Зацвярджэнне рашэння на ахову Дзяржаўнай граніцы органамі пагранічнай службы ў 2025 годзе

Прэзідэнт Беларусі Аляксандр Лукашэнка 30 студзеня зацвердзіў рашэнне на ахову Дзяржаўнай граніцы ў 2025 годзе.

"Традыцыйна ў пачатку года, як гэта ў нас прынята, мы чарговы раз зацвярджаем рашэнне на ахову Дзяржаўнай граніцы. Сённяшняе рашэнне - гэта не проста лінія Дзяржаўнай граніцы на зямлі, вадзе і ў паветры. Гэта вельмі сур'ёзнае рашэнне па абароне суверэнітэту і абароне нашай дзяржавы", - падкрэсліў Аляксандр Лукашэнка.

Прэзідэнт заўважыў, што ў абароне беларускіх рубяжоў у шырокім сэнсе задзейнічаны ўсе сілавыя структуры ад міліцыі да ваенных, паколькі забяспечыць ахову больш як 3,6 тыс. км аднымі пагранічнымі войскамі складана.

"Скажу адкрыта. Нараўне з абаронай Дзяржаўнай граніцы з боку пагранічных войскаў найважнейшым пытаннем з'яўляецца тое, каб яны нас своечасова папярэдзілі аб пагрозах. Іншыя ведамствы таксама займаюцца гэтым, але перш за ўсё гэта задача нашых пагранічнікаў - папярэдзіць аб магчымых пагрозах нашай бяспецы. Тады, адмабілізаваўшы ўсе сілы, якія ёсць у краіне (ад міліцыі да арміі, Міністэрства абароны), мы зможам процістаяць праціўніку", - заявіў Кіраўнік дзяржавы.

"Сітуацыя на рубяжах няпростая, мы пра гэта пастаянна гаварылі і гаворым. Работы сёння хапае не толькі пагранічнікам, але і мытнікам, асабліва на прапускных пунктах. Чэргі з аднаго і з другога боку вялізныя, гэта дадатковая нагрузка на нашых пагранічнікаў", - сказаў Аляксандр Лукашэнка.

Прэзідэнт дадаў, што не па чутках ведае, што такое пункты пропуску і зялёная граніца, як ахоўваюць рубяжы. "Гэта ўсё няпроста. Таму давайце абмяркуем асноўныя моманты аховы Дзяржаўнай граніцы, асноўныя элементы. І калі мы прыйдзем да поўнага ўзаемаразумення і згоды з прапанаваным варыянтам пагранічнымі войскамі, мы зацвердзім рашэнне на ахову Дзяржаўнай граніцы", - падкрэсліў беларускі лідар.

Кіраўнік дзяржавы пацікавіўся, як складваецца сітуацыя ў прыграніччы і непасрэдна на граніцы, якія пытанні неабходна вырашыць.

Як адзначыў Старшыня Дзяржпагранкамітэта Канстанцін Моластаў, органы пагранічнай службы пастаянна праводзяць мерапрыемствы па павышэнні эфектыўнасці аховы граніцы, нарошчванні інжынернай інфраструктуры, аснашчэнні ўзбраеннем і тэхнікай, удасканаленні баявой падрыхтоўкі. Па дзяржаўнай праграме "Пагранічная бяспека на 2021-2025 гады" абсталяваны рубяжы аховы і аўтаматызаваныя пасты тэхнічнага назірання, разгорнуты сігналізацыйныя сістэмы, устаноўлены датчыкі, якія хутка разгортваюцца.

Акрамя таго, пачата стварэнне высокатэхналагічнага падраздзялення на польскім участку граніцы на базе пагранічнай заставы імя Героя Савецкага Саюза лейтэнанта Андрэя Кіжаватава Брэсцкай пагранічнай групы. Гэта закладзена ў адпаведнай праграме Саюзнай дзяржавы. Фарміраванне такога падраздзялення дасць магчымасць значна павысіць надзейнасць аховы і перайсці ад патрулявання ўчастка да рэагавання на развіццё абстаноўкі ў рэжыме рэальнага часу, а таксама аптымізаваць штатную структуру.

"Для павышэння эфектыўнасці прымянення ў ахове рубяжоў пілатуемай і беспілотнай авіяцыі праведзена рэарганізацыя авіяцыйных падраздзяленняў, што забяспечвае цэнтралізаванае прымяненне аўтажыраў, іх тэхнічнае абслугоўванне і забеспячэнне. У падраздзяленнях граніцы ўведзены пасады аператараў беспілотных лятальных апаратаў", - праінфармавалі ў ДПК.