Рабочая паездка ў Шклоўскі раён Магілёўскай вобласці

Прэзідэнт Беларусі Аляксандр Лукашэнка 6 лістапада ў працяг вялікай камандзіроўкі ў Магілёўскую вобласць наведаў аб'екты ў Шклове.

У першую чаргу Аляксандр Лукашэнка прыехаў у Шклоўскі райаграсэрвіс, дзе па яго даручэнні некалькі месяцаў таму была завершана маштабная рэканструкцыя. Кіраўнік дзяржавы раней ужо азнаёміўся з вынікамі гэтых работ, але ў бліжэйшыя дні аграсэрвіс стане адным з асноўных пунктаў для правядзення рэспубліканскага семінара аб сучасных падыходах да рэгіянальнага развіцця на прыкладзе Шклоўскага раёна.

"Я прыехаў, каб пераканацца, што Назараў (Кіраўнік спраў Прэзідэнта Беларусі Юрый Назараў. - Заўвага) сумленна дакладвае мне. Семінар жа будзе - я павінен на ўласныя вочы ўсё ўбачыць", - адзначыў Прэзідэнт.

Па даручэнні Кіраўніка дзяржавы ў Шклове і Шклоўскім раёне за апошнія гады шмат зроблена як для развіцця сельскай гаспадаркі, так і шэрага абслуговых арганізацый. Мадэрнізаваны і пабудаваны новыя жывёлагадоўчыя комплексы, малакаперапрацоўка, фактычна з нуля створаны самы сучасны райаграсэрвіс, мадэрнізаваны камбікормавы завод. Спіс можна прадаўжаць.

Аляксандр Лукашэнка даручаў, каб Шклоўскі раён стаў узорам для ўсёй краіны ў пытаннях рэгіянальнага развіцця. У бліжэйшыя дні тут на гэту тэму пройдзе рэспубліканскі семінар з удзелам кіраўнікоў раёнаў з усёй краіны.

База створана. Цяпер Кіраўнік дзяржавы арыентуе старшыню Шклоўскага райвыканкама Міхаіла Крыцкага, каб раён самастойна эфектыўна працаваў, а ад укладзеных сродкаў была аддача: "У Шклоўскі раён я больш не прыеду такім чынам і дапамагаць тут больш не буду. Усё, далей табе ўжо трэба ўпірацца пасля семінара па поўнай з усімі. Каб ад зямлі атрымаць рэзультат. У Гарадцы (пры наведванні сельгаспрадпрыемства "ААБ-Агра Гарадзец". - Заўвага) лічылі. Тое, што вы сёння атрымліваеце выручкі, нам яшчэ трэба працэнтаў 30 дабаўляць, каб у нуль выйсці. А даўгі вяртаць? Табе гэта трэба самому бачыць і жалезна патрабаваць".

Наведваючы Шклоўскі райаграсэрвіс, Аляксандр Лукашэнка яшчэ раз пераканаўся, што тут усё ў парадку і зроблена тое, што абяцалі. "Паказаць трэба (удзельнікам семінара. - Заўвага), як павінна быць", - адзначыў Прэзідэнт.

"Значыць, тое, што мы тут планавалі, усё зроблена, каб можна было сказаць, што Сельгастэхніка адноўлена і райаграсэрвіс існуе. Значыць, рамантаваць тэхніку, абслугоўваць тэхніку мы тут ужо можам", - зрабіў выснову Аляксандр Лукашэнка.

Важны момант - на базе райаграсэрвісу ёсць участак і па абслугоўванні даільных установак.

Прэзідэнт арыентуе, каб рамонт усёй тэхнікі ў райаграсэрвісах праводзіўся ў цесным кантакце з айчыннымі заводамі-вытворцамі. Каб яны не проста пастаўлялі запчасткі, але і пры неабходнасці аказвалі дапамогу, дзяліліся кампетэнцыямі. Фактычна гэта павінны быць паўнацэнныя сэрвісныя цэнтры - так, як гэта Беларусь робіць за мяжой. Кіраўніку дзяржавы далажылі, што аграсэрвіс у Шклове ўжо працуе ў гэтым напрамку, супрацоўнічаючы з заводамі - вытворцамі тэхнікі.

На тэрыторыі аграсэрвісу ў Шклове ёсць і станцыя тэхабслугоўвання, дзе можна абслугоўваць як грузавыя, так і легкавыя аўтамабілі.

Аляксандр Лукашэнка ўсё дэталёва агледзеў і падагульніў: "Добрае месца. Трэба толькі інтэнсіфікавацца і ўсё гэта развіваць далей. Каб на гэтай пляцоўцы мы аказвалі не толькі тыя паслугі, што тады (у ранейшыя гады. - Заўвага) аказвалі, а ў тры разы больш".

Традыцыйна Аляксандр Лукашэнка нагадаў аб працоўнай і тэхналагічнай дысцыпліне: "Кожны дзень пераконваюся. І сёння пераканаўся: усё ўмеем рабіць. Умеюць, ведаюць, як трэба. Але не робяць. Гэта вось мы: "рынак, рынак". Распусцілі людзей". Прэзідэнт растлумачыў, што ў гэтым выпадку мае на ўвазе якасць апрацоўкі тых тэрыторый, міма якіх ён часцей за ўсё ездзіць. Кіраўнікі і іншыя адказныя ў сельгасарганізацыях павінны дакладна кантраляваць аб'ёмы і якасць выкананых механізатарамі работ, і ўжо зыходзячы з гэтага плаціць за іх працу.

Другім пунктам рабочай праграмы Аляксандра Лукашэнкі ў Шклове стала тэрыторыя былой мэблевай фабрыкі.

Цяпер разглядаюць варыянт размяшчэння тут новай сучаснай вытворчасці - лёгкіх стальных танкасценных канструкцый. Менавіта яны выкарыстоўваліся пры будаўніцтве ў Мінску гарадской інфекцыйнай бальніцы, якую 30 кастрычніка ўрачыста адкрылі з удзелам Прэзідэнта.

Аляксандр Лукашэнка даў высокую ацэнку гэтай тэхналогіі і арыентаваў на больш шырокае выкарыстанне гэтых канструкцый у будаўніцтве. Для гэтага неабходна пашыраць існуючую вытворчасць. І Прэзідэнт прапанаваў размясціць яе на пляцоўцы ў Шклове.

"Капітальны будынак. Яго трэба прывесці ў парадак і завод зрабіць", - сказаў Кіраўнік дзяржавы аб былой фабрыцы ў Шклове.

Вытворчыя плошчы часткова задзейнічаны і цяпер. Як далажылі Прэзідэнту, імі цяпер валодае прыватная арганізацыя, якая сама па сабе нічога не вырабляе, але ў сваю чаргу здае асобныя памяшканні іншым прыватнікам пад невялікія вытворчасці. Напрыклад, кардоннай упакоўкі.

Аляксандр Лукашэнка даручыў усё ўважліва вывучыць і спраектаваць, навесці парадак як унутры вытворчых памяшканняў, так і звонку.

"Гэта ўсё павінна быць да канца будучага года зроблена. Усе павінны быць мабілізаваны", - даручыў Кіраўнік дзяржавы.

Што датычыцца ўжо існуючых арандатараў, Аляксандр Лукашэнка сказаў: "Калі яны робяць тое, што трэба, няхай робяць. Тут трэба, не крыўдзячы іх, размясціцца. Месца ж хапае. Нікога выганяць не трэба, калі чалавек працуе. Акуратна трэба. Не крыўдзіце тых, хто займаецца справай тут. Кардон купляюць, штампуюць тут нешта. Няхай працуюць. Гэта ж нашы людзi працуюць. Нават калі трэба, давай лепш дапаможам гэтым прыватнікам. Яны малайцы, што працуюць. Таму няхай працуюць, вытворчасці трэба дапамагаць".

Як далажылі Прэзідэнту, агульныя плошчы былой фабрыкі складаюць 5 тыс. кв.м, а пад новую вытворчасць стальных канструкцый трэба толькі 2 тыс. кв.м.

Апорныя канструкцыі, сцены і перакрыцці моцныя, але знешне ўсё вымушае жадаць лепшага. Відаць, што з часоў існавання мэблевай фабрыкі ў рамонт ніхто асабліва не ўкладваўся. Прэзідэнт прывёў у прыклад тое, як у Мінску ўладкавалі пад вытворчыя патрэбы былую тэрыторыю Мотавелазавода. Такім чынам трэба зрабіць і ў Шклове.

"У дзікіх умовах людзі тут працуюць. Зразумела: станок прывёз, паставіў. Няхай працуюць, але тут павінен быць нармальны парадак, павінна быць добрая вытворчасць, - даручыў беларускі лідар. - Вось вам прыватная ўласнасць і вось вам прыклад рынку. Гэта нядобра. І гэта не толькі ў Шклове".

"Проста вы павінны разумець, што не трэба спяшацца ўсё гэта прыватызаваць. Вось прыватызавалі. Што тут змянілася з савецкіх часоў? Горш стала. Вось і ўся прыватызацыя. Прыватнік - ён выціскае для сябе нешта, у яго свае планы: сям'ю забяспечыць або вывесці гэтыя грошы, куды-небудзь схаваць. А ў нас - дзяржава. Мы павінны забяспечыць сваю дзяржаву. Часам думаю: госпадзі, мы ў Беларусі на гэтых камяністых глебах - гліна, пясок - накармілі людзей, $10 млрд экспарт. Украіна ваюе. Я хадзіў па ўкраінскіх землях. Калі б нам такія глебы, як ва Украіне... А ў нас гэтага няма. Таму не трэба спяшацца".

Прэзідэнт звярнуў увагу, што на новую вытворчасць у Шклове хутчэй за ўсё давядзецца прыцягваць спецыялістаў і збоку. Адпаведна, ім трэба прадаставіць арэнднае жыллё. "Калі спецыялісты прыедуць, мы пабудуем ім тут жыллё. Пабудуем для спецыялістаў добры дом", - сказаў Кіраўнік дзяржавы.

Гаворачы аб развіцці Шклоўскага раёна, Прэзідэнт падкрэсліў яго выгаднае размяшчэнне на лагістычных маршрутах паміж усходам і захадам, поўначчу і поўднем. Побач ёсць чыгунка, міжнародныя аўтатрасы, аэрапорты ў Магілёве і Балбасаве. Таму ёсць магчымасць на будучае развіваць існуючыя і ствараць новыя вытворчасці.

"Шклоў - гэта адзін з самых выгадных для краіны вузлоў для жыцця, для вытворчасці. Ідэальнае месца. І, вядома, яно атрымае сваё развіццё", - упэўнены Аляксандр Лукашэнка.

Прэзідэнт падкрэсліў, што яго ўвага да Шклоўскага раёна і стварэнне на яго базе ўзору для рэгіянальнага развіцця абумоўлена не самім фактам, што гэта яго малая радзіма. "Для мяне Шклоў важны тым, што я тут ведаю кожны квадратны метр", - сказаў Кіраўнік дзяржавы.

"Пакажам, які павінен быць раён. І ў далейшым, рабі так, як тут", - сказаў Аляксандр Лукашэнка, маючы на ўвазе запланаваны семінар.

"У бліжэйшы час мы павінны разгледзець пытанні датацый вёсцы. Хопіць вось гэтак выкідваць грошы. І самі не ведаем, куды. Гэта не значыць, што мы скароцім. Можа, нават павялічым грошы для вёскі. Але мы павінны добра разумець, сістэма павінна быць разумнай. Можа, камусьці ўжо і не трэба дапамагаць", - заявіў беларускі лідар.

"Таму што ў сельскай гаспадарцы ўтрыманства ў нас празмернае. Гэта я ўжо бачу. Утрыманства быць не павінна", - падкрэсліў Аляксандр Лукашэнка.

Ён таксама ўказаў на неабходнасць навесці парадак ва ўсіх гаспадарках. "Старшыні райвыканкамаў павінны разумець, што яны ў сваім раёне павінны навесці парадак", - сказаў Прэзідэнт.

Аляксандр Лукашэнка нагадаў Кіраўніку спраў Прэзідэнта Беларусі Юрыю Назараву пра яшчэ адно даручэнне ў галіне сельскай гаспадаркі. Яно датычыцца ачысткі ад зараснікаў і выкарыстання для атрымання кармоў пойменных тэрыторый рэк. Аб гэтым Кіраўнік дзяржавы гаварыў раней у час наведвання Прыпяцкага рэгіёна. Цяпер для апрацоўкі гэтых тэрыторый робяць спецыяльную фрэзу, і гэтыя работы якраз курыруе Кіраўнік спраў.