Падпісаны Указ, які датычыцца натарыятаў і натарыяльнай дзейнасці
Прэзідэнт Беларусі Аляксандр Лукашэнка 16 жніўня падпісаў Указ № 326, якім уносяцца змяненні ў іншыя ўказы ў мэтах прывядзення актаў заканадаўства ў адпаведнасць з Законам ад 5 студзеня 2024 года "Аб змяненні Закона Рэспублікі Беларусь "Аб натарыяце і натарыяльнай дзейнасці".
Дакументам уносяцца папраўкі ў тры ўказы Кіраўніка дзяржавы. Змяненне ва Указ № 40 ад 16 студзеня 2009 года "Аб Фондзе сацыяльнай абароны насельніцтва Міністэрства працы і сацыяльнай абароны" прадугледжвае магчымасць бясспрэчнага спагнання ў бюджэт фонду ўсіх нядоімак (напрыклад, недаплат, выяўленых пры праверцы правільнасці выплаты ўзносаў), а не толькі завінавачанасці па абавязковых узносах.
Папраўкамі ва Указ № 99 ад 25 лютага 2014 года "Аб пытаннях рэгулявання лізінгавай дзейнасці" выключаецца норма, якая прадугледжвае магчымасць спагнання завінавачанасці, узнікаючай па дагаворы фінансавай арэнды (лізінгу), на падставе выканаўчага надпісу натарыуса. Гэтыя пытанні ўрэгуляваны Законам аб натарыяце.
Змяненні датычацца таксама Указа № 239 ад 19 чэрвеня 2019 года "Аб праездзе цяжкавагавых і (або) буйнагабарытных транспартных сродкаў". Абноўленым Законам аб натарыяце ўпершыню вызначаецца магчымасць спагнання на падставе выканаўчага надпісу натарыуса платы за праезд па дарогах агульнага карыстання з прымяненнем павышаючага каэфіцыента. У адпаведнасці са змяненнямі, унесенымі ва Указ № 239, устанаўліваецца парадак афармлення дакументаў у выпадку парушэння правіл праезду, а таксама прад'яўлення такіх дакументаў уладальнікам транспартных сродкаў для добраахвотнага ўнясення платы ў пэўны тэрмін і спагнання яе на падставе выканаўчага надпісу натарыуса пры неўнясенні ў добраахвотным парадку.