Сустрэча з намеснікам Дзяржаўнага сакратара Саюзнай дзяржавы Сяргеем Глазьевым

Прэзідэнт Беларусі Аляксандр Лукашэнка 17 красавіка правёў сустрэчу з намеснікам Дзяржаўнага сакратара Саюзнай дзяржавы Сяргеем Глазьевым.

"Вы дакладна ведаеце тэму нашай размовы", - пачаў сустрэчу Кіраўнік дзяржавы.

"Я даўно думаў аб тым, што наш рух да саюза, вельмі цеснага саюза паміж Беларуссю і Расіяй, павінен грунтавацца перш за ўсё на эканоміцы, - прадоўжыў Прэзідэнт. - Вы эканаміст, я лічу, ад бога. Многае ў вас (ёсць у плане прафесійных навыкаў і вопыту. - Заўвага) насуперак тым, хто думае інакш у нас ці асабліва ў Расійскай Федэрацыі".

Кіраўнік дзяржавы расказаў аб рашэнні лідараў дзвюх краін, каб Сяргей Глазьеў змяніў Дзмітрыя Мезенцава на пасадзе Дзяржаўнага сакратара Саюзнай дзяржавы. "Мы дамовіліся з Уладзімірам Уладзіміравічам Пуціным, што Ваш уклад у будаўніцтва Саюзнай дзяржавы павінен быць важкім. Ён добрага меркавання пра Вас. Маё меркаванне Вы даўно ведаеце. Таму мы вызначыліся. У сувязі з тым, што заканчваецца тэрмін знаходжання на гэтай пасадзе Дзмітрыя Мезенцава і ён ідзе на іншую працу, - сказаў Аляксандр Лукашэнка. - Мы прынялі такое рашэнне аб назначэнні Вас кіраўніком і маторам нашай саюзнай інтэграцыі ў плане кіраўніцтва ўсім апаратам СД. Думаю, што эфект будзе добры".

Такога ж меркавання, паводле слоў Аляксандра Лукашэнкі, прытрымліваецца і Кіраўнік Адміністрацыі Прэзідэнта Беларусі Дзмітрый Крутой, які да назначэння на гэту пасаду быў паслом Беларусі ў Расіі. "Паколькі ён служыў да нядаўняга часу паслом у Расійскай Федэрацыі, за гэты час вельмі добра асвоіў асноўныя напрамкі нашай дзейнасці. Ён прытрымліваецца такога ж меркавання".

Прэзідэнт звярнуў увагу, што мае намер яшчэ неаднаразова перагаварыць з Сяргеем Глазьевым у будучым наконт развіцця саюзнага будаўніцтва. "Думаю, мы яшчэ не адзін раз сустрэнемся, і Вы мяне як Старшыню Вышэйшага дзяржсавета азнаёміце са сваім бачаннем, са сваімі прапановамі, - сказаў ён. - Гэта такая першапачатковая размова. І мы з Вамі сустрэнемся і грунтоўна яшчэ пагаворым, як нам дзейнічаць. Я на Вас вельмі разлічваю. Што там граху таіць, ад Вас будзе многае залежаць і ад тых людзей, якія будуць з Вамі працаваць у апараце нашага саюзнага будаўніцтва".

Як адзначыў беларускі лідар, Прэзідэнт Расіі Уладзімір Пуцін таксама нацэлены на тое, каб краіны "падтрымлівалі самыя цесныя адносіны". "Гэта формула "адзіная Айчына - дзве дзяржавы", я думаю, на сённяшні дзень - гэта рэалізуемая ідэя, - заявіў Аляксандр Лукашэнка. - У нас Айчына ад Брэста да Уладзівастока, я гэта падкрэсліваю яшчэ з тых часоў".

"Так здарылася, што ў нас дзве дзяржавы існуюць. Будзем выбудоўваць адносіны. Я часта гавару: мы даволі разумныя людзі, каб выбудаваць адзіную сістэму ўзаемадзеяння, пабудаваць нашы адносіны нават больш цесна, чым ва ўнітарнай дзяржаве. Можа, вельмі амбіцыйна, але, тым не менш, мы гэту задачу павінны вырашыць. У адваротным выпадку (Вы бачыце, што адбываецца вакол нас) нам не быць і не існаваць", - падкрэсліў Прэзідэнт.

Сяргей Глазьеў у час сустрэчы запэўніў беларускага лідара, што прыкладзе ўсе намаганні, каб ідэі, закладзеныя ў аснову стварэння Саюзнай дзяржавы, развіваліся па апошнім слове эканамічнай навукі. Сярод такіх Сяргей Глазьеў абазначыў роўныя ўмовы гаспадарання, роўныя правы грамадзян, агульныя механізмы развіцця, пашырэнне кааперацыі, стварэнне канкурэнтаздольнай эканомікі, якая магла б развівацца апераджальнымі тэмпамі.

"Усё будзе зроблена па апошнім слове эканамічнай навукі", - сказаў намеснік Дзяржсакратара Саюзнай дзяржавы.

Аляксандр Лукашэнка заўважыў, што ў час адной з размоў з Уладзімірам Пуціным лідары Беларусі і Расіі сышліся на думцы, што Сяргей Глазьеў са сваімі ідэямі быў ля вытокаў стварэння Саюзнай дзяржавы. "Нам вельмі важна, што Вы не проста памятаеце, а можна сказаць, былі побач з гэтымі ідэямі. Магчыма, недзе некаму і падказвалі, як трэба дзейнічаць", - падкрэсліў Кіраўнік беларускай дзяржавы.