Разгляд кадравых пытанняў

Прэзідэнт Беларусі Аляксандр Лукашэнка 4 студзеня разгледзеў кадравыя пытанні.

Кіраўнік дзяржавы назначыў:

Чабатара Юрыя Адамавіча - Міністрам эканомікі,

Касько Міхаіла Міхайлавіча - Надзвычайным і Паўнамоцным Паслом Беларусі ў Індыі,

Ляўковіча Сяргея Віктаравіча - памочнікам Прэзідэнта Беларусі - інспектарам па Віцебскай вобласці,

Міколенка Таццяну Аляксандраўну - суддзёй Эканамічнага суда СНД,

Залатара Ігара Францавіча - начальнікам упраўлення матэрыяльна-тэхнічнага забеспячэння Аб'яднанага штаба АДКБ.

Прэзідэнт таксама даў згоду на назначэнне:

Ягорава Сяргея Валер'евіча - старшынёй Віцебскага райвыканкама,

Губко Паўла Валянцінавіча - старшынёй Маладзечанскага райвыканкама,

Бабовіча Сяргея Алегавіча - генеральным дырэктарам РУП "Беларуская атамная электрастанцыя",

Вярэніча Валерыя Емяльянавіча - Першым намеснікам Міністра транспарту і камунікацый,

Ядзевіча Віталя Уладзіміравіча - членам Магілёўскага аблвыканкама,

Зайцава Сяргея Міхайлавіча - начальнікам упраўлення праблем ваеннай бяспекі Сакратарыята АДКБ.

Назначаючы Юрыя Чабатара на пасаду Міністра эканомікі, Аляксандр Лукашэнка заявіў, што хацеў бы бачыць актыўную ролю міністэрства.

"Што датычыцца Міністэрства эканомікі, скажу шчыра, публічна: год у нас асаблівы. Таму будзем гаварыць усё сумленна і адкрыта, каб нас да чарговых прэзідэнцкіх выбараў праз год не папракалі, што мы там недзе круцілі-вярцелі, няпраўду гаварылі і наогул улада наша ні на што не вартая, як цяпер пачынаюць ужо гэта раскручваць. Таму гэты год будзе асаблівы. І ў аснове ўсяго, як я часта гавару, ляжыць эканоміка, - сказаў Кіраўнік дзяржавы. - Я хацеў бы бачыць актыўную ролю Міністэрства эканомікі. Вы прапануеце праекты планавання нашай эканомікі - тактычныя і стратэгічныя. Тактычныя - на год, стратэгічныя - на пяцігодку. На Усебеларускім народным сходзе вам часта давядзецца выступаць, абгрунтоўваючы тыя ці іншыя напрамкі дзейнасці ўлады ў цэлым і краіны на перспектыву. Таму вы да гэтага павінны быць гатовы".

"Лёгка не будзе. Будзе цяжка, асабліва ў гэтым годзе. Не таму, што цяперашні Прэзідэнт хоча быць і далей Прэзідэнтам. Не таму, што нехта нечага хоча. Мы проста людзям павінны яшчэ раз даказаць, што мы сумленна, шчыра працавалі гэтыя гады. Ну а калі атрымаецца - пераканаць людзей у тым, што лепшых за нас не будзе. Гавару адкрытым тэкстам у пачатку года. І міністэрства ваша павінна адыграць тут істотную ролю", - падкрэсліў беларускі лідар.

Аляксандр Лукашэнка адзначыў, што ва Урадзе Міністэрства эканомікі займае асаблівае месца. Ведамства плануе, кантралюе і шмат у чым накіроўвае эканамічнае развіццё краіны. "У гэтым плане я хацеў бы бачыць Міністэрства эканомікі. Скажу адкрыта, я яго заўважаў на працягу года нячаста, - канстатаваў Прэзідэнт. - Вы разумееце, што я не зусім задаволены работай Міністэрства эканомікі. І гэта незадаволенасць у тым ліку кладзецца і на вас. Вы - Першы намеснік Міністра эканомікі (гэту пасаду Юрый Чабатар займаў да цяперашняга назначэння на пасаду Міністра. - Заўвага). Але я вельмі спадзяюся, што сітуацыя зменіцца. Як Першы намеснік вы многае маглі, але не ўсё. Я гэта разумею".

Аляксандр Лукашэнка адзначыў, што пасля вывучэння ўсёй інфармацыі па кандыдатуры новага Міністра ён прыйшоў да высновы, што Юрый Чабатар можа арганізаваць работу Міністэрства эканомікі. “Прынамсі для гэтага ў вас ёсць усё. Але ў аснове вашай работы павінна ляжаць выключна праўда. Ніякага прыхарошвання. Рана ці позна я гэта заўважу. У мяне дастаткова для гэтага рычагоў. Таму ні ў якім разе не хлусіць. Усё як ёсць. Таму што калі вы, мякка кажучы, недакладную інфармацыю будзеце прадастаўляць мне, значыць, будуць няправільныя кіраўніцкія рашэнні", - адзначыў Прэзідэнт.

Узгадняючы назначэнне старшыні камітэта па сельскай гаспадарцы і харчаванні Віцебскага аблвыканкама Сяргея Ягорава на пасаду старшыні Віцебскага райвыканкама, Аляксандр Лукашэнка пацікавіўся, чаму прапануецца такое кадравае рашэнне. "Гэта незадаволенасць яго працай на гэтай пасадзе?" - спытаў Прэзідэнт.

Як растлумачыў Кіраўнік Адміністрацыі Прэзідэнта Ігар Сергяенка, для Сяргея Ягорава гэта чарговая ступень па кар'ернай лесвіцы. А папярэдні яго вопыт спатрэбіцца на новым месцы.

"Пэўны вопыт я напрацаваў за чатыры гады работы ў камітэце па сельскай гаспадарцы. Да гэтага працаваў старшынёй Талачынскага райвыканкама. Напэўна, гэта работа мне бліжэй па духу", - адзначыў у сваю чаргу Сяргей Ягораў.

"Гэта больш жывая работа, вы хочаце сказаць. І ўсё ж такі, напэўна, Віцебскі раён валавызначальны і ў сельскім (плане. - Заўвага)?" - спытаў Аляксандр Лукашэнка.

"На другім месцы пасля Аршанскага раёна. І па плошчах, і па вытворчых паказчыках", - удакладніў Сяргей Ягораў.

"Але гэта не значыць, што ён павінен быць другім", - заўважыў Кіраўнік дзяржавы.

"Стаўлю перад сабой задачу вывесці раён на ўзровень нашых перадавых раёнаў іншых абласцей - Гродзенскай і Брэсцкай", - заявіў старшыня камітэта.

"Гэта правільна. Аршанскі, Талачынскі, Віцебскі, і "малыя" побач павінны цягнуць усю вобласць. Не поўнач жа Віцебскай вобласці (Верхнядзвінск, Браслаўскі край) будзе выцягваць сяло. Хоць і там трэба ўпірацца, - падкрэсліў Прэзідэнт. - Добра, што вы перад сабой ставіце задачу вывесці гэты раён. А для гэтага ўсё ёсць у Віцебскай вобласці, і Віцебску, і ў раёне. Усё ёсць для таго, каб вывесці яго на ўзровень перадавых у краіне. Арыенцір для вас на першым этапе - Аршанскі раён. Вы павінны перасягнуць яго".

Новы старшыня з'явіцца і ў Маладзечанскім райвыканкаме. На гэту пасаду ўзгоднены першы намеснік старшыні Павел Губко. Месца заставалася вакантным тры месяцы. Але з назначэннем вырашылі не спяшацца, каб паглядзець, як першы намеснік спраўляецца з работай без кіраўніка, расказаў Ігар Сергяенка.

"Убачылі, што чалавек можа арганізаваць работу. Справіцца", - перакананы Кіраўнік Адміністрацыі Прэзідэнта.

"Павел Валянцінавіч, справіцеся вы ці не - у вас выйсця іншага няма. Калі вы прымаеце гэту пасаду, памрыце, але павінен быць вынік", - заявіў Аляксандр Лукашэнка.

Пры назначэнні Сяргея Ляўковіча памочнікам Прэзідэнта Рэспублікі Беларусь - інспектарам па Віцебскай вобласці Кіраўнік дзяржавы падкрэсліў, што Віцебскую вобласць трэба выцягнуць з таго стану, у якім яна знаходзіцца, хоць сітуацыю ў рэгіёне нельга назваць катастрофай.

“Спадзяюся, што вынік ад вашай працы будзе. Вельмі спадзяюся. Трэба знайсці сваё месца і працаваць у інтарэсах Віцебскай вобласці. Трэба выцягнуць Віцебскую вобласць з таго стану, у якім яна знаходзіцца. Я не скажу, што там катастрофа. Але гэта вобласць не лепшая у краіне, а магчымасцей у яе нямала", - падкрэсліў беларускі лідар.

Аляксандр Лукашэнка адзначыў, што Сяргей Ляўковіч ведае Віцебскую вобласць. "Вобласць няпростая, калі не сказаць больш. Вы - аграрый, добра ведаеце сельскую гаспадарку, зыходзячы з вашай біяграфіі. Тое, што нам трэба ў Віцебскай вобласці. Прааналізуйце той шлях, які мы абазначылі ў развіцці сельскай гаспадаркі. Вы ведаеце, што мы стваралі там так званыя інтэграцыйныя структуры, кампаніі. Я на гэты варыянт згадзіўся - ён у прынцыпе бяспройгрышны, нічога не псуе. Калі гэта не ўдасца нам рэалізаваць - ну вельмі проста інтэграцыйнай структуры разбегчыся. Яны ж нічога не губляюць. Трэба паспрабаваць рэалізаваць гэты праект да канца . Гэта ваша найважнейшая задача", - даў наказ Кіраўнік дзяржавы.

Аляксандр Лукашэнка звярнуў увагу, што ўсе гэтыя задачы рэалізуюць людзі, а кадры - гэта сфера адказнасці Сяргея Ляўковіча. "Працуйце разам з губернатарам, але не забывайце, што вы не падручны губернатара. Вы - вушы і вочы Прэзідэнта ў гэтай галіне. Я ад вас чакаю аб'ектыўнай ацэнкі. Бойкі там быць не павінна. Павінна быць аб'ектыўная ацэнка сітуацыі", - падкрэсліў беларускі лідар.

Ён арыентаваў, каб усе рашэнні ішлі ад жыцця, як таго заўсёды патрабуе і сам Аляксандр Лукашэнка. Напрыклад, у жывёлагадоўлі трэба аператыўна прымаць рашэнні аб перадачы жывёлы ў іншыя гаспадаркі, калі дзесьці няма магчымасці накарміць і ўтрымліваць жывёл. Гэта дазволіць як мінімум знізіць аб'ёмы падзяжу жывёлы. А далей ужо неабходна даводзіць да канца работу па стварэнні неабходнай кармавой базы, што ўключае ў сябе добраўпарадкаванне месцаў для захоўвання кармоў, выкананне ўсіх тэхналагічных патрабаванняў па іх нарыхтоўцы.

Што датычыцца кадравай сітуацыі ў вёсцы, то Кіраўнік дзяржавы заклікаў "не плакацца, што ў нас у сельскай гаспадарцы не хапае людзей". "Катастрофа, калі людзі лішнія (для якіх няма магчымасці знайсці работу. - Заўвага). Я гэта праходзіў. Можа, і вы сутыкаліся. Вось гэта бяда. А калі ёсць работа, дык трэба працаваць і зарабляць", - заўважыў Аляксандр Лукашэнка.

У самыя напружаныя для сельскай гаспадаркі перыяды ён арыентуе прыцягваць да сельгасработ на складанай тэхніцы спецыялістаў у тым ліку з гарадоў, якія маюць такі вопыт і кампетэнцыі. “Іх трэба 2-3 чалавекі, ну, 5 на гаспадарку ў цяжкія часы. Каб на камбайне, энерганасычаным трактары працаваў з мазгамі чалавек. Знайдзіце іх загадзя, усталюйце з імі адносіны і працуйце. У мяне так было (у гады працы кіраўніком сельгаспрадпрыемства. - Заўвага). Я з хлопцамі, якія з'ехалі з маёй гаспадаркі працаваць некуды (некаторыя жылі ў нас і працавалі за 5-7 кіламетраў ад гаспадаркі), усталяваў адносіны. Яны з задавальненнем прыязджалі і працавалі ў мяне на камбайнах.  На астатнюю тэхніку ў мяне людзей хапала. Бліскуча працавалі", - падзяліўся вопытам Прэзідэнт.

У гэтым плане, адзначыў ён, у кожнай гаспадарцы павінна быць стратэгія, і гэтым пытаннем павінны займацца ў тым ліку на ўзроўні райвыканкамаў, якія асабліва не перагружаны ў сваёй рабоце.

Аляксандр Лукашэнка таксама паставіў задачы перад назначаным новым паслом у Індыі Міхаілам Касько. Кіраўнік дзяржавы разлічвае  на рост супрацоўніцтва з гэтай краінай.

Да гэтага часу Міхаіл Касько займаў пасаду старшыні канцэрна Беллеспаперапрам, і Прэзідэнт асабліва згадаў пра гэты момант: "Міхаіл Міхайлавіч, што датычыцца вас, я згадзіўся на назначэнне. Але ў мяне, вядома, будуць прэтэнзіі да вас. Вы ведаеце, у якім стане сёння ваша міністэрства фактычна. І мне вельмі не хацелася б, каб мае падазрэнні ў тым, што вас хочуць проста ціхенька перамясціць на нейкую іншую пасаду, каб гэта пацвердзілася ў будучым. Я вельмі спадзяюся, што ваша работа ў Індыі (вы валодаеце замежнай мовай - англійскай) дасць значны плён".

"Індыя - велізарная краіна. Я не магу быць задаволены тым станам спраў, якія ў нас складваюцца ў беларуска-індыйскіх адносінах. Скажу адкрыта: у адносінах з Індыяй мы дэградавалі, - канстатаваў Кіраўнік дзяржавы. - Таму Індыя - няпросты напрамак. І вы як чалавек практычны, хоць у вас не вельмі атрымалася ў нашым канцэрне, тым не менш вопыт, я думаю, вы свой можаце выкарыстоўваць на індыйскім напрамку. Але не дай бог вам думаць, што гэта для вас адпачынак або вы адышлі некуды ў бок. Не. Ідзяце па ўзыходзячай".

Аляксандр Лукашэнка нагадаў, што за развіццё адносін з ключавымі знешнеэканамічнымі партнёрамі ў кіраўніцтве краіны замацаваны канкрэтныя чыноўнікі. Напрыклад, за напрамак Расійскай Федэрацыі адказвае Прэм'ер-міністр Раман Галоўчанка, за супрацоўніцтва з Кітаем - першы віцэ-прэм'ер Мікалай Снапкоў. А што датычыцца Індыі, то яшчэ пры былым кіраўніку МЗС Уладзіміру Макею яму даручалася распрацаваць план дзеянняў на гэтым напрамку. Зараз гэта задача ўскладзена на цяперашняга Міністра замежных спраў Сяргея Алейніка.

"Я не скажу, што мы там разгарнуліся, і гэта наш вельмі важны (знешнеэканамічны. - Заўвага) партнёр. Тое, што мы вырабляем, мы спакойна можам і ў Кітаі, і ў Расіі прадаць, у некаторых краінах на далёкай дузе. Але Індыя - велізарны рынак, і мы там былі прадстаўлены, мы там працавалі з часоў Савецкага Саюза. Нам трэба вызначыць асноўныя напрамкі, дзе мы нешта зможам зрабіць, дзе мы будзем перш за ўсё карысныя для Індыі. Гэта аснова гэтага плана", - сказаў Прэзідэнт.

У сувязі з гэтым ён даручыў новаму паслу разам з кіраўніком МЗС вызначыцца па адпаведных пытаннях. "Салодка і лёгка не будзе. Трэба выбудаваць фундамент нашых адносін па асноўных напрамках з Індыяй. Мы не разгорнемся ў Індыі, як у Кітаі, дапусцім. Менш працавалі, ды і, слухайце, у нас не такая эканоміка, каб ужо разгортвацца па ўсім свеце, як Кітай ці Расія. Нам дастаткова вызначыць асноўныя напрамкі і працаваць з індусамі", - заявіў Кіраўнік дзяржавы.

Ён у якасці прыкладу пералічыў шэраг напрамкаў, па якіх ёсць перспектывы для развіцця адносін з Індыяй: "У іх добрыя лякарствы. Нам яны вельмі патрэбныя. І тэхналогіі пэўныя. Яшчэ сёе-тое яны ўмеюць рабіць, не толькі алмазы апрацоўваць. Гэта для нас таксама важна. Мы гэтаму надаём вялікі прыярытэт. Ёсць тавары, якія мы можам туды прадаць. На аснове нашых тэхналогій можам нават і нейкія прадпрыемствы там стварыць. Вядомы напрамкі дзейнасці. Трэба вызначыцца".