет? "Я не стану сабе прыпісваць ролю нейкага тут іграка і прадказальніка, што чакае свет. Пажывём - убачым. Напэўна, самы інфармаваны, перадавы палітык, чалавек ні ў адной кропцы свету сёння не скажа, што чакае свет у будучым. Але вы абсалютна маеце рацыю, калі канстатавалі тое, што свет мяняецца. Я часта, гаворачы пра гэта, канстатаваў факт, што свет проста ашалеў, страціў розум. Суб'екты, якія ўдзельнічаюць у гэтым, розум пакрыху таксама страчваюць. Хто - вы добра ведаеце", - адзначыў Аляксандр Лукашэнка.

Кіраўнік дзяржавы звярнуў увагу, што светапарадак, устаноўлены пасля Другой сусветнай вайны, у якой народы Савецкага Саюза адыгралі вырашальную ролю ў перамозе над нацызмам, ужо не існуе.

"Нядаўна на пасяджэнні Шанхайскай арганізацыі супрацоўніцтва я сказаў, што гэты светапарадак на сённяшні дзень знішчаны. Яго не існуе. Мы ўжо не жывём па законах, міжнародных правілах. Мы сёння нават не жывём па паняццях, - сказаў Прэзідэнт. - Правіл ніякіх, паняццяў няма. Светапарадак разбураны. Дзякуючы тым гульням, якія распачалі буйныя краіны нашай планеты. Калі гаварыць вельмі мякка, што чакае (свет. - Заўвага): нас чакае, абсалютна ў гэтым упэўнены, адыход у нябыт аднапалярнай сістэмы. З'яўляецца шматпалярнасць. І гэты працэс ужо не спыніць. Не спыніць ні мірным, ні ваенным шляхам. Калі з'яўляецца сапраўдны парадак, заснаваны на шматпалярнасці, то гэта зусім іншая канфігурацыя, якая забяспечыць цалкам сур'ёзную ўстойлівасць нашай планеты, якая будзе абапірацца на шмат пунктаў апоры".

У ліку гэтых пунктаў апоры Аляксандр Лукашэнка назваў ЗША, Еўрапейскі саюз, Кітай, Індыю. Таксама, паводле яго слоў, праявяць сябе краіны Афрыкі і Блізкага Усходу. "Мне хацелася б, каб постсавецкая прастора, наколькі гэта магчыма, кансалідавалася і таксама выступіла адным з пунктаў апоры", - дадаў беларускі лідар.

Наступнае пытанне Прэзідэнту датычылася пазіцыі Захаду адносна Украіны, у прыватнасці, прызнання памылак Захаду, якія прывялі да канфлікту.

"Абдумаецца Захад або не? Захад ніколі нічога не прызнаваў і не прызнае. Тым больш цяпер. Яны лічаць сябе вяршыцелямі ўсяго, - сказаў беларускі лідар. - Няма ЕС, няма Еўропы - яна поўнасцю пад нагамі ЗША, і ўсё, што прынята ў Вашынгтоне, прымаецца еўрапейцамі, нават, што здзіўляе, на шкоду сабе. Вазьміце Германію. Чацвёртая эканоміка свету была. Дзе яна цяпер? І навошта было разбураць такую высокатэхналагічную эканоміку са сполаху, са страху або дзеля некага?"

Ніколі ЗША не прызнавалі і не прызнаюць свае памылкі, падкрэсліў Прэзідэнт. Кіраўнік дзяржавы апеляваў да гістарычных прыкладаў: бамбардзіровак ЗША японскіх гарадоў Хірасімы і Нагасакі, калі гэта не мела ваеннага сэнсу. "Папрасілі прабачэння? Не. І такіх шмат было выпадкаў: і вайна ў Карэі, у В'етнаме, потым бліжэй да нас - Афганістан, разбурылі ўвесь Бліжні Усход, Лівію, Сірыю. Прызналі яны сваю памылку? Не. Напляваць: "Аднапалярны свет, мы гегемон, у нас самая магутная армія, зброя, у нас долар самая магутная зброя", - вось і ўсё", - адзначыў Аляксандр Лукашэнка.

Кіраўнік беларускай дзяржавы падкрэсліў, што ЗША - магутная краіна. "І вы бачыце, як там паводзіць сябе кіраўніцтва", - адзначыў ён.

Прэзідэнт удакладніў, што размова не пра ўзрост: "Мы ўсе будзем старымі, мы ўсе будзем слабымі. Толькі кожны павінен у гэты час займаць пэўнае месца".

"Гэта (ЗША. - Заўвага) мацнейшая краіна ў свеце і прымае многія рашэнні, якія так ці інакш перакладваюцца на ўвесь свет. І тут трэба несці адказнасць хаця б малую. Яны ніякай адказнасці не нясуць. Іх рашэнні проста камедыйныя, проста смешныя", - сказаў Кіраўнік дзяржавы.

"Пакуль мы не ўраўнаважым планету (а ўраўнаважыць можна, толькі стварыўшы пэўныя процівагі, як гэта было ў свой час, калі быў Савецкі Саюз), пакуль мы гэтага не зробім, да таго часу яны будуць дзівачыць. І гэта будзе ператварацца ў гібель тысяч і тысяч, мільёнаў людзей", - падкрэсліў беларускі лідар.

Адно з пытанняў беларускаму лідару датычылася саміту НАТА ў Вільнюсе.

"Вы заўважылі нядаўна выпад фактычна Уладзіміра Зяленскага супраць уладных людзей, якія збяруцца на саміт НАТА ў Вільнюсе? Ён ім ультыматум прад'явіў фактычна. Накшталт я на саміт не паеду, калі вы там нечага не зробіце. Чаму ён так сябе паводзіць? Гэта вельмі важны момант, асабліва для нас з вамі, Расіі і Беларусі", - звярнуў увагу Кіраўнік дзяржавы.

Прэзідэнт падкрэсліў, што Захад даўно рыхтаваў глебу для атакі перш за ўсё на Расію з тэрыторыі Украіны: "З першага майдана, да майдана (а калі б не было гэтай падрыхтоўкі, не было б і майдана) рыхтавалі Украіну да гэтай вайны. Пачалася вайна. І не трэба думаць, што Зяленскі і ўкраінскае грамадства, кіраўніцтва былі дурнямі і не разумелі, чым гэта можа скончыцца. Разумелі. Але ЗША, перш за ўсё пры падтрымцы іх бяздумных сатэлітаў, Зяленскаму жалезабетонна заявілі: "Мы цябе будзем падтрымліваць, узбройваць, будзем даваць грошы столькі, колькі трэба, ніколі не кінем". І тады ў Зяленскага з'явіліся крылы, ён паляцеў".

"А што адбываецца цяпер? Асабліва з 4-5 чэрвеня - контрнаступ так званы. Ён (Зяленскі. - Заўвага) канчаткова зразумеў, што не пераможа ў гэтай вайне. Што гэты контрнаступ нічым для яго не скончыцца, акрамя гібелі тысяч і тысяч людзей", - сказаў Прэзідэнт.

Таму, упэўнены Аляксандр Лукашэнка, ён паступова стаў прад'яўляць прэтэнзіі да тых, хто штурхаў Украіну да гэтай вайны. У першую чаргу прэтэнзіі ў выглядзе грошай і новай зброі. "Пакуль "падвіслі" на F-16 і ўжо да ядзернай зброі дайшлі. Бачачы, што яго патрэбнасці не задавальняюцца і што ён прайграе на фронце, ён ужо робіць захады, каб выйсці з гэтага становішча і перакласці на некага адказнасць. Падтэкстам гучыць: "Ну, вы ж мяне на вайну штурхнулі, вы ж мне абяцалі і вы мне гэта не зрабілі, таму я сёння, маючы ўсе гэтыя нашы дамоўленасці, маю права вам прад'явіць ультыматум: я на саміт не паеду, а калі ў вас ёсць нешта мужчынскае, то вы прыміце рашэнне", - расказаў беларускі лідар.

Паводле слоў Прэзідэнта, яшчэ да спецыяльнай ваеннай аперацыі там была дамоўленасць ваяваць да апошняга ўкраінца, і на гэта Захад павінен быў даць зброю і грошы. А калі не даюць столькі, колькі запытаў Зяленскі, то ўльтыматум. Гэта тэма, упэўнены Аляксандр Лукашэнка, будзе мець развіццё, асабліва ў выпадку няўдач украінскай арміі пры контрнаступленні.

Кіраўнік дзяржавы таксама лічыць, хто схватка ва Украіне будзе нарастаць і ўзмацняцца, паколь ва Украіны ёсць яшчэ немалыя стратэгічныя рэзервы. "Да 11 ліпеня (саміт НАТА ў Вільнюсе. - Заўвага) яны павінны нешта прадэманстраваць", - сказаў ён.

"Яны паспрабавалі Расію, наступаючы ў лоб, - заўважыў Аляксандр Лукашэнка. - У лоб не ўдалося. І не ўдасца. Калі Расія будзе дзейнічаць у адпаведнасці з класікай вядзення ваенных дзеянняў, ніякай перамогі ва ўкраінцаў не будзе".

Кіраўнік дзяржавы звярнуў увагу на асаблівую сітуацыю перад самітам НАТА ў Вільнюсе, калі ўкраінскі бок будзе імкнуцца прадэманстраваць свае сілы. "Небяспека заключаецца ў тым, што калі яны кінуць цяпер, перад 11 ліпеня, каб прадэманстраваць сваім заступнікам сваю моц, лепшыя падраздзяленні ў бой, яны канчаткова пахаваюць ўкраінскую баяздольнасць. Яны перамелюць там усё. Тады з той кропкі, дзе яны атакуюць цяпер, каб адрэзаць сухапутную дарогу на Крым, рассячы паўднёвую групоўку, як толькі яны перамелюць тут свае войскі, Расія нанясе контрудар, а абараняцца ўкраінцам ужо не будзе чым. Яны адсякуць Украіну поўнасцю і ад Чорнага мора, і ад самых добрых, выгадных, каштоўных для Украіны тэрыторый. Вось над гэтым трэба падумаць", - сказаў Аляксандр Лукашэнка.

"Для іх будзе потым вельмі небяспечны контрудар (Расіі. - Заўвага) па поўдні Украіны да Прыднястроўя. І тады з дзяржаўнасцю Украіны пытанне будзе вырашана, - дадаў Прэзідэнт. 

Менавіта аб верагоднасці такога сцэнарыя развіцця падзей трэба задумацца ўкраінскаму боку, а не аб тым, якую "цукерку" могуць яму прапанаваць на маючым адбыцца саміце НАТА ў Вільнюсе, лічыць Аляксандр Лукашэнка. На яго думку, Прэзідэнта Украіны не задаволіць прапанаваны варыянт фарміравання Савета Украіна - НАТА, замест паўнацэннага ўступлення  ў альянс. "Ніколі Уладзімір Зяленскі з гэтым не згодзіцца. Ён будзе настойваць на тым, каб Украіну прынялі ў НАТА, чытай - НАТА ўступіла ў вайну супраць Расійскай Федэрацыі. Вось у чым небяспека. А калі НАТА прыме такое рашэнне, зусім іншая будзе вайна. Баюся, што яна вельмі хутка можа скончыцца", - падкрэсліў беларускі лідар.

Адносна верагоднасці таго, што Захад у такой сітуацыі можа адважыцца змяніць Зяленскага на каго-небудзь іншага, Прэзідэнт Беларусі лічыць гэта малаверагодным: "Цалкам магчыма, але я не думаю, што гэта адбудзецца. Замяніць Зяленскага - гэта першы крок да прызнання свайго паражэння. Пакуль няма такіх перспектыў. Фактаў, якія сведчылі б пра гэта, у мяне няма. І навошта ім мяняць Зяленскага, калі ён робіць усё, што ім патрэбна".

Ён падкрэсліў, што менавіта цяпер трэба не ўпусціць той момант, калі яшчэ можна і трэба сесці за стол перагавораў. "Сёння трэба абдумацца. Пакуль на стале пакет перагавораў, цэлы пакет пытанняў, па якіх можна дамовіцца. Заўтра гэта будзе немагчыма, - сказаў кіраўнік дзяржавы. - Сёння з Украінай можна размаўляць і дасягаць якіх-небудзь мірных пагадненняў. Пасля так званага контрнаступу сітуацыя зменіцца, і ці захочуць з табой (кіраўніцтвам Украіны. - Заўвага) размаўляць?" Шкада, што палітыкі ва Украіне гэтага не бачаць і не разумеюць, дадаў Прэзідэнт.

Кіраўнік дзяржавы адзначыў, што ўжо некаторы час таму ва Украіне пачаўся сур'ёзны канфлікт паміж Прэзідэнтам Уладзімірам Зяленскім і ваеннымі вярхамі. "Таму што ваенныя бачаць, што адбываецца на фронце. А ён, пакуль падштурхоўваемы гэтымі непаседамі Дудам і Осцінам з Блінкенам (Прэзідэнтам Польшчы Анджэем Дудам, Міністрам абароны ЗША Лойдам Осцінам і Дзяржсакратаром ЗША Энтані Блінкенам. - Заўвага), лічыць: "Я герой, пра мяне ўсе гавораць у свеце і я яшчэ буду і пераможцам". Гэтага не будзе ніколі", - заявіў Прэзідэнт.

"Трэба цяпер спыніцца. Ужо шмат дрэннага зрабілі. Загінула шмат людзей. Але можа ж быць горш. Таму трэба спыніцца цяпер, сесці за стол перагавораў. Без папярэдніх умоў. І там ужо вызначацца тэрыторыі, бяспека, будучыня Украіны, Беларусі і Расіі. Усё мы павінны вырашыць за сталом перагавораў. Гэта залежаць павінна ад Беларусі, Украіны і Расіі. Але менш за ўсё ад ЗША. Яны далёка. Яны разумеюць, што тут адбываецца, але гэта нібыта не іх вайна. Таму мы павінны вырашаць тут гэту праблему", - падкрэсліў беларускі лідар.

Вельмі цікавіла журналістаў пытанне, на якой тэрыторыі цяпер размяшчаецца ПВК "Вагнер".

"Чаму вы пытаецеся ў мяне, дзе знаходзіцца сёння прыватная ваенная кампанія "Вагнер" і кіраўнік гэтай кампаніі? Гэта кампанія, вы цудоўна разумееце, расійская. Таму пытанне відавочна не да мяне. Наколькі я інфармаваны, байцы - вельмі сур'ёзныя байцы ПВК "Вагнер" - знаходзяцца ў сваіх пастаянных лагерах. У тых лагерах, дзе яны знаходзіліся пасля вываду з фронту на аднаўленне, лячэнне, адпачынак і гэтак далей. Ідзе звычайная ратацыя для такой вайны. Пасля Бахмута яны былі выведзены ў свой лагер, там яны сёння і знаходзяцца", - расказаў Аляксандр Лукашэнка.
 
"Што датычыцца Яўгена Прыгожына, ён знаходзіцца ў Піцеры. Дзе ён сёння раніцай? Магчыма, у Маскву паехаў, можа, яшчэ недзе, але на тэрыторыі Беларусі яго няма", - падкрэсліў Прэзідэнт.

Разам з тым Кіраўнік дзяржавы адзначыў, што не бачыць рызык для Беларусі ў выпадку, калі байцы ПВК "Вагнер" будуць размешчаны ў нашай краіне.

"Ніякіх рызык ад размяшчэння ПВК "Вагнер" у Беларусі, калі гэта адбудзецца, я абсалютна не бачу. Гэта не той выпадак, якім мяне з усіх бакоў спрабуюць напружыць. Я разумею, чаму напружваюць: калі ПВК "Вагнер" з'явіцца ў Беларусі… Усе суседзі, і ў тым ліку ваша кіраўніцтва, Злучаных Штатаў Амерыкі, разумеюць, што гэта вельмі магутная баявая адзінка і наўрад ці ёсць такія ж у свеце падраздзяленні, як ПВК "Вагнер", якія прайшлі праз шматлікія баі, бітвы і ў дадзеным выпадку праз вайну. Таму я разумею, чаму вы так топчацеся на гэтай тэме", - сказаў Аляксандр Лукашэнка.

Кіраўнік дзяржавы адзначыў, што Узброеныя Сілы Беларусі вельмі баяздольныя падраздзяленні, якія не ўступаюць "Вагнеру".

"А вопыт, які мае "Вагнер" і камандзіры, яны з задавальненнем перададуць нашым Узброеным Сілам. Я маю на ўвазе ваенны вопыт, які яны атрымалі. Той, які нам неабходны. Гэта тактыка, баявыя дзеянні. Супакойвацца нам не даводзіцца. Вы бачыце заявы розных непасед, Дуды і Валодзі Зелянскага, аб тым, што яны не пакінуць Беларусь у спакоі. Зразумела, я як галоўнакамандуючы павінен рэагаваць на такія рэчы. Таму справімся з гэтай праблемай, калі вы лічыце, што гэта праблема. Я не лічу, што гэта праблема", - заявіў Аляксандр Лукашэнка.

"Будуць яны ў Беларусі або не будуць, у якой колькасці - у бліжэйшы час мы разбяромся. Мы ўтойваць гэту інфармацыю не будзем. Мы абавязкова праінфармуем аб нашых далейшых узаемаадносінах з гэтым падраздзяленнем", - запэўніў Аляксандр Лукашэнка.

Прэзідэнт адзначыў, што калі расійскае кіраўніцтва і ПВК "Вагнер" палічаць неабходным размясціць пэўную колькасць байцоў у Беларусі для адпачынку і падрыхтоўкі, ён сваё абяцанне аб гатоўнасці прыняць іх стрымае.

"Мяне абсалютна не хвалюе і не турбуе, што ў нас будзе размешчана пэўная колькасць гэтых байцоў. Больш таго, яны будуць размешчаны пад пэўныя ўмовы. Галоўная ўмова: калі нам трэба будзе задзейнічаць гэта падраздзяленне для абароны дзяржавы (калі яны будуць тут), яно будзе задзейнічана імгненна на любым напрамку. І іх вопыт будзе ў Беларусі запатрабаваны", - адзначыў Кіраўнік дзяржавы.

У той жа час Аляксандр Лукашэнка ўпэўнены, што ў Беларусі не можа паўтарыцца сітуацыя, якая адбылася з ПВК "Вагнер" у Расіі. "Як у нас кажуць, варажыць на кафейнай гушчы сэнсу няма. Але я не думаю, што "Вагнер" недзе паўстане і паверне сваё ружжо супраць беларускай улады і беларускай дзяржавы. У жыцці ўсякае бывае. Але я сёння не бачу такой сітуацыі. Працаваць трэба з людзьмі", - звярнуў увагу Прэзідэнт.

Паводле слоў беларускага лідара, на сённяшні дзень пытанне перадыслакацыі і размяшчэння ПВК "Вагнер" у Беларусі не вырашана. Кіраўнік дзяржавы падкрэсліў, што гэта залежыць не ад яго, а ад рашэння расійскага боку і саміх вагнераўцаў.

"Лагеры мы не ўзводзім. Мы прапанавалі ім некалькі былых ваенных гарадкоў, якія выкарыстоўваліся яшчэ ў ваенны час. У тым ліку пад Асіповічамі. Але ў ПВК "Вагнер" іншае бачанне па іх размяшчэнні. Зразумела, я пра гэта бачанне вам не скажу", - адзначыў Аляксандр Лукашэнка.

Паводле слоў Прэзідэнта, Беларусь гатова прапанаваць вагнераўцам некалькі пунктаў для дыслакацыі. "Такіх ваенных гарадкоў, якія перададзены грамадзянскім адміністрацыям на месцы, у нас некалькі дзясяткаў. Мы ім паказалі, як гэта можа быць уладкавана. Але яшчэ раз падкрэсліваю: на сённяшні дзень пытанне перадыслакацыі і размяшчэння падраздзялення не вырашана. Галоўнае пытанне, дзе будзе размяшчацца ПВК "Вагнер" і чым будзе займацца, залежыць не ад мяне. Гэта залежыць ад кіраўніцтва Расійскай Федэрацыі. Гэта іх самае баяздольнае падраздзяленне", - звярнуў увагу Кіраўнік дзяржавы.

Аляксандр Лукашэнка падкрэсліў, што адносіны Беларусі з Расіяй пасля сітуацыі з ПВК "Вагнер" будуць яшчэ больш моцнымі.

"Чаму нашы адносіны павінны быць аслаблены ў выніку? Мы разам вырашалі праблему. Вырашылі вельмі сур'ёзную праблему для Расіі. Калі Пуцін падняў "Марш справядлівасці" да ўзроўню заявы Прэзідэнта, звароту да народа... Не дай бог смута ў Расіі, як ён гэта назваў, горача было б усім. Але нам дакладна. Нам было б не адседзецца, я гэта зразумеў адразу. Таму я і ўключыўся ў гэты працэс. І ў выніку мы, адыграўшы пэўную ролю, і ён і я, не дапусцілі гэтай смуты. Гэта ў плюс? У плюс. Дык чаму ў нас павінны пагоршыцца адносіны? - спытаў Прэзідэнт. - Так, я бачу, што ў некаторых думкафарміруючых людзей у Расіі ўзнікла нейкая рэўнасць, яшчэ, можа, нешта. Я гэта ўлічваю. Але што паробіш, так склалася сітуацыя", - адзначыў Аляксандр Лукашэнка.

"Роля Беларусі і мая, у прыватнасці, роля не нашкодзіла Расійскай Федэрацыі. Пуцін адкрыта ў другой сваёй заяве, звароце аб гэтым сказаў. Я спадзяюся, я думаю і сёння перакананы, што, наадварот, нашы адносіны будуць больш моцнымі. Хоць куды ўжо больш. Мы і так даўным-даўно маем добрыя адносіны, разам вырашаем сур'ёзныя пытанні, якія з'яўляюцца так ці інакш у нашых адносінах і вакол нас. Калі і ўзнікне якое-небудзь напружанне, у нас устаноўлены каналы сувязі, на працягу некалькіх хвілін мы можам перагаварыць, сустрэцца і абмеркаваць любую праблему", - сказаў Прэзідэнт.

"Я не думаю, што будуць нейкія праблемы ў тым, каб вагнераўцы працавалі ў інтарэсах Расіі. Страціць такое падраздзяленне пры ўсіх нюансах (вядома, прэтэнзій шмат: і людзі загінулі, і гэтак далей; магло загінуць значна больш) нельга. А тым больш байцоў гэтага падраздзялення. Там прыкладна два дзясяткі герояў Расіі. Гэтыя хлопцы, якія ваявалі, дай бог каб уся армія так ваявала, - адзначыў Аляксандр Лукашэнка. - Але гэта праблемы Расійскай Федэрацыі і Прэзідэнта Пуціна".

"Мы ў бліжэйшы час дамовіліся з ім сустрэцца. Думаю, абмяркуем і гэту праблему, паколькі мы аказаліся ўключаны ў яе вырашэнне, і пытанні далейшага функцыянавання ПВК "Вагнер". Думаю, гэта самая простая праблема, якая будзе вырашана і вырашаецца", - сказаў Кіраўнік дзяржавы.

Аляксандр Лукашэнка адзначыў, што адна з праблем, якую ўзняў Яўген Прыгожын, - гарантыі бяспекі. "Я яму сказаў: калі трэба дзеля спынення гэтага канфлікту, я гатовы прыняць у Беларусі і гарантаваць тваю бяспеку", - расказаў Прэзідэнт.

Акрамя таго, расійскім бокам было дадзена абяцанне спыніць крымінальныя справы, у тым ліку ў адносінах да Яўгена Прыгожына.

На гэты момант усе дамоўленасці выконваюцца, падкрэсліў Кіраўнік беларускай дзяржавы.

Разам з тым, як ужо адзначалася, пытанне размяшчэння ў Беларусі ПВК "Вагнер" пакуль не вырашана, і гэтага можа ў прынцыпе не адбыцца, калі такое рашэнне будзе прынята расійскім кіраўніцтвам.

Адказваючы на пытанне, у якіх рамках у Беларусі будуць дзейнічаць вагнераўцы, калі ўсё ж іх перадыслацыруюць у краіну, і ці не будуць яны выкарыстоўваць тэрыторыю для нападзення, Аляксандр Лукашэнка сказаў: "Мы ніколі ні на каго не нападалі. Я ўжо аб гэтым заяўляў не адзін раз. І нападаць не збіраемся. І з нашай тэрыторыі ніхто ні на каго нападаць не будзе. Калі супраць нас будзе ўчынена агрэсія, мы адкажам. І калі тут будзе ПВК "Вагнер", яны гэтак жа, як і беларуская армія, будуць абараняць нашы інтарэсы".

Паводле слоў Аляксандра Лукашэнкі, калі ПВК будзе размяшчацца ў Беларусі, то з гэтай кампаніяй будзе заключаны юрыдычна абавязваючы кантракт, дзе ўсё будзе прапісана. "На ўзроўні закона або ўказа Прэзідэнта будуць вызначаны рамкі, у якіх будзе дзейнічаць гэта падраздзяленне", - заявіў Кіраўнік дзяржавы.

"Я не ўсё ведаю і ведаць не хачу, што датычыцца ўзаемаадносін Пуціна і Прыгожына. Але трэба разумець, што Пуцін Прыгожына ведае значна лепш, чым я. Я яго проста бачыў пры арганізацыі тых ці іншых мерапрыемстваў. Пуцін жа з ім знаёмы значна больш, яшчэ з Санкт-Пецярбурга, калі яны там жылі і працавалі. І ў іх былі вельмі добрыя адносіны адзін з адным. Можа, нават больш, чым добрыя.Прыгожын знаходзіцца, я ведаю абсалютна дакладна, на свабодзе. І ў дадзены момант у тым ліку. Мы не раз размаўлялі па тэлефоне з ім. Па-мойму, учора пасля абеду мы размаўлялі з ім па тэлефоне і якраз абмяркоўвалі моманты далейшых дзеянняў ПВК "Вагнер". Ён мне сказаў адно: "Мы будзем працаваць у імя Расіі, на карысць Расіі і будзем выконваць свой абавязак да канца, так, як мы дамовімся і будзе прынята рашэнне адпаведнымі органамі ўлады", - адзначыў Аляксандр Лукашэнка.

"Што з ім будзе далей? Ну, усякае ў жыцці бывае. Але калі вы думаеце, што Пуцін такі шкодны і злапамятны, што яго заўтра "замочаць" недзе... Не, гэтага не будзе", - падкрэсліў Прэзідэнт.

Пры гэтым Кіраўнік дзяржавы звярнуў увагу, што не трэба сітуацыю з ПВК "Вагнер" зводзіць выключна да Яўгена Прыгожына. Паколькі ў кампаніі служыць шмат іншых байцоў - герояў Расіі. Вялікая колькасць ваеннаслужачых узнагароджана ордэнамі і медалямі. "І гэта не таму што яны былі "прыгожынцы", а таму, што па-сапраўднаму ваявалі. А да гэтага, ды і цяпер, ваююць па ўсім свеце, адстойваючы дэмакратыю або незалежнасць тых ці іншых краін, дзе Францыя або Злучаныя Штаты хацелі б паставіць кагосьці на калені. Таму загубіць такое падраздзяленне, я лічу, было б няправільна", - заявіў Аляксандр Лукашэнка.

"А што датычыцца "здраднікі" і іншае - гэта была першая рэакцыя Прэзідэнта Пуціна раніцай у суботу. Я думаю, што з цягам часу яна, можа, і не памянялася, ацэнкі, магчыма, не змяніліся, але сталі значна мякчэйшымі. І адна справа выказаць на ўвесь свет, а іншая справа, што ў цябе ўнутры", - дадаў Прэзідэнт.

Кіраўнік дзяржавы адзначыў, што з сучаснымі тэхналогіямі знішчыць чалавека або групу людзей, нават якія вельмі ахоўваюцца, не складае праблем. "Абсалютна ніякіх праблем. Бачачы, як развіваюцца падзеі на фронце з гэтымі беспілотнікамі… Проста трэба думаць аб наступствах. Лепш за ўсё прадставіць сусветнай грамадскасці Пуціна і Лукашэнку нейкімі варварамі, якія крадуць людзей, дзяцей і "ядуць" іх. Пачалі абвінавачваць спачатку Прэзідэнта Пуціна ў тым, што дзеці перамяшчаліся з Данбаса ў Расійскую Федэрацыю. Вы бачылі, што гэтыя дзеці перамяшчаліся з раёнаў баявых дзеянняў дзеля выратавання, некаторыя з бацькамі", - расказаў Прэзідэнт.

Што датычыцца Беларусі, то аздараўленнем і рэабілітацыяй дзяцей Данбаса займаецца грамадскі дзеяч Аляксей Талай. "Я наогул схіляюся перад гэтым чалавекам", - падкрэсліў беларускі лідар. Паводле яго слоў, многія іншыя прадстаўнікі Беларусі бывалі асабіста на Данбасе і душой пранікліся да праблем дзяцей, якія там знаходзяцца. І на ўзровень кіраўніка дзяржавы была вынесена ініцыятыва арганізаваць для такіх дзяцей аздараўленне і адпачынак у Беларусі, на што Аляксандр Лукашэнка адрэагаваў станоўча і як старшыня Вышэйшага дзяржсавета Саюзнай дзяржавы Беларусі і Расіі даручыў выдзеліць сродкі з саюзнага бюджэту.

"Мы прывозілі гэтых дзяцей. Для нас гэта было нармальна, я і не ўнікаў у гэту тэму. Але раптам потым, за ўсё гэта добрае, прачытаў у аглядзе: "Лукашэнку ў Гаагу…" За што? - "За тое, што ён крадзе дзяцей, крадзе, перамяшчае..." Мы нікога не крадзём", - падкрэсліў Прэзідэнт. У Беларусь прыязджаюць вялікія групы дзяцей, адпачываюць тут, аздараўляюцца, а потым едуць назад. "Ніякага злачынства мы тут не ўчынялі і ўчыняць не збіраемся. І будзем запрашаць, калі на гэта будзе неабходнасць, калі іх бацькі або той ці іншы дзіцячы дом звернуцца да нас з гэтай просьбай", - дадаў ён.
 
"А гаварыць аб тым, што мы маем тут нешта дрэннае на мэце - гэта проста варварства, асабліва з боку Захаду. Яны заўсёды крычалі: "Ах, дзеці-дзеці!" Дык чаго вы мяне папракаеце, што я заву гэтых няшчасных сюды, каб яны пабылі тут без бамбёжак, падлячыліся, паправіліся?" - задаў рытарычнае пытанне Аляксандр Лукашэнка.

Адказваючы на пытанне, ці аслабіў Уладзіміра Пуціна марш вагнераўцаў, Кіраўнік дзяржавы падкрэсліў: "Нават не спадзявайцеся на гэта. Ніякага хістання не было. Ніякай аслабленасці не было. Пуцін займаўся сваімі пытаннямі. У такой сітуацыі і Пуцін, і любы прэзідэнт, наадварот, актывізуецца, збіраецца, а Пуцін - тым больш (я яго характар ведаю). Гэта, наадварот, садзейнічала яго не толькі сабранасці, але і яго ў добрым сэнсе слова агрэсіўнасці, каб абараніць краіну і адказаць".

Прэзідэнт адзначыў, што небяспечную сітуацыю з ПВК "Вагнер" трэба было пагасіць у зародку, інакш існавала рызыка, што яна можа распаўсюдзіцца на ўсю краіну і нават выйсці за межы Расіі.

Кіраўнік дзяржавы расказаў, што папярэдзіў аб гэтым і кіраўніка ПВК Яўгена Прыгожына: "Даслоўна: "Жэня, не крыўдуйце, не крыўдуй на мяне - наша беларуская армія пераведзена ў поўную баявую гатоўнасць. Вызначаны вайсковыя падраздзяленні, якія гатовы да перакідкі пад Маскву. Маскву мы будзем з Пуціным абараняць".

Аляксандр Лукашэнка расказаў, што для перакідкі ў Маскву быў падрыхтаваны спецназ. "Першых 5 ці 7 самалётаў прызямліліся ў нас для перакідкі беларускай брыгады спецыяльнага прызначэння пад Маскву. Гэта прыкладна, як вагнераўцы, а можа, недзе і мацнейшыя. І вы разумееце, што гэты канфлікт мог вельмі разрасціся. Мы дамовіліся (з расійскім бокам.- Заўвага): калі трэба будзе ў моманце - мы ў самалёт і туды", - заявіў Прэзідэнт.

Самалёты прадаставіла расійскае Міністэрства абароны. "Першая брыгада спецыяльнага прызначэння была ўжо гатова. Калі трэба было б падключыць сілы спецыяльных аперацый (у нас такія ёсць), мы гатовы былі іх падключыць", - дадаў Кіраўнік дзяржавы.

На сустрэчы з прадстаўнікамі СМІ Аляксандр Лукашэнка пацвердзіў перамяшчэнне ў Беларусь ядзерных боегаловак, і гэта было зроблена не па зямлі.

"Гэта такая тэма (ядзернай зброі. - Заўвага), на якую разважаць асабліва не пасуе любому палітыку. Пэўная колькасць ядзерных боегаловак перамешчана на тэрыторыю Беларусі. Знаходзяцца пад надзейнай аховай", - сказаў Кіраўнік дзяржавы.
 
У сувязі з гэтым Прэзідэнт заўважыў, што перамяшчэнне ядзерных боегаловак, зразумела, не змаглі прасачыць "збеглыя" за мяжой (хоць, відаць, вельмі хацелі) і сталі на гэтым фоне будаваць домыслы наконт выкарыстання чыгункі для дастаўкі такой зброі і нават увязалі гэта з заўчаснай смерцю Міністра транспарту і камунікацый.

"Страшэнны факт вам прывяду: па зямлі мы ядзерныя боегалоўкі не перамяшчалі, - адзначыў Аляксандр Лукашэнка, гаворачы пра спосаб дастаўкі. - Нікому не перашкаджалі. Перамясцілі так, што ні вы, ні ў Штатах (ЗША. - Заўвага), ні Мі-6, ні ў Германіі - нідзе гэтага не заўважылі. Такая была задума".

Наконт кантролю за захаваннем ядзернай зброі, то ён, паводле слоў Прэзідэнта, забяспечваецца ідэальны, сумеснымі намаганнямі беларусаў і расіян: "Таму што самі мы, цяперашні склад беларускіх Узброеных Сіл, абслугоўваць ядзерную зброю не можам, таму што ў нас яе не было. Рэч вельмі сур'ёзная. Таму мы на сённяшні дзень усё робім разам з Расійскай Федэрацыяй".

Каменціруючы ўсялякія размовы на тэму таго, хто ўсё ж такі будзе прымаць рашэнне аб прымяненні ядзернай зброі - кіраўніцтва Беларусі ці Расіі - Аляксандр Лукашэнка звярнуў увагу, што нават пры прапрацоўцы менш важных аперацый, чым магчымасць прымянення ядзернай зброі, лідары абедзвюх краін дзясяткі разоў сазвоньваюцца, сустракаюцца, абмяркоўваюць. "Прымяненне ядзернай зброі, нават калі б Расія вырашыла гэта зрабіць, я ўпэўнены, што са сваім бліжэйшым саюзнікам, яна параілася б. А тым больш - мы", - сказаў беларускі лідар.

Што датычыцца прымянення, то Беларусь не збіраецца нікога атакаваць з дапамогай ядзернай зброі. Яна прызначана выключна для абарончых мэт. "Калі вы ўчыніце агрэсію супраць Беларусі, адказ будзе імгненным. Цэлі вызначаны", - сказаў Прэзідэнт.

"Калі я чагосьці не хачу або наш народ, наша дзяржава не хоча, значыць, не будзе", - удакладніў Аляксандр Лукашэнка аб механізме прыняцця рашэння па выкарыстанні ядзернай зброі.

Гаворачы аб тэрмінах перамяшчэння ядзернай зброі ў Беларусь, Прэзідэнт заявіў: "Да канца года дакладна. Але я думаю, значна раней мы цалкам перамесцім боегалоўкі, якія прызначаны для гэтага".

"Пункты размяшчэння ядзернай зброі былі цалкам гатовы месяц таму. Вялікая частка ядзернай зброі перамешчана і знаходзіцца ў Беларусі", - заявіў Аляксандр Лукашэнка.

Журналісты згадалі аб нядаўнім артыкуле брытанскай газеты Financial Times: выданне сцвярджала, што Старшыня КНР Сі Цзіньпін у час сакавіцкага візіту ў Маскву нібы перасцярог Уладзіміра Пуціна ад прымянення ядзернай зброі ва Украіне.

"Стапрацэнтны фэйк. Я ведаю аднаго і другога. Я ведаю Кітай і ведаю Сі Цзіньпіна. Ён гэтага ніколі не зробіць. Можа, неяк нейкія каналы выкарыстоўвалі б і іншае, але тое, што ён папярэдзіў Пуціна аб непрымяненні ядзернай зброі, - гэта фэйк, гэта хлусня. Гэтага не было 100%", - падкрэсліў Кіраўнік дзяржавы.

Прэзідэнт дадаў, што, калі распаўсюджваецца такая інфармацыя, то на бліжэйшай сустрэчы з Уладзімірам Пуціным ён удакладніць у яго гэты момант. "Хоць я ўпэўнены, што гэтага не было, але спытаю. Я гэтаму не веру і вам раю ў гэта не верыць. Гэта ўкід. Трэба яшчэ ацаніць, каму патрэбны гэты ўкід. Напэўна, Захаду, які хоча паказаць, што вось нават сябар Пуціна Сі Цзіньпін трос пальцам у яго пад носам і крычаў: "Не прымяняй ядзернай зброі". Гэтага быць не можа і гэтага не было, я ўпэўнены, - заявіў беларускі лідар. - Пуцін і ўсё грамадства Расіі ведае, калі можна прымяніць ядзерную зброю, а калі не. Калі Расіі будзе пагражаць смяротная небяспека, будзе стаяць пытанне жыцця і смерці Расіі і супраць яе будзе ажыццёўлена грубая агрэсія, будзе прыменена ядзерная зброя. І я яго ў гэтым плане падтрымліваю".

Беларусь таксама не вяла і не вядзе з Кітаем якіх-небудзь перагавораў адносна ядзернай зброі, дадаў Аляксандр Лукашэнка.

Адказваючы на пытанне аднаго з заходніх журналістаў, ці абмяркоўваў ён тэму Запарожскай АЭС з Уладзімірам Пуціным, Кіраўнік дзяржавы сказаў, што гэтага не было. "З Прэзідэнтам Пуціным мы сітуацыю на Запарожскай АЭС не абмяркоўвалі. Сітуацыя простая: калі вы, амерыканцы і Украіна, не захочаце, каб там здарылася тое, аб чым вы гаворыце, гэтага не здарыцца. У Расіі няма неабходнасці ўзрываць Запарожскую АЭС. Яна знаходзіцца ў руках расіян. Навошта ўзрываць?" - сказаў Аляксандр Лукашэнка.

"Гэтым вайну ва Украіне не скончыш. Гэта ўсёй Еўропе і Еўразійскаму кантыненту будзе нанесены каласальны ўрон", - дадаў беларускі лідар.

"Перагаворы ў тупіку, але пакуль яшчэ ёсць выйсце з гэтага тупіка. Ёсць магчымасць сесці за стол перагавораў і дамовіцца. Я ў гэтым абсалютна ўпэўнены. Заўтра можа не быць такой магчымасці, таму што зменіцца сітуацыя, - падкрэсліў Аляксандр Лукашэнка. - Гэта вайна ў нашым доме, таму трэба весці перагаворы, пакуль гэта магчыма".

Прэзідэнт адзначыў, што многія краіны прапануюць сябе як пасрэдніка ва ўрэгуляванні канфлікту. Але, заявіў кіраўнік дзяржавы, ён не любіць такое пасрэдніцтва. Беларусь жа, звярнуў ён увагу, не з'яўляецца пасрэднікам, паколькі вайна ідзе ў агульным славянскім доме.

"Я сябе пасрэднікам ніколі не лічыў. Я лічу, што гэта вайна ў нашым доме. Украіна і Беларусь, і Расія знаходзяцца, груба кажучы, у адной лодцы, або на адным караблі, і з гэтага трэба зыходзіць", - сказаў Аляксандр Лукашэнка.

"Што датычыцца, што вайну можна закончыць нанясеннем ядзернага ўдару па Украіне, - цалкам магчыма, але не трэба. Прэзідэнт Пуцін некалькі разоў заяўляў, што прымяняць ядзерную зброю, нават абмежаваных магчымасцей - тактычную ядзерную зброю, - такое пытанне нават не стаіць. У Расіі дастаткова звычайных узбраенняў, няядзерных, для таго каб дабіцца сваіх мэт", - адзначыў Кіраўнік беларускай дзяржавы.

"І мне здаецца, што вайна ва Украіне, спецыяльная ваенная аперацыя не з'яўляюцца і не будуць з'яўляцца прычынай нанясення ядзернага ўдару з якога б там ні было боку. Вось калі будзе агрэсія НАТА, напрыклад, Злучаных Штатаў Амерыкі ці блока НАТА супраць Беларусі або Расіі, а гэта значыць уварвуцца на нашу тэрыторыю, тады рукі развязаны - па Канцэпцыі нацыянальнай бяспекі Расія, лічы і Беларусь, якая сёння мае гэту зброю, адкажа, - заявіў Прэзідэнт. - Таму я заўсёды па-народнаму кажу: вы нас не чапайце, і мы ніколі не прыменім гэту смяротную зброю. І ваяваць нават не будзем".

"Кітай можа адыграць важнейшую ролю ва ўрэгуляванні гэтага крызісу, калі ён гэтага па-сапраўднаму не проста захоча, а будзе дабівацца", - заявіў Аляксандр Лукашэнка.

Кіраўнік дзяржавы таксама развянчаў заявы крыніц амерыканскага інфармацыйнага агенцтва Associated Press, якія заяўлялі, што Прэзідэнт Беларусі пры ўрэгуляванні сітуацыі з ПВК "Вагнер" кансультаваўся з кітайскім бокам. Прычым гэтыя крыніцы журналістаў Аляксандр Лукашэнка назваў "няправільнымі, неразумнымі і агіднымі".

"У вас вельмі дрэнныя крыніцы. Ніякіх кансультацый ні з кім наконт перагавораў з "Вагнерам" у мяне не было. Я сам ведаў, што сказаць, без усякіх кансультацый. З Кітаем у мяне не было ніякіх кантактаў. А калі б яны маглі быць, то толькі з адным чалавекам - Сі Цзіньпінам. Мы з ім не размаўлялі. І наўрад ці магчыма была б гэта размова, калі нават я захацеў бы. З-за многіх прычын. Не, не і яшчэ раз не. Мы з Кітаем - ні з паслом, ні з пасольствам, ні з Сі Цзіньпінам, ні з ваеннымі - кантактаў не мелі. У гэтым не было ніякай неабходнасці", - падкрэсліў Прэзідэнт.

Аляксандр Лукашэнка адзначыў, што еўрапейскія краіны гатовы да перагавораў па Украіне, але Зяленскі займае крайнюю пазіцыю.

"Я спрабую растлумачыць, назваць прычыны, чаму цяпер трэба ісці на перагаворы. Пазіцыя Захаду такая: Еўропа гатова да таго, каб весці цяпер перагаворы, у тым ліку Францыя. Магчыма, перш за ўсё Францыя. Гэта вайна ў нашым доме, таму трэба весці перагаворы, пакуль гэта магчыма. Зяленскі займае крайнюю пазіцыю - "ваяваць, пакуль не вызвалім тэрыторыі, нават калі да апошняга ўкраінца". ЗША займаюць прамежкавую пазіцыю. Яны будуць гатовы да перагавораў пасля контрнаступлення", - сказаў Прэзідэнт.

Паводле яго слоў, нават калі гэта контрнаступленне скончыцца для Украіны няўдала, гэта таксама вынік: "Тады трэба ісці на перагаворы. І Еўропа з гэтым пагадзілася. Усё сфакусіравана на контрнаступленні".

Прэзідэнт таксама заявіў, што для Беларусі і Расіі абсалютна недапушчальна магчымасць захопу заходніх тэрыторый Украіны з боку Польшчы або іншых краін Захаду. "І мы з Прэзідэнтам Расіі гэту тэму абмяркоўвалі. Поўнае ўзаемаразуменне. Гэта вельмі небяспечны шлях эскалацыі канфлікту ва Украіне - калі ў іх з'явіцца жаданне ўварвацца на тэрыторыю Украіны і адваяваць "гістарычныя" тэрыторыі. Для нас гэта недапушчальна", - падкрэсліў беларускі лідар.

Аляксандр Лукашэнка лічыць, што Беларусь знаходзіцца ў перагаворным працэсе, але на гэты момант ён зайшоў у тупік: "Але мы - у гэтым перагаворным працэсе. Я зыходжу з таго, што першыя тры раўнды прайшлі на тэрыторыі Беларусі".

"Да восені павінна сітуацыя змяніцца, і мы пачнём гаварыць за сталом перагавораў. Магчыма. Можа, не ў верасні, крыху пазней. Не хачу выдаваць нейкую інфармацыю, але пра гэта ўжо гавораць еўрапейцы. Францыя, Германія. Ад гэтай вайны матэрыяльна страчваюць больш за ўсё еўрапейцы. А выгадаатрымальнікам з'яўляецца фактычна адна краіна", - сказаў Кіраўнік дзяржавы.

Аляксандр Лукашэнка не лічыць, што бакі збяруцца ў Маскве ці Мінску, але не гэта важна. "Галоўнае, каб гэты канфлікт спыніўся", - падкрэсліў ён.

Кіраўнік дзяржавы таксама адзначыў, што важна не прапусціць момант для правядзення перагавораў, паколькі сітуацыя вельмі дынамічна мяняецца.

"Магутная, моцная Расія, няхай нікога не здзіўляе, гатова да перагавораў з Украінай. Ну не хочацца, каб гінулі людзі. А калі заўтра расіяне перамелюць гэтыя сілы (УСУ. - Заўвага) і ўбачаць магчымасць атакаваць па поўдні Прыднястроўя, што тады? Сядзе Расія за стол перагавораў? Наўрад ці. Сітуацыя зменіцца і падыходы будуць іншымі. Таму калі нехта чакае гэты "контрнаступ"… "Калі ён не атрымаецца, вось тады мы сядзем за стол перагавораў", - Захад (так заяўляе. - Заўвага). А Расія можа паслаць па-руску і вельмі далёка", - сказаў Прэзідэнт.

"Таму трэба карыстацца момантам. Таму што дынаміка шалёная. Развіццё сітуацыі імгненнае часам, і гэтым трэба скарыстацца", - падкрэсліў Кіраўнік дзяржавы.

Аляксандр Лукашэнка таксама адзначыў, што цяпер змянілася сітуацыя адносна далучаных да Расіі ўкраінскіх тэрыторый. "Расія што, будзе абмяркоўваць Крым і Наваросію? Ніколі! Сітуацыя змянілася. А тады (у час папярэдніх раўндаў перагавораў. - Заўвага) яшчэ можна было. А заўтра, магчыма, наогул перагаворы нікому не будуць патрэбныя. І калі там заходнікі з Зяленскім сядзяць і чэрцяць, нешта раскладваюць - гэта толькі для сябе. Таму што зменіцца сітуацыя. Таму тое, што было тады, думаю, працэнтаў на 50 цяпер непрымальна", - выказаў меркаванне Аляксандр Лукашэнка.

"Але расіяне не будуць настойваць. Я ведаю пазіцыю Пуціна. Ён будзе ісці да таго, каб абмяркоўваць любыя пытанні. Але давайце сядзем за стол перагавораў. Без папярэдніх умоў", - дадаў Кіраўнік дзяржавы. Прыкладам такіх умоў ён назваў вывад расійскіх войскаў з тэрыторыі Украіны.

"Калі не хочаце, каб Расія перамагла, сядзьце за стол перагавораў і дамоўцеся", - сказаў Аляксандр Лукашэнка на пытанне журналіста французскага СМІ.

Адказваючы на пытанне, ці разлічвае Прэзідэнт Беларусі, што Расія пераможа, ён заявіў: "Разлічваю".

Кіраўнік дзяржавы таксама падкрэсліў, што Расія з'яўляецца бліжэйшым саюзнікам Беларусі, і гэта ні для каго не сакрэт. "Мы даўно працуем над фарміраваннем адзінага саюза. І мы ўсё прапісалі", - адзначыў ён.

Што датычыцца ўдзелу Беларусі ў канфлікце ва Украіне, Аляксандр Лукашэнка адзначыў: "Нават французы не прымусяць мяне гэта зрабіць. Няма ў тым неабходнасці".

У Кіраўніка дзяржавы спыталі, ці не аддала Беларусь свой суверэнітэт у сувязі з размяшчэннем у краіне расійскіх войскаў і зброі.

"Я мог бы ў вас спытаць, а які суверэнітэт я некаму аддаў? Каму я аддаў частку суверэнітэту, каб застацца на чале ўлады? Я застаўся на чале ўлады дзякуючы свайму народу. У тым ліку дзякуючы беларускім журналістам, якія тут знаходзяцца. Яны - прапагандысты і агітатары ўсяго лепшага, што ў нас ёсць у краіне. Толькі дзякуючы гэтаму я знаходжуся на чале ўлады", - сказаў Прэзідэнт.

"Таму ніякага суверэнітэту мы нікому не аддавалі. Суверэнітэт - гэта ўлада ў межах граніц пэўнай дзяржавы. Хто, акрамя нашых уладных структур і ў тым ліку Прэзідэнта Беларусі, тут ажыццяўляе ўладу?" - задаў рытарычнае пытанне Аляксандр Лукашэнка.

Кіраўніку дзяржавы было зададзена пытанне наконт яго прапановы па спалучэнні інтэграцыйных фарматаў ЕАЭС, БРІКС і ШАС, а таксама што трэба рабіць, каб і СНД стала адной з апор шматпалярнага свету.

"Уся наша бяда ў тым, што мы калі ідзём, то вельмі нясмела. Я таксама пра гэта гаварыў", - адзначыў Кіраўнік дзяржавы.

Ён нагадаў, што нядаўна на канферэнцыі ў Маскве сказаў у адрас Прэзідэнта Расіі Уладзіміра Пуціна, што Расіі трэба больш актыўна дэманстраваць сябе. І хоць постсавецкую прастору і розную, але яе яшчэ можна кансалідаваць.

"Расія - гэта будучыня планеты. Усе рэсурсы тут", - падкрэсліў Прэзідэнт.

Ён адзначыў, што ў краіне ёсць многія прарыўныя тэхналогіі ў розных сферах, а па многіх напрамках ёсць кампетэнцыі і ў Беларусі. "Нам (удзельнікам інтэграцыйных аб'яднанняў. - Заўвага) трэба варушыцца ў плане аб'яднання. Калі нас расцягнуць - паасобку разбяруцца. Беларусь і Расія гэта зразумелі", - адзначыў Кіраўнік дзяржавы.

Ён таксама падкрэсліў, што заўсёды выступаў за шматпалярнае светаўладкаванне.

У час сустрэчы Аляксандр Лукашэнка выказаўся пра сваё прэзідэнцтва і адказаў на пытанне пра ўспрыманне таго, што яго называлі "апошні дыктатар Еўропы".

"Калі вы думаеце, што, знаходзячыся на чале гэтай улады, я нешта празмернае атрымаў, і ці атрымаў наогул, вы памыляецеся. Нічога падобнага. Я працую на вялікай, высокай пасадзе, якую мне даверыў народ. Працую. А не ўладару", - сказаў Кіраўнік дзяржавы.

"Не я ж вырашаю, быць мне на чале ўлады ці не", - падкрэсліў беларускі лідар, гаворачы аб трох дзесяцігоддзях ля руля краіны.

Адказваючы на пытанне пра лёс Беларусі пасля яго прэзідэнцтва, Аляксандр Лукашэнка сказаў: "Які будзе лёс маёй Беларусі, я спадзяюся, мы з вамі ўбачым". Кіраўнік дзяржавы запэўніў, што, якую б ролю ён не выконваў, ён "будзе рабіць усё, каб у Беларусі быў свой лёс".

"Я задумваюся аб тым, што будзе далей, што будзе пасля мяне. Але калі я буду жывы пасля прэзідэнцкага тэрміну, я буду ісці гэтым шляхам і змагацца за суверэнную і незалежную Беларусь", - запэўніў ён.

"Што датычыцца апошняга дыктатара Еўропы, вы павінны папрасіць прабачэння ў мяне. Вы ўжо адышлі ад гэтага азначэння. Ніякі я не дыктатар, а калі і дыктатар, то не апошні", - дадаў беларускі лідар.

Аляксандр Лукашэнка на сустрэчы з журналістамі адказаў на пытанне пра ўдзел у прэзідэнцкіх выбарах у 2025 годзе.

"Я пакуль яшчэ аб прэзідэнцкіх выбарах нават не задумваўся. Сумленна. І не планаваў. Толькі ў плане разваг: а што будзе пасля мяне? Толькі ў гэтым ключы. А так я абсалютна нічога не планаваў", - сказаў Аляксандр Лукашэнка.

Што датычыцца прэзідэнцкіх выбараў у Расіі, якія павінны адбыцца ў 2024 годзе, Кіраўнік дзяржавы расказаў, што не абмяркоўваў гэта пытанне са сваім расійскім калегам Уладзімірам Пуціным. "Ды мяне гэта і не цікавіць. Чаго я буду чалавеку ў душу лезці. Калі ён прыме рашэнне, ён мне скажа аб гэтым. Пакуль не гаварыў", - адзначыў Прэзідэнт.

У той жа час Аляксандр Лукашэнка звярнуў увагу, што цяпер, паводле сацыялагічных даследаванняў, ва Уладзіміра Пуціна высокая падтрымка сярод насельніцтва.

На сустрэчы з прадстаўнікамі СМІ Прэзідэнт адказаў на пытанне аб сітуацыі вакол Кіева-Пячэрскай лаўры і падкрэсліў, што ніводны манах адтуль без увагі ў Беларусі не застанецца.

"Гэтыя людзі ні ў чым не вінаватыя. Навошта яшчэ іх крыўдзіць? Таму мы ўсё зробім для таго, каб манахі з гэтай лаўры знайшлі свой прытулак у Беларусі, калі на тое будзе воля Госпада і жаданне гэтых людзей", - запэўніў Аляксандр Лукашэнка.

Прэзідэнт заявіў, што не разумее, навошта ўкраінскія ўлады прыгнятаюць гэтых людзей. Паводле яго слоў, гэта мэтанакіраванае нагнятанне абстаноўкі. "Чапляюць за жывое. А калі б гэта з мусульманамі было? Ужо, напэўна, канфлікт разгарэўся б яшчэ больш моцны, чым спецыяльная ваенная аперацыя. Гэта сведчыць аб тым, што ніякага міру яны не хочуць. Яны ўвесь час - у дробязях, у значным, ідэалагічна, фінансава, на полі бою - ідуць на канфрантацыю. І гэта дрэнна, - падкрэсліў Кіраўнік дзяржавы. - Гэта жудаснае непаразуменне, мякка кажучы. Навошта гэта трэба ўкраінскім уладам, я дагэтуль не магу зразумець. Куча праблем, навошта яшчэ тут ускладняць і канфрантацыю весці? Але тое, што мы можам не кінуць у бядзе гэтых гаротнікаў, гэта праўда. Мы знойдзем ім месца ў Беларусі".

Аляксандру Лукашэнку было зададзена пытанне, ці магчыма такое развіццё падзей з улікам нарастання процістаяння карэнных еўрапейцаў і выхадцаў з іншых краін, у тым ліку мусульманскіх, - спаленне Карана ў Швецыі, беспарадкі ў Францыі, узрастанне негатыву, які прадуцыруюць еўрапейскія бюракраты ў Германіі.

"Я не выключаю. Але не хацеў бы, каб гэта грамадзянская вайна была ў Еўропе. Таму што для нас гэта небяспечна не настолькі, вядома, як разгарнулася б процістаянне ў Расіі. Аднак небяспечна. Мы - цэнтр Еўропы. Таму не дай бог за агароджай недзе нешта ўспыхне. Ну вось як ва Украіне. І што, нам добра ад гэтага? Нам вельмі дрэнна, - сказаў Прэзідэнт. - Таму я не хацеў бы. Але яны (у Еўрасаюзе. - Заўвага) урачыстым маршам ідуць да гэтага грамадзянскага процістаяння. І нават больш, чым у Францыі. У Францыі ўжо даўно можна было б усё гэта пагасіць, калі б не ўпартасць нейкая ўлад. Калі вінаватыя, з людзьмі трэба размаўляць. А там віна ёсць і ўлад".

Выпады адносна мусульман Аляксандр Лукашэнка назваў бязглуздымі і неразумнымі. "Навошта гэта рабіць? І тым больш пры заступніцтве фактычна ўлад. Што, шведскія ўлады не маглі гэта спыніць? Маглі. Але яны сказалі, што гэта законна. Таму не трэба на роўным месцы ствараць праблемы, якія могуць стаць прычынай будучай грамадзянскай вайны", - заўважыў Кіраўнік дзяржавы.

Напрыканцы Аляксандр Лукашэнка адказаў на пытанне, ці збіраецца ехаць у верасні на саміт у ААН па мэтах устойлівага развіцця.

"Пакуль не адмяняю гэта мерапрыемства. Пакуль. Будзе вядома задоўга да таго як. Параімся са старэйшым братам. Калі ён не паедзе, ну, чаго мне без яго туды ехаць", - сказаў Кіраўнік дзяржавы.