Дворец Независимости

Палац Незалежнасці

Палац Незалежнасці па праву стаў візітнай карткай Беларусі, эпіцэнтрам актыўнага грамадска-палітычнага і дзелавога жыцця. Тут размяшчаецца рэзідэнцыя Прэзідэнта Рэспублікі Беларусь.

Палац Незалежнасці, які прыняў першых высокіх гасцей 24 кастрычніка 2013 года, знаходзіцца ў паўночна-заходняй частцы Мінска, на адной з галоўных транспартных артэрый - праспекце Пераможцаў.

Будынак гарманічна ўпісваецца ў знакавы для ўсіх беларусаў сталічны квартал: побач з палацам размешчана плошча Дзяржаўнага сцяга, крыху паводдаль - Парк Перамогі, Беларускі дзяржаўны музей гісторыі Вялікай Айчыннай вайны і знакамітая стэла "Мінск - горад-герой".

Пад скляпеннямі палаца праходзяць перагаворы на вышэйшым узроўні, нарады па важнейшых пытаннях унутранай і знешняй палітыкі, сустрэчы Кіраўніка дзяржавы з прадстаўнікамі беларускіх і сусветных сродкаў масавай інфармацыі. Гэты комплекс прымае ў сваіх сценах саміты з удзелам лідараў краін блізкага і далёкага замежжа.

Нягледзячы на тое што Палац Незалежнасці - адзін з самых маладых адміністрацыйных будынкаў у краіне, ён ужо ўвайшоў у летапіс сусветнай гісторыі. У лютым 2015 года тут адбыўся лёсавызначальны саміт "нармандскай чацвёркі". Для ўдзелу ў перагаворах, якія прадаўжаліся больш як 15 гадзін, у Мінск прыбылі палітычныя лідары Германіі, Расіі, Украіны і Францыі.

Палац Незалежнасці з'яўляецца культурным здабыткам усёй беларускай нацыі, таму яго залы па асабістым распараджэнні Прэзідэнта Рэспублікі Беларусь Аляксандра Рыгоравіча Лукашэнкі ва ўстаноўлены час адкрытыя для экскурсій.

Алгарытм дзеянняў для наведвання з экскурсіяй Адміністрацыйнага комплексу "Палац Незалежнасці":

  1. Арганізацыяй (установай) накіроўваецца пісьмо-заяўка на адрас Адміністрацыі Прэзідэнта Рэспублікі Беларусь (г. Мінск, вул. К.Маркса, 38) з пазначэннем складу групы і колькасці чалавек. Наведвальнікі павінны быць старэйшыя за 14 гадоў. Група павінна быць не большая за 50 чалавек.
  2. У пісьме-заяўцы абавязкова пазначаецца прозвішча, імя ўласнае і імя па бацьку кіраўніка групы (адказнай службовай асобы) і яго нумар тэлефона.
  3. Пісьмо-заяўка павінна змяшчаць аформлены спіс асоб, якія жадаюць наведаць Адміністрацыйны комплекс "Палац Незалежнасці". У спісе пазначаюцца: прозвішча, імя ўласнае, імя па бацьку (калі такое ёсць), пасада, чысло, месяц, год нараджэння, даныя дакумента, які засведчвае асобу наведвальніка (серыя і нумар дакумента, дата выдачы і найменне органа, які яго выдаў).
  4. Правільна аформленае пісьмо-заяўка ўключаецца ў чаргу для наведвання з экскурсіяй Адміністрацыйнага комплексу "Палац Незалежнасці".

Будзем рады вас бачыць!

Палац Незалежнасці дэманструе шматграннасць талентаў беларусаў. У метале, дрэве, камені, шкле, тэкстылі і на палатне ўвасоблена багатая духоўна-культурная спадчына беларускай нацыі і перадавыя дасягненні айчыннай інжынерна-архітэктурнай думкі.

Рашэнне пра будаўніцтва адміністрацыйна-прадстаўніцкага комплексу - сімвала суверэнітэту і незалежнасці краіны - было прынята Прэзідэнтам Рэспублікі Беларусь Аляксандрам Лукашэнкам у 2011 годзе.

Пастаўленая Кіраўніком дзяржавы задача была не з простых: у даволі сціслыя тэрміны стварыць унікальную для Беларусі афіцыйную цырыманіяльную пляцоўку, у абліччы і ўнутраным убранні якой павінны гучаць нацыянальныя, культурныя і гістарычныя матывы.

Галоўным архітэктарам Палаца Незалежнасці выступіў Уладзімір Архангельскі.

Пад яго кіраўніцтвам вялікі калектыў прафесіяналаў прадпрыемства "Мінскпраект" і іншых арганізацый скрупулёзна працаваў над фарміраваннем цэласнага вобраза будынка і кожнага яго памяшкання асобна, па-майстэрску ўплятаючы ў элементы дызайну традыцыі і сучаснасць.

Палац Незалежнасці ўяўляе сабой трохузроўневы прамавугольны будынак са старанамі 120 на 140 метраў у стылі постмадэрнізму. Яго агульная плошча — 53 778,6 кв.м.

Строгія фасады выкананы са шкла, металу і высакароднага каменю. Дзяржаўнай сімволікай у выглядзе гербаў упрыгожаны галоўныя фасады, размешчаныя на ўездах з боку праспекта Пераможцаў - вуліцы Арлоўскай, а таксама фасад на ўваходзе з боку Нацыянальнага выставачнага павільёна "БелЭКСПА".

Тэрыторыя, якая прылягае да Палаца Незалежнасці, займае 15 га. Тут размясціліся кветкавая кампазіцыя "Міні-Беларусь", Алея ганаровых гасцей, цэнтральная алея з фантанам, Плошча ўрачыстых цырымоній, прагулачныя дарожкі і малыя архітэктурныя формы.

Для ўнутранай аддзелкі палаца прымяняліся матэрыялы айчынных вытворцаў. Выключэнне складаюць толькі некалькі парод мармуру і граніту.

Інтэр'еры выкананы ў класічным стылі. Адначасова шырока выкарыстоўваецца нацыянальны арнамент, у першую чаргу матывы слуцкіх паясоў. Традыцыйныя беларускія ўзоры прысутнічаюць у многіх элементах інтэр'ера, яны лёгка пазнаюцца ў мармуры, метале, мазаіцы, мастацкім роспісе сцен і столей.

Унутраная прастора будынка напоўнена дзённым і штучным святлом. Усе люстры і бра ў палацы вытворчасці лідскага ЗАТ "Каскад", па ўзроўні складанасці і майстэрства яны не ўступаюць работам вядомых чэшскіх і італьянскіх вытворцаў.

У стварэнні ўтульнай атмасферы залаў і холаў палаца ўдзельнічалі вядомыя далёка за межамі краіны беларускія мэблевыя кампаніі: ЗАТ "Холдынгавая кампанія "Пінскдрэў", ААТ "Бабруйскмэбля", ЗАТ "Маладзечнамэбля", ААТ "Гомельдрэў".

Асноўныя прадстаўніцкія функцыі Палаца Незалежнасці маюць каля двух дзясяткаў залаў, дзе праходзяць важнейшыя сустрэчы, саміты, нарады і даклады.

На трэцім паверсе размяшчаецца Музей падарункаў. Гэта сапраўдная скарбніца, якая захоўвае некалькі соцень падарункаў Прэзідэнту Рэспублікі Беларусь ад замежных калег, высокапастаўленых палітычных дзеячаў, дэлегацый, дыпламатаў, сусветна вядомых персон, выдатных спартсменаў, а таксама ад радавых беларусаў-суайчыннікаў і працоўных калектываў краіны.

Дзесяць фактаў пра Палац Незалежнасці:

  • 24 кастрычніка 2013 года адбылася афіцыйная прэзентацыя Палаца Незалежнасці Рэспублікі Беларусь.
  • Агульная плошча будынка – 53 778,6 кв.м.
  • Тэрыторыя комплексу - 15 га.
  • Палац быў пабудаваны за 30 месяцаў замест запланаваных 58.
  • Зала ўрачыстых цырымоній Палаца Незалежнасці вышынёй 18 м і плошчай 3,5 тыс. кв.м з'яўляецца самай вялікай у Рэспубліцы Беларусь.
  • Дыяметр самага вялікага герба ў палацы - 5,5 м, яго вага дасягае амаль 1,5 т.
  • Зала ўручэння дзяржаўных узнагарод - адзіная ў палацы, у якой няма прамога дзённага асвятлення.
  • Сярод аўдыторый палаца самую незвычайную форму - амфітэатра - мае Універсальная зала.
  • 150 відаў экзатычных раслін прадстаўлены ў Палацы Незалежнасці.
  • Скляпенні Зімняга саду палаца маюць асаблівую акустыку: дзякуючы архітэктурнаму рашэнню тут нават самы ціхі гук набывае незвычайную сілу і выразна чутны па ўсім перыметры памяшкання.