Удзел у маладзёжным форуме "Моладзь. Беларусь. Будучыня"

Адзінства беларускага народа роўнае незалежнасці дзяржавы. Аб гэтым Прэзідэнт Беларусі Аляксандр Лукашэнка заявіў 17 верасня ў сваім выступленні на маладзёжным форуме "Моладзь. Беларусь. Будучыня", прысвечаным Дню народнага адзінства.

Кіраўнік дзяржавы адзначыў, што шчыра рады бачыць удзельнікаў і гасцей форуму - маладых, яркіх, поўных энергіі. "Вы - галоўныя дзеючыя асобы нашага мерапрыемства і свята ў цэлым. І менавіта з вамі я хацеў бы пагаварыць аб даце, важнейшай у нашай гісторыі", - звярнуўся да іх Аляксандр Лукашэнка.

"Вы, напэўна, часта чулі аб тым, што Беларусь знаходзіцца на важным напрамку ў Еўразіі. І геаграфічным, і геапалітычным", - адзначыў Кіраўнік дзяржавы.

Паводле яго слоў, прынята лічыць, што гэта найвялікшая выгада для беларускага народа. "Напэўна, так. Калі мець галаву на плячах і разумна гэтым распарадзіцца, напэўна, гэта будзе вялікая выгада. Але чаму вучыць нас гісторыя? Яна вучыць галоўнай філасофскай выснове: аднабаковага разумення працэсу быць ніколі не павінна. Ёсць нешта станоўчае, абавязкова з другога боку - адмоўнае. Гледзячы ў гісторыю, ад гэтага выгаднага становішча мы вельмі шмат страцілі беларусаў і жыхароў гэтага кавалачка зямлі", - сказаў Прэзідэнт.

З такіх трагічных для краіны гістарычных эпізодаў Аляксандр Лукашэнка нагадаў толькі аб некалькіх адносна нядаўніх і найбольш значных. "Напалеон ірваўся на Усход, туды прайшоў праз Беларусь і назад, 1812 год. З буйных падзей - Першая сусветная вайна, 1914 год, і да 1920-х, да тых злашчасных рыжскіх перагавораў у 1921 годзе (калі была падзелена Беларусь. - Заўвага). Тэатр ваенных дзеянняў у асноўным быў тут, у Беларусі. І страшная вайна - Вялікая Айчынная, 1941-1945 гады. Тэатр ваенных дзеянняў дзе? У Беларусі", - адзначыў Прэзідэнт.

"Вось цяпер і мяркуйце: наша геапалітычнае і геаграфічнае становішча - яно выгаднае ці не", - сказаў Кіраўнік дзяржавы.

Ён нагадаў аб прымусовым падзеле Беларусі ў 1921 годзе і ўз'яднанні краіны, якое адбылося праз час. "Наша тагачасная армія (мы знаходзіліся ў складзе Расійскай імперыі) пацярпела поўнае паражэнне восенню 1920 года ў Польшчы. Мы прайгралі гэту вайну. Палякі аказаліся наверсе пры дапамозе, зразумела, усіх заходніх дзяржаў (гэта таксама ўрок)", - сказаў Аляксандр Лукашэнка. 

Прэзідэнт заўважыў, што палітыкам тады хапіла розуму, каб дамовіцца і заключыць у 1921 годзе Рыжскі дагавор. Праўда, для Беларусі гэта ўсё роўна мела сумныя наступствы. "Палову Беларусі, амаль 3,5 млн (з насельніцтвам амаль 3,5 млн чалавек. - Заўвага) адрэзалі і аддалі. Нам заўсёды гаварылі, што трэба было выратаваць краіну, таму ахвяравалі Заходняй Беларуссю і заходняй часткай Украіны. Проста аддалі палякам", - канстатаваў ён.

Кіраўнік дзяржавы звярнуў увагу, што пры падпісанні Рыжскага дагавора і прыняцці рашэння аб падзеле меркаванне Беларусі не ўлічвалася. 

"Без нас гэта вырашылі. Я лічу, гэта вельмі грубая памылка савецкага Урада, - падкрэсліў Аляксандр Лукашэнка. - Факт застаецца фактам: без нас вырашылі ў 1921-м наш лёс і частка Беларусі, амаль палова (самае развітое, перадавое, калі браць землі, лясы і іншае, што з'яўляецца галоўным нашым багаццем) аказалася там (у складзе Польшчы. - Заўвага)".

"У 1939 годзе без усялякіх войнаў Чырвоная Армія вызваліла Заходнюю Беларусь, Заходнюю Украіну", - сказаў Прэзідэнт. Такім чынам, паводле яго слоў, было вернута тое, што ў свой час, пры Уладзіміру Ільічу Леніне, было аддадзена Захаду. 

"Мы вярнулі сваё. Я гэта падкрэсліваю і гавару таму, што апошнім часам у Польшчы разгарнулася кампанія: "Сталін сволач, такі-сякі, там улада была ненармальная, яны дамовіліся з фашысцкай Германіяй, з Гітлерам і падзялілі Польшчу". Мы нічога не дзялілі. Савецкія войскі вярнулі тое, што належала беларусам і той велізарнай краіне, у якой мы жылі. Мы гэта вярнулі, - падкрэсліў Аляксандр Лукашэнка. - Вось якая сітуацыя тады складвалася, калі аб'ектыўна, і так, як мы сёння гэта разумеем". 

"Мы польскія землі не захоплівалі. А калі немцы і фашысты іх тады акупіравалі (у перыяд Другой сусветнай вайны. - Заўвага), дык вы ім выставіце прэтэнзіі сёння. Палякі ўсім цяпер выстаўляюць прэтэнзіі, у тым ліку і Германіі. Патрабуюць яшчэ адной хвалі рэпарацый. Ну дай бог", - сказаў Прэзідэнт. 

Кіраўнік дзяржавы таксама заўважыў, што ў 1939 годзе, у перыяд аб'яднання, Беларусь была адноўлена не ў тых граніцах, якія існавалі раней. "Так склаліся акалічнасці. І мы не прэтэндуем на кавалкі зямлі ў Смаленскай і яшчэ якой-небудзь вобласці. З другога боку, мы не прэтэндуем і не патрабуем Беласток, а яшчэ далей - Віленшчыну і гэтак далей і да таго падобнае, - адзначыў Аляксандр Лукашэнка. - Мы прызналі ў граніцах цяперашняй Беларусі, што гэта - наша зямля". 

"Формула, пакуль я на чале ўлады, адна: чужога нам не трэба, але і свайго мы не аддадзім", - падкрэсліў беларускі лідар.

У гэтым кантэксце Прэзідэнт зрабіў акцэнт на адзінстве як найважнейшым элеменце для захавання суверэнітэту і незалежнасці. "Адзінства беларускага народа роўнае незалежнасці нашай дзяржавы. Гэта элемент і паказчык нашай незалежнасці. Адзінства - гэта наша незалежнасць", - падкрэсліў беларускі лідар. 

Цяперашняе свята - Дзень народнага адзінства - якраз служыць гэтай мэце, таму Кіраўнік дзяржавы надае яму вялікае значэнне і чакае таго ж ад моладзі, за якой будучыня краіны. 

"Вы будзеце гаварыць аб гэтым свяце сваім дзецям, унукам, будзеце святкаваць, ушаноўваць, калі хочаце быць незалежнымі. Калі хочаце, каб да вашага слова ў будучым прыслухоўваліся", - сказаў Аляксандр Лукашэнка.

"Мы адзначаем Дзень народнага адзінства. Дзень уз'яднання беларускага народа ў адной дзяржаве, дзень вяртання мільёнаў беларусаў у сваю сям'ю, у сваю Айчыну. Сапраўды лёсавызначальная падзея. 17 верасня - свята асаблівае. У першую чаргу для вас - маладых, актыўных, уключаных у грамадскае жыццё краіны. І гэта нагода пагаварыць пра будучыню, якая будуецца на ўроках і вопыце, на фундаменце мінулага. Пагаварыць пра вашу будучыню, - сказаў ён. - Выпадковых жа людзей тут няма. Хутчэй за ўсё (тут. - Заўвага) людзі з пэўнымі амбіцыямі (гэта добра - без амбіцый нічога не бывае), пэўнымі мэтамі, якія ўжо сябе паказалі ў гэтым жыцці".

"У нас краіна магчымасцей. Ціхая, спакойная, без вайны, дзякуй богу. Вам трэба гэта ўсё захаваць у будучым. Не зрабіць горш. На вашы плечы ляжа найцяжэйшы груз (цяжэйшы быць не можа, паверце мне) - адказваць за гэта адзінства, за беларускі народ, за зямлю, дзе мы сёння жывём спакойна", - сказаў Кіраўнік дзяржавы.

"Рыхтуйцеся да таго, каб узяць на сябе гэты цяжкі груз і адказваць за будучыню нашай краіны. У вас будуць дзеці, унукі, і вы будзеце, як і я, гаварыць, што ўсё вакол нас належыць не толькі і не столькі нам, колькі ім", - падкрэсліў Прэзідэнт.

У сувязі з гэтым Аляксандр Лукашэнка звярнуўся з наказам да гасцей і ўдзельнікаў форуму, у ліку якіх не толькі моладзь, але і людзі сярэдняга пакалення. "Прашу вас, ніколі не спяшайцеся. У жыцці трэба рабіць усё хутка, але не спяшаючыся. Ніколі не судзіце, гледзячы збоку. Думайце: "А што зрабіў бы я". Як я думаю, а што я зрабіў бы ў 1921 годзе, калі парэзалі Беларусь. Мая вам парада", - сказаў ён.

Гаворачы пра падзеі таго года, якія прывялі да падзелу Беларусі, Прэзідэнт падкрэсліў, што ўсходняя палова рэспублікі пачала строіць зусім новае жыццё. Роўнымі ў правах сталі ўсе савецкія грамадзяне - упершыню ў гісторыі. "А заходнія беларусы? Засталіся чужымі на сваёй зямлі, парабкамі вядомай дзяржавы, адарванымі ад Радзімы. Але, што важна, якія захавалі яе ў сваім сэрцы. Вядома, гэта нашы героі - героі, якія дастойна адказалі на выклік панскага парадку", - канстатаваў беларускі лідар. 

Аляксандр Лукашэнка звярнуў увагу, што на працягу 18 гадоў - з 1921 па 1939 год - на тэрыторыі Заходняй Беларусі праводзілася вельмі жорсткая практыка этнацыду. "Дастатковы тэрмін, каб прымусіць людзей забыць мову, традыцыі, гісторыю. Галоўнай задачай з боку тых, каму мы былі перададзены, было зламаць людзей духоўна, сцерці як асобу, ператварыць у маўклівых рабоў, якія і думаць не змаглі б пра адзінства і раўнапраўе. За гэты час там, у так званай польскай турме народаў, вырасла новае пакаленне. Але ніхто не забыў, ніхто не адрокся і не адарваўся ад каранёў", - сказаў ён. 

Прэзідэнт падкрэсліў, што і да гэтага часу ў Беларусі памятаюць пра падзеі тых гадоў. "Памятаем, што анексіраваныя Польшчай тэрыторыі былі вернуты ў склад Беларускай Савецкай Сацыялістычнай Рэспублікі. І як бы хто ні спрабаваў вам, маладым, праз навамодныя сацсеткі расказваць свае версіі падзей, мы павінны гаварыць праўду, не для ўсіх зручную, аб тым, што ў тыя гады ў нашых заходніх абласцях пад выглядам санацыі і пацыфікацыі праводзіліся карныя аперацыі. Што ваенна-палявыя суды выносілі прыгаворы актывістам і простым жыхарам, якія асмеліліся лічыць сябе беларусамі. Турмы былі перапоўнены тымі, хто хацеў гаварыць, вучыцца, маліцца на сваёй мове. Нашы людзі жылі ў пастаянным страху перад чарговым налётам польскай дэфензівы (палітычная паліцыя на акупіраваных тэрыторыях. - Заўвага)", - заявіў Аляксандр Лукашэнка.

Менавіта таму жыхары заходніх рэгіёнаў Беларусі з кветкамі сустракалі Чырвоную Армію як вызваліцеляў. "Падкрэслю: для беларусаў гэты паход не быў ваенным. Ён прайшоў як мірная сустрэча дзвюх частак аднаго народа. Гэты факт прызналі і некаторыя заходнія дзяржавы, у прыватнасці Францыя і Брытанія", - заявіў Прэзідэнт.

"Сёння ідзе бітва, перадзел свету адбываецца на нашых вачах. І нам трэба ў гэтай абстаноўцы выстаяць, абапіраючыся на нашых саюзнікаў. Але нас хочуць загнаць пад бізун. Не згушчаю фарбы. Мне гэта не трэба. Я вас проста папярэджваю, як будучых кіраўнікоў краіны, якім трэба забяспечыць суверэнітэт і незалежнасць", - заявіў беларускі лідар.

Кіраўнік дзяржавы адзначыў, што на Захадзе часам пішуць пра гісторыю Беларусі, яе ідэнтычнасць і прыроджанае пачуццё павагі да памешчыкаў. "Сутнасць іх навукі простая - зноў прымусіць беларусаў жыць пад бізуном і працаваць на пана. Я гэта ведаю лепш, чым вы, - заўважыў Аляксандр Лукашэнка. - Любыя мае перагаворы, сустрэчы, дыскусіі з заходнімі партнёрамі сведчаць аб гэтым".

Прэзідэнт пры гэтым адзначыў, што, напрыклад, прадстаўнікі ЗША, з якімі ён вядзе дыялог, прама не гавораць аб жаданні, каб Беларусь адышла ад Расіі. "Адарваць нас па жывым ад Расіі - гэта паспрабавалі ў 2020 годзе зрабіць. І калі б атрымалася, у нас было б тое, што цяпер адбываецца ва Украіне - багатай, магутнай, моцнай краіне. Паспрабавалі нас з вамі на зуб. Не атрымалася. Хацелася б (гэтага Захаду. - Заўвага). Але трэба аддаць належнае амерыканскай дэлегацыі: яны ніколі мне аб гэтым не сказалі, - сказаў Аляксандр Лукашэнка. - Але я ж разумею, што для Захаду гэта выгадна - па жывым разарваць адзінства. Таму я іх папярэдзіў у самым пачатку: Расійская Федэрацыя, Кітайская Народная Рэспубліка - дзве краіны выносім за дужкі, не абмяркоўваецца (у ходзе беларуска-амерыканскага дыялогу. - Заўвага). Калі вы (Захад. - Заўвага) увялі супраць нас санкцыі, яны адчынілі для нас дзверы. І шмат у чым дзякуючы гэтаму мы сёння жывём і працуем. Было сказана сумленна і прама. Але, яшчэ раз падкрэсліваю, амерыканцы ніколі, пакуль марылі аб гэтым, услых не гаварылі".

Паводле слоў Кіраўніка дзяржавы, пры гэтым не Беларусь з'яўляецца галоўнай мэтай, а багатыя рэсурсамі землі далей на ўсходзе: "Яны (праціўнікі на Захадзе. - Заўвага) гатовы яе чарговы раз растаптаць, парваць, кожнага трэцяга забіць, але прарвацца туды - на ўсход да тых рэсурсаў, якіх у іх не хапае. Ну каму сёння гэта не зразумела?"

Аляксандр Лукашэнка адзначыў, што ў пэўным сэнсе нават удзячны цяперашняй Адміністрацыі ў ЗША і Дональду Трампу за адкрытую заяву аб сваёй пазіцыі і сапраўдных мэтах. Напрыклад, што датычыцца сітуацыі з Венесуэлай. "Захапілі фактычна Венесуэлу. Венесуэльцы, цяперашняя краіна з усімі прэтэнзіямі амерыканцаў пагадзіліся. А галоўная "прэтэнзія" - карысныя выкапні. Там нафты нямерана. Практычна па запасах Венесуэла займае першае-другое месца ў свеце. Трамп прама гаворыць: там вялікія грошы", - сказаў Прэзідэнт.

Ён звярнуў увагу і на іншыя геапалітычныя сутыкненні з удзелам ЗША: "Ідзе фактычна эканамічная вайна паміж Кітаем і ЗША. Але Трамп разумее, што Кітай - гэта не Венесуэла. Разгарнуліся баталіі паміж ЗША і Канадай. Фактычна гандлёвая вайна. Амерыканцы мараць, каб гэта быў чарговы штат у складзе ЗША. А навошта? Таму што Канада багатая на рэсурсы. І аб гэтым адкрыта сказана. Потым Грэнландыя, Арктыка і гэтак далей, якія быццам яшчэ з'яўляюцца паўсвабоднымі. Амерыканцы кінулі туды свой позірк".

Згадаў Аляксандр Лукашэнка і пра атакі на Іран. "Ну навошта было ваяваць са спадчыннікамі персаў? Яны ніколі ні перад кім на каленях не стаялі. Што, у Амерыцы не ведаюць гэту гісторыю? Ведаюць. Гавораць, што калісьці там іранцы разграмілі пасольства ЗША, і вось ім адказ. Яны вырашылі пачаць вайну. Але прычына не ў гэтым. Прычына - багацце Ірана", - сказаў Прэзідэнт.

Гаворачы аб жаданні Захаду загнаць беларусаў пад бізун, Кіраўнік дзяржавы канстатаваў, што прыкладна так працуюць так званыя ўрад і офісы ў выгнанні. "За мінулае стагоддзе, асабліва апошнія 30 гадоў, іх у нас нямала назбіралася - гэтых офісаў з ліку збеглых у выгнанні, - звярнуў увагу Аляксандр Лукашэнка. - Князёў, магнатаў і іншых правіцеляў на розных кантынентах, якія да гэтага часу не разумеюць, што на нашай зямлі ёсць толькі адзін гаспадар - народ Беларусі. Абяцаю вам, што так і будзе".

"Да ўлады мяне прывёў народ насуперак усяму, што адбывалася. І ніколі не верце таму, што "Лукашэнка ўтрымлівае ўладу пасінелымі рукамі". Ды Гасподзь з тымі, хто гэта гаворыць. Я ўжо наеўся гэтай улады, што далей няма куды. Пытанне толькі ў тым, ці здольны вы сёння ўзяць краіну і ўтрымаць яе? Калі здольны - заўтра заступайце. Калі шчыра, станоўча адказаць на гэта пытанне я пакуль не магу", - дадаў Кіраўнік дзяржавы.

Прэзідэнт адзначыў, што з боку Захаду гучалі і прадаўжаюць гучаць у яго адрас абвінавачанні ў дыктатарстве. Ён упэўнены, што гэта звязана з шэрагам яго рашэнняў, прынятых яшчэ ў першыя гады прэзідэнцтва. Адно з іх - адмова ад "ліквідацыі лішкаў узбраенняў" па дагаворы з Захадам. Аляксандр Лукашэнка тады фактычна спыніў знішчэнне арміі, калі бранятэхніку рэзалі на часткі і вывозілі як металалом за мяжу. Акрамя таго, Прэзідэнт прызнаўся, што не падтрымліваў вывад з тэрыторыі Беларусі ядзернай зброі. Але ў выніку давялося гэта зрабіць у тым ліку пад націскам Барыса Ельцына, які ў тыя гады быў Прэзідэнтам Расіі. 

"Я тады стаў дыктатарам, таму што выступіў супраць усяго "цывілізаванага свету". Праўда, і цяпер на мяне ярлыкі прычэпліваюць у сувязі з будаўніцтвам атамнай станцыі, іншымі пытаннямі. У сувязі з тым, што мы армію рыхтуем да вайны, каб не было вайны. У сувязі з тым, што мы займаем пэўную пазіцыю па Украіне..." - падкрэсліў Аляксандр Лукашэнка.

Ён выказаў упэўненасць, што націск Захаду на Беларусь звязаны з тым, што беларусы ідуць шляхам захавання сваёй спадчыны - і ў духоўным, і ў культурным, і ў эканамічным вымярэннях. У сувязі з гэтым Прэзідэнт звярнуўся да заходніх "беларусазнаўцаў". "Асабліва да тых, хто да гэтага часу марыць адрадзіць імперскае мінулае Рэчы Паспалітай і робіць выгляд, што ў Беларусі ў гэты святочны дзень нічога не адбываецца, - заявіў Аляксандр Лукашэнка. - Некаторыя ў Польшчы ў цемнаце ходзяць у спальні і бачаць дух Пілсудскага (размова пра Прэзідэнта Польшчы Караля Наўроцкага, які раней заяўляў, што размаўляе з духам нябожчыка маршала Юзафа Пілсудскага. - Заўвага). Цытата кіраўніка Польшчы, калі нехта гэта прапусціў. Ніякіх Пілсудскіх у Беларусі не будзе. Пара аб гэтым забыць".

"Я разумею, што гэтымі людзьмі (гаворка пра заходніх "беларусазнаўцаў. - Заўвага) кіруюць фантомныя болі, ген нянавісці, а намі - энергія стварэння, - сказаў Аляксандр Лукашэнка. - Наша зямля не раз адраджалася з попелу. Нас не зламалі ні крывавыя паходы на ўсходніх славян, ні Першая сусветная і Вялікая Айчынная войны".

Прэзідэнт запэўніў, што беларусам чужога не трэба - ні зямлі, ні багаццяў, ні ідэй. "У нас ёсць прыгожая краіна, працавіты народ, багатыя традыцыі - і культурныя, і палітычныя. Сваю філасофію жыцця мы нікому не навязваем, але і імпартная філасофія тут не прыжывецца", - падкрэсліў ён.

"У гэты сімвалічна важны для нас дзень я хачу, каб у першую чаргу вы, наша моладзь, не толькі ўспомнілі хроніку падзей 17 верасня 1939 года, і не толькі іх. Для чаго мы ствараем традыцыі, абапіраючыся на лёсавызначальныя сюжэты сваёй гісторыі? Каб быць сабой. Не страціць сваю індывідуальнасць. Каб не збіцца са шляху, які пралажылі нашы папярэднікі, якія ў тым ліку трымалі ў руках і вось гэты чырвоны сцяг (устаноўлены на сцэне. - Заўвага). Сцяг, захаваны падпольшчыкамі Гродна і Беластока", - сказаў Кіраўнік дзяржавы. 

Гэты чырвоны сцяг канца 30-х - пачатку 40-х гадоў мінулага стагоддзя, як мяркуецца, удзельнічаў у вызваленчым паходзе Рабоча-сялянскай Чырвонай Арміі і пры правядзенні мясцовых народных сходаў на тэрыторыі Беластоцкага краю і цяперашняй Гродзенскай вобласці ў верасні 1939 года. Сцяг знойдзены і выратаваны ў гады Вялікай Айчыннай вайны падпольшчыкамі гарадоў Беластока і Гродна. 

"Ён стаў сімвалам уз'яднання беларусаў, ён перажыў Вялікую Айчынную вайну. І, каб вы разумелі, яго захавалі не ў музеі. А ў звычайнай сям'і, перадаючы з пакалення ў пакаленне. І ў гэтым уся праўда аб нашай гісторыі. Гісторыі народа, які ведае пра каштоўнасць адзінства", - падкрэсліў беларускі лідар.

Аляксандр Лукашэнка адзначыў, што моладзі гэта свята патрэбна, каб не забываць тых, хто ствараў летапіс Беларусі, захаваў культуру, традыцыі і веру, хто аб'ядноўваўся, устаючы ў цяжкія часы на іх абарону. 

"Што ні адбывалася б з намі ў розныя эпохі - беларусы былі, ёсць і будуць. Гэта наша гісторыя. Гісторыя народнага адзінства, - заявіў беларускі лідар. - Успамінаючы мінулае, мы плануем будучыню. Нашы планы добрыя. Мы хочам бачыць сваё заўтра мірным і шчаслівым. І для Беларусі, і для ўсіх частак свету". 

Кіраўнік дзяржавы павіншаваў усіх са святам, пажадаў шчасця, заклікаў берагчы родную зямлю і спрадвечныя каштоўнасці.