Перагаворы з Прэм'ер-міністрам Пакістана Шахбазам Шарыфам

Прэзідэнт Беларусі Аляксандр Лукашэнка 11 красавіка ў Мінску правёў перагаворы з Прэм'ер-міністрам Пакістана Шахбазам Шарыфам.

Сустрэча лідараў дзвюх дзяржаў пачалася з афіцыйнай цырымоніі.

Затым перагаворы стартавалі ў вузкім складзе. Вітаючы высокага госця, Аляксандр Лукашэнка заўважыў, што Шахбаз Шарыф, яшчэ калі быў дзіцём, разам з бацькам наведваў беларускую сталіцу. "Спадзяюся, гэты горад стаў родным, як і наша Беларусь", - сказаў Кіраўнік дзяржавы. 

Прэзідэнт звярнуў увагу, што напярэдадні правёў нефармальную сустрэчу з Прэм'ер-міністрам Пакістана, якая доўжылася амаль тры гадзіны, абмеркавалі многія пытанні міжнароднага парадку дня і тое, што адбываецца вакол дзвюх краін, пагаварылі аб перспектывах двухбаковых адносін. "У нас склаліся вельмі добрыя адносіны. Адносіны, як вельмі правільна вы, спадар прэм'ер-міністр, сказалі, сямейныя. Таму мы заўсёды будзем падтрымліваць такі ўзровень адносін, і ўпэўнены, што пасля гэтага візіту мы не маем права на тое, каб не рэалізаваць нашы дамоўленасці", - падкрэсліў беларускі лідар.

Кіраўнік дзяржавы звярнуў увагу, што ў складзе пакістанскай дэлегацыі ў Беларусь прыехала шмат буйных бізнесменаў, якія зацікаўлены ў наладжванні з айчыннымі прадпрыемствамі "канкрэтных адносін па канкрэтных напрамках". 

"Вы ведаеце, у нас машынабудаўнічая краіна, развітая сельская гаспадарка. Я вельмі добра ведаю, што трэба Пакістану. Вы таксама добра ведаеце, што трэба Беларусі ад Пакістана. Думаю, што ў працэсе гэтага візіту члены Урада і кіраўнікі буйных кампаній дамовіліся аб перспектывах супрацоўніцтва", - адзначыў Аляксандр Лукашэнка.

Прэм'ер-міністр Пакістана ў сваю чаргу падзякаваў Кіраўніку беларускай дзяржавы за цёплы прыём. Ён адзначыў важнасць нефармальнай сустрэчы, якая праходзіла напярэдадні афіцыйных перагавораў у якой удзельнічалі члены сем'яў, і таксама звярнуў увагу на цудоўную беларускую кухню.

Шахбаз Шарыф падкрэсліў: "Мой першы візіт у Беларусь адбыўся шмат гадоў таму, калі ваша краіна яшчэ была часткай Савецкага Саюза, і тады я прыехаў разам са сваім бацькам. І ўжо тады мне ваша краіна здалася высокаразвітой з пункту гледжання індустрыі. Учора, калі я прызямліўся і ехаў па Мінску - бачыў цудоўныя будынкі і тое, якой прыгожай стала ваша краіна, у тым ліку пад Вашым мудрым кіраўніцтвам".

"Мяне таксама ўразіла чысціня вашых вуліц. І я хацеў бы аддаць належнае вашаму жаданню і імкненню падтрымліваць гэту чысціню, ваш намер і далей весці да працвітання вашу цудоўную краіну. Спадзяюся, што нашы цёплыя адносіны і сувязі ў канчатковым выніку выльюцца ў інвестыцыі і рост узаемнага гандлю. Беларусь вельмі важная для нас з пункту гледжання сельскай гаспадаркі. Мы ведаем, якую дапамогу могуць аказаць беларусы ў развіцці аграрнага сектара нашай краіны", - прадоўжыў ён.

У час перагавораў у шырокім складзе Аляксандр Лукашэнка перш за ўсё падзякаваў Шахбазу Шарыфу за тое, што ён прыняў запрашэнне і прыехаў у гасцінную Беларусь. Прэзідэнт таксама выказаў шкадаванне наконт таго, што гэта адбылося не зімой, як планавалася першапачаткова. "Але, з другога боку, будзе стымул прыехаць да нас зноў, каб убачыць прыгажосць заснежаных беларускіх лясоў", - заўважыў беларускі лідар.

"Знаходжу сімвалічным, што мы не змяняем традыцыям і абмяняліся візітамі вельмі аператыўна, як гэта было дзесяць гадоў таму з маім сябрам і вашым братам Навазам Шарыфам", - сказаў Аляксандр Лукашэнка. Ён нагадаў, што першыя візіты на вышэйшым узроўні ў Ісламабад і Мінск адбыліся ў 2015 годзе. Былі падпісаны стратэгічныя для двухбаковых адносін палітычныя дакументы - Ісламабадская дэкларацыя беларуска-пакістанскага партнёрства і Дагавор аб дружбе і супрацоўніцтве. "Стваральны дух гэтых дакументаў прайшоў выпрабаванне часам. Нягледзячы на сусветныя перыпетыі і выклікі бяспецы, нашы краіны засталіся добрымі сябрамі і надзейнымі партнёрамі", - заявіў Кіраўнік дзяржавы.

Прэзідэнт звярнуў увагу, што падыходы Беларусі і Пакістана да ключавых пытанняў глабальнага парадку дня супадаюць або падобныя. "У нас выключна канструктыўны характар узаемадзеяння ў міжнародных арганізацыях", - сказаў ён.

Аляксандр Лукашэнка падкрэсліў, што сельская гаспадарка і ўсё, што з ёй звязана, з'яўляюцца драйверам супрацоўніцтва Беларусі і Пакістана. Прэзідэнт адзначыў, што сумесныя намаганні дзвюх краін трэба сканцэнтраваць у тым ліку на вырашэнні важных стваральных задач - развіцці сельскай гаспадаркі і забеспячэнні харчовай бяспекі. "Ведаючы, якое высокае значэнне вы надаяце аграрнаму сектару, думаю, вы мяне падтрымаеце", - дадаў беларускі лідар.

Гаворачы аб узаемадзеянні дзвюх краін у сферы сельскай гаспадаркі, Прэзідэнт адзначыў, што яно шматграннае і мае вялікія перспектывы. "Упэўнены, што мы будзем адштурхоўвацца ад таго, што будзем ствараць сумесныя зборачныя прадпрыемствы па вытворчасці сельскагаспадарчай тэхнікі ў Пакістане - і па вытворчасці трактароў "Беларус" і прычапных машын для вырошчвання сельскагаспадарчай прадукцыі, - сказаў кіраўнік дзяржавы. - Мы зробім усё для таго, каб вы былі ў гэтым зацікаўлены і не пашкадавалі аб гэтым супрацоўніцтве".

Прэзідэнт звярнуў увагу, што дзякуючы аператыўнаму садзейнічанню Прэм'ер-міністра беларускія ветэрынарныя прэпараты ўпершыню сертыфікаваны ў Пакістане і ў бліжэйшы час павінны пачацца іх пастаўкі.

Аляксандр Лукашэнка прапанаваў прадстаўнікам пакістанскага боку паскорыцца і перайсці да канкрэтных перагавораў па пастаўках беларускага насення збожжавых культур і кукурузы для вырошчвання ў іх краіне. "Нашы профільныя міністэрствы з прыцягненнем дзелавых колаў дзвюх краін ужо да наступнага пасяўнога сезона павінны выйсці на рэальныя кантракты", - сказаў Кіраўнік дзяржавы.

Паводле яго слоў, беларускія спажыўцы будуць рады пакістанскім таварам у магазінах. Па выніках беларуска-пакістанскага бізнес-форуму, які адбыўся напярэдадні перагавораў у Мінску, чакаецца рост паставак рознай прадукцыі, у тым ліку рысу і мандарынаў, фармацэўтычнай і тэкстыльнай прадукцыі, спартыўных тавараў, адзення і абутку.

Акрамя таго, Беларусь прапанавала сваё садзейнічанне ў рэалізацыі амбіцыйнай задачы, пастаўленай Урадам Пакістана, - па перавядзенні да 2030 года трэці грамадскага транспарту на электрацягу. "У нашага прадпрыемства "БКМ Холдынг" ёсць усе неабходныя кампетэнцыі ў частцы вытворчасці сучасных электробусаў і суперхуткіх зарадных станцый, - сказаў Прэзідэнт. - Мы гатовы лакалізаваць вытворчасць гэтай тэхнікі ў Пакістане, што знізіць яе кошт, створыць новыя рабочыя месцы і прыцягне прагрэсіўныя тэхналогіі і кампетэнцыі".

Аляксандр Лукашэнка таксама прапанаваў разгледзець пытанне арганізацыі паставак сучасных кар'ерных самазвалаў БЕЛАЗ, грузавой і дарожна-будаўнічай тэхнікі МАЗ і "Амкадор" для патрэб вугальнай і меднаруднай галін, а таксама інфраструктурных праектаў Пакістана.

Асаблівасцю цяперашняга візіту Кіраўнік дзяржавы назваў тое, што члены Урада, службовыя асобы абедзвюх краін і прадстаўнікі дзелавых колаў вельмі эфектыўна папрацавалі і змаглі абмеркаваць не толькі доўгатэрміновыя перспектывы супрацоўніцтва, але і дамовіцца па канкрэтных пазіцыях і заключыць кантракты.

Рэалізацыі гэтых дамоўленасцей, а таксама развіццю двухбаковых дзелавых і гуманітарных кантактаў павінна садзейнічаць адкрыццё прамога рэйса паміж Ісламабадам і Мінскам. Гэта тэма таксама абмяркоўвалася ў час перагавораў двух лідараў. 

"Калі мы аператыўна створым паветраны мост паміж Ісламабадам і Мінскам і падтрымаем паветраныя зносіны, то, я ўпэўнены, што мы вельмі сур'ёзна рушым наперад у гэтым напрамку. Тым больш калі мы будзем прыцягваць працоўныя рэсурсы з Пакістана ў Беларусь (а гэта будзе), для людзей патрэбны хуткія паветраныя зносіны. Мы гатовы ў гэтым напрамку працаваць і прайсці свой шлях", - сказаў Аляксандр Лукашэнка.

Прэзідэнт канстатаваў, што ў Пакістане ёсць вялікая колькасць людзей, якія могуць і хочуць працаваць у Беларусі. Паміж кіраўніцтвам дзвюх краін дасягнута дамоўленасць аб тым, каб забяспечыць ім гэту магчымасць і выпрацаваць адпаведны механізм. 

"Мы дамовіліся з вамі, што зробім усё для таго, каб нашы пакістанскія сябры, рабочыя, сяляне, інтэлігенцыя - жадаючыя змаглі прыехаць у Беларусь і працаваць тут. Мы акажам ім адпаведную падтрымку, - сказаў Аляксандр Лукашэнка. - Мы таксама дамовіліся, што выпрацуем канкрэтны механізм прыезду людзей для работы ў Беларусі. Нам яны будуць вельмі патрэбны". 

Паводле ацэнкі Аляксандра Лукашэнкі, абодва бакі нямала зрабілі ў час цяперашняга візіту Прэм'ер-міністра Пакістана і ў гэтым, паводле яго слоў, сур'ёзна дапамог даўні сябар Кіраўніка дзяржавы Наваз Шарыф. "Ён у нас выступаў як трацейскі суддзя. Я заўважыў, што ён практычна ўсе нашы пачынанні падтрымаў. Ён будзе рады, калі мы рушым наперад у нашых адносінах ужо на канкрэтнай базе", - заўважыў беларускі лідар. 

Прэзідэнт яшчэ раз падзякаваў высокаму госцю за візіт і выказаў надзею на тое, што такія сустрэчы будуць праходзіць часцей як у Мінску, так і ў Ісламабадзе. "Думаю, што мы зробім сур'ёзныя крокі ў нашым супрацоўніцтве", - рэзюмаваў Кіраўнік дзяржавы.

Прэм'ер-міністр Пакістана ў час перагавораў у шырокім складзе заявіў: "Мы сапраўды гатовы працаваць разам і будзем рабіць усё, каб ператварыць пагадненні і мемарандумы ў канкрэтныя дзеянні. Я буду рабіць усё, каб двухбаковыя адносіны станавіліся яшчэ больш эфектыўнымі і дасягалі новых вышынь".

Шахбаз Шарыф звярнуў увагу, што прыехаў у Мінск пасля працяглага перапынку: "Для мяне вялікі гонар і задавальненне знаходзіцца ў вашай цудоўнай краіне другі раз".

Звяртаючыся да Аляксандра Лукашэнкі, пакістанскі госць падкрэсліў: "Мы вялікія сябры, вы аказваеце нам вялікую падтрымку, і я буду цесна з вамі супрацоўнічаць. Ваша лідарства і Ваш прыклад кіраўніцтва Рэспублікай Беларусь падтрымліваецца народам краіны. І яшчэ раз хацеў бы павіншаваць Вас з тым, што народ Беларусі зноў выбраў Вас Прэзідэнтам. У мяне няма ніякіх сумненняў, што беларускі народ давярае і абсалютна ўпэўнены ў Вас".

"У нас ёсць каля сотні пагадненняў і мемарандумаў па супрацоўніцтве. Цяпер неабходна дзейнічаць хутка сумесна, каб гэтыя пагадненні ператварыліся ў канкрэтныя дзеянні, каб мы выканалі ўсё, што запланавана. Я абсалютна гатовы, як і ўся мая каманда, працаваць разам з вамі", - заявіў ён.

"Ведаю ваш стыль работы - менш размоў, больш справы. Давайце дасягаць вынікаў, гэты падыход блізкі мне, - падкрэсліў Прэм'ер-міністр. - Мы сапраўды гатовы працаваць разам, я буду працаваць з вамі і буду рабіць гэта шчыра. З усіх сіл буду старацца ператварыць гэтыя пагадненні і мемарандумы ў рэальныя вынікі". Ён таксама падзякаваў Прэзідэнту Беларусі за словы падтрымкі і спачування ў сувязі з тэрактам у Пакістане.

Па выніках перагавораў паміж Беларуссю і Пакістанам заключаны пакет дакументаў аб супрацоўніцтве. Цырымонія абмену тэкстамі падпісаных міжнародных дагавораў і іншых афіцыйных дакументаў адбылася ў прысутнасці лідараў дзвюх краін.

Падпісана міжурадавае пагадненне Беларусі і Пакістана аб рэадмісіі.

Пагадненне аб супрацоўніцтве па барацьбе са злачыннасцю заключана паміж міністэрствамі ўнутраных спраў дзвюх краін, аб ваенным супрацоўніцтве - паміж міністэрствамі абароны. Дзяржаўны ваенна-прамысловы камітэт Беларусі і Міністэрства абароннай прадукцыі Пакістана падпісалі дарожную карту ваенна-тэхнічнага супрацоўніцтва на 2025-2027 гады. 

Профільныя міністэрствы абедзвюх краін зацвердзілі план мерапрыемстваў па рэалізацыі мемарандума аб супрацоўніцтве ў галіне аховы навакольнага асяроддзя. Падпісаны таксама пяць мемарандумаў і пагадненняў у галіне эканамічнага супрацоўніцтва, падтрымкі прадпрымальніцтва, развіцця гандлю паміж арганізацыямі і прадпрыемствамі Беларусі і Пакістана.

У час сустрэчы з журналістамі Кіраўнік дзяржавы адзначыў, што перагаворы прайшлі ў цёплай і абсалютна давернай, дружалюбнай атмасферы. Лідары дзвюх краін абмеркавалі шырокі спектр пытанняў, абмяняліся думкамі па міжнародных і рэгіянальных праблемах.

"У нас з Пакістанам адзіная пазіцыя адносна далейшага развіцця, паглыблення палітычнага дыялогу паміж нашымі краінамі, умацавання міжпарламенцкіх сувязей, пашырэння дагаворна-прававой базы. Але ключавымі напрамкамі супрацоўніцтва, безумоўна, застаюцца эканоміка і ўзаемны гандаль", - падкрэсліў Аляксандр Лукашэнка.

У лістападзе 2024 года, калі Прэзідэнт Беларусі наведваў з афіцыйным візітам Пакістан, бакі дамовіліся сканцэнтраваць намаганні на атрыманні практычных эканамічных вынікаў ад сумеснай работы. "Асабліва хачу падкрэсліць абавязковасць Прэм'ер-міністра Пакістана. Ён разам са сваім братам Навазам паабяцаў, што яны прыедуць у Беларусь у складзе вялікай дэлегацыі для таго, каб абмеркаваць перспектывы нашага супрацоўніцтва. І сваё слова стрымалі. Як я гаварыў, прыехалі толькі вясной, але не зімой (першапачаткова планавалася, што візіт будзе ажыццёўлены ў лютым. - Заўвага). Але мы памятаем гэта абяцанне Шахбаза, што ён прыедзе да нас зімой - і ўбачыць, што такое сапраўдная зіма", - сказаў Прэзідэнт. 

"Рады канстатаваць, што ў нас агульнае бачанне прыярытэтаў. Першы і галоўны сярод іх - умацаванне харчовай бяспекі ў самым шырокім сэнсе гэтага слова. Гэта і пастаўкі сельгастэхнікі ў Пакістан, арганізацыя сумеснай вытворчасці беларускіх трактароў і прычапной тэхнікі, задавальненне попыту пакістанскага рынку на якаснае дзіцячае харчаванне, сухое малако, а таксама экспарт насення і ветэрынарных прэпаратаў. Усё гэта мы ўмеем рабіць і гатовы падзяліцца сваім вопытам з нашымі пакістанскімі сябрамі. У сваю чаргу мы будзем рады бачыць у Беларусі ў большай колькасці прадукты з Пакістана", - сказаў Кіраўнік дзяржавы.

Аляксандр Лукашэнка прапанаваў Пакістану пастаўляць сваю прадукцыю ў Еўропу праз Беларусь. Гэта могуць быць, напрыклад, рыс і мандарыны, фармацэўтычная і тэкстыльная прадукцыя, спартыўныя тавары, адзенне і абутак.

"Мы таксама гатовы супрацоўнічаць з Пакістанам у плане паставак вашай прадукцыі на еўрапейскі рынак. Прынамсі, еўрапейцы з задавальненнем купяць вашу прадукцыю. Яны ж санкцыі супраць вас не ўводзілі. Таму, калі ласка, скарыстайцеся Беларуссю, якая знаходзіцца ў цэнтры Еўропы, для таго каб пастаўляць сваю прадукцыю на Захад", - прапанаваў Аляксандр Лукашэнка, звяртаючыся да пакістанскіх прадстаўнікоў.

Кіраўнік дзяржавы адзначыў, што бясспрэчным флагманам, які фарміруе аснову беларускага экспарту ў Пакістан, з'яўляецца трактарабудаўнічая галіна. "Упэўнены, што ў бягучым годзе аб'ёмы паставак беларускіх трактароў у Пакістан будуць толькі ўзрастаць", - заявіў Прэзідэнт.

У час перагавораў узнімалася пытанне паставак у Пакістан камунальнай, грузавой і кар'ернай тэхнікі беларускай вытворчасці.

"Мы таксама прапанавалі нашым сябрам разгледзець магчымасць арганізацыі ў сябе зборкі электробусаў у адказ на просьбу Прэм'ер-міністра аб тым, што яны хацелі б развіваць у Пакістане такія кампетэнцыі. Гатовы падзяліцца гэтым вопытам і навучыць вашых вытворчасці гэтай складанай тэхнікі", - сказаў Аляксандр Лукашэнка.

Шахбаз Шарыф падтрымаў прапанову беларускага боку. Ён пацвердзіў, што Пакістан паставіў перад сабой амбіцыйную задачу па пераводзе да 2030 года трэці грамадскага транспарту на электрацягу. Паводле яго слоў, аб неабходнасці развіцця гэтага напрамку гаварыў яшчэ Наваз Шарыф, калі быў Прэм'ер-міністрам.

"Электратранспарт заўсёды быў захапленнем майго брата, якое ён перадаў і мне. Дзякуючы яго мудраму кіраўніцтву, у нас ёсць цудоўная сетка грамадскага транспарту. У гэтым выпадку электратранспарт - неабходнае, але пакуль адсутнае звяно. На глебе гэтага супрацоўніцтва мы можам стаць бліжэй. Калі яно стане маштабным, мы атрымаем вялікую карысць у перспектыве", - сказаў Шахбаз Шарыф.

Ён заявіў аб вялікай зацікаўленасці ў трансферы беларускіх тэхналогій. "Мы хочам вучыцца на вашым вопыце, выкарыстоўваць яго. Беларусь моцная ў вытворчасці абсталявання, у тым ліку для горназдабыўнай прамысловасці. Ёсць кар'ерныя самазвалы і розная тэхніка. Я з нецярпеннем чакаю візіту на адзін з заводаў (размова аб намеры наведаць БЕЛАЗ. - Заўвага). Бо няма ні адной прычыны, па якой мы не маглі б атрымаць карысць ад вашага вопыту", - падкрэсліў Прэм'ер-міністр.

Ён звярнуў увагу, што Пакістан мае багатыя мінеральныя рэсурсы і гэты напрамак сумеснай дзейнасці можа быць вельмі перспектыўны. "Можна зарабіць мільёны долараў у гэтай сферы. Думаю, што ў гэтых адносінах мы будзем выдатнымі партнёрамі", - лічыць Шахбаз Шарыф.

"Я ўдзячны Прэм'ер-міністру, што ён замест кабінетнай работы згадзіўся змяніць свой графік і накіравацца на адно з вядучых нашых прадпрыемстваў па вытворчасці велікагрузных самазвалаў. Ён там канкрэтна зможа сказаць кіраўніцтву і працоўнаму калектыву, у чым мае патрэбу Пакістан і што БЕЛАЗ павінен зрабіць для Пакістана", - сказаў беларускі лідар.

"Мы таксама выйшлі на дамоўленасці канкрэтнага характару - аб развіцці нашых адносін у сферы тэкстыльнай прамысловасці на прыкладзе прадпрыемства ў Баранавічах. Што вельмі важна: нашы пакістанскія сябры паабяцалі нам дапамагчы спецыялістамі ў тэкстыльнай прамысловасці, накіраваўшы іх для работы ў тым ліку і ў Баранавічы", - расказаў Аляксандр Лукашэнка.

Прэзідэнт адзначыў, што Беларусь гатова прыняць на работу 100-150 тыс. пакістанскіх спецыялістаў.

"Мы таксама дамовіліся з маім сябрам Прэм'ер-міністрам Пакістана, што ў бліжэйшы час будуць накіраваны спецыялісты розных галін. Тых галін, аб якіх мы папросім. І кіраўніцтва Пакістана дапаможа нам падабраць такіх людзей. Няхай гэта будзе 100 тысяч, можа, 120-150 тысяч гэтых спецыялістаў. Мы гатовы прыняць іх у Беларусі і стварыць ім неабходныя ўмовы для работы", - падкрэсліў Кіраўнік дзяржавы.

Такая ініцыятыва была з вялікім энтузіязмам успрынята пакістанскім бокам.

"Дазвольце падзякаваць Вам ад усяго сэрца і ад асобы ўсёй дэлегацыі, ад народа Пакістана за Вашу шчодрую прапанову і запрашэнне больш як сотні тысяч высокакваліфікаваных работнікаў з Пакістана прыехаць у Беларусь працаваць, - сказаў Прэм'ер-міністр. - Паверце, гэта прапанова зрабіла мой дзень. Гэта сапраўдны падарунак, які я вязу з сабой з Беларусі, дарагі падарунак ад майго брата Аляксандра Лукашэнкі".

Шахбаз Шарыф запэўніў, што ўсе пакістанскія спецыялісты, якія атрымаюць магчымасць працаваць у Беларусі, будуць мець выдатную падрыхтоўку. "Вы пераканаецеся, што яны сапраўды маюць высокую кваліфікацыю і могуць аказаць дапамогу вашай краіне. Яны працавітыя, у іх ёсць навыкі, сем'і, якія трэба падтрымліваць. Яны могуць стварыць той самы мост, які мы будуем паміж Мінскам і Ісламабадам", - заўважыў пакістанскі Прэм'ер-міністр.

Рухаючай сілай у пашырэнні беларуска-пакістанскага супрацоўніцтва Аляксандр Лукашэнка назваў дзелавыя колы дзвюх краін. Менавіта таму з Прэм'ер-міністрам Шахбазам Шарыфам у Мінск прыбыла вялікая дэлегацыя прадстаўнікоў бізнесу, якія, па існуючай традыцыі, плённа папрацавалі з беларускімі калегамі на бізнес-форуме. "Гэта асаблівасць нашых перагавораў і візіту пакістанскай дэлегацыі, што прадстаўнікі дзелавых колаў і дзяржслужачыя, члены ўрада разам вельмі сур'ёзна працавалі над канкрэтнымі праектамі", - звярнуў увагу Прэзідэнт.

"Мы прапануем пакістанскім прадпрымальнікам самыя спрыяльныя ўмовы для стварэння вытворчасцей, арыентаваных на рынак не толькі Беларусі, але Еўразійскага эканамічнага саюза, - заявіў Кіраўнік дзяржавы. - Я рады таму, што пакістанскія калегі настроены выкарыстоўваць усе існуючыя магчымасці і рэзервы для актывізацыі гандлёва-эканамічнага супрацоўніцтва з нашай краінай".

Аляксандр Лукашэнка ўпэўнены, што пасля візіту Шахбаза Шарыфа ў Мінск адбудуцца новыя візіты і сустрэчы, а дружалюбныя адносіны паміж дзвюма краінамі будуць і ў далейшым умацоўвацца і прыносіць карысць народам Беларусі і Пакістана.

Пасля завяршэння перагавораў Аляксандр Лукашэнка і Шахбаз Шарыф прынялі ўдзел у традыцыйнай цырымоніі і пасадзілі дрэва на Алеі ганаровых гасцей каля Палаца Незалежнасці. Разам з лідарамі дзвюх краін быў і прэзідэнт Пакістанскай мусульманскай лігі, былы Прэм'ер-міністр Пакістана Наваз Шарыф, які далучыўся да размовы і перагавораў пасля завяршэння іх афіцыйнай часткі.