Аб удасканаленні работы з кадрамі ў дзяржаўных органах

Прэзідэнт Беларусі Аляксандр Лукашэнка 23 лютага падпісаў Указ № 66 "Аб удасканаленні работы з кадрамі ў дзяржаўных органах", які накіраваны на паляпшэнне сістэмы ўліку, падбору і расстаноўкі кіруючых кадраў, павышэнне эфектыўнасці дзейнасці дзяржорганаў па рэалізацыі дзяржаўнай кадравай палітыкі ў сферы забеспячэння кадравай бяспекі.

Для ўніфікацыі падыходаў да ўліку кіруючых пасад, падбору і расстаноўкі кіраўніцкіх кадраў на ўсіх узроўнях сістэмы органаў дзяржаўнага апарату Указам пашыраецца пералік ведамстваў, якія фарміруюць кадравыя рэестры.

Так, акрамя кадравых рэестраў Кіраўніка дзяржавы, Савета Міністраў, абласных і Мінскага гарадскога выканкамаў уводзяцца кадравыя рэестры дзяржаўных органаў, падпарадкаваных (падсправаздачных) Прэзідэнту, рэспубліканскіх органаў дзяржаўнага кіравання, гарадскіх і раённых выканаўчых камітэтаў, мясцовых адміністрацый раёнаў у гарадах. Пры гэтым вызначаюцца агульныя патрабаванні да парадку вядзення кадравых рэестраў.

Указам прадугледжаны меры па ўдасканаленні адбору кадраў для замяшчэння кіруючых пасад і дзяржаўнай службы. У сувязі з гэтым устаноўлены парадак фарміравання і праверкі звестак аб кандыдатах на пасады, уключаныя ў кадравыя рэестры, а таксама на пасады дзяржаўных служачых.

У мэтах павышэння эфектыўнасці дзейнасці па прадухіленні карупцыйных праяў у сістэме дзяржаўнага кіравання зацверджана палажэнне, якое рэгулюе пытанні дэкларавання даходаў і маёмасці асоб, якія займаюць пасады, уключаныя ў кадравы рэестр Кіраўніка дзяржавы, кандыдатаў на гэтыя пасады, а таксама іх сваякоў.

Указ уступае ў сілу праз месяц пасля яго афіцыйнага апублікавання.