Сустрэча з дзяржаўным міністрам, міністрам замежных спраў, па справах нацыянальных абшчын за мяжой і афрыканскіх спраў Алжыра Ахмедам Атафам
- 8
- 2:51
Прэзідэнт Беларусі Аляксандр Лукашэнка 6 жніўня сустрэўся з дзяржаўным міністрам, міністрам замежных спраў, па справах нацыянальных абшчын за мяжой і афрыканскіх спраў Алжыра Ахмедам Атафам.
Кіраўнік дзяржавы адзначыў, што застаўся пад уражаннем ад сустрэчы з Прэзідэнтам Алжыра Абдэльмаджыдам Тэбунам, якая адбылася ў канцы мінулага года. Тады лідары дзвюх краін вызначылі канкрэтныя праекты, якія могуць ажыццявіць Мінск і Алжыр. Прэзідэнт Беларусі падзяліўся галоўнай высновай па выніках гэтых перагавораў.
"Мы з Алжырам можам дамовіцца аб рэалізацыі многіх праектаў. Асновай гэтага майго пераканання з'яўляецца тое, што мы ўмеем рабіць абсалютна ўсё, што сёння (а, можа, і заўтра) неабходна Алжыру, - падкрэсліў Аляксандр Лукашэнка. - Хацелася б, каб гэтыя праекты атрымалі большае паскарэнне".
"Калі мы рушым наперад у гэтым плане і дасягнём дамоўленасцей па канкрэтных праектах, гэта, па-першае, паслужыць фундаментам для нашых далейшых адносін. Па-другое, гэта адкрые новыя магчымасці ва ўзаемадзеянні паміж Беларуссю і Алжырам ужо сёння. Вось прыкладная філасофія нашых адносін, якую бачу я", - перакананы беларускі лідар.
Вітаючы Кіраўніка беларускай дзяржавы, замежны госць падзякаваў за магчымасць сустрэчы і расказаў пра асаблівую місію, давераную яму Прэзідэнтам Алжыра.
"Ваш сябар, мой Прэзідэнт Абдэльмаджыд Тэбун упаўнаважыў мяне данесці да вашага ведама тры пасланні. Першае - пацвярджэнне глыбокай дружбы і высокай ацэнкі вашай дзейнасці, спадар Прэзідэнт. Другое - яго гатоўнасць і прыхільнасць працаваць з вамі плячо ў плячо, каб павысіць узровень двухбаковых адносін. Трэцяе - высокая ацэнка інтэнсіўнай дынамікі двухбаковых адносін, якая назіраецца пасля сустрэчы лідараў дзвюх краін у снежні 2025 года ў Алжыры", - сказаў Ахмед Атаф.
Паводле яго слоў, вядзецца работа над арганізацыяй візіту Абдэльмаджыда Тэбуна ў Беларусь. "Прэзідэнт Алжыра будзе актыўна працаваць над выкананнем раней дасягнутай дамоўленасці аб наведванні Беларусі ў бліжэйшы час", - падкрэсліў кіраўнік МЗС Алжыра.
