Сустрэча са Старшынёй ЦВК Ігарам Карпенкам

Прэзідэнт Беларусі Аляксандр Лукашэнка на сустрэчы са Старшынёй ЦВК Ігарам Карпенкам 19 чэрвеня абмеркаваў падрыхтоўку да электаральнай кампаніі 2024 года.

"Мы ўжо напярэдадні выбараў. Навізны вельмі шмат. Асабліва ў плане Усебеларускага народнага сходу. Размова ідзе пра выбары ў парламент і пра адпаведны Указ Прэзідэнта. Я азнаёміўся з матэрыяламі, якія Вы прадставілі. Няма адхілення ні па адным з пытанняў. Тым больш аб выданні Указа. Я даручу сёння Адміністрацыі Прэзідэнта, каб вы разам селі, прапрацавалі, выпрацавалі разам (і Урад падключылі) аптымальныя тэрміны прыняцця гэтага Указа", - заявіў Кіраўнік дзяржавы.

"Думаю, ваша прапанова ў гэтым плане разумная. Не вы ж адны яго прыдумалі. А выпакутавалі, напэўна, перш чым уносіць прапанову. Таму пытанне выдання Указа аб выбарах - гэта пытанне, лічыце, вырашанае", - заявіў Аляксандр Лукашэнка.

"Работа (па падрыхтоўцы да правядзення выбараў. - Заўвага) планамерна вядзецца, - сказаў у сваю чаргу Ігар Карпенка. - Фактычна яшчэ да выдання Указа мы пачынаем шэраг дэмакратычных працэдур, якія прадугледжаны нашым законам, Выбарчым кодэксам. Да 1 верасня мы павінны будзем устанавіць колькасць выбаршчыкаў і колькасць саветаў дэпутатаў, якія будуць выбірацца. Да 1 кастрычніка мы павінны будзем вызначыць межы акруг па выбарах дэпутатаў Палаты прадстаўнікоў. Усяго іх будзе 110, як і раней".

Яшчэ адно пытанне, якое абмяркоўвалася на рабочай сустрэчы ў Кіраўніка дзяржавы, датычыцца ўзаемадзеяння з дзяржаўнымі органамі пры падрыхтоўцы і правядзенні электаральнай кампаніі.

"Вы вельмі правільна прапануеце. Нічога не трэба адкідваць. У нас ёсць вялікі вопыт і практыка правядзення выбараў у плане задзейнічання органаў улады, іншых дзяржаўных органаў. Усё ў вашым распараджэнні. Вы адказваеце за арганізацыю. А ўсе дзяржаўныя органы і структуры, і я ў тым ліку, мы будзем Вам дапамагаць ажыццявіць той план, які мы ўзгаднілі ўсе разам", - сказаў беларускі лідар. 

"Адзіны дзень галасавання - таксама навізна. Мы выбіраем усе саветы па вертыкалі. Таму работы будзе дастаткова. Не спяшаючыся, спакойна мы правядзём гэту работу", - упэўнены Прэзідэнт.

"Што датычыцца інфармацыйнага забеспячэння, таксама вопыт вельмі вялікі. Але і новага вельмі шмат. Трэба выкарыстоўваць і інтэрнэт, і стварэнне новага кантэнту, як Вы прапануеце. Гэта таксама трэба рабіць, каб людзям было зручна", - сказаў Аляксандр Лукашэнка.

Паводле яго слоў, гэтай работай трэба займацца, пачынаючы ад запрашэння выбаршчыкаў, у тым ліку рассылкі SMS-паведамленняў.

Кіраўнік дзяржавы закрануў пытанне запрашэння наглядальнікаў на маючыя адбыцца ў 2024 годзе выбары. "Суб'екты, якія запрашаюць наглядальнікаў, вызначаны законамі. Нам хаваць няма чаго. У патрэбны час, калі падыдзе тэрмін, калі мы палічым патрэбным, мы запросім наглядальнікаў. Каб яны бачылі, як будуць праходзіць выбары. Каб нас не папракалі, што мы праводзім выбары, як у Амерыцы там. І страляюць у людзей пасля выбараў, і па пошце выбары праводзяць і гэтак далей. І фальсіфікацый шмат. Гэта ўжо сёння відаць. Мы павінны сумленна правесці гэтыя выбары", - сказаў Прэзідэнт.

Аляксандр Лукашэнка падкрэсліў, што хавацца няма чаго. "Амаль 80% адназначна сёння падтрымліваюць той курс, які мы вызначылі. Нам чаго баяцца? Ну, за 20%, якія вагаюцца і якія супраць, мы яшчэ пазмагаемся. Гэта я гавару як Прэзідэнт", - адзначыў Кіраўнік дзяржавы.

Асобна ён звярнуў увагу на такую навелу, як фарміраванне Усебеларускага народнага сходу.

"Закладваем пэўны фундамент у гэтай справе. Напрацоўваем вопыт. Трэба вельмі ўважліва да гэтага паставіцца. Вельмі шмат у Канстытуцыі і ў законах вызначана: колькасць, як выбіраць, ад каго выбіраць і гэтак далей. Спрэчак тут няма. Таксама трэба адкрыта і сумленна правесці выбары у склад Усебеларускага народнага сходу, - сказаў Прэзідэнт. - Там будуць розныя людзі. Там, я ўпэўнены, будуць розныя пункты гледжання. Адзінае, што ворагаў там не будзе. Але нам не патрэбны ворагі. І нашаму грамадству ў тым ліку. А пункты гледжання павінны быць рознымі, каб мы правільна прымалі рашэнне".

Рэзюмуючы, Аляксандр Лукашэнка сказаў: "Азнаёміўшыся з Вашым пісьмовым дакладам і прапановамі я, напрыклад, не бачу якіх-небудзь іншых падыходаў. Трэба цяпер пачынаць гэту работу".