Адобраны праект пагаднення аб электронным гандлі таварамі ў ЕАЭС

Прэзідэнт Беларусі Аляксандр Лукашэнка 10 красавіка падпісаў Указ № 122, якім адобрыў у якасці асновы для правядзення перагавораў праект пагаднення аб электронным гандлі таварамі ў Еўразійскім эканамічным саюзе.

Праект міжнароднага дагавора накіраваны на забеспячэнне ўзаемнага электроннага гандлю ў рамках унутранага рынку ЕАЭС, захаванне правоў і законных інтарэсаў яго ўдзельнікаў, вызначэнне правіл узаемадзеяння паміж імі.

Прадугледжваецца, у прыватнасці, замацаванне прынцыпаў і ўмоў электроннага гандлю (недыскрымінацыя, забеспячэнне свабоды перамяшчэння тавараў і аказання спадарожных такому гандлю паслуг), парадку прымянення электроннага дакументаабароту, забеспячэння абароны даных і інфармацыйнай бяспекі. Савету ЕЭК плануецца прадаставіць паўнамоцтвы па ўстанаўленні агульных патрабаванняў і правіл для ўдзельнікаў электроннага гандлю.

На правядзенне перагавораў па праекце пагаднення і яго падпісанне ўпаўнаважаны Урад.

Рэалізацыя пагаднення дасць магчымасць забяспечыць рост аб'ёмаў гандлю і павысіць узровень абароны правоў спажыўцоў.